السبت، مارس ٢٢، ٢٠٠٨

صور الفرح يا معلمين

انا ... العريس طبعا ولابس القميص البربل والكرافت البربل ومحدش يسالني يعني ايه بربل لاني مش عارف الحكاية وما فيها ان قبل الفرح باسبوع اسماء جات قالتلي ابقي هات القميص والكرافت لونهم بربل وبما انني رجل شرقي عيب يظهر قدام المدام بتاعته بمظهر اللي مش عارف شئ ما حتي ولو كان البربل فقلتلها خلاص ماشي نجيبه بربل وكأن البربل ده باكله علي الفطار كل يوم وطبعا كل ما اقابل حد اساله يعني ايه بربل فيطلع مش عارف لغاية لما اسلام لطفي قاللي تعالي اجيبلك البربل ونزلت معاه عباس العقاد واشترينا اتنين بربل واحد قميص وواحد كرافت وعقبال ما يجيب كل واحد منكم البربل بتاعه


دكتور عصام وهو بيقول كلمته وكانت اربع نقط الاولي اشادة بطبيخي والبيض ابو بسطرمة الجبار اللي انا بعمله وطبعا هو عرف القصة دي من اخر حبسة لاننا كنا في زنزانة واحدة وكنت انا مسؤل الخدمة وكان الدكتور عصام احد افراد المجموعة بتاعتي "عجبت لك يا زمن" وتاني نقطة كانت عن الهدف الاسمي من الزواج واعمار الارض والتالتة كانت مقارنة بين نظم الزواج في الاسلام وباقي النحل والملل "حلوة النحل والملل دي " والرابعة والله ما فاكرها



حبيبي الدكتور محمدي اللي شردلي وكشف ما كان بيني وبينه وعلشان تعرفوا الراجل ده قاسي معايا قد ايه هاحكيلكوا حكاية من حوالي تلات سنين الاخوان حطوني في اسرة نقيبها الدكتور محمدي وكان هدف الاسرة الاول والاخير هو تزويجي والراجل مقصرش معايا خالص مرة بالهداوة ومرة بالعقل ومرة باللين وفي الاخر قاللي بص يا مجدي انا عاوزك تمشي في الشارع كل يوم لمدة ربع ساعة وتقول" انا معنديش مشكلة- انا قادر علي الزواج "وبعدها هتلاقي نفسك اتجوزت مباشرة وفعلا بعدها مباشرة اتقبض عليا وما زال الدكتور مصر علي ان زواجي الان هو نتاج تلك الوصفة السحرية





الدكتور رجب بيقول وحمايا بيقول وراه " علي فكرة احنا كنا بنلعب رست دققوا كدة في الصورة "


الدكتور رجب بيقول وانا بقول وراه " ما زال ماتش الرست شغاليا ريت تدققوا اكتر في الصورة "


الماتش خلص والروح الرياضية مسيطرة علي الاجواء وطبعا الدكتور رجب مش موجود





من علي اليمين " انس القاضي اللي هو اوسو اوسو " وبعدها انا وبعدها القصاص " القلب الكبير والاب الروحي لكل اعزب اخواني " وبعدها منعم " رويترز الاخوان ومسؤل الملف الاعلامي بحركة 7 مارس "


اللهم صلي علي النبي - نبدا من اليمين من فوق (علي زلط وبعدها محمد سيد "ابويا الروحي" ووراهاحمد اسامة وجنبيه اسلام ابو الفتوح ووراه احمد سباعي وبعدين انا وبعدين عمرو اشرف وبعدين منعم وبعدين حسن علي وبعدين محمد عثمان )

قدامي مباشرة ابراهيم العريان وجنبيه علي طول احمد الجعلي وقدامه دوغري محمد حمزة وعلي يمينه محمود قطب وابو نضارة شمس تخوف ده بلال النواوي وعلي شماله وائل فوزي قبل ما انسي في واحد طويل قوي ورا ده ابراهيم الشرقاوي



من علي اليمين احمد عبد المحسن " المخ" وبعديه سامرعلي وبعدين محمد غزلان وبعدين انا وبعدين انس "اوسواوسو"

اللي في الصورة دي من علي اليمين اسامة عبد المنعم صاحب اجمل ابتسامة في صفوف الاخوان وبعديه الحاج ابراهيم ربيع وبعديه احمد عبد الجواد "اجدع ساب اخواني "وبعديه انس غزلان "صديق العمل المناكف" وبعديه انا وبعديه محمد سعيد "الراجل السكرة " وبعديه المهندس الزين "زينة اخوان اسماعيلية وبعديه ابنه وطبعا اللي واقف قدام خالص ده محمد عثمان "مانا"قبل ما انسي صحيح في واحد طويل واقف ورا خالص ده ابراهيم الشرقاوي


نفس المجموعة اللي فاتت بس سيت اقول حاجة كل دول كانوا مع بعض في الحبسة الاخيرة في عنبر تلاتة مزرعة طرة وربنا يزيد ويبارك

يا مسهل الحال يا رب - من اليمين فوق بلال النواوي وبعديه النجم مصطفي محمود وبعديه عمر الطموح وبعديه ابراهيم الشرقاوي وبعديهابراهيم العران واسلام ابو الفتوح واحمد السباعي واحمد حسن ومحمود قطب ووائل فوزي وعلي الارض تقي وعمير سامح البرقي اولاد اختي والمعلم احمد رفعت لبو تي شيرت اسود وابو سويت شيرت ابيض مش عارفه بس جزاه الله خيرا علي الحضور





الأحد، مارس ٠٩، ٢٠٠٨

شكر وعرفان ودعاء


"جزاكم الله خيرا"
لا اجد اي كلامات اخري تعبر عما يجيش في صدري وصدر اسماء


فشكر لكل من حضر او اتصل او ارسل برسالة تهنئة
وحمد لله علي اتمامه لنعمته علينا
ودعاء من القلب لكل الشباب والبنات بسرعة الزواج
وانتظروا قريبا صور واحداث يوم 7 مارس " الفرح "

ويلا مش مهم