الأحد، نوفمبر ١١، ٢٠٠٧

بجد انتوا عالم محترمة


تحية واجبة الي كل زوار المدونة الكرام الذين افاضوا علينا بكرمهم ونبل اخلاقهم وشاركونا لحظات سعادتنا والتي تتضاعفت بهذا الكم الهائل من التهاني والدعوات ومرة اخري لكم مني ومن " هي " الف تحية وكل الدعوات الصادقة لكم بالتوفيق والنجاح والسعادة الدائمة بالدنيا والاخرة وانا علي يقين انني مهما كتبت ودونت لن اوفيكم حقكم ولذا فلن اقول لكم الا

جزاكم الله خيرا

والحمدالله كان اليوم لذيذ جدا وجميل جدا وسعيد جدا

لولا بعض الدسائس والمؤمرات التي تمت بمعرفة كاترين زيتا جونز وانجلينا جولي كان اليوم سيكون من الايام المشهودة في تاريخ الانسانية وكانت


اول تلك الدسائس كالاتي

محمد - مجدي العربية هاتفصل بنزين ادعي ان ربك يستر لغاية لما نوصل لاي بنزينة

مجدي - دوس بس انت وربك هاييسر

محمد - العربية فصلت استني بقي هنا اروح اجيب بنزين وارجعلك

مجدي - " ميت علي نفسي من الضحك " ماشي يا حمادة خد تاكسي بقي بس بسرعة

بعد ربع ساعة رجع محمد وفي ايده جركن بنزين

محمد - مجدي تعالي معايا علشان ندلق البنزين ده في التانك

مجدي - ماشي بس بقولك ايه حاسب لاحسن البدلة تتبهدل بنزين

محمد - ماشي

النتيجة

مجدي ومحمد غرقو بنزين وميتين علي نفسهم من الضحك في الشارع جنب العربية

طبعا بدون اي حسابات او تعقيدات اكيد العملة دي من تدبير انجلينا جولي ريحتها كانت مختلطة بالبنزين بس علي مين عدت علي خير ومحدش خد باله من البنزين اللي مغرق ايدي واجزاء من هدومي


المؤامرة التانية

اميييييييييييييييييييييييييييين

" الفاتحة تم قرائتها من الحضور "

احدهم - يالا يا جماعة علشان عروستنا وعريسنا يلبسوا الدبل

انا - امي هاتي الدبلة علشان هانلبس الدبل دلوقتي

امي - الدبيلة مع اختك يا مجدي

انا - اختي هاتي الدبلة علشان هانلبس الدبل

اختي - الدبلة مع امك يا مجدي

انا - امي اختي بتقول ان الدبلة معاكي

امي - لا يا ابني دا انا سبتها لاختك علشان تجيبها

انا - اختي امي سابتلك الدبلة علشان تجبيها

اختي - لا يا مجدي دا انا فاكرة ان امك هاتجبها

امي واختي في صوت واحد - مجدي احنا نسينا الدبلة

" وفي لحظات كانت اختي تتسلل بين الحضور لتذهب الي اخي الاكبر وتنتزع من اصبعه دبلته وتاتي بها الي لالبسها ولا من شاف ولا من دري ولبستها واتصورت ومحدش خد باله وطبعا كلنا حاسين بالمؤامرة وشامين ريحة كاترين زيتا جونز ورا الملعوب ده بس علي مين طبعا عرفنا نخلع منها وتمت الخطوبة علي خير "

ما زلت عند وعدي بان احدثكم عن " هي " وستكون التدوينة القادمة ان شاء الله

وجزاكم الله خيرا

ويلا الف مبروك

هناك ٢٣ تعليقًا:

غير معرف يقول...

الف الف الف مبروك و ربنا يستر عليك من مؤمرات فزلينا وانجيلينا يا رب نسمع اخبار أحلي و أحلي قريب . بارك الله لكما و بارك عليكما و جمع بينكم في خير

غير معرف يقول...

الف الف الف مبروك يا مجدي وربنا يتمم لك بالخير يارب
ولاء

غير معرف يقول...

سؤال: هي ايه لزمة اللمونة اللي جنب الشبكة اللي في الصورة ده؟

غير معرف يقول...

يا أبو الأمجاد....

طول عمرك بتشتكي من نيكول كيدمان....

إشمعنا يعني هي دي بالتحديد إلي معملتش فيك مغرز من إيَاهم...

واضح إنها بنت ناس ومتربيه !!!

لف مبروك وربنا يتمملك على خير !!!

غير معرف يقول...

كدة برضة يا واد يا مجدي تعملها
آه منك آه ومن عمايلك
وأنا اللي قعدت أقول بيتقل، وبيمثل، يعني بس بيعملهم علينا علشان نصالحو، إنما يطلع الموضوع بجد؟ وتقرا فاتحة؟
ماشي يا مجدي
ماشي يا مجدي
انتظر اللي هعمله فيك في الفيلم القادم

احمدرامى يقول...

بارك الله لك وبارك عليك ياحبيب قلبى

Saad El-Shater يقول...

الف مبروك يا مجدي

وانا طلعت محترم برضة

http://www.khirat-elshater.com/?p=319

:D

وبعدين ولا يهمك الالاعيب بتاعة الناس دول

خليك في الطريق ولا يضيرك كيد العابثين

أندلس يقول...

مبارك مرة تانية يا مجدي
انا حكاية الدبلة دي وصلتني فعلا من (هي)

وبالمناسبة هي ربنا يسعدها ويبارك لها ويتم لكما على خير لأنها قريبة لقلوبنا كلنا

وراها رجالة يا مجدي

خلي بالك منها اوي

عقبال الليلة الكبيرة

مصطفي النجار يقول...

مجدي باشا
بعد اللي حصل دا كله
بصراحة ربنا يتمم الجوازة علي خير
المشكلة شكلها فيك يا صاحبي
مش في انجلينا ولا كاترين

عبدالمنعم محمود يقول...

فيما يبدو لي اني مضطر ابارك ليك يا مجدي
رغم انك حطتيني في موقف محرج للغاية
لكن الواجب برده مينفعش انت تقع في مصيبة زي دي أسف اسف يعني بيقولوا فرحة يعني زي ولازم اشاركك الأفراح
الموقف المحرج اكيد انت فاهمه اني فعلا بقيت الشخص الوحيد اللي متبقي من هذه المجموعة الثقبوية الذي لم يقدم علي هذا الأمر الجلل فيما يبدو لي أنه الزواج
الف مبروك ياعم وان شاء الله انا ححافظعلي المبادئ بتاعة العزوبية
لحد ما ينضحك عليا زيكو
مبرووووووووووووووووووووووووووووووووووووك

غير معرف يقول...

صاحبي
مفيش فايده فيك مدهول
خلي بالك احسن بعد كده ممكن تنسى حاجات مهمه

الف مبروك
وعقبال كتب الكتاب

صح مين فزلين وكريم وصابون دول ؟؟؟؟

أحمد القبرصي يقول...

ألف مبروك
بس هي غلطتنا أحنا كنا لازم فكرناك بالدبل
و لكن ما تخفش حنفكرك يوم الزفاف بمفتاح الشقه
لحسن ساعتها مش حينفع مفتاح شقه أخوك
ينقذك

Unknown يقول...

Alf Alf Alf Mabrouk Ya Magdy
i have no doubt" Heya "is as great as you are
God Bless your life together inshaAllah

Ola

فنان من الأخوان يقول...

يا ألف نهار يا استاذ مجدي يا الف نهار مبروك
بارك الله لكما وبارك عليكما وجمع بينكما في خير
لو عملنا استقصاء علي النت عن اشهر عازب و اجدد عريس هتكون حضرتك الف مبروك
علي فكرة انا بطني بتوجعني جدا ومش لاقي شرايط لام كلثوم

belal يقول...

أمي فرحانة بيك جداً
وبتقولك ألف مبروك
وعقبال لما ترزقوا بأولاد
ونيجي نبارك لك عليهم
هنا في المدونة
ويللا ألف مبروك

Unknown يقول...

ألف مبروك

ومتخفش مش حنحذرها

وياريت قبل ما تتلخم في التلفونات -هه تلفونات بليل- ربنا يسهله تشارك في الحملة دي

أدعوك للمشاركة في الحملة ضد جريدة المصري اليوم

زوروا مدونة مظلومين للتعرف على الحملة وأسبابها وأهدافها

كن إيجابيًا وشارك وقل
لا للكذب والتلفيق

مالك مصطفى

حلم الحرية يقول...

ههههههههههه


هنحاول جاهدين نوصل لكاترين زيتا جونز وانجلينا جولي ونهديهم ونصبرهم بدل ما كل يومين يعملوا خطط ومؤامرات كده

الف مبرووووووك يافندم


تاني نكرر الدعاء
بارك الله لكما وبارك عليكما وجمع بينكما في خير

The Islamic Spirit يقول...

ألف مبروووك يا أستاذ مجدى

بصراحه مش قدرت مش أعلق المره دى

فرحت أوى فعلا

ربنا يوفقكم يااااااااارب

غير معرف يقول...

طبعا بعد التحية و التهنئة أحب أن أوضح أن كل من كان فى الحفل كشفو المؤامرة الخاصة بالدبلة بس عدينها و عملين نفسنا مش واخدين بالنا.
بس انا متفقة جدا مع حضرتك ان اليوم كان لذذ و جميل و انشاء الله كل أيامكم حتكون كدة
ملحوظة:فين الدبلة الآن؟؟
سؤال يطرح نفسه

ومضات .. أحمد الجعلى يقول...

أنا من أول عارف انك مش ممكن هتعدى الموضوع طبيعى كده ولازم هيحصل مفاجآت
وانا قلت لك فى التدوينة اللى فاتت يا اما تقابلنى يوم الخميس يا اما هاتصرف، بس استاذ محمد قام بالواجب وفضى البنزين
(-:

ألف الف مبروووك يا استاذ مجدى ويللا ربنا يعوض على انا والشباب بحد تانى بعديك نتمشى معاه لانك طبعا هتبعنا إذا لم تكن بعتنا بالفعل ومن لقى .... نسى ....

(-;
دى سمايلز واحد بيغمز على فكرة

غير معرف يقول...

ألف مبروك ...بيت سعيد إن شاء الله أهنيك على الخطوة دى وفعلاً طال انتظارها وربنا يسعد ايامك
وبارك الله لك وبارك عليك وجمع بينكما فى خير
ويلا الف الف مبروك
حيدر

عمر أفندى و أبووه يقول...


الف مبروك يا معلم و ان كان انا مبيهمنيش من الموضوع كله غير جملة واحدة

(ولا من شاف ولا من دري ولبستها واتصورت ومحدش خد باله)

فين الصور يا بطل ...ابعت على الخرطوم حالا و عبر ايملك بدل ما ابعتلك سليفا كير يبوظلك ام الفرح ده باللى فيه

مبروك يا صاحبى

أبو الفـــداء يقول...

مبرووووووووووووووووووك...عالخطوبة

مع أنها متأخرة قليلا..

فلن يمنعي الخجل من التهنئة....