الاثنين، يوليو 16، 2007

انا اسف ...


انا اسف

ومعترف بالتقصير

ومقر بالذنب العظيم

بس يمكن لو عرفتوا السبب

تعذروني

ويمكن لو وضحت ظروفي

تستحملوني

ويمكن لو بينت اسبابي

تتفهموني

بس نرجع للسؤال المهم

هو انا اسف ليه

انا اسف لاني

مش بعلق علي تعليقات الزوار اللي بيشرفوني بتعليقاتهم

ولاني

مش بعلق او اتفاعل مع تدوينات السادة المدونين الاخرين

بس والله السبب هو انشغالي الشديد في عملي اللي بيستنزف كل وقتي بلا مبالغة وبيحتل كل مللي في ذهني وبيخلليني لا انفذ الا اكثر اولوياتي اهمية وحتي هذه يتم ترحيلها في كثير من الاحيان نظرا لتمدد مسؤليات العمل وازاحة تلك االاولويات الي الصفوف التالية

ولو مش مصدقين

اساله اوسو اوسو اللي اتصل بيا علشان اسافرله وقلت له مش هاينفع

واساله جعلي اللي اتفقت معاه علي اكتر من ميعاد ومقدرتش اوفي

واساله عبد الرحمن اللي بقالي شهر مش عارف اشوفوه علي الرغم من اتفاقي معاه اكتر من ميت مرة

واساله اخواتي في البيت اللي بشوفوهم لدقائق قبل النوم وبنزل صباحا قبل ما يصحوا

وده غير ضغط الشغل وحرقة الدم وانشغال الذهن بتفاصيل ومشاكل وطموحات العمل

والعمل للي يعرفني كويس هاياكد ليكوا انه بيمثلي الان مسالة حياة اموت

والنقطة التانية

وهي خاصة بالرد علي المعلقين علي تدويناتي

وتتلخص في الاتي

انني كنت في بداية التدوين ارد علي كل معلق ولكنني بعد فترة قلت ما بيني وبين نفسي ان انا خدت حقي الكامل في عرض ارائي عن طريق ما كتبته في التدوينة وان الفرصة يجب ان تتاح للاخرين في عرض ارائهم وانشاء فضاء حواري يتفق ويختلف فيه الزوار وان الامر اذا استحق التدخل فليكن التدخل عن طريق تدوينة شارحة او مكملة او موضحة


هذا اجتهادي الذي من الممكن ان يكون صحيح او خطا ولكن هذا حقيقة ما يدفعني لعدم الرد علي المعلقين


توضيح

يعلم الله انني احترم كل مدون او مدونة يكتب افكار اتفق معها او اختلف

وانني اقدر كل زائر او معلق يشرف مدونتي بزيارة او تعليق ويقتطع من وقته ولو ثواني لزيارة مدونتيل ري

وانني مدين بالاعتذار لكل من اساءت لهم سواء عن قصد او بدون قصد

وانني سوف اجتهد في الفترة القادمة ان اقوم بالتفاعل مع الاخرين والتفاعل ايضا مع المعلقين

وفي نهاية التدوينة


سامحوني

ويللا حصل خير

والمسامح كريم

وما محبة الا بعد عداوة

وادي راسكم ابوسها

وياللي قاعدين يكفيكوا شر اللي جايين

وقومي يا بنتي روحي بيت جوزك علشان خاطر العيال

وانت قوم خد ايد مراتك واغزي الشيطان


هو ايه اللي انا بقولوه ده

ده كل مصطلح يدعوا للعفو والصلح افتكرته

ويللا مش مهم

هناك 22 تعليقًا:

غير معرف يقول...

استاذ مجدى مش كده خلاص انا هعيط ايه ده كله انا مش حاسس ان مجدى سعد هوه اللى بيتكل اتمنى يااخى لك التوفيق فى كل تدويناتك وانك تنجح فى شغلك وانك تتجوز وتخلف عيال يخلوك تتاسف انك مابتكتبش اساسا حاتم ثابت

عصفور المدينة يقول...

ويللا حصل خير
جزاك الله خيرا من وجهة نظري أنا أوجه رسالة إلى الكاتب كرد على رسالته التي وجهها لي بكتابة التدوينة مين قال إنك لازم ترد تاني وإحدى الأخوات اشتكت في مدونتي من المدونين الذين يعلقون وهذا أمس وكنت أنوي أن أكتب تطييبا لخاطرها بالنيابة عن هؤلاء المدونين وحضرتك اسديت إلي معروفا بهذه التدوينة سوف أحيلها هنا
وثانيا الذي يكون في بيئة الأعمال يعرف يعني إيه إنسان ما عندوش وقت
واعانك الله

محمود سعيد يقول...

مع أنى مبحبش اللى مبيعبرش التعليقات
باعتبار أنه من الإحتمالات أنه يكون الكاتب متكبر ومعتز برأيه وإحتمالات أخرى حسنة كثيرة ....

ولكن لا بد لى من أن أقول أن طريقة حضرتك فى الرد بتدوينة شارحة موضحة هى طريقة مميزة وممتازة جداً

وكان الله فى العون :-)

saad alshater يقول...

ربنا معاك
وشد حيلك

bahry يقول...

الاخ مجدي سعد

بس يا سيدي انا ما بكلش من الكلام ده

اولا متشكرين يا سيدي علي الاعتذار وكويس انك عراف انك مقصر مع الناس

ثانيا التخريجة اللي انت عملتها لنفسك وفي ناس مدونين مقتنعة بيها فهي تخريجة خزعبلاتية شوية لان طالما حضرتك سمحت بخاصية التعليق يبقي لازم ترد علي التعليقات ومش شرط واحد واحد ممكن مثلا بعد عدد معين وترد علي اللي محتاج رد
مثلا لو واحد بيسأل سؤال أو مش فاهم حاجة في البوست أو صحح معلومة أو شكك او كذب واقعة أو قدم أقتراح أو سأل سؤال
لكن ممكن تتجاهل تعليقات أخري أو ترد ردود مختصرة عليها
مثل تعليقات التشجيع والمدونة ديه جميلة والكلام دا رائع أو الشتيمة والغلط

ثالثا لو انت مشغول اوي يعني ومش لاقي وقت خالص خالص تماما كمبلتلي

ادي الناس احساس انك علي الاقل قريت تعليقاتهم

معلش يا جماعة مش فاضي

حبقي ارد في وقت تاني

شكرا للأخوة المعلقين

منجلكمش في حاجة وحشة

كده يعني

واخيرا تحياتي ليكي واعتذار مقبول مؤقتا

واحد كان زعلان من عدم الرد عليه
ويلا مش مهم
بحري من اسكندرية

هاني جابر يقول...

يا اخي بارك الله فيك
وكان الله في عونك
محدش قال انك لا تقدر اي مدونه
ونحن مراعيين الظروف

mo'men mohamed يقول...

يا عم حصل خير
وربنا يسهلها معاك
ومتقلقش انت معزتك عندنا متخليناش نزعل منك
السلام عليكم

ومضات .. أحمد الجعلى يقول...

ربنا يكرمك يا استاذ مجدى وييسر لك الامور ويوفقك فى العمل وفى حياتك العامة والخاصة.

بالتأكيد شخصيا انا مقدر ظروفك ويكفينى شرفا أن نكون على بالك فى وسط كل هذه الزحمة والانشغالات.

بس برضه ده ما يمنعش إن احنا لينا لقاء ولازم يكون قريب ان شاء الله

غير معرف يقول...

مع انك بتخبط واحيانا بتلخبط
معرفش انا ليه باحبك
اوعي فكرك يروح لبعيد انا هو مش هيه
دي اول مرة اكتيبلك
ما تخدش في خطرك يمكن تكون تخاريف حر اصل حر اوربا مش زي حركم
ابسط يا عم بقيت عالمي
يمكن نتقابل في كمب ولا
لأ يا عم انا باكره البتزا
سلام

مصري إخواني يقول...

المسامح كريم

أمــانــى يقول...

السـلام عليكم
انا جيت هنا عن طريق مدونة
أســتاذنا عصفور المدينة
ليه كل ده اعتذار
أستغربت والله
على العموم
ربنا يوفق الجمــيع ياااااااارب آمــــــــين ويعينك ويعين الجمـــيع يااااااااااارب آمــــــــــين
لازم الناس تخلى بالها شوية وتلتمس الاعذار
التمــس لأخاك سبعين عــذرآ

ام عمر يقول...

جزاك الله خيرا

ibnyosry يقول...

أعانك الله
ويسر لك امرك
ولا يهمك ياباشا
ويلا مش مهم

علاء يقول...

ده موضوع التجمع ياريت أعرف رأيك

المدوّن خانة

يلا مش مهم يقول...

اييييييييييييه
اخيرا هاعلق علي تعليقات المعلقين الذين علقوا علي ما علقت عليه من قبل
المهم

انا سعيد جدا جدا باني معلق تماما زي شعار انا سعيد لاني مدون
نخش في الكلام الجد

حاتم ثابت
صباح الخير وشكرا علي تعليقاتك اللي بتخلليني اتاكد ان الدنيا لسة بخير

عصفور المدينة
والله ببقي سعيد بيك وبشاب مصري والمنوفي لانكم من الناس اللي علي يميني او انا علي شمالهم وعلي الرغم من البون الشاسع بيننا في الافكار الا انكم لما بتلاقوا نقطة اتفاق بترشقوا فيها علي طول فجزاكم الله خيرا

محمود سعيد
الاخوان ابن الاخوان
مرحب بيك يا صاحبيوسؤال هو انت بتجيب وقت ودماغ وصبر منين علشان تقعد تعلق علي المدونين والمدونات الاحياء منهم والاموات

سعد الشاطر
سلامي لوالدك وللمهندس ايمن عبد الغني ولكل الاسرة الكريمة وربنا يفك كرب السيد الوالد ويثيبكم علي ما تقدموه من تضحيات

بحري
يعني اسكندراني
يعني حبيبي لاني بحب اسكندرية
وبموت في رجالة اسكندرية
وبعشق بحر اسكندرية
وروحي بتروح مني لما بشوف ..... اسكندرية ولا بلاش علشان عيب
يا عمنا انت نورت المنطقة وتعليقاتك دي عاملة بالظبط زي طاجن الوقار اللي بالبطاطس من عند زفير في الماكس عارفه ولا
المهم انا سعيد بيك جدا وسلملي علي اخوان بحري كلهم وعلي راسهم الحاج منصور ومحمد نصر المرشد العام لجماعة الاخوان المحسنين

هاني جابر
معرفكش
بس يكفي مدونتي فخرا انها نالت زيارة كريمة منك

جعلوني
واحشني موت
ممكن اسالك سؤال مكرر
هو ليه الاسلام حرم زواج الرجالة ببعض

مؤمن محمود
صباحه عسل يا مؤمن
وشرفتنا
وسعداء بيك
وفي النهاية
تحب تسمع معانا ايه

المجهول االلي من لندن كما يقول
شكرا علي الزيارة
ومتقلقش يا صاحبي انا دماغي مش هاتروح لبعيد وربنا يكون في عونك في لندن وينجيك من حر لندن وحركات لندن
بس انا شاكك فيك لاما انت
عبد المجيد
او
عبد الفضيل
انت مين في دول يا صاحبي

الفاضلة اماني
شكرا علي زيارتك وشكرا علي تعليقك وسعيد جدا بزيارتك ويا رب تتكرر

ابن يسر
ممكن تدعيلي باليسر في كل اموري
وشكرا علي تعليقك

مصري اخواني
ازيك يا عبده
واحشني يا نجم
واخبار التاريخ ايه

المنشد العام للإخوان المسلمين يقول...

The more important than commenting on the comments is reading the comments themselves.
You can be forgivved for not commenting but read at least ya basha...

Sorry for writing in English, as the keyboard that I'm writing from hasn't Arabic.

And as you always say: @yalla mesh mohem@ :):):)

Your brother,
Al-Monshed Al-3am Lel-Ikhwan Al-Muslimeen
http://ellygowwaya.blogspot.com

يلا مش مهم يقول...

نسيت تعليق

ام عمر
هو انت ام عمر مرات ابو عمر اللي ابنهم عمر افندي
اللي راحوا السودان قريب
لو انت هي سلامي وتحياتي ليكي ولابو عمر ولعمر بتوع السودان
ولو انت مش هي
يبقي برضه سلامي وتحياتي ليكي ولابو عمر ولعمر اللي مراحوش السودان
ويللا مش مهم

محمود سعيد يقول...

بما أن حضرتك سألت
يبقى لازم أجاوب

أول هام فى كذا مدونة كده زى A-list بتوعى

باحرص على قراءة كل جديد عندهم وباحرص أنى لو عندى تعليق إنى أكتبه
لأنى باستفيد من التعليق أنى بافكر فى المكتوب وأحاول أجيب عكس المكتوب
أوضح حاجة منسية
أبين إقتناعى وإستفادتى
كذا حاجة كده

أما بقى أهم تعليق
لازم يكون على مدونتى
لأنى باعتقد إنى مدون فاشل بس معلق ممتاز
وبادون فى التعليقات :-)
وبطبيعتى عارف إنى مبعرفش أوصل أفكارى لو شرحتها
بس أعرف أحاور بشكل ممتاز جداً

باجيب وقت لأنى لو فاضى بيكون عندى وقت
ولو مشغول
بيكون فى بركة وقت

أما الدماغ والصبر
الحمد لله ربنا رزقنا بيهم
وربنا يزيدهم كمان وكمان

بس يبدو حضرتك بتقرأ كتير ومتابعنى
منين بتجيب وقت لكل ده وأنت مشغول :-)

شروق الشواف يقول...

ربنا معاك

ahmed hanafy يقول...

ربنا يعينك ويفرج همك ويفك كربك وينجح مقاصدك يا قادر ياكريم
(حنفي)

إخوانية مصرية يقول...

استاذ مجدي
انا غبت يومين
اجي الاقي كل التدوينات دي
ماشاء الله
اللهم لاحسد
والمسامح كريم
دا المسامح بقي
واحنا ان شاء الله كرماء
ربنا يعينك وييسرلك امرك يارب ان شاء الله

غير معرف يقول...

السلام عليكم .شكرا لك على المجهود لكن اتمنى عليك ان تحدد لنا معايير الجودة ولو اني اعتبر ان طبيعة المحتوى من اهمها