الأربعاء، يوليو 04، 2007

اووه ه اهلاوي - اهلاوي اهلاوي اهلاوي

ما زالت تداعيات احداث غزة مسيطرة علي الساحة التدوينية والاستاذ فهمي هويدي ما زال يصول ويجول بمقالاته التي ترد وتوضح وتبين ولا تدع مجال للبس او شك او تاويل او تربص وربنا يحميك يا استاذ فهمي وده مقاله الاخير" فصل فيما تكشف من ازمة غزة"وياريت تقروه بتمعن
الاهلي - مصدر السعادة للمصريين
معلش بقي نرجع تاني لحياتنا الخاصة ونتكلم

الحاجة الوحيدة اللي بتدخل السعادة والفرحة لقلوب المصريين

الاهلي

انا اهلاوي صميم ومن زمان وانا بشجع الاحمر وبيتنا كله بيشجع الاحمر ما عدا ابن عمي اللي بقاله يومين مختفي بعد العلقة السخنة بتاعت اول امبارح

الاهلي والشغل

كنت زمان بظبط مواعيد شغلي لما يحصل تضارب ما بين ميعاد مباراة للاهلي وميعاد عمل بس اول امبارح كان عندي ميعاد مع احد العملاء الجدد للشركة والميعاد تم تحديده من اسبوع انه يكون الاثنين الساعة تسعة مساءا وبعدين افتكرت يوم الاحد ان الماتش بكرة واتصلت بالراجل بس طلع مغيب مش عارف ان في حاجة اسمها كورة قدم اصلا فقلتله خلاص علي ميعادنا ورحتله وقعدت معاه للساعة حداشر " الله يسامحه " ونزلت بعدها جري علي كافيه كان عبد الرحمن وعثمان مستنيني هناك وبيتفرجوا علي الماتش ولحقت الاضافي وكانوا ماتش لوحدهم واول ما اسامة حسني جاب الجونين هتفنا مع الشباب اللي في الكافيه " اووه ه ه اهلاوي اهلاوي اهلاوي اهلاوي " وبعدها قعدنا في نقاشات طويلة عريضة حوالين الاداء والحلاوة وابو تريكة الساحر ومتعب اللي كان مكنة وبركات النحلة وامير اللي كان جاي يشم هوي واتسبب في الجون الاول وبعدها روحت ولاقيت المصريين فرحانين قوي بجد الزمالك ده لو يعرف قد ايه المصريين بيفرحوا لما يتغلب كان سيب كل المبا ريات ووالله هياخد ثواب كبير قوي

الاهلي والاخوان

كتير من الاخوان اهلاوية ونادرا لما تلاقي حد زملكاوي ولما بيبقي موجود بيعالج تربويا وفكريا وبيتحول علي طول وباسرع وقت والا هايفضل عليه ملاحظات تربوية وفكرية وعقلية احيانا اذا احتفظ بزملكوياته وفضيلة المرشد اهلاوي صميم واللي عاوز يتاكد يروح مكتب الارشاد بعد اي ماتش للاهلي والزمالك ويكون الاهلي هو اللي فايز ويشوف فرحة الاستاذ عاكف قد ايه
الاخوان الزملكاويين
متهيألي مشفتش زملكاوية اخوان ومصرين علي خيانة مبادئ الاخوان ومحتفظين بزملكوياتهم الا اتنين
الاستاذ عبد المنعم عبد المقصود محامي المعتقلين
عبد المجيد مشالي احد قيادات قسم الطلبة بالجماعة

الاولاني بيبرر انتمائه بان الاهلي هو نادي النظام وعميل للسلطة وان كل باشوات الحزب اهلاوية ودايما يقول كفاية ان كمال الشاذلي اهلاوي وفاكر في مرة واحنا في النيابة وكان الزمالك مغلوب قبلها من الاهلي وقعدت اتريق علي الزمالك فقالي انت مش اهلاوي شوف بقي محامي اهلاوي يخش معاك التحقيق وبعد محايلة وتطييب الخواطر وافق انه يخش معايا

عبد المجيد مشالي كان دايما ليه دعاء مأثور اثناء وبعد كل ماتش بين الزمالك والاهلي وهو " الله يرحمك ويسامحك يا ابويا " يقصد والده طبعا ولما تساله ليه يقولك ما هو اللي طلعني زملكاوي واتسببلي في كل حرقة الدم اللي انا فيها دية ولما تقوله غير واتحول يقولك مينفعش خلاص الوقت عدي من زمان وبعدين شكلي هايبقي وحش قوي

يا رب توب علي كل واحد زملكاوي

الاهلي وطرة

لما كنا في السجن كان العنبر كله يتجمع يوم ماتش الاهلي والزمالك ودايما كنت تلاقي الاخوان الاهلاوية منتشرين والاخوان الزملكاوية قاعدين في ركن وساكتين مخافة ان يعرف انتمائهم وطوال الماتش كانوا يسمعوا من التريقة ما يكفي لاثارة حرب اهلية لكنهم دايما ساكتين لانهم مش لاقيين حاجة يقولوها واخر ماتش للاهلي والزمالك لما كنا في السجن كان الصيف اللي فات وفاكر ان ساعتها كان قاعد معانا الدكتور حسن الحيوان الله يرحمه رحمة واسعة ووهو اللي كان معاه الريموت والدكتور حلمي الجزار وهو كروي قديم والحاج احمد فرغلي والدكتور احمد سليم ولفيف من القيادات وهما دول الوحيدين اللي انقذوا الاخوان الزملكاوية من ايدينا والسنتنا وساعتها الاهلي فاز تلاتة صفر وكان نهائي الكاس اللي فات

الاهلي والسياسة

اقوي فصيل شعبي وجماهيري

في الشارع المصري ويملك قاعدة شعبية تمتد افقيا في كل انحاء المحروسة وراسيا في كل قطاعات الشعب وطبقاته ويملك من ادوات التاثير ما يتيح له الفوز باي انتخابات مستقبلية في مصر ويكتسح الجميع بما فيهم الاخوان
وفي النهاية

اووه ه ه ه اهلاوي اهلاوي اهلاوي اهلاوي

ويللا مش مهم

هناك 32 تعليقًا:

محمود قطب يقول...

لا يا أستاذ مجدي أنا أكشفت أتنين زملكاوية عندنا في الجماعة تاني
وائل وسباعي
سباعي بيقول أن في سببين بيخلوا يشجع الزمالك
1-أنه بيحب الغلابة والزمالك طبعا أبو الغلابة
2-أنه بيحب اللون الأبيض
في الأخر
يارب منشوف بكره في الجرايد
أنقسامات في صفوف الإخوان حول الأهلي والزمالك
هاهاهاها

إسلام أبو الفتوح يقول...

هو ده الكلام تدوينه فى الجون يانجم ويلا المفروض القله من الاخوان المنتمين لما يسمى بالزمالك يصححو أوضاعهم ويعودو الى صوابهم قبل ماتش السوبر

أهلى أهلى اووه ه

إخوانى مخربش يقول...

مع الاعتذار للاستاذ مجدى

مفيش حد بيشجع الاهلى انما فى حد بيكره الزمالك

ومفيش حد فى مصر زملكاوى
انما الاصح بيكره الاهلى

وللاسف احنا المصريين كده

وللاسف الاسيف احنا الاخوان اصبحنا كده زى المصريين
بدل ما نصلحلهم قضية التعصب تعصبنا معاهم

وبعدين المرشد لما اتسال عن الرياضة ومصر

قال قيمة الشعوب بما يمارسونه من رياضة
مش بما يشاهدونه من الرياضة

الكواكبي يقول...

بالرغم ان معرفتي بالكرة بتنحصر في انها "بتتنفخ" لا مؤاخذة إلا أنني من "موكعي" هذا يشرفني بل ويسعدني اني زملكاوي
وهافضل زملكاوي احياءً لذكرى المرحوم ابويا الله يرحمه؛ اينعم ابويا مات ايام ما كان الكوارشي لسه بيلعب؛ واينعم ما كانش عارف ان فيه بني آدم اسمه مرتضى منصور هايستولى على النادي ؛ ولا ان كائن حي من الكائنات الأهلاوية اسمه ابراهيم سعيد هايجي يلعب في النادي برجليه احياناً وبصباعه اغلب الوقت
الا انه برضه ما يصحش كده يعني . . وبعدين اهلي ايه اللي نشجعه؟ ده نادي من لا نادي له ميكانيكية على وزراء على ظباط على رقاصات
ما فيش سينس خالص

عبد الرحمن يقول...

انت ظلمت زمالكاويه إخوان كتييييير

بس يلا
أحسن
هما حد قالهم يبقوا زمالكاويه

بس فعلا ماتش كبييير جدا
وفي درس مهم

ياريت كلنا نعيش ثقافة النجاح
إللي الأهلي عاشها من أول دقيقه

إبراهيم الهضيبي يقول...

يا حاج مجدي
وجود زملكاوية في الإخوان دليل على سعة صدر الجماعة وعدم حجرها على أحد
يعني إحنا لا نعاقب أحدا بسبب معتقداته، بس بصراحة يعني، رمضان داخل، فهما لو يستغلوا الفصة ويتوبوا يبقى تمام أوي، ونرجع نقول للزملكاوية: قل هو من عند أنفسكم

محمد القط يقول...

الله عليك يا مجدي...
والله يا ابني حبك زاد في قلبي بعد التدوينة الحمرا دي...
وبصراحة لازم الاخوان ينقو جداول الجماعة من الزملكاوية...
لأن الزمالك أشبه بالمرض ..ليه أعراض على حامليه..من ضمنها الاكتئاب والهوس العنقودي..والانفتاخ التشعبي..والتكور الليمبي-فاوي
زائد أغلبهم مرضى دوالي..يعني مبيستحملوش في أمن الدولة ..
وده من نتايج الفريق..وبالتالي بيبقو نقاط ضعف للإخوان...

أهلاوي ..وبحب الاهلي..وخادنا الكاس والدوري...!!!!!

عصفور المدينة يقول...

!!!

saad alshater يقول...

ياسلام انا كمان اهلاوي
بس متعصب حبتيين
بس الاخوان فيها كل حاجه
www.ibn-elshater.blogspot.com

محمود سعيد يقول...

كما قال عصفور المدينة

!!!!!


التدوينة ديه طلعت منك أوت يا أستاذ مجدى

لأن فاكر زمان كنا نقول أنا مسلم لا أهلاوى ولا زملكاوى

بمعنى إن إنتمائنا للإسلام مش للأهلى

لأ وكمان المرشد أهلاوى و و و

بكرة نلاقى المصرى اليوم بتنقل عنك هذا الكلام
والهزار بتاع أن الأخ لو زملكاوى بيتعالج تربوياً

لأ وكمان
هايفضل عليه ملاحظات تربوية وفكرية وعقلية احيانا اذا احتفظ بزملكوياته

عارفين أنك بتهزر بس الناقل مش هيكون أمين

ده غير أن ده تفريق و و و

ولو إنى باشجع الأهلى :-)

وائل_صح ولا غلط_ يقول...

زملكاوي

زملكاوي

زملكاوي


انا مسلم طبعا بس بشجع الزمالك وفي فرق انك تكون بتشجع نادي وانك تكون متعصب وبضيع وقتك في الكلام ده

نرجع بقي لموضوع الزمالك

اولا الناس اللي بتقول ان اكثر الشعب المصري بيشجعوا الاهلي

فده طبعا شئ عادي لان الاكتريه دايما هما اللي مش علي الحق

زي الحزب الوطني كده مالوش في البطيخ بس هما مستولليين علي كل حاجه

ودايما الاقليه هي اللي بتكون مظلومه وده حال الزمالك وجمهوره

ثانيا ان الاهلي بياخد كل البطولات فده برده شئ طبيعي

خد عندك الاتحاد المصري معظمه من الاهلاويه
القنوات الفضائيه البرامج الرياضيه اللي بتيجي فيها تقريبا اللي بيقدومها واللي مسيطرين عليها كلهم من الاهلاويه

ان مجلس الاداره في الزمالك بيكون في مشاكل بقاله ست وسبع سنين من ايام كمال دريش وجهاز الشباب والرياضه مش عاوزين يدخلوا في حلها حل جذري اكيد لازم بتحريض اهلاوي

يعني حتي الكوره بقي قيها بيزنس ومصالح

عاوزين بعد ده كله الاهلي مايخدش البطولات دي كلها ....اللي اختشوا ماتوا يا اخي


لو بتتكلموا عن الكوره نتكلم عن الفن والهندسه واللعب الجميل يعني نادي الزمالك طبعا

الماتش ده بالذات من الماتشات اللي انا شخصيا مش زعلان ان الزمالك اتغلب فيها لانه في ظل ظروف الماتش والتغييرات الاضطراريه اللي حصلت اجزم بان الزمالك لعب واحده من افضل المباريات علي الاطلاق كفايه ان احنا كنا كاسبينكوا لغاية قبل نهاية المباره بدقيقتين واحنا بالحاله دي من اصابات وتغييرات وغيره

وفي الوقت الاضافي كده برده
ياراجل داانتوا المره الوحيده اللي اتقدمتوا فيها في الماتش كانت اخر عشر دقايق من الماتش ...عيب عليكوا يعني

انا والله يا جماعه كنت هعلق تعليق صغيرا جدا بس لما لقيت كله نازل طحن في الزمالك قلت لازم ارد عن كل الزملكاويه

في الاخر احب اسأل سؤال هل تشجيع نادي معين بغض النظر عن اسمه من غير تعصب ولا تتضيع للوقت ومن غير تتضيع للاعمال الدعويه ......صح ولا غلط

رايي المتواضع جدا انه صح جدا

البتول يقول...

انا لا احب لكرة وان حبيت لا احب الاهلي خالص وانا حره وبرضه اخوان

bahry يقول...

الاخ الجميل الاهلوي جدا
اولا دي اول مرة اعلق عندك
وانا متابع تدوينك من فترة واسلوبك بشكل عام عجبني
ده في الاول بس
بالنسبة بقه لموضوع الاهلي والزمالك
فأنا واحد من الناس اهلي كلهم اهلاوية وانا كنت بشجع الاهلي لغاية من سبع سنين فاتوا يعني بحسبة بسيطة قعدت اشجع الاهلي 27 سنة كاملة وتحولت الي الزمالك لانه فعلا نادي مظلوم والاهلي رمز للفساد والسلطة والت...كلمة ابيحة مينفعش اقولها هنا

وكمان رمز للإدعاء والتمثيل بانه حامي الاخلاق والقيم والبتنجان ده كله

ايه الكلام الكبير ده؟؟

عموما يا عم مبروك الماتش

بس فعلا انا زملكاوي ومكنش فارق معايا مين يفوز بالماتش لانه كان جميل والفريقين عملوا اللي عليهم

اللهم اهدي الاهلوية فانهم لا يعلمون

ياسر أبو العلا يقول...

على فكرة يا مجدي أنا أول مرة أعرف إن الإخوان فيها حد زملكاوى ، ياه ، وازاى الجماعة طايقة النوعية دي من الإخوان ؟
بس هما أكيد لسه في مراحل تمهيدية .. يعنى لما يفهموا كويس الوضع في البلد ، وإن الأهلي هو حزب الذين يريدون إسعاد أبناء بلادهم سوف يدخلون -بدون أي ضغوط- للأهلي ويتخلون عن هذه النزعة الزملكاوية غير المبررة ، فلا أحد يرتبط بالزمالك حتى الآن لأسباب منطقية ، فلا لاعبين أو مدرب أو رئيس نادى أو حتى جمهور مخلص .
أنا رحت الناديين .. في مهام عمل
الزمالك بصراحة تشعر إنه لا يزيد في مدرجاته ومبانيه عن نادى نسيج حلوان طيب الله ثراه، فضلا عن الألفاظ الرائعة التي سمعتها من جمهوره الغاضب لذا لم أكرر التجربة
أما الأهلي فزرته أكثر من مرة إحداها للقاء اللاعب الرائع هادى خشبة ولا تدرون كمية السعادة التي شعرت بها بسبب هذا الحوار ، أما الثانية فكانت للقاء اللاعب هشام حنفي والثالثة كانت حضور مباراة في كرة اليد بين الأهلي والزمالك
والصراحة نادى يشرح القلب تبقى مش عاوز تمشى منه
أعتقد أن الأغلبية من المصريين تشجع الأهلي لأنه يعبر عن طموحاتها وإحساسها بأنه نادى يقوم على العمل والاجتهاد والتخطيط وتداول السلطة واحترام المسئوليات والمسئولين فيه
وعموما .. اعتقد بعد الكلمتين دول لن يبقى في الإخوان أو غيرها من التكتلات المحترمة أي زملكاوى

إبراهيم الهضيبي يقول...

يا جماعة دانا لسة بقول وجودهم دليل على سعة صدر الجماعة، وبعدين لا إكراه في الدين، هيبقى في إكراه في الكورة؟؟؟
الناس بطبعها مختلفة، وفي نا غاوية غلب ونكد، ولو مكانوش موجودين كنا هندخل السرور على قلب مين
يجب أن نتقبل الخلاف،ولا نضغط على الزملكاوية لتغيير انتمائهم

خطــاب يقول...


نفس تعليق الاستاذ عصفور المدينة
!!!!!!
هو فى ايه ؟
اعتقد المفترض مننا كمدونين التحدث عن ظاهرة التغييب الكروى الى الناس عايشة فيه
مش وصف احد الاشخاص بانه مغيب لانه لا يعلم ميعاد مباراة !!!

اتمنى من الاخوة قرائة هذا التدوينة

صراخ كثير


Dr_Moslim يقول...

الأستاذ مجدي هذه أول مرة اشارك في مدونتكم الكريمة
لكن اسمحلي أختلف معك
بجد انا زعلت
أذكر مقولة لأحد العلماء ..إذا أردت ان تعرف مستقبل هذه الأمة فانظر ماذا يشغل شباب هذه الأمة
ودلوقتي مستقبلنا بااااااان
بس علي فكرة فيه طائفة من الشعب انت مش جبت سيرتهم خاااالص
طائفة المشايخ لو تعرف تجيبلنا هم بيشجعوا ايه القلعة الحمراء ولا البيضاء ......والله حاجة تزعل يا جماعة
طب شوف المقال ده انا كنت كاتبه في مدونة شحابيط http://shakhabeeet.blogspot.com/2007/05/blog-post_16.html
يعني أصبحت الأمة منقسمة إلي أهلي وزمالك
ثم تحت هذين التقسيمين يندرج تقسيم آخر
إخواني أم ليس من الإخوان

حقيقي كما قال أحد الحكماء
كما تكونوا يولي عليكم
مش تزعلوا بقي من اللي بيحصل لينا
كل واحد همه هو الأهلي لعب وووو
طب سؤال
هو وقتك وانت بتشجع ده يندرج تحت أي طائلة
حلال أم تضييع وقت
طب لو الواحد مات وهو بيسمع مطش هل هيبقي شهيد ؟؟؟؟؟

فرصة سعيدة يا جماعة
وآسف علي غلاستي

عبد الرحمن يقول...

لأ خالص يا دكتور
ولا غلاسه ولا حاجه

بس هوه أسلوب التفكير هوه إللي بيوصل الواحد لوجهة نظره
ولإختلافنا في أسلوب تفكيرنا بنختلف في وجهة النظر

بس أنا مش مصدق إنك فعلا بتسأل السؤال ده بجد
لو مت وانت بتتفرج عالماتش أو لو مت وانت بتعمل إي حاجه ظاهرها إنها مش عباده صريحه
وباطنها واصلها متغير حسب نية كل واحد

المهم أنا رأيي إن السؤال مش في محله

وإن الأهم لو هانتكلم في موضوع الكوره بجد
هوه إننا نتكلم عن النيه
وهل في استفاده ممكن تكون من ورا القصه دي ولا لأ


بس كنت عايز في الآخر أعرف هو حضرتك يا دكتور بتروح عن نفسك في إيه وازاي

Dr_Moslim يقول...

طب الحمد لله أصلي أوقات كلامي يزعل
بس دايما بقول كما قال سيدنا عمر بن الخطاب ((إيه ياحق ما ترت لي صاحبا ))وشكرا عبد الرحمن علي الرد
بس بجد
إيه نية الواحد وهو بيتفرج علي الماتش كلام بجد ..هل هو بيروح عن نفسه مثلا يعني علشان يقوم بعد كده ينفع المسلمين ..هل هو بيتسلي وبيقول ماحنا خلاص أخدنا الاجازة (( مع إن ده مش في الاجازة وبس ))يعني نيتك إيه وانت بتتفرج
لو كانت زي الأولي
هقولك انا بروح عن نفسي ببخرج بره أزور زمايلي ..ممكن أقعد عالنت وأعمل حاجة مفيدة برضه أصمم أي حاجة ((انا بصمم بانرات لموقع الطريق إلي الله )) بتسلي كده
انت عراف إن الإمام ابن القيم الجوزية ألف كتابه الشهير ..زاد المعاد في هدي خير العباد ... وهو كتاب من 4 مجلدات ..ألفه في رحلة حج..وهو من أعظم الكتب...
يعني بيعرفوا يستغلوا وقتهم
طب بأمنانة يا اخي
احنا مش بنضحك علي نفسنا ..زبنقول ترويح عن النفس وووو طب احسب الماتش كام ساعة .. طب شوف تضييع الصلاة ((اه كويس إني افتكرت ...لو انت بتسمع الماتش والأذان أذن و فرضا رحت صليت ...هل تركيزك هيكون في الصلاة ولا في الماتش ...ولا مع صوت التليفزيون اللي بره الجامع مستني حد يقول هيييييه .....ده لو انت طلعت تروح تصلي .....طب لو كسلت وقلت أكمل الماتش علشان اعرف أركز في الصلاة حجة يعني ...تبقي إيه ... طب لو مت وانت كده ومش صليت )))
الموضوع كبير جدا أخي الكريم
شوف انت بتسمع ماتش كام مرة في الأسبوع وبتسمع شريط كام مرة

أنا طولت جامد
أنا آسف بس أنا عندي كلام كتير جدا ومش هينفع أطول أتر من كده

Dr_Moslim يقول...

طب ممكن لو سمحتم
تشوفوا أول موضوع هنا
وتجاوبوا علي الأسئلة اللي فيه
http://analmoslim.blogspot.com/
وآسف علي الإطالة

shab masry يقول...

حد منا شايف الي بيحصل في فلسطين؟؟؟

حد منا شاف بتوع القسام وهما بيستهشدوا واحد تلو الاخر ؟؟؟

حد شاف مصور قناة الاقصى وجسمه ينتفض من الرصاص وهو يوصل رسالته؟؟

ورب الكعبة سنسال عما نفعل...

ورب الكعبة سنسال عن اخواننا الذين تركناهم بدون مرتبات ويتسهدون امامنا ونحن نتكلم عن الماتش والاهلاوية والزملاكوية

اتقوا الله في اخوانكم.. اتقوا الله في اخوانكم.. اتقوا الله في امتكم...


بالمناسبة انا اتابع الكورة في بعض الاحيان وقت ان اكون فاضي.. لكن هذا لا يعني انه في ظل ما يحدث هذا ان اكتب بوست بهذه السطحية والبعد عن ما يحدث لامتنا... من الممكن ان يشاهد واحد الماتش لكن هذا لا يعني في ظل هذه الظروف واليوم 11 شهيد في فلسطين ان يعني ان يضيع المرء وقته في قراءة وكتابه مثل هذا ...

SHAHEENSHY...فوضى منظمة يقول...

مش كنت تقول من زمان يا استاذ مجدي على موضوع الملاحيظ التربويه والفكريه والعقليه..الواحد دلوقتي فهم حاجات كتيييير عن العراقيل العجيبه اللي كانت بتتحط قدام الواحد ... وكمان المرشد أهلاوي .. أنا لو برجماتي كنت بقيت أهلاوي عشان أوصل .. بس أنا زملاكوي على طووووووول زي وائل

محمد النجار يقول...

بوست جميل ودمه خفيف بارك الله فيك يا أستاذ مجدى
بس برده فيه ناس بيأكدوا ان المرشد زملكاوى

سحس يقول...

تدوينة فى الجون يا أبو المجد
وأنا مع الأخ عبدالرحمن

أخت يقول...

على فكرة بقى انا زملكاوية بس بحب النادى الاهلى.هو فى ايه يا جماعة مش كلنا مسلمين ومصريين .بصراحة انا ضد التعصب الزائد ده.وكمان اختلف مع رأى Dr_Moslimلانى شايفة ان الفرجة على الماتش وتجيع نادى معين دون تعصب ممكن يكون نوع من الدعوة .لانه بيكون وسيلة سهلة لكسر الحواجز بينا وبين الناس وخاصة ان فى ناس بتفتكر ان الاخوان دول جايين من كوكب تانى .

ارحم دماغك! يقول...

ههههههههههههه
أضحك الله سنك..

هو بص انا معرفش يطلع مين أهلي ده على وجه الدقة (كل واحد بيقول أهل، أهل مين بالضبط يا جماعة؟)لكن في حاجة باكرهها لما بيقولوا انه كسب..

هي انه كل ما بيقولوا انه كسب، الثورة البلشفية بتقوم في القاهرة..حدش يقول لي هو يقرب إيه للينين؟!..

في حاجة تانية صخننة..يعني يا أخ مجدي، لما أشوف تدوينة زي بتاعت الدكتور ابراهيم الزعفراني زي دي..أحس بالفخر..
انما أكيد هاحس بالنقيض لما أشوف حد بيقول انه في إخوة بيبقوا قاعدين عايزين اللي ينجدهم من إيديكوا ولسنتكوا يعني :D

على فكرة انا مش زمالكاوي..أنا عمري ما رحت الزمالك..بس مش هاقول لكو أنا منين عشان مانضربش في المولد ده..
هههههههههههههه
أنا من (مهد الدعوة)
هههههههههااااااااااااي..
هنشوف دلوقتي ولاءكوا للدعوة ولا للأهلي هههههه

غير معرف يقول...

بصراحة أنا من الإخوان ولا أعرف عن الكرة إلا أنها شيء كروي يلعب الناس به في مساحة خضراء
يا ترى صيامي بالطريقة دي ينفع ولا لازم القضاء؟؟

وقف لله تعالى يقول...

السلام عليكم

يا ريت التريقة و الهزار لا يمتد لأمور الدين

و جزاكم الله خيرا

محمد شمس الدين يقول...

أميل للزمالك، وأرى الأهلى يشبه الحزب الوطني

:)

Ahmed يقول...

بص يا عم مجدى .. بغض النظر عن الكلام بتاعك اللى لا بيودى و لا بيجيب و اللى ميتوزنش بتاع الأخوان و الزمالك و التربويات و أنك خليت اللى ليه و اللى ملهوش بيتكلم عن الزمالك .

بصفتى زمالكاوى كان متعصب و بقالى سنتين بسمع كلام من أصحابى الأهلاوية و مرة لقيت واحد باعتلى ميل فقومت رديت عليه و بعدين قولت مأخلى الرد جاهز يمكن واحد من أخوانا الحمر يتكلم تانى ، أكن الأهلى مفضلش أربع سنين بيتسك على قثاه من الزمالك .

عموماً حبعتلك الرد اللى كنت بعته و يا ريت تبقى تتفرج ع الفيديو بتاع الأيام الخوالى بتاعتك .. علكم تستفيدوا . سلام يا صاحبى و صاحب صاحبى

" ا بنى و الله انتم فرقة تعبانة و لسه شامين نفسكم من سنتين و قدامك سنتين تانين و ترجعوا أبيض يا ورد كالعادة و لو كنت ناسى أفكرك
لما طلعتوا أخر مجموعتكم فى دور التمانية فى أفريقيا و أتغلبتم من التلت فرق اللى معاكم منهم الرجاء رايح جاى و أتغلبتم من فريق نجيرى بالتلاتة فى نيجيريا و طلعت الأغنية الشهيرة اللمبى اللمبى اللمبى .. جان دارك رجاء و مازينبى
و لا المريخ السودانى لما رزعكم تلاتة فى السودان .. و لا الهلال لما غلبكوا واحد هنا يا عينى
طب بلاش فاكر البن الأثيوبى و لا فاكر أتليتكوا اللى رزعكم 4 هنا فى أستاد القاهرة
لو كنت ناسى أفكرك
بالإسماعليى و حلاوة الإسماعيلى لما جبكم كام ماتش ورا بعض كنت بيلاعبكم فيها الفورة من أربعة منهم واحدة أربعة صفر يا عينى
ده غير لما فضلتوا تلاعبوا الزمالك خمس سنين من موسم 99 لموسم 2004 عشر ماتشات مكسبتوش فيهم غير واحد بس ده غير انكم أتسحبتم من البطولة العربية بعد مأتغلبتم من الهلال السودانى و مكنتوش لسه لعيبتم الزمالك علشان متيلوش ماتشين كمان و علشان متقولش بخرف ممكن تدخل لموقع الأهلى الرسمى
http://www.ahlyegypt.com/Arabic/News/press/qemma+no+99.htm
أووووووووووووووووووه أنبى و ما أدراك أيه اللى أنبى عملوا فيكم و لا المقاولين فى نهائى كأس مصر لما كان درجة تانية و أخد منكم الكأس
طبعاً لو قعدت أفتكر مش حخلص فكفاية عليكم كده دلوقتى و الحال من بعضه و الأيام دول و اللى الزمالك بيشوفه اليومين دول الأهلى كان فضل فيه أربع خمس سنين لحد مأشترى منتخب الإسماعيلى
عموماً أتفرج على شوية اللينكات اللى تحت دول و شوف لما جمهور الأهلى كان بيشتم فرقته و لما لعيبة الأهلى كانت بتضرب بعض فى ماتش الإسماعيلى من كتر مأعصابهم كانت تعبانة من الأربعات و كفاية عليكم كده النهارده

http://www.youtube.com/watch?v=GVeiNIwbxTo
http://www.youtube.com/watch?v=KLUuYp6Q_rA
http://www.youtube.com/watch?v=E4TZiGy6QrE
http://www.youtube.com/watch?v=M1KacJ2bvD0
http://www.youtube.com/watch?v=Wd5XXxJY0FI
http://www.youtube.com/watch?v=a1DxggbCcy8&mode=related&search=
http://www.youtube.com/watch?v=TQ9ZMZHZsA4&mode=related&search=
http://www.youtube.com/watch?v=WErXolG9LjM

محمد السيد يقول...

أيوة كده ................

فرحنا ياعم ... فرح كل اأهلاوية وكل الإخوان ....

طيب والله العظيم ... بحبك ياعم ... وأهلاوي كمان .... كده تبقي آخر حلاوة ......

يلا مبروك كل الأفراح اللي ورا بعضها دي ....

ahmedhabiby4 يقول...

بص يا عم الأمور كون انك تبقى اهلاوى ده ملكش اختيار فيه لأن الديفولت انك تكون أهلاوى أما ان تكون زملكاوى ده فعلاً منتهى التمردعلى الواقع المفروض وكون ان شايف ان تشجيع الزمالك خيانه لمبادئ الاخوان ده مالوش إلا رد واحد ده عبيط ده ولا ايه