الأربعاء، يناير ٠٢، ٢٠٠٨

تلاتين سنة - كل سنة وانا طيب


بكرة الجمعة 4-1-2008 هو يوم ميلادي الثلاثين

انا بقي عندي تلاتين سنة , تخيلوا انتوا لاني مش قادر اتخيل اني بقالي في الدنيا دي تلاتين سنة

بجد في حاجة غريبة

انا مكنتش فاكر اصلا

بس في الشركة قالوليلي عاوزينك تبقي موجود يوم السبت علشان هانحتفل بعيد ميلادك فافتكرت ان انا كدة بقالي تلاتين سنة
وافتكرت التدوينة بتاعت السنة اللي فاتت اللي كتبتها في يوم ميلادي التسعة وعشرين"كل سنة وانا طيب " لو قريتوها هتلاقوا كل حاجة عني مكتوبة فيها يعني هتلاقوا "وصف تفصيلي ليوم ميلادي وسبب تسميتي بمجدي " وهتلاقوا "طفولتي كان شكلها ايه " وهتلاقوا " ظروف تعرفي علي الاخوان " وهتلاقوا " حاجات تانية كتير " لكن اهم حاجة فيها هي "امنياتي للسنة الجديدة" اللي هي بقت سنة قديمة وايه فيها اللي اتحقق وايه اللي لسة

بصوا انا هانقل امنياتي بتاعت السنة اللي فاتت كما هي وهاقولوكوا ايه اللي احصل فيها ماشي

امنيات السنة اللي فاتت

امنيات " مجدي " حاجات بسيطة خالص "دي بتاعت 2007"
تحقيق حالة نجاح في حياتي العملية لتعويض ما سبق وتاكيد الثقة في نفسي
بفضل الله قدرت احقق حالة النجاح تلك والامور تسير من حسن الي احسن بس ده طبعا جه علي حساب حاجات كتير منها نشاطي واعصابي وعلاقاتي الانسانية ودي اكترحاجة مضيقاني ومزعلاني لاني قصرت مع ناس كتير جدا حتي الاتصال التليفوني مش بعمله وكمان ساعات مش برد علي كل الاتصالات التليفونية اللي بتجيلي وكتير من الافراح مرحتهاش وكتير من الوعكات الصحية مش سالت علي اصحابها واطمنت عليهم يعني من الاخر تحولت الي الة نشاطها الرئيسي واهتمامها الاوحد هو العمل

العمل داخل الاخوان فيما احبه لا فيما تفرضه الظروف والاحداث
الحمدالله هناك فرصة للعمل فيما احب ولكن التقصير مني انا ولكنني بعد نصيحة ودفع وتحفيز "هي " لي اخذت قرار بالعودة الي مضمار النشاط وادعولي بجد اني اقدر اسد فيما سالتزم به امام الاخوان

العثور علي بنت الحلال كما يسمونها تتحقق فيها احلامي وترضي بظروفي الحالية
دي بقي اكتر حاجة سعيدة حصلتلي السنة دي اني لاقيت "هي" واني خطبتها وارتبط بيها وبالفعل تحققت فيها احلامي ومش هاقول غير شطر من اغنية "لما النسيم " لمنير بيقول " يا حلم نفسي تحلمه كل القلوب " بجد لو ان القلوب تحلم وتتمني سيكون حلمها الول وامنيتها الرئيسية "هي"


زواج صاحبي انس الشهير ب "اوسو اوسو" ونجاح مشروعه الجديد
بالنسبة لانوس صاحبي فمشروعه ماشي كويس الحمدالله بس بنت الحلال مغلباه ومطلعة عينه ومن الواضح ان بنات اسكندرية مش بيحبوا الخير لنفسهم علشان سايبين كنز زي انس يفلت من ايديهم . مع اني والله ما قصرت معاه ابدا وقلتله تعالي اظبطك في القاهرة وبنات القاهرة بيقدروا الرجالة جدا بس هو مصر علي اسكندرية مش عارف ليه تقولش بنات اسكندرية اوتوماتيك وبنات القاهرة مانيوال
علي العموم هو ماشي في موضوع كدة وربنا يسهله

امنيات السنة الجديدة "دي بقي بتاعت 2008"

امنية سبيشيال - انوس يتجوز بقي لاحسن كدة غلط عل عقله الباطن

اول حاجة - اتجوز ودعواتكم الكتيرة معايا علشان يتم بسرعة

تاني حاجة - ارجع لكامل نشاطي مع الاخوان وفي مشروع كدة في دماغي لو تم صدقوني هايبقي حاجة جديدة فبرضه دعواتكم معايا كتير

تالت حاجة - اصالح الناس اللي زعلانين مني علشان تطنيشي ليهم الفترة اللي فاتت وارجع سابق علاقاتي بالناس اللي حواليا كما كانت

رابع حاجة - اكمل مسيرة نجاحي في الحياة العملية وابدأ دراسة الmba في خلال السنة دي

واخيرا
مستني تهانيكم ودعواتكم واقتراحاتكم
ويلا
كل سنة وانا طيب

هناك ٢٦ تعليقًا:

غير معرف يقول...

يااااااااه يا مجدي اول مرة اكون اول المعلقين عندك
ودي بشرة خير

كل سنة وانت طيب يا صاحبي
والف مبروك علي الامنيات اللي اتحققت
وربنا يحققلك الامنيات الجديدة

وربنا يجعل كل اواقتنا في طاعته ويتقبل منا كل اعمالنا ويجعلها في ميزان حسناتنا

غير معرف يقول...

اسأل الله لك فى هذا اليوم حسنات تتكاثر وذنوب تتناثر وهموم تتطاير وان يجعل بسمتك سعاده وصمتك عبادة وخاتمتك شهادة ورزقك فى زيادة
وكل سنة وانت طيب وعقبال ميت مليون سنة .
هالـــــة

محمد يقول...

كل عام وأنت بخير
وتقبل الله عملك
وبارك في عمرك
وبلغك أمانيك
:)

ا بـن عــمــر يقول...

كل عام وانت الى الله اقرب وعلى طاعته ادوم

اللهم بلغنا ما تحب وابعدنا عما لا تحب
واجعلنا ممن تحب

غير معرف يقول...

كل سنه وانت طيب يا باشا ويارب تحقق كل امنياتك ويوفقك في شغلك وتبقى ناجح على طوووووووووووول (اني احبك في الله )

احمد حنفي

غير معرف يقول...

كل سنة وانت طيب يا مجدي ربنا يباركلك في عمرك ويارب تحقق كل امانيك دايما ويخليلك "هي" ودايما تدفعك وتخلي حياتك جنة ع الارض

ولاء

ومضات .. أحمد الجعلى يقول...

أكتب لأضيف مشاركة وأنا مضطر، فما كان لى أن أضيع فرصة تهنئة الأستاذ مجدى بعامه الثلاثين "مش عارف ليه موقفى ده بيفكرنى بلقطة من الفيلم الكرتونى الأسد الملك والكل بيقدم فروض الطاعة والولاء حتى لو كان مرغما زى حالاتى"

على أى حال كل عام وانت بخير يا استاذ مجدى ويارب يكون غدك خير من امسك وان تحقق فى عامك المقبل انجازات واحلامك الجديدة التى تمنيتها.

كل عام وانت بخير والى الله أقرب، ولمشروعك الدعوى الجديد منجز ورائد كما هو العهد بك.

غير معرف يقول...

On your special day, I hope you'll be granted all what you wish and even much more. Haapy Birthday !

Mona

آن الأوان يقول...

كل سنه و حضرتك طيب

احلى حاجه لما الواحد يلاقى نفسه حقق اهدافه اللى كان محددها لنفسه

و السنه الجايه ان شاء الله تحقق كل اهدافك

mostafa mahmud يقول...

كل سنة وانت طيب يا كتكوت

طيب ما تيجى نحتفل بيك على طريقة الثقب الأسود

إرجع يا مجدى

للى بيحبوك

ومش هاتلاقى زيهم

mostafa mahmud يقول...

أى خدمة يا عم مجدى

http://mostafamahmod.blogspot.com

غير معرف يقول...

كل عام وانتم بخير والى الله اقرب يا أ.مجدى

هوه جميل ان فى حاجات كتير اتحققت من أمانى العام القادم

لكن اتمنى لحضرت ان موضوع العلاقات الانسانية ده يتحسن..
لأن فى التدوينة اللى كتبتها عن د.حسن الحيوان كنت ذكرت موقف مع زوجته انك تأخرت فى الاتصال بها مرة فشعرت بحرج فاخذت تأخره اكثروأكثر..

فاذكرك بحاجة..ان الفرصة قائمة وان كل يوم يمر بيكون فى فرصة لتصحيح ما فات بس احنا احيانا مبنستغلهاش ..

اعانكم الله وفقكم لما فيه الخير

حسن مدني يقول...

يا عم كل سنة وانت طيب،
وعقبال سنين كثير،،
وربنا يوفقك وييسر لك الخير، ويتمم لك النجاح.
تحياتي

تليفزيون ملون يقول...

كل سنة و انت طيب يا استاذ مجدي و ربنا يطيل عمرك و يحسن عملك ....

غير معرف يقول...

الف الف مبروك وعقبال 100سنة وانت في طاعة الله وتسطيع ان تحقق كل احالمك وامنياتك .
واسف علي التاخير في التهئنه

حسن

غير معرف يقول...

هناك خطر عظيم يهدد سفينة المسلمين وسفينة الوطن ألا وهو التنصير الذي زاد سعاره هذه السنوات الأخيرة بصورة كبيرة وهو يهدف إلى قلع المسلمين من دينهم وإن لم يدخلوا في نصرانيتهم ويهدفوا إلى إشعال الوطن وتكون فرصة لأسرائيل لكي تدخل وهي وأمريكا وتقسم مصر إلى ثلاث أجزاء جزء من النيل إلى الفرات للصهاينة وجزء للنصارى وجزء للمسلمين ويستخدمون في ذلك وسائل تزول منها الجبال قنوات فضائية – إذاعات – صحف – مواقع إنترنت - بالتوك –معاهد –مدارس – مستشفيات – إنتشار في الجامعات وما قصة الأخت زينب التي تنصرت ورجعت ببعيده عنا – إلخ وهناك مبالغ مرصودة لذلك تشيب من عظمها الولدان يكفي أن أقول أنه في مؤتمر واحد تم رصد ألف مليون دولار لذلك وهو الذي دعا إستاذنا الشيخ الغزالي يكتب كتابه صيحة تحذير من دعاة التنصير . فلابد أن نتكاتف جميعا لصد هذا الخطر على أمتنا وديننا ووطننا ولو بكلمة والله إن قلبي يكاد يتفطر أن يتصدر لهذا الأمر مسلمين لايجيدون إلا السب بألفاظ مخزية فأين المسلمين أصحاب الفكر الوسطي المعتدل هل هم مشغولون بفصل الدعوي عن السياسي والدخول في جدل عقيم لا معنى له أبدا أفيقوا يا إخواني

غير معرف يقول...

هناك خطر عظيم يهدد سفينة المسلمين وسفينة الوطن ألا وهو التنصير الذي زاد سعاره هذه السنوات الأخيرة بصورة كبيرة وهو يهدف إلى قلع المسلمين من دينهم وإن لم يدخلوا في نصرانيتهم ويهدفوا إلى إشعال الوطن وتكون فرصة لأسرائيل لكي تدخل وهي وأمريكا وتقسم مصر إلى ثلاث أجزاء جزء من النيل إلى الفرات للصهاينة وجزء للنصارى وجزء للمسلمين ويستخدمون في ذلك وسائل تزول منها الجبال قنوات فضائية – إذاعات – صحف – مواقع إنترنت - بالتوك –معاهد –مدارس – مستشفيات – إنتشار في الجامعات وما قصة الأخت زينب التي تنصرت ورجعت ببعيده عنا – إلخ وهناك مبالغ مرصودة لذلك تشيب من عظمها الولدان يكفي أن أقول أنه في مؤتمر واحد تم رصد ألف مليون دولار لذلك وهو الذي دعا إستاذنا الشيخ الغزالي يكتب كتابه صيحة تحذير من دعاة التنصير . فلابد أن نتكاتف جميعا لصد هذا الخطر على أمتنا وديننا ووطننا ولو بكلمة والله إن قلبي يكاد يتفطر أن يتصدر لهذا الأمر مسلمين لايجيدون إلا السب بألفاظ مخزية فأين المسلمين أصحاب الفكر الوسطي المعتدل هل هم مشغولون بفصل الدعوي عن السياسي والدخول في جدل عقيم لا معنى له أبدا أفيقوا يا إخواني

عبدالله يقول...

كل سنه و انت طيب يا مجدي و ان شاءالله تتحقق كل امنياتك

تحياتي

مصعب الجمال يقول...

أخي الفاضل مجدي كل عام وأنت من الله أقرب وعلى طاعته أدوم ، وعلى تحقيق أمنياتك أقدر

عبدالرحمن فارس يقول...

كل سنه وانت طيب وعقبال 101 سنه يارب

Saad El-Shater يقول...

كل سنه وانت طيب
-
بس فيه حاجة زعلتني اوي
انك ماتمنيتش اننا نخلص منه
:(

أحمد عبد العاطي يقول...

أخي مجدي
كل سنة وانت طيب
اح>ر فقد نقصعمرك عام
بارك الله لك في البقية وأصلحه لك
وانت علي أعتاب العقد الرابع

إحنا يقول...

كل سنة وحضرتك محقق أمنياتك
ويارب السنة الجاية تبقى كلها
وأكيد فى أمنيات تانية سرية ربنا يحققها لكم
وبلاش كده مع الاسكندرانية مع احترامنا اللى محصلش للقاهروية عشان (هى)

أحمد السباعـي يقول...

كل سنة وانت طيب يا أستاذ مجدي

و30 سنة في طاعة الله

وربنا يستجيب دعواتك وتحقق أحلامك

غير معرف يقول...

ايه يا عم مجدى
هى التدوينة دى هتفضل منشورة لغاية ما يبقى عندك واحد و تلاتين سنه ولا ايه

الناس زهقانة و نفسها تقرا حاجة جديدة كل يوم
هو ايه حالة الركود اللى فى المدونات دى الأيام دى يا جدعان

ابوعدي للتسوق يقول...

شركة مكافحة حشرات بالدمام