الأربعاء، فبراير ٢٠، ٢٠٠٨

محاولة للتدوين

بقالي كتير مدونتش والسبب الرئيسي هو اني بعاني من فتور تدويني غريب والسبب الفرعي اني مشغول جدا في عملي . عندي افكار كتير ومواضيع كتيرة بس كل ما اقعد علشان ادون مقدرش .
يمكن الفتور ده جالي من احساسي بالمرارة من الاحداث اللي بتدور حوالينا يعني حصار غزة واللعبة القذرة اللي لعبها النظام المصري بتشويه الفلسطينين وحماس ودفعه للمحجوبيين "ديوله في الاعلام والصحافة " بشن حملة كراهية وتشويه لكل ما هو فلسطيني واثارة النعرة المصرية عن طريق تضخيمه لاحداث جرت علي الحدود مع غزة وتصوير الموقف علي انه احتلال فلسطيني لارض مصرية واعتداءات من الفلسطينين ناكري الجميل علي جنودنا البواسل ده اول امر


وتاني امر هو تحديد جلسة النطق بالحكم في المهزلة العسكرية وهاحكيلكم حكاية من 13 سنة في 95 كانت المحكمة العسكرية الاولي وساعتها رحت جلسة النطق بالحكم ووقفت برة المحكمة لان الكل اتمنع من الدخول ولما خرج الحكم مكنتش عارف اعمل ايه بس اللي انا فاكره ان كل الحضور جري وكسر كل الحواجز اللي كان عملها الجيش وحاول يدخل علشان يسلم علي الاخوان لولا قياداتنا من كبار الاخوان اللي وقفت في وسط الناس ونادت باعلي صوتها وجمعت الشباب ووهديت الناس وانصرفنا وكنت مضايق جدا لعجزي عن فعل شئ ودلوقتي بجد مش عارف ده صح ولا غلط يعني صح ان احنا نسكت ونتجاوز ونكمل طريقنا المعتاد ولا نتحرك بقوة طيب لو اتحركنا هايجيب نتيجة ولا هاتكون الخسائر كبيرة بجد مبقيتش عارف هو الاخوان خدوا علي كدة واصبحوا مازوخيين "بيتلذذوا بالاضطهاد " ولا فعلا هو ده البديل الانسب للمرحلة الحالية ولا في حاجة تالتة مبقيتش عارف . تالت حاجة هي حالة التعتيم الغبية اللي عايشاها الصحف والمسارات الاعلامية تجاه القضية يعني المصري اليوم قومت الدنيا ومقعدتهاش علشان اتنين محبوسين جنائي في سجن طنطا وفي شبهة ظلم واقع عليهم وعلي الناحية التانية حدث بقيمة واهمية تحويل قيادات فصيل سياسي الي المحاكم العسكرية وتحديد جلسة للنطق بالحكم بعد ساسلسة من المهازل سميت بجلسات المحكمة ولا يوجد اي اهتمام وقس علي ذلك معظم الابواق الاعلامية الموجوجة في بلدنا المحتل من نظام لا اجد اي وصف يعبر عن حقيقته

كل ده بيدفع الفرد الي القرف وسدة النفس والانعزال واحنا بشر فبنحس باللي بيحس بيه البشر فيمكن علشان كدة جاتللي حالة الفتور التدويني دي

النهاردة الفجر
رسالة جاتللي الساعة 5 صباحا من عبده ابن خلدون بيقوللي فيها نسالكم الدعاء علشان امن الدولة في البيت دلوقتي بيعتقل بابا فبعتله رسالة مقتضبة مش فاكر فيها ايه بس كتبت فيها جملة مملة ومكررة جدا
خالد حمزة
اتقبض عليه الفجر وتم اختطافه من سيارته في احد شوارع القاهرة واللي مش عارف خالد حمزة وعاوز يعرفه يروح يشوف "اخوان ويب " موقع الاخوان باللغة الانجليزية وهو يعرف مين خالد حمزة ولو عاوز تعرفه اكتر بص علي حجم الاعمال الاعلامية والحقوقية اللي تمت بشأن المحكمة العسكرية وانت تعرف مين هو خالد حمزة لانه هو مهندس كل هذه الاعمال ولو عاوز تعرفه بجد قابله واقعد معاه ممكن تستغرب منه او تخاف من طرحه او تقلق من ثوريته ورغبته في التغيير والاصلاح الداخلي وممكن تندهش من قدرته علي رؤية الاحداث بمنظور مختلف غير معتاد بس لما تقعد تفكر في ما طرحه ستجد انك تحتاج الي رؤيته . كفارة يا باشمهندس خالد
ويلا مش مهم

هناك ١٤ تعليقًا:

غير معرف يقول...

السلام عليكم:
اولا ازيكوا جميعا يامن تدخلوا علي يلا مش مهم ياه من زمان وانا مش بدخل النت اصلا بس بجد الله افتقدت المدونات كلها اللى بدخل عليها
بجد والله يااستاذ مجدى البوست اللى فات بتاع ابوتريكة جميل جدا والبوست الحالى يمكن يكون بيعبر عن احوال ناس كتير اخوان وغيرهم متأثرين ببلدهم وبالى بيجرا فيها بس والله طول مافى خير فى أمل
وطول مافى غزم عندنا برده فى امل ويكمن الدليل علي ده اللى عامله منتخبنا القومى
واكيد نتمنا لحضرتك الرجوع الى التدوين بصحه جيدة
وجزاكم الله خيرا

غير معرف يقول...

أولاً حمداً لله على السلامة يا أستاذ مجدي وربنا يعين حضرتك على شغلك ويفك همومك

بس أنا عندي إحساس معين :إنه لو الطرح بتاع حضرتك إنه الإخوان أصبحوامازوخيين ده طرح صحيح...أنا شايف إنه مش الإخوان بس ده الشعب كله...يعني من الأخر تقريباً يكون التأثر وقت الحدث وبعد الحدث ما يحصل بيدوب خمس دقائق الكل بينسي وبيرجع لهمومه وانشغالاته.....وربنا يسترها على أخواننا فى المحاكمات العسكرية...ويرزقنا عدم نسيان قضيتهم أبداً...

Dr.khaled يقول...

:)

ما أتى رجل بمثل ما جئت بــه إلا عودي...

يحيى عياش يقول...

الإ خوان المسلمين جماعة مليئة بالقدرات والحمد لله و نسأل الله عز و جل أن يعينه أرجو زيارةمدونتي

غير معرف يقول...

أستاذ مجدي..
أول حاجة ماتخدش في بالك بتوع الإعتام الحكومي دا.. هما كدا.. ربنا يحرقهم..
أما موضوع الإخوان وكونهم مازوخيين.. هي دي اللي معقداني بجد..
كل حاجة تحصل يقولك سنصبر ونعمل ومش عارف ايه.. وندفع ثمن دعوتنا..
امبارح باقرأ الدستور لقيت المرشد بيقول: صبرنا صبرًا فاق الحدود..
طيب لما فاق الحدود.. قاعدين ليه ورا الحدو احنا؟؟؟!!
الصراحة الموضوع بقى يفلق..
مهزلة عسكرية تستمر سنة وشويه.. وساكتين..!!
اعتقالات بالمئات مرة واحدة .. وساكتين..!!
حاجة تعقد..!!
...
ربنا يستر بخصوص الحكم يوم 26
ربنا يفرجها ويخرج آباءنا بإذن الله
وإن كان بعد اعتقال م. خالد حمزة ما أظنش الحكم هيكون كويس..
عارف إنه مدبر من زمان.. لكن كان فيه أمل
ربنا يستر

أحمد القبرصي يقول...

أدعوا لأخوانكم

ربنا يعينهم و يقوي بأسهم

و يحق الحق

يوم 26 فبراير

انا مسلمه يقول...

استاذ مجد ولله وكانك تحدثت عما يجول بخاطرى كلما ههمت بكتابة بوست جديد كلما تذكرت اخوان فى السجون وفى غزة وكلما زاد احساسى بعجزى واحساسى بالظلم فتوقفت يدى عن لكتابة وزاد القلب حزنا
اللهم فك اسر معتقلينا واعدهم الى بيوتهم واهليم سالمين
تقبل مرورى

محمد يقول...

ساعات تفصلنا عن جلسة النطق بالحكم ..

يا أخي أنت تعرف أن ما يفعله الأخوة ليس استسلام للإضطهاد .. وتعرف كيف توازن بين المكاسب والخسائر .. فأنت إخوان ..

أظن ان تساؤلاتك ما هي إلا طاقة حزن لما يحدث .. فرج الله همومنا وفك أسرنا

اللهم انصرنا وفك أسر إخواننا , اللهم أجر العدل على لسان القاضي وقلبه .. اللهم آمين

غير معرف يقول...

المدون الدكتور إبراهيم الزعفراني المعتقل حالياً من قبل السلطات المصرية لتضامنه مع حملة فك الحصار عن غزة ... يجري يوم الأربعاء عملية قسطرة في قلبه بمستشفي جامعة الإسكندرية ..؟؟
شاركوا في المطالبة بالإفراج عن صاحب القلب الكبير الذي بدأ يأن من رهن الحبس والظلم ...
إظهر تضامنك وتأييدك للإفراج عنه في حملة الألف مدون للإفراج عنه ...
وقع في الرابط التالي :
http://www.yallanefdahom2.blogspot.com/

Entrümpelung wien يقول...

شكرا على الموضوع ..))

شركات توظيف مصر يقول...

دهب أكثر الشركات تميزاً فى مجال توظيف العمالة المصرية بالخارج. لا تعطل عجلة النجاح بشركتك واتصل بشركة دهب لتوفر لك ما تريد. هدفنا هو مساعدتك فى النجاح المستمر لشركتك. نسعى للحصول على ثقتكم ونعمل بجهد لتوفير وقتكم. دهب ، أينما كنت نوفر لك ما تريد من أفضل الكفاءات المصرية.

Bookmarks يقول...

تسلم ايديك على الموضوع المتميز جداا
bookmarks-pligg
bookmarks-pligg
bookmarks- pligg
bookmarks-pligg

كليك بانك يقول...

شكراّ ع الموضوع

ابوعدي للتسوق يقول...

شركة تنظيف منازل بالدمام