الثلاثاء، فبراير ٢٦، ٢٠٠٨

حركة 7 مارس


السادة زوار المدونة الافاضل
يشرفني ان ادعوكم للانضمام الي حركة 7 مارس . تلك الحركة التي انتظرها الكثير . تلك الحركة التي انشئت لتثبت للجميع ان ما زال هناك امل في التغيير والاصلاح وانه مهما كانت المصاعب التي تواجهنا فما زلنا نملك القدرة والارادة علي تذليلها وقهرها . تلك الحركة التي ولدت من رحم المعاناة والالم . تلك الحركة التي خرجت لتؤكد للجميع ان شباب وبنات الاخوان كفاءات . تلك الحركة التي انشئت لترد علي المشككين والمغرضين
حركة 7 مارس هي "حركة" اي انها مضادة لاي ركود او جمود وهي "سبعة" اي انها رقمية فهي منضبطة زمنا وسلوكا وهي"مارس" وكلكم يعرف مدي ارتباط شهر مارس بالحركات الاصلاحية فهناك "9مارس" مجموعة استقلال الجامعة وهناك"20 مارس " وكانت الغطاء الاعلامي والحركي للاشتراكيين الثوريين في فترة من الفترات وهناك"21مارس" عيد الام
حركة 7 مارس "حسم" هكذا كان اختصارها فالحاء من "حركة" والسين من"سابعة" والميم من "مارس" فهي "حسم" للكثير من الامور المعلقة وهي" حسم" لانتهاء مرحلة والانتقال الي مرحلة اخري وهي "حسم"لاشاعات المغرضين والمشككين
حركة 7 مارس يشرفها ان تدعوكم لحضور احتفالية تدشينها وتوقيع البيان التأسيسي لها يوم الجمعة الموافق 7مارس 2008 من الساعة الثالثة الي الساعة الخامسة عصرا بمسجد الارقم بمدينة نصر
نسيت اقولكم "حركة سابعة مارس " هي موعد عقد قران" مجدي" اللي هو انا علي "هي" سابقا "اسماء "حاليا والعقد هايكون في مسجد الارقم بمدينة نصر من الساعة تلاتة للساعة خامسة والدعوة عامة وهاتبقي لمة
دعوات خاصة
أهالي ابطالنا في العسكرية
دعوة خاصة جدا لكم واعلموا اننا "اسماء- مجدي" كنا في غاية الحرج منكم ونحن نفكر في الاعلان عن فرحنا وانتم في هذا الظرف العصيب ولكننا تمنينا ان يكون حضوركم لفرحنا هو تخفيف لكم واعلموا ان حضوركم سيثلج صدورنا وان فرحنا بدونكم لن يكون فرحا واننا في غاية الاشتياق لحضوركم ويسعدنا جدا وجودكم واود ان اخص بالذكر "سعد الشاطر والعائلة الكريمة - معاذ مالك والعائلة الكريمة - اسماء ياسر والعائلة الكريمة - السيدة الفاضلة زهراء الشاطر وعائلة المهندس ايمن عبد الغني - معاذ احمد شوشة والعائلة الكريمة - عبدالله صادق الشرقاوي والعائلة الكريمة - الدكتور احمد عبد العاطي وعائلته الكريمة - الدكتورة امل غلوش زوجة الدكتور محمد حافظ والعائلة الكريمة وكل عوائل ابطالنا المحالين للعسكر وفرحنا الكبير يوم خروج هؤلاء الابطال من سجون العائلة المستبدة ال مبارك بأذن الله
المدونون وزوار المدونة
ليا طلب خاص عندكم وهو ان نفسي اشوفكم . اتواصلنا كتير عبر الانترنت ومن خلال التدوين والتعليق لكن ينقصنا ان نري بعض وهذه دعوة لكل مدون ولكل زائر ولكل معلق بالحضور يوم 7 مارس
البناتيت اصحاب اسماء
من حكاويها عنكم وعن اعداد حضوركم فكرت بشكل جدي ان احجز الصالة المغطاة بتاعت استاد القاهرة بس منفعش فحجزنا القاعتين بتوع مسجد الارقم وطبعا "اسماء" اخدت القاعة الكبيرة وانا اخدت القاعة الصغيرة فعارفين لو مجيتوش بالعدد اللي قالت عليه اسماء هاتبقي مشكلة لا يعلم مداها الا الله
شباب جامعة القاهرة
شكلي هايبقي زي ......... لو بعتوني ومجيتوش وبعدين ميصحش ان شكلنا يبقي وحش قدام البنات وخاصة منظري قدام العروسة ويا شباب جامعة القاهرة انا يا رجالة هلعب برة ارضي " الفرح في مدينة نصر" وكلي امل ان احنا نثبت لجامعة الازهر وعين شمس ان رجالة جامعة القاهرة هايفضلوا ورا راجلهم ولو رايح اخر الدنيا
رجالة الثقب الاسود
وعلي راسهم القصاص ابو قلب كبير اللي جابني وادالي كل خبراته عن يوم العقد وظبط معايا كل تفاصيل اليوم ووزع كافة المهمات علي اعضاء الثقب الاسود (اسلام"اختيار البدلة"-منعم"التغطيةالاعلامية"- مصطفي"الدعم الفني"-حسن علي"مش عارف هايعمل ايه")
انوس وشباب اسكندرية الجدعان
انوس اللي هو اوسو اوسو اللي انس القاضي نسختي الاسكندراني ومعاه كل شباب اسكندرية المخربشين " اسلام عبحميد - الصعيدي - الحداد والدعوة موصولة لكل الاسكندرانية الجدعان "
ابو عمر "باسم الشربيني"
باسم الشربيني اللي هو ابو عمر السوداني ممثل الحركة في السودان الشقيق وعائلته الكريمة ونرجوا منه ابلاغ اعضاء الحركة هنالك " حيدر - حافظ - سنوسي )
_____________________________
وفي النهاية بحب افكركم مرة تانية بميعاد الفرح
الجمعة 7 مارس من الساعة تلاتة للساعة خامسة بمسجد الارقم اللي في مدينة نصر "متفرع من شارع مكرم عبيد " والبنات في قاعة الصفا والولاد في قاعة المروة وعقبالكم جميعا ورجاء خاص الشاهد يبلغ الغايب والكل معزوم واحضر سجادة معك ويوجد اماكن للنساء وهدايا للاطفال
ويلا مش مهم

الأربعاء، فبراير ٢٠، ٢٠٠٨

محاولة للتدوين

بقالي كتير مدونتش والسبب الرئيسي هو اني بعاني من فتور تدويني غريب والسبب الفرعي اني مشغول جدا في عملي . عندي افكار كتير ومواضيع كتيرة بس كل ما اقعد علشان ادون مقدرش .
يمكن الفتور ده جالي من احساسي بالمرارة من الاحداث اللي بتدور حوالينا يعني حصار غزة واللعبة القذرة اللي لعبها النظام المصري بتشويه الفلسطينين وحماس ودفعه للمحجوبيين "ديوله في الاعلام والصحافة " بشن حملة كراهية وتشويه لكل ما هو فلسطيني واثارة النعرة المصرية عن طريق تضخيمه لاحداث جرت علي الحدود مع غزة وتصوير الموقف علي انه احتلال فلسطيني لارض مصرية واعتداءات من الفلسطينين ناكري الجميل علي جنودنا البواسل ده اول امر


وتاني امر هو تحديد جلسة النطق بالحكم في المهزلة العسكرية وهاحكيلكم حكاية من 13 سنة في 95 كانت المحكمة العسكرية الاولي وساعتها رحت جلسة النطق بالحكم ووقفت برة المحكمة لان الكل اتمنع من الدخول ولما خرج الحكم مكنتش عارف اعمل ايه بس اللي انا فاكره ان كل الحضور جري وكسر كل الحواجز اللي كان عملها الجيش وحاول يدخل علشان يسلم علي الاخوان لولا قياداتنا من كبار الاخوان اللي وقفت في وسط الناس ونادت باعلي صوتها وجمعت الشباب ووهديت الناس وانصرفنا وكنت مضايق جدا لعجزي عن فعل شئ ودلوقتي بجد مش عارف ده صح ولا غلط يعني صح ان احنا نسكت ونتجاوز ونكمل طريقنا المعتاد ولا نتحرك بقوة طيب لو اتحركنا هايجيب نتيجة ولا هاتكون الخسائر كبيرة بجد مبقيتش عارف هو الاخوان خدوا علي كدة واصبحوا مازوخيين "بيتلذذوا بالاضطهاد " ولا فعلا هو ده البديل الانسب للمرحلة الحالية ولا في حاجة تالتة مبقيتش عارف . تالت حاجة هي حالة التعتيم الغبية اللي عايشاها الصحف والمسارات الاعلامية تجاه القضية يعني المصري اليوم قومت الدنيا ومقعدتهاش علشان اتنين محبوسين جنائي في سجن طنطا وفي شبهة ظلم واقع عليهم وعلي الناحية التانية حدث بقيمة واهمية تحويل قيادات فصيل سياسي الي المحاكم العسكرية وتحديد جلسة للنطق بالحكم بعد ساسلسة من المهازل سميت بجلسات المحكمة ولا يوجد اي اهتمام وقس علي ذلك معظم الابواق الاعلامية الموجوجة في بلدنا المحتل من نظام لا اجد اي وصف يعبر عن حقيقته

كل ده بيدفع الفرد الي القرف وسدة النفس والانعزال واحنا بشر فبنحس باللي بيحس بيه البشر فيمكن علشان كدة جاتللي حالة الفتور التدويني دي

النهاردة الفجر
رسالة جاتللي الساعة 5 صباحا من عبده ابن خلدون بيقوللي فيها نسالكم الدعاء علشان امن الدولة في البيت دلوقتي بيعتقل بابا فبعتله رسالة مقتضبة مش فاكر فيها ايه بس كتبت فيها جملة مملة ومكررة جدا
خالد حمزة
اتقبض عليه الفجر وتم اختطافه من سيارته في احد شوارع القاهرة واللي مش عارف خالد حمزة وعاوز يعرفه يروح يشوف "اخوان ويب " موقع الاخوان باللغة الانجليزية وهو يعرف مين خالد حمزة ولو عاوز تعرفه اكتر بص علي حجم الاعمال الاعلامية والحقوقية اللي تمت بشأن المحكمة العسكرية وانت تعرف مين هو خالد حمزة لانه هو مهندس كل هذه الاعمال ولو عاوز تعرفه بجد قابله واقعد معاه ممكن تستغرب منه او تخاف من طرحه او تقلق من ثوريته ورغبته في التغيير والاصلاح الداخلي وممكن تندهش من قدرته علي رؤية الاحداث بمنظور مختلف غير معتاد بس لما تقعد تفكر في ما طرحه ستجد انك تحتاج الي رؤيته . كفارة يا باشمهندس خالد
ويلا مش مهم

الاثنين، فبراير ٠٤، ٢٠٠٨

بنحبك يا ابو تريكة

نادي الهلال بغزة اقام احتفالية تحت عنوان بنحبك يا ابو تريكة احتفاءا بالنجم محمد ابو تريكة ردا علي رفعه لقميص ابيض مكتوب عليه جملة تعاطف مع اهل غزة



دول اطفال غزة شايلين لوحات تأييد لابو تريكة


بحبك يا ابو تريكة

ويلا مش مهم