الاثنين، نوفمبر ٢٧، ٢٠٠٦

ولا يهمك يا أوسو أوسو

بداية " أوسو أوسو " هو الاسم الذي اطلقه علي صاحبي واخي" انس القاضي" احب الاخوان الي قلبي
أنس اعرفه منذ ان كنا طلبة هو بجامعة الاسكندرية وانا بجامعة القاهرة والتقينا في بعض لقاءات واعمال الاخوان الطلابية وكانت بداية التعارف وبداية اشهر قصة حب في الله امتدت علي طول الطريق الصحراوي من القاهرة الي الاسكندرية وبعد تخرجنا اكملنا نشاطنا مع الاخوان في العمل الطلابي وكان دوره في جامعة الاسكندرية هو نفس دوري في جامعة القاهرة
وانس يبلغ من العمر 28عام مثلي تماما سجن مرتين بسبب نشاطه مع الاخوان مثلي تماما فقد عمله في الحبسة الاخيرة مثلي تماما اعزب مثلي تماما شهم مثلي تماما كريم مثلي تماما وسيم افتقد انا الي الكثير من هذه الصفة قضينا مع بعضنا البعض خمسة اشهر في نمرتين متجاورتين بزنزانة 3 عنبر 3 سجن طرة وكان لا يذكر انس الا وذكر مجدي والعكس صحيح
في اخر زيارة له للقاهرة وبعد ان تناولنا الغداء علي حسابي طبعا مما ادي الي تدمير ميزانية الشهر كما يحدث له كلما
ذهبت ازوره بالاسكندرية حدثني عن سعيه للارتباط وكيف ان هناك اختين رفضتا الارتباط به نتيجة لظروف حبسه
السابقة و التهديدات الامنية التي من الممكن ان يتعرض لها مستقبلا وكان كلامه مصحوب بهالة من الاسي والحزن
وللاسف لم استطع مناقشة الامر معه لمداهمة موعد الاتوبيس الذي سيستقله لنا وعليه فقد قررت ان اكتب له تلك
الرسالة نستكمل فيها نقاشنا واستمحيكم عذرا انني ساستخدم العامية المبتذلة في كتابة الرسالة
عامل ايه يا عم الكتكوت
صاحبي وحبيبي وكفاءة " اوسو اوسو" عامل ايه الشوق معاك عامل ايه فيك الحنين صباحه عسل غرقان قشطة مرشوش مكسرات من اخوك وحبيبك" ميجو ميجو" الاسم الذي يناديني به انس
فاكر يا صاحبي الموضوع اللي انت كلمتني فيه اخر مرة كنت معايا عند موقف السوبر جيت في الجيزة بخصوص طلبك لايد بنتين من بنات الاخوان ورفضهم ليك علشان ظروفك الامنية انا قعدت ادورالموضوع في دماغي شوية لغاية لما نورت معايا ورسيت علي علي الفولة " تعبير يدل علي الفهم والوصول الي اسباب المشكلة "
بص يا ابن عمي من الاخر احنا اتخدعنا ليه بقي يا صاحبي فاكر لما كنا في السجن وييجي وقت النوم في الساعة دية كان كل افراد الزنزانة يرقدوا في نمرهم وعينهم مفتوحة كل واحد بيفكر في حاجة اللي بيفكر في عياله واللي بيفكر في شغله واللي بيفكر في مراته كنت انا الاقي عمك الشيطان داخل عليا فارد قلوعه وبيصورلي المجد اللي مستنينا لما نخرج وازاي احنا اتحولنا لابطال وان احنا لما نخرج هتمطر علينا طلبات الجواز من بنات الاخوان وان احنا هنمضي الاوتوجرافات قدام
المساجد وفي لقاءات الاخوان وبما انك كنت جاري ونمرتك جنبي فاكيد حود عليك في السكة ومن الواضح ان احنا موقفناش قدامه صح لغاية لما بوظ نيتنا وخلانا نقضي الحبسة شرك اصغر "تعبير يعرفه المتدينين وخريجي مدارس وجامعات الازهر " وعليه يا صاحبي فالرفض اللي حصلك ده عقاب الهي علشان نيتنا اللي باظت
التفسير التاني يا شقيقي " اسم مناداة خاص بسائقي الميكروباصات ينطق بتحويل القاف الي همزة" ان فيه تحولات اجتماعية حادة حصلت عند بعض
بنات الاخوان لما احنا كنا في غيابات السجن " حلوة غيابات ديه " وانهم اتحولوا الي براجماتيين "مصلحجية يعني " وبراجماتي كلمة تستخدم بكثرة في قناة الجزيرة " وان اهم حاجة عند الاخوات دول هي الحياة
اللي جنب الحيط والشقق السوبر لوكس وسلملي علي التضحية والنضال وكل الكلام اللي بيهتفوا بيه في المظاهرات
او يا اوسو اوسو ده جزاء عادل ليك علي كسرك لقلبي وتركك لي بعد خروجنا من السجن وعدم اتصالك بالاسابيع يا عم الكتكوت وخللي الجواز ينفعك
علي العموم يا صاحبي هما اللي خسرانين واي بنت تعرفك صح تتمني انها تمشي جنبك او خيالك يقع عليها وصدقني انا لو كرومسماتي كانت اقل من 47 كرومسوم وانا جنين "حاجة مش هايعرفها الا اللي كان علمي علوم في الثانوية العامة " وطلعت بنت لكنت اتجوزتك وانا "مغمضة "قصدي " مغمض
بصوا بقي يا بنات اسكندرية كنتم من الاخوان اولا انا مش هاستجدي منكم الارتباط بانس بس انا بحذركم علي
الجريمة اللي هاترتكبها اي واحدة في حق نفسها لو انس اتقدملها وهي رفضت ليه بقي يا اخواتي في الله " مصطلح
دارج في اوساط نساء الاخوان عند نداء بعضهن البعض" اي واحدة عايزة راجل بجد وبكل ما تعنيه الكلمة من معاني
الرجولة مش هتلاقي زي رجولة انس سيكولوجيا وفسيولوجيا"سيكولوجيا تعني الناحية النفسية وفسيولوجيا تعني
الناحيةالبدنية الجسدية" راجع كتاب الاحياء في الثانوية العامة
واي واحدة عايزة واحد مشاعره اكتر سخونة من مشاعر قيس حبيب ليلي وجميل حبيب بثينة و تامر حبيب باكينام
م "مش عارف من الاخرنيين دول" مش هتلاقي زي انس
واللي عايزة كرم وتفييس "كلمة تعني الانفاق والبذل "اكتر من كرم حاتم "يضرب به المثل عند العرب في كرمه ويقال كرم حاتمي " فملهاش غير انس
يا بنات اسكندرية ومصر والمحيط الاقليمي " كلمة سمعتها في الفضائية المصرية " خدوا الكلمتين دول من اخوكم مجدي وحطوهم حلقة في ودانكم "ستجري دموعكم انهارا وستنبت بذور الندم علي ضفافها لتصبح اشجارا تناطح الجبال
الشامخات طولا و من علي قممها ستنتحر امالكم وافراحكم وسلامكم النفسي وامانيكم حزنا وكمدا علي عدم الارتباط بانس" جملة من رواية البؤساء لتلستوي
اما انت يا ابو الانس ولا يهمك هما الخسرانين وبعدين "بصرة" يا صاحبي " تعبير عن تشابه حدث او موقف لدي طرفان " ما انا برضه اتقدمت واترفضت بس علشان امكاناتي المادية بس ايه ما اتهزتش شعري في صدري ليه بقي
لان الرجالة هي اللي بتعمل الفلوس مش العكس يا نجم
واحب اقولك اني بكتب ورقة اليومين دول وهاقدمها للعالم اللي ماسكة شغل الاخوات في الاخوان هاقولهم فيها يروحوا
يشوفوا بناتهم وعمايلهم معانا في الجواز وكمان هاقولهم محدش يزعل لما نروح نتجوز من برة الاخوان و خللي حد ييجي يلوم علينا " يا لهوي يا صاحبي لو رحنا اتقدمنا لحد برة الاخوان واترفضنا داحنا ننتحر او نسلم نفسنا لامن الدولة
بقولك ايه يا ابو الانس اوعي يا صاحبي تفقد ثئتك " ثقتك " في نفسك لان من الاخر انت مش هاتتجوز الا مراتك وكل شئ نصيب والنصيب غلاب
وبعدين يا شقيقي " تم التنويه عنها مسبقا وكيفية نطقها "سيبك من كل الحوارات دية احنا اللي باقيين لبعضينا وبخ لصنف الحريم كله "بخ كلمة تعني دع او غض الطرف عن ولها مرادف اخر احلق او نفض " واهم حاجة الحب في الله والاخوة اللي ما بينا وادينا مقضينها وبرضه بديل حلو وبناخد عليه ثواب
وما طولش عليك علشان تقضي مصالحك وتتلفت ليومك واشوفك قريب عند شعبان بتاع السمك اللي بيقولوه عليه في ميدان المنشية او في الفقير للمشويات عندنا في فيصل
وهاختملك بالندا اللي كنا بنقوله دايما واحنا راجعين من النيابة واخدين الخمستاشر يوم بتوع التجديد المتين علي باب عنبر تلاتة
فرجه قرييييييييييييييييييييييييييييييييييييييييييييييييييييييييييييييييب
ويللا مش مهم

هناك ٧ تعليقات:

غير معرف يقول...

الله عليك يا ميجو ميجو، و الله كلام عظيم و أهم فائدة ليه هي إنه يقدم معجم بالمصطلحات التي يحتاجها من يتحدث إليك.
بس فيه حاجة مهمة جدا فيه، إني مكنتش أعرف إنك اتقدمت لواحدة قبل كده؟! أديني عرفت أهو، بس برضو خللي بالك من موضوع بره الإخوان ده لحسن مسئولك يسلبك أعز ما تملك.

ملحوظةلا بد منها، مجدي عمل اللي عليه، أيوه عمل اللي عليه و اتصل بيا و سأل عليا و عرض عليا كمان نخرج مع بعض و أنا اللي اعتذرت.من هنا و رايح مينفعش أقول إنه باعني(بالمعني اللي كنت بقولها بيه قبل كده) بس إن شاء الله ليها معني تاني و تالت و رابع، و لكي أظل أدعوه دائما ب (أستاذي اللي باعني)

غير معرف يقول...

يا عم انت اذا بليتم فاستتروا؛ لما انت قضيت الحبسة شرك اصغر . . خد بالك بقى ولم نفسك في اللي جاي لحسن الأجل بينتهي في لحظة يا صاحبي . . واظن اصدقائك سواقين النقل يا ما قالوا لك ان البني آدم ماشي على بةئين هوا وما حدش ضامن عمره

عبدالرحمن رشوان يقول...

والله جامدة جدا
أحمد بهجت ميجيش جنبك حاجة
انت لازم تشوفلك شغلانة كاتب ساخر
صحفى
المهم
أكتب
أكتب
أكتب

زوج الله أنس ومجدى وشباب المسلمين

أخوك عبدالرحمن رشوان

غير معرف يقول...

هههههههههههههههه

اولا مبروك المدونة المشقشقة جميلة جدا واجمل منها تعبيرك بعفوية وصراحة
وبعد ان وجدتها او بالاحرى وجدتكم "مدونى الاخوان " اعترف بانى قد وجدت ضالة عزيزة ان اجد الاخوان على طبيعتهم خارج المظاهرات والهتافات
ومن ثم :استطيع بعد كل هذة المقدمة ان انوة واحذر ان الكلام دة فية ظلم واجحاف بالاخوات ...وبالراحة يا عمو مجدى كدة وانت داخل على الاخوات
مش احتمال انت وصاحبك تكونوا اتقدمتوا لناس مش مناسبين
دة نصيب....ربنا يوفقكم ويعزكم
ونشوفكم فى الحبس الزوجى قاادر يا كريم
وكدة نقدر نقول ان فية لسة اخوة فى الله صادقة يا ولاد.... ربنا يديمها عليكم
ام حذيفة

غير معرف يقول...

السلام عليكم و رحمة الله و بركاته
جزاااك الله خيرا على اثارة الموضوع ده
اولا انا حتكلم بصفتى واحدة من الاخوات مش عشان ادافع عنهم لكن حقول الكلام اللى بيتقال عندنا فى وسط الاخوات :
اولا : اللى بيتقالوكو بيتقالنا برضه عن ضرورة اختيار الزوج الصالح اللى شايل نفس الفكرة
ثانيا: انا حاسة انك بهدلت بنات الاخوان كلهم و طلعت عليهم سمعة ...........(فضايح ع النت يعنى...)مع ان اغلبنا بتتمنى واحد اتبهدل فى سبيل الله (يعنى سوااااااااابق) لان ده معناه انه اختبر فى قوة ايمانه ونجح(انتو بقى اللى حظكو وحش)
ثالثا : مش اى حد مكتوب جنب اسمه (اخ) حنرضو بيه ..لان لازم (زى ما انت عارف)يكون فى توافق وتكامل وماتنساش اهم حاجة القبوووول (و ده ربنا اللى بيحطه فى القلوب)
بس انتو دورو كويس وحتلاقو نصيبكو المكتوب ان شاء الله
و خد نصيحة من اخت فى الله شيل من دماغك (من بره الجماعة دى)لاحسن لو عملتو كلكو كده حنعملو مظاهرة ونتجوزو من بره (معرفش بره فين)و بكده نفركشو الجماعة علشان تتبسطو (ويبقى صفرصفر)
وربنا يرزقكو ببنات الحلال(قصدى اخوات الحلال)قريب
والسلام عليكم

غير معرف يقول...

السلام عليكم واحده مش من الاخوات
مصريه مسلمه مرتبطه بواحد من الاخوان والحمد لله قربنا نتجوز ادعولنا كنت عايزه اعلق على جزء من الكلام وهو ان لازم اخ من الاخوان يتجوز اخت من الاخوات بالنسب ليه انا وخطيبى وزوجى فى المستقبل ان شاء الله رأى او قاعده وهى ارتبط باللى تحس معاه بالامان والسعاده والتفاهم ويكون كل واحد منكم متفهم احتياجات الاخر وانتمائاته ويكون قادر على استيعابها على فكره انا عارفه ان خطيبى تم اعتقاله قبل كده وعمر ده ما وقف فى طريق ارتباطنا وانا وهو الان بنحاول نهيء نفسنا للامر ده لو حصل لا قدر الله زى ما بنهيء نفسنا لتكوين بيتنا وحياتنا مع بعض وفى النهايه ربنا يرزقك انت وانس اسفه لو كنت طولت عليكم

Strong80 يقول...

هي تلاكيك يا نجم انت وهو ولا ايه
انت بتقول محدش هيجوز غير مراته مراته
مش اخته فى الله
يا جدعان عايزين نحسبها صح انت ليه بتتجوز من الاخوات الفاضلات فى العمل الدعوى
لتكون اقرب الى فكرك
طب وان حصل ولاقيت خارج مجتمع الاخوات الفاضلات
طب متقرب وتجرب وتتوكل على اللى خلق انت والاخوات
منحسبها صح وبلاش اختلاق حوارات ان لم يكن المانع شخصى وبنلزقه فى ان الاخوات مش راضيين
متبحبح الدايرة شويه انت وهو
ودور بجد لو عايزين
وبعدين مهى كلها خلقه من نفس الطينه والعجينه
كلهم حور طين مش عين.