الاثنين، يناير ١٥، ٢٠٠٧

مواطن مصري صالح


مواطن مصري صالح
فعلا انا بقيت مواطن مصري صالح
من الشغل للبيت ومن البيت للشغل
اخر النهار بيبقي اقصي تطلعاتي ومنتهي احلامي هي
اخرج رجلي من سجنها " الحذاء"واحطها تحت المية الباردة
وحد ياخدني من ايدي ويوديني للمكان اللي بنام فيه
وبعد ما انام حد ياخد من ايدي الكتاب اللي كنت بحاول اقرا فيه
قبل ما انام
(استبدلت الكتب بقصص احمد خالد توفيق ونبيل فاروق علشان مفيش مساحة في دماغي للتفكير )
مفيش اي نشاط اخر غير الشغل
مفيش اي اهتمامات غير الشغل
مفيش اي اتصال بحد غير الناس اللي مرتبطين بيا في الشغل
فعلا بقيت .. مواطن مصري صالح
المواطن المصري الصالح هو النموذج السائد في المجتمع المصري
وصفات صلاح هذا المواطن هي كالاتي
بيقضي اكتر من 12 ساعة في شغله
ما بيقراش جرايد اللا اهرام الجمعة علشان اعلانات الوظايف وصفحات الرياضة
بيتفرج علي تمثيلية الساعة 8 ده كان قبل الدش والوصلات
واصبح الان بيتفرج علي تمثيلية 8و10 و12و وبيختم بفيلم علي ال ا ر ت افلام
او الام بي سي 2
بيشجع كل المعترضين علي الاوضاع بس امام التليفزيون
اما في الشارع فبيلعن كل المتطاهرين لتعطيلهم المواصلات وتاخيرهم له عن شغله
بيتصل كل يوم قبل ما يروح علشان يسال زوجته عن طلبات البيت
وهي تجاوب زي كل يوم " عاوزين لبن وفينو وما تنساش الجبنة البيضة "وبس
مفيش حوارات او نقاشات بينه وبين زمايله في اماكن العمل الا عن الرياضة والجنس والفضايح وسب في اصحاب العمل او المديرين
ما لوش اي نشاط اجتماعي او سياسي او تطوعي
وبيعتبر كل الفاعلين في تلك الامور عقلهم ضارب او عالم فاضية ما ورهاش مسؤليات
وبما اني بعمل اكتر من سبعين في المية من هذه الافعال فتقدروا تقولوا علي اني اصبحت
مواطن مصري صالح
انا اسف
انا اسف يا دكتور/ ......... ( اسم نقيب اسرتي الاخوانية مقدرش اقول اسمه علشان ما خدتش اذنه) لاني محضرتش الاسرة اللي فاتت ولاني لو حضرت الاسرة اللي جاية مش هاكون محضر اي حاجة من المنهج ولا حافظ اي اية من السورة المفروض نحفظها وعوضك علي الله
ملحوظة مهمة ..الاسرة الاخوانية هي اللقاء التربوي الملزم لكل افراد الجماعة وتتكون من اربعة الي ست افراد بالاضافة للنقيب واهدافها الرئيسية هي التاخي والتكافل والتفاهم بين افرادها وكذلك هي المسار الرئيسي والرسمي لافراد الاخوان في التعرف علي رؤي وقرارات الجماعة

انا اسف يا اوسو اوسو
"صاحبي انس القاضي" لاني في اخر اتصال بيك عرفت انك عملت حادثة خفيفة بالعربية وما قدرتش اعمل معاك حاجة غير اني اتصل بيك واطمن عليك من خلال صوتك ومقدرتش اروحلك اسكندرية


انا اسف يا عمرو الطموح لانك كل ما تدخل علي النت تكلمني عبر الماسينجر وانا اطنشك وما ردش بس صدقني غصب عني انا ما بكونش علي مكتبي الا دقايق معدودة وباقي الوقت سارح في الشركة وقاعد في اجتماعات ومقابلات


انا اسف يا دكتور احمد عبدالله لانك طلبت مني مجلة التايم علشان مقالة البلوجرز وتاثيراتهم لانك مساف مؤتمر في اسبانيا ومحتاج تحضر ورقة حول هذا الامر .بس صدقني انا اتصلت بكذا واحد علشان اجيبلك المجلة او المقال ووصلت لواحد بس ما تابعتش معاه وعلي العموم خيرها في غيرها


انا اسف يا رجلي
لاني بحس بصرخاتك وانينك من ضغط الجزمة عليكي طوال النهار واستخدامي ليكي المستمر والقاسي في الحركة طوال اليوم في الشركة او في شوارع مصر وعارف طلبك ليا ببتغيير الجزمة الجلد للصندل او حذاء رياضي بس انت عارفة اني لازم البس رسمي وعليه لازم البس الجزم الجلد فاستحمليني الشهر ده واوعدك اني هالبس كل اللي انت عاوزاه او امشي حافي علشان ترتاحي


انا اسف يا ابن خلدون لاني ما قريتش تدوينتك الاولي بعد ما وعدتك اني هاقراها وارد عليك بس صدقني انا مضغوط جدا جدا جاد وعلشان اصالحك انا اشتريتلك كتاب رحلة ابن خلدون اصدار اخبار اليوم والكتاب هايعجبك جدا فكرني لما اقابلك اجيبهولك معايا

انا اسف يا زوار المدونة
في فرضي عليكم قصة حياتي المملة والرتيبة طوال 12 يوم وعدم اضافة اي تدوينة جديدة طوال تلك الفترة بس فعلا انا معنديش اي مساحة دهنية خالية تسمحلي افكر او اكتب او ابدع وعلي فكرة انا عندي علي المكتب اربع تدوينات مكتوبين بس عاوزين يتشطبوا ويتنسقوا وفعلا معنديش وقت اعمل كدة فسامحوني لغاية اول شهر اتنين


انا اسف يا سيد دوجلاس
لاني ما بعملش الواجب اللي انت بتدهولي وما بحفظي الكلمات المطلوبة مني وكمان بروحلك متاخر عن الميعاد بحوالي نص ساعة بس صدقني علي اول شهر اتنين هاعملك كل حاجة


انا اسف يا امي
لاني ما بشوفكيش الا نادرا لدخولي البيت كل يوم بعد الساعة اتناشر صباحا وبنزل الساعة تمانية صباحا وباليل بتكوني نايمة والصبح بتكوني نايمة بس ما تزعليش انا علي اول شهر اتنين هتلاقيني برجعلك علي الساعة عشرة وهاقعد معاكي بس انت ادعيلي ان ربنا ييسر الامور اليومين دول

الصلح خير
زوار المدونة الكرام علشان اصالحكم فان شاء الله ترقبوا في خلال ايام مقالة حصرية للاستاذ محمد احمد الراشد لم تنشر من قبل ومقالة جامدة جدا وجديدة جدا وغريبة جدا حصلت عليها بمعجزة وهارفعها علي المدونة قريبا جدا
ويللا مش مهم

هناك ١٦ تعليقًا:

غير معرف يقول...

يا عام خلاص
ماتزعلش أوي كده
دي مصر 95% منها كده


بس انت مش لايق عليك الجو ده

وانا رأيي إن التوازن حلو ومطلوب ومش مستحيل

ابقى إتأسف لرجلك في الآخر بعد الناس
ويجعله عامر

عمرو طموح يقول...

يا عم متزعلش كده... و بعدين بقي انت مش المفروض تعتذرلي بالعكس، انا المفروض أشكرك، لأني أساسا غلطان إني داخل علي النت في أيام الامتحانات اللي هي المفروض ابقي بذاكر فيها.... و للاسف بقضي معظم وقتي علي النت.

بس أنا فعلا... مش عاجبني (الهم)اللي حاسه في كلامك... روق كده، و فك.

و علي أول شهر اتنين (اللي هو انت موضحتش ايه اللي هيحصل فيه، كأنك هتاخد إفراج وللا حاجة) إن شاء الله يكون عندك وقت تروح في الحتت اللي انت عاوزها، و تعمل الحاجات اللي انت عاوزها... و يكون عندك مساحة (دهنية)للتفكير و التدوين و الإبداع، و مساحة وقتية لعمل كل ما تريد.

و في انتظار مقالة الراشد.

ربنا يفرج همك، و يسعدك، و يقدملك اللي فيه الخير، و يجعل حياتك أحسن من حياتي.

واحد من الإخوان يقول...
أزال المؤلف هذا التعليق.
واحد من الإخوان يقول...

والله كلامك من الأخر

وقلت اللي الواحد عاوز يقولوا

والخوف للزمن يعدي ونقعد زي عاوجيز الفرح

يلا
إحنا كنا فين وبقينا فين

زمن

كلها كام سنة ونتطلع معاش

ونبقى نتفرغ للعمل العام

اهو حتى الريس يكون فضيلنا شوية ساعتها

بسيطة


بس مش واجب كنا إتجوزنا في الهيصة دي ؟؟؟

ما لناش نصيب

خليها دي كمان بعد المعاش

اسيبك عشان رايح التأمين الصحي

هههههههههه

محمد حمزة

احمد سمير يقول...

مواطن اخوانى صالح
مبروك يا مجدى على المدونه ومبروك على انك بقيت مواطن اخوانى صالح .. فالاخوان عندهم مشكله .. ان احسن مواقع على النت تلاقيها للاخوان لكن نادر جدا تلاقى لواحد منهم مدونه بيعبر من خلالها عن رايه الشخصى او ذاته .. فيه ناس فاكره ان ده بسبب ان البعبع اللى اسمه الاخ المسئول هو السبب وده مش حقيقى المشكله فى الهوس الأمنى والخوف مع ان كلكم معروفين اساسا اعتقد انك بالمدونه دى بتقول انا لها على راى محمد احمد الراشد وبترفع للحق رايه ومن نفسك من غير ما يتقال لك ان دورك كذا وحنتقابل فى المعاد الفلانى نشوف الاخ مجدى عمل ايه
مبروك مره تانيه على المدونه وانت واحشنى والله
أحمد سمير صحفى بالدستور ..

غير معرف يقول...

مشكلة الحياة في مصر انها بتدفع البني ادمين انهم يدخلوا في الساقية وميطلعوش منها الا على القبر عدل ممكن يقف يعمل شوية حاجات انما لازم يرجع الساقية تاني ويلف اسرع عشان يعوض الفترة اللي وقفها
مش عارف دا وضع سياسي وللا هما اللي عايزنا نفضل كدا حتى منفكرش غير في اليوم الجاي هنعمل ايه في الساقية
المهم يابو مجدي كفاية كتابة كدا ويلا لف معايا احسن عم عوض جاي بالكرباج .

mashi_97 يقول...

واضح أنك مواطن صالح جداً
:]
استمعت جداً بقراءة تدوينتك وزيارة مدونتك
وفي انتظار مقال الشيخ الراشد
بالتوفيق

غير معرف يقول...

السلام عليكم
النموذج ده فعلا الى هو المواطن المصرى الصالح اللى بتقول عليه يبقى ابويا وعمى وخالى وخالتى وكل الجيران والقرايب .الشعب المصرى كله بقى نسخه واحده كله ملوش دعوة بالتانى كله فى فى اللى هو فيه بيشتكى من الاوضاع والمشاكل؟ بيشتكى بس بيشتكى على استحياء تقولش المشاكل ده تخص واحد تانى متخصهوش هو
فعلا احنا عندنا سلبيه رهيييييييييييييبه
شايفين المشاكل وساكتين وفعلا عندنا قدرة رهيبه فى التكيف
بنتكيف على كل الاوضاع وعمرنا مانقول لا ابدا
واللى يمشى عكس التيار ده يبقى بيحب المشاكل ومش عايز يعيش بسلام
انا متهيالى انى لو مكنتش من الاخوان اللى اول مبدا ليهم اصلح نفسك وادعو غيرك كان ممكن زمانى كنت انتحرت .
بس انا ملاحظه فى نفسى دلوقتى انى بقيت ابقى بردو مواطنه مصريه صالحه
انا خايفه ابقى كده انا خايفه انى اتعود ماتكلمش ولا يكون ليا اهتمامات غير المذاكرة والشغل وكده

بس فعلا يا استاذمجدى انت صعبان عليا ووالله صعبان عليا نفسى بردو
ربنا يكرمك ويفك كربك ولا يخليك مواطن صالح مهما حصل

غير معرف يقول...

الحقيقة يا أستاذى أنت الى أخترت تحيط نفسك بالناس دى ,اه هما ممكن يكونوا غالبية فى مصر بس ليه تحط نفسك وسطهم فى الف شغل ممكن تشتغلة يكون جوه أنقى من كده عارف يا أستاذ مجدى فكرتنى بأيه ,كأنك دخلت قاعة كلها مدخنين يأما تغير فيهم يأما تخرج تشم هوا نظيف عشان صحتك متتعبش ومتضيعش وقتك لو مفيش فايدة.....

الأمين المساعد الثانى

ياء يقول...

ولا يهمك

المهم انك بخير

وظروفك دى ظروف اى مواطن صالح


بس مطولش على دا الحال عشان الدعوه مش عايزه حد يريح دلوقتى

غير معرف يقول...

مواطن صالح وبيحضر أسرة إخوانية؟!! كيف يتم حل هذه المعادلة
يا استاذى الفاضل الإخوان كما صرح سيادة رئيس الجمهورية خطر على أمن مصر وبالتأكيد لن يكون المواطن المصرى صالحا إذا كان منتميا لمثل هذه الجماعة!!!

على اى حال مبروك إنك بقيت ا. مجدى برتبة مواطن صالح ويارب بكرة نشوفك برتبة وزير صالح، يا عااالم ليس هذا على الله ببعيد

ولما نشوف ايه الحدث المحورى اللى هيحصل فى شهر فبراير ده وهيخليك تفضى شوية يا مسهل يا رب.

بالمناسبة شباب طب الصاعد الواعد انهى بالأمس امتحاناته التاريخية وبيخطط لانطلاقة بكره فايه نظامك؟؟ فى انتظار الرد

غير معرف يقول...

وبكده يبقي حققنا الهدف القومي لمصر كل واحد مشغول باكل عيشه و مش لازم اخوان و لا سياسه اصلا
ومستنينك من اول فبراير علشان يناير شعبولا حاجزه :)
سلام يا جميل وابقي بص علي بوست عيد ميلادك سايبلك تهنئة متاخره شويه
و

إبـراهيم ... يقول...

حلو قوووي يا مجدي ... مصادفة حلوة خلتني أعدي على مدونتـك تاني


إنتا فين صحيح ؟؟؟؟


طبعًا إنتا كده بقيت من المرضي عنهم !!!


مش عارف أقول لك إيه ؟!؟!؟!

محمود سعيد يقول...

لازم تتصرف وتشوف لك حل فى هذه الحالة الخطيرة ومتسكتش على نفسك

انا عانيت منها لما كنت شغال فى القاهرة من الشركة للسرير ومن السرير للشركة

الحمد لله انا رجعت لحياة الطلبة وبأقرأ وادون واسمع واحضر وكل حاجة بس للأسف بذاكر :(

koukawy يقول...

نسيت تقول ان المواطن الصالح ده بيرجع البيت بالبطيخه و الجرنان تحت باطه 00
lol
ياهههههههههههههههه
بيصعب عليا اوي المواطن الصالح ده

عمر عاشق القرآن يقول...

مواطن صالح
لا كمان ناقص انك تدخل سينمات و مسارح و ياريت كباريهاات

و يا سلام بقى لو شقق دعارة
ساعتها ممكن يضموك للحزب الوطنى و ممكن كمان يرشحوك فى مجلس الشعب نائب صالح زى نواب سميحة كده