الثلاثاء، مارس 20، 2007

اسكت


اسكت
اياك تنطق بكلمة اعتراض
خليك راجل واحترم عهدك مع ربك
وارضي بقضائه وسلم ليه

اياك
يجول في خطرك كلمة"ليه"
هايوصل بيك الحمق انك تناقش ربك في قضائه
متنساش نفسك انك عبده
وانه ارحم بيك من امك

خلاص
نسيت كل النعم الي انعمها عليك ربك
وما افتكرتش الا حاجة حرمك منها بعلمه وحكمته
اعقل وما تخليش الغضب يعميك عن الحق

ابكي
ما تتكلمش
ما تردش علي التليفون
انت بشر ومن حقك
بس خليك زي نبيك يوم ما مات ابنه ابراهيم بكي وحزن
لكن ما قالش غير ما يرضي ربه
انا لله وانا اليه راجعون
ربي
انا راضي بقضائك واسف علي اي انفعال صدر مني
سامحني انا بشر
وانا متأكد ان اللي اخترته خير وانه الاصلح للطرفين
بس معلش ليا طلب عند جنابك
الصبر والرضا

انا مفتقدك جدا
النهاردة بعد ما جالي التليفون كان نفسي
الاقيك قدامي
كان نفسي احط راسي في حجرك وابكي
كان نفسي اسمع صوتك بيواسيني ويصبرني
كان نفسي اشوف نظرة العطف اللي في عينك
ربنا يرحمك

دكتور- انا لما ما لقيتكش اتصلت بانس وفضلت معاه علي التليفون حوالي ربع ساعة
ومقلتش طول المكالمة الا كلمةواحدة "رفضوا"
وطول المكالمة انس بيواسيني وانا مش راضي اتكلم لاني لو اتكلمت هيبان صوت بكايا
وربنا يكرمه رجعني لصوابي وفكرني بكل اللي الحزن نسهولي
واحتمال اسافر له بكرة اسكندرية
وسلام يا دكتور وارجوك ادعيلي لاني مكروب

هناك 27 تعليقًا:

عصام الدين يقول...

وعسي ان تكرهوا شي وهو خيرا لكم

واحد ماتعرفوش يقول...

للدرجة دي؟؟
احم ... معلش ... انا آسف ... ليه يعني للدرجة دي؟؟
انا اتكدرتلك والله
لا حول ولا قوة الا بالله

أحلى ما في الدنيا يقول...

لعله الخير

غير معرف يقول...

جرح الرفض كبير وصعب تقبله ولكن...الخيرة فيما اختاره الله(وعسى ان تكرهوا شيئا وهو خيرا لكم

غير معرف يقول...

لا حول ولا قوة إلا بالله...لا تحزن يا أخي..ساعات الواحد بيكون نفسه في حاجه..ولما متجيلوش يضايق جدا..وبعدها - وده كرم من الخالق - يجيلك اللي احسن منها بكتير ويقول ساعتها الحمد لله ان الشيء الأول مجاش...والزم دائما قول "إن لله وإنا إليه راجعون" حتى يخلفك الله في مشكلتك خيرا منها

بن توفيق يقول...

استاذ مجدى .. مشفتشكش قبل كده بالطريقة دى

استاذى .. قدر الله وما شاء فعل
وان شاء الله ربنا يبدلك بافضل منها

وعسى ان تكرهوا شيئا وهو خير لكم

بس بجد خد معنيين من التدوينة دى .. جامدين جدا

sharkawoo يقول...

لا أحب أن أتكلم أنا ....

ولكن الأمر يقدر بمقدرات كثيرة ....

ولولا علمك بأن الله مقدر ذلك ما كنت لتكتب تلك الكلامات ....

درس عملته إلي أحد تلاميذك ....
وهذا التلميذ عملني إياه ....

تكيف مع الوضع الذي أنت فيه ....

أعانك الله دائماً إستاذنا ....

ووفقك إلي ما فيه رضاااه...

عبدو بن خلدون يقول...

إذا اشتدت بك البلوى

ففكر في ألم نشرح

فعسر بين يسرين

إذا فكرته تفرح

!

الكواكبي يقول...

اخويا وصديقي مجدي
أنا مقدر طبعاً حالتك النفسية واتمنى من الله ان تسقط هذا الأمر من ذاكرتك سريعاً ولي عندك رجاء خاص جداً لا تخلط امورك ببعضها فتشقى
اي شاب بيتقدم لبنت واتنين وعشرة وهو يرفض مرة ويترفض 15 مرة وده شيء عادي جداً
سامحني اذا قلت لك اني حاسس ان جزء كبير من حزنك انك بتضيفه على مجموعة الصدمات اللي قابلتها منحبسة وفقد وظيفة قبل ان تبدأ الى تغيير موقعك الدعوي الى ما غير ذلك من امور قلت لي انها احبطتك
فاكر لما قلت لك ما تتعلقش قوي كده لأنها مش صاحبتك في النادي ولا بتحبها من ايام المدرسة!! انت اتقدمت بشكل تقليدي جداً زيك زي اي شاب مصري بسيط وهما رفضوك زي اي اسرة مصرية عادية وبسيطة
يعني اللي حصل معاك مش خارق للعادة بس هي المشكلة انك اخدت كام قرصة ورا بعض
وعسى يا اخي ان ربنا يكون بيعدك لأمر ما يحتاج صلابة وجلد او عسى انه يكون بيكفر عنك اول بأول وتذكر ان ربك عدلٌ رحيم لا يجمع على عبده شقائين فمن شقي في الدنيا سعد وارتاح في الآخرة
من الآخر . . استرجل وخليك انشف من كده حبة
وعموماً لحد ما تلاقي رفيقة حياتك وشريكتك في الضياع لك في انس مندوحة غن الانحراف ترح تحط همك على همه وتقضوها ضحك

غير معرف يقول...

يا أخي شغلتنا جميعا بالانتظار معك وسط هذه الأحداث .
مع أنني كأب لفتاة مثل من تقدمت لها ليس القرار قراري ولكنه قرار الابنة التي تقدمت لها أو آخرون ملتصقون بها ، لأنني كرب للأسرة بمجرد الموافقة على الزيارة فقد وافقت وأصبحت الكرة ليست في ملعبي،
وهذا أمر متكرر ،
فليس كل من يتقدم يقبل وليس كل رفض له أسباب منطقية .
بل كثيرا ما نحس في أمور الزواج أن الأمر قضاء وقدر أو كما يقولون قسمة ونصيب .
وقد مررت بتجربة مع ابنتي لأخ مثلك ولم أجد مبررا واحدا لرفض ابنتي ، ولكن ماذا نفعل ؟
ولم أجد شيئا أقوله للأخ الذي هو من وجهة نظري الشاب المؤتمن المناسب لابنتي ولكن ليس الأمر بيدي بل اختيار من الله ، ولله في خلقه شئون .
وأحييك على مدونتك الفريدة التي قدمت للقراء صورة من شبابنا الذي يحب ويكره ، ويفرح ويحزن ، ويعاني في عمله ولقمة عيشه وحياته الخاصة ، ويواصل دعوته ، وليس نسخة من غيره.
و لتقدم ببساطة لمن لم يحتك بنا صورة من واقعنا العادي الذي نعيشه نحن الإخوان غير مموه ولا مزوق .
وهون عليك يا فتى

عبدالله يقول...

ايه ياعم مش للدرجه دي
لو موضوع صالونات زيها زي اي حد غيرها عادي ما لازم كل الشباب الي مشرفين في السجون يترفضوا من اغلب الاسر يعني نادر الاسر الي بيتقبل بحد خد سجن قبل كده و ممكن في اي لحظة يدخل تاني
انا بقول بقي نستوردلك عروسه من الشيشان او افغانستان متعودين علي الحاجات دي هناك

كله خير ان شاء الله المهم نحب ربنا اكتر مع كل حاجه بتقبلنا

تحياتي

مصراوي أوي يقول...

الي اخويا وحبيبي مجدي.........انا حديث العهد بمطالعة المدونات........مدونتك شدتني بصراحة لمجرد اني قريت البروفايل بتاعك........ومقدرتش اتمالك نفسي من الضحك مع قفشتك الجميله ياللا مش مهم لدرجة اني معلق عليها دلوقتي........يا عم انت شكلك دمك زي العسل متزعلش بقي اوي كدة انا كنت فاكرك بتهزر هما اللي خسروا وبكرة هتروق وتحلي ان شاء الله يا احلي مدون اخوك مصراوي اوي

غير معرف يقول...

أخى الحبيب مجدى هون عليك هذا شىء عادى بيحصل لاى حد فى الدنيا فلا تحمل نفسك أكثر مما تطيق وانطلق فى حياتك وياسيدى زى ما بيقول أنت مش هتتجوز الا مراتك وتأكد من قضا ءربك فيه الخير وعلى أن نرضى عن قناعة وليس عن عجز وياسيدى يلا مش مهم

عبد الرحمن يقول...

خسروا كتييييييييييييييير أوي
بس يلا.. هما مالهومش نصيب فيك

بس فعلاً أول مره اشوف مجدي بيتكلم بالطريقه دي

من الواضح إن الجرح غاااااااااائر
والمصاب جلل

AbdElRaHmaN يقول...

عمو مجدي
ربنا كبير
ربنا رحيم
كلنا بشر
ومش عارفين الخير فين
تفاءل
وكلم الاخ بتاع التنمية البشرية عندك :)
والاخ المسؤول
وصلي وقول الاذكار وورد الرابطة
وادعليلي يا أخ مجدي
بحبك في الله
سلام

Abdulrahman Mansour يقول...

السلام عليكم
كيف حالك يا عم مجدي

لا تحزن واحتسب عند الله وان شاء الله هو خير لك

من رأيي ان تسافر لأنس صديقك كما ذكرت وتنسي كل شيء هناك

وتجهز نفسك لحياتك مرة أخري، كأن شيئا لم يحدث، وهي أقدار

وكما تعرف في المثل المصري اللي مكتوب علي الجبين لازم تشوفه العين

استعن بالله، أنا عارف انها فعلا بتكون ازمة كبيرة داخل الإنسان او الأخ مننا

ليه واشمعنا وحصل ايه و و..؟؟

لكن ان شاء الله هو خير والخيرة فيما اختاره الله لك

السلام عليكم

أروى الطويل يقول...

ياااه
طيب وعلي ايه ده كله
علي حتة بنت رفضتك طيب وفيها ايه
ان كانت هيه اللي رفضت يبقي ماتستهلش حضرتك وان كان باباها اللي رفض يبقي خير وبعدين لاحظ انك صاحب دعوه يعني في اي وقت ممكن لا قدر الله تتسجن يعني ربنا عاينلك واحده تقدر تصبر معاك
وبعدين اي حاجه ربنا يعملها خير خير خير مش ممكن تطلع غير ما حضرتك شايفها احتمال كبير
يعني الموضوع مش مستاهل خالص

سلسبيل يقول...

قدر الله وما شاء فعل

ربنا يعين حضرتك

واكيد ان شاء الله ربنا هيرزقك الاحسن


لعله خير

يلا مش مهم يقول...

الاخوة الافاضل اصحاب التعليقات
شاكر ليكم جدا مواساتكم ومشاعركم
وصدقوني انا ما كنتش نتوي اعلق
بس لما لقيت بعض التعليقات تمس الطرف الاخر فكان واجب عليا اني اعطيها حقها
اعلموا علم اليقين انه مهما كان حجم المي ومعاناتي فانها تتالم وتعاني اضعافه
واعلموا انها دافعت عن اختيارها وصمدت امام الكثير من الضغوط من اجل الارتباط بي
واعلموا انها شجاعة وفاضلة وتقية اتقت ربها ودافعت عن اختيارها واطاعت اهلها
فلها كل الاحترام والتبجيل والدعاء بالسعادةفي حياتها
وادعوا لها كثيرا بالصبر والرضا وان يرزقها الله بمن هو خيرا مني يسعدها اضعاف ماتخيله معي
وصدقوني اكثر ما يؤلمني هو ان هناك من يتالم اكثر مني
ربنا معاها

عبدالرحمن رشوان يقول...

حقيقة أخى الحبيب أثرت فى جدا ما كتبت

لو أن إرادة الله أن تكون زوجتك فستكون حتى لو رفضوا
ولو أن إرادته بألا تكون زوجتك فلن تكون حتى لو قبلوا

أن الله مقسم الأرزاق من قبل أن نولد وقد قدر أن فلانا لفلانة

إن ألم الدنيا كله ينسى بمجرد غمسة فى الجنة

إن مع العسر يسرا

استثمر دموعك أخى فى تقرب اليه واجعل مفجرها ايى القران وكن على بابه وادعوه دعوة فى جوف الليل فانه قريب

كلمات متفرقات وددت أن أقولها لك عندما قرات ما كتبت

واحـــد مـــــن الـنـــاس يقول...

يا استاذنا

والله هما الي خسرو مش انتا

مع احترامي لاهل البنت دي

دول مش بيبصو الا تحت رجليهم

نظرية نفسي نفسي

وده اللي جايبنا ورا

وبعدين زي ما قال الاخ عصام الدين
عسى ان تكرهو شيئا وهو خير لكم

ايش دراك ان البنت دي ممكن تكون الزوجة الصالحة ليك

قدر الله وماشاء فعل

وعروستك بنت الحلال مستنياك
والقدر جاي جاي

ومسيرنا هنفرح بيك ان شاء الله

غير معرف يقول...

صديقى الحبيب قال تعالى"وَأَقِمِ الصَّلاةَ طَرَفَيِ النَّهَارِ وَزُلَفًا مِنَ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ (114) وَاصْبِرْ فَإِنَّ اللَّهَ لا يُضِيعُ أَجْرَ الْمُحْسِنِينَ (115) فَلَوْلا كَانَ مِنَ الْقُرُونِ مِنْ قَبْلِكُمْ أُولُو بَقِيَّةٍ يَنْهَوْنَ عَنِ الْفَسَادِ فِي الأرْضِ إِلا قَلِيلا مِمَّنْ أَنْجَيْنَا مِنْهُمْ وَاتَّبَعَ الَّذِينَ ظَلَمُوا مَا أُتْرِفُوا فِيهِ وَكَانُوا مُجْرِمِينَ (116) وَمَا كَانَ رَبُّكَ لِيُهْلِكَ الْقُرَى بِظُلْمٍ وَأَهْلُهَا مُصْلِحُونَ (117) وَلَوْ شَاءَ رَبُّكَ لَجَعَلَ النَّاسَ أُمَّةً وَاحِدَةً وَلا يَزَالُونَ مُخْتَلِفِينَ (118) إِلا مَنْ رَحِمَ رَبُّكَ وَلِذَلِكَ خَلَقَهُمْ وَتَمَّتْ كَلِمَةُ رَبِّكَ لأمْلأنَّ جَهَنَّمَ مِنَ الْجِنَّةِ وَالنَّاسِ أَجْمَعِينَ "عبده دسوقى

غير معرف يقول...

معلش يا مجدي حصل خير ونصيبك كدة
وربنا يكتب لك الخير يا رب ان شاء الله
ويعوضك باحة افضل ان شاء الله

غير معرف يقول...

معلش يا مجدي حصل خير ونصيبك كدة
وربنا يكتب لك الخير يا رب ان شاء الله
ويعوضك بحاجة افضل ان شاء الله

قدر الله وما شاء فعل
ولالالالالالالالالالالالالالالالالاء

بنــات العـــــــريان يقول...

ليس كل ما يتمناه المرء يدركه

وان شاء الله ربنا يعوضكو خير

ودع التدبير للخالق فهو الى اعلم انه افضل لحضرتك

وربنا يخفف عن حضرتك

سميه العريان

غير معرف يقول...

أنا مش عارف اقولك إيه بعد الرد بتاعك

من الواضح إنك حبيتها أوي أوي

يعني حتى زعلك هوه إنها زعلانه

والله مشاعر جميله ونبيله بحييك عليها

بس كل حاجه وليها وقت وبتقل حبه حبه لغاية ما تنتهي
فأرجوك كفايه كده وابدأ رد عالتليفون ومارس حياتك طبيعي

غير معرف يقول...

ماعنديش غير كلمة واحدة
لا حول ولا قوة إلا بالله