الخميس، يوليو ١٩، ٢٠٠٧

معلش بقي .. مدونتي

تعالوا نتفق علي شوية حاجات
المدونة مدونتي وبتعكس شخصيتي
احنا مش شبه بعض تماما يعني كل واحد وثقافته وبيئته
انا بدون يبقي بدون براحتي وبدون عن اللي انا حاسه وماثر فيا
لو رسمنا خط وحطينا نقطة في النص هايبقي في ناس علي شمال النقطة دي وناس علي يمينها وهكذا نحن كل فرد منا هناك من هو علي يمينه وهناك من هو علي شماله سواء صفات او افكار او سلوكيات وهكذا


اللي فات ده كله علشان اقولكم اني التدوينة الجاية ممكن ما تعجبش ناس كتير وممكن تعجب ناس كتير والسبب ان احنا مش زي بعض اينعم ممكن يربطنا خيط فكري او تنظيمي او انساني احيانا بس في الاخر كل واحد منا ليه شخصيته واهتماماته و مفرداته المختلفة ودائرة انفتاح تتضيق وتتسع حسب معطيات كثيرة تخص الشخص صاحب الدائرة


تحذير


التدوينة اللي جاية ممكن نقول انها للبالغين فقط يعني للناس اللي فوق 18 سنة ويفضل عدم دخول البنات
اديني حذرت وانذرت ومحدش يزعل ويروح يشكي لنقيبي وانا ممكن اقترح عليكم اقتراح
اللي مش هاضم الموضوع ميدخلش لمدة ستة ايام وبعدها يشرفنا يبقي نزلت تدوينة تانية
اسيبكم بقي علشان اكتب التدوينة


ملحوظة
التدوينة دي هاتتكتب بكيبورد شاب مصري سيبك من انتمائه او اتجاهه
عمره تسعة وعشرين سنة مش متجوز وركز قوي علي الكلمة الاخيرة دي
بيشتغل كل يوم اكتر من خمستاشر ستاشر ساعة علشان ينسي
هتسالني ينسي ايه
هاقولك
والله ما انا فاكر
ويللا مش مهم

هناك ٢١ تعليقًا:

غير معرف يقول...

إنت ناوي تجيب مُزز وحشيش وحلبة محوّجة ولا إيه؟
:)
طيب، ابقي دحرج التماسي يا برنس

غير معرف يقول...

من اخ عنده 31 سنة ولسه متجوزش رلنا يصبرنا
وحسبنا الله ونعم الوكيل

غير معرف يقول...

لو مفيهاش صور اوفيديو
يبقاء دوس يانجم

عصفور المدينة يقول...

استر يا رب يعني أوقف عرض الصور في المتصفح يعني

غير معرف يقول...

إنجز ياصديقى ونزل التدوينه لوقف هذة التكهنات وربك يستر

جمعاوى يقول...

متابع
وتسجيل حضور
وربنا يستر

فوضى منظمة يقول...

ربنا يستر .. بقلك يا استاذ مجدي..انت بتجيب وقت تكتب منين؟؟!!!!!!!!!!!!!انا عارف اللي فيها .. واكتب اللي في نفسك يا استاذ مجدي..بالتوفيق

بيدو يقول...

يا استاذ مجدي كفايا تشويق نزل البوست الناس هتموت من القلق
واتمنى تشريف مدونتي

محمد محيي الدين يقول...

اوبااااااااااااا

ربنايستر :D

غير معرف يقول...

فى انتظارك على احر من الجمر يا ريس

غير معرف يقول...

أستر يا رب من تدويناتك يا عم مجدى.
و ما تكونش زى تدوينات شعار الإنتخابات اللى وصلت الجرايد

عمومالو كنت هتقول كلام مافيهوش مخالفة شرعية و لا يثير بلبلة تنظيمية داخل الجماعة يبقى توكل على الله.
لكن لو أى حاجة من الاتنين اللى فاتو دول ممكن تحصل يبقى أناشدك أن تتراجع

أستر يا رب... أستر يا رب.... أستر يا رب.... أستر يا رب.... أستر يا رب

قولوا معايا يا جماعة

أستر يا رب... أستر يا رب.... أستر يا رب.... أستر يا رب.... أستر يا رب

أستر يا رب.... أستر يا رب.... أستر يا رب
أستر يا رب

دكتور حر يقول...

ده من آثار الشغل الكتير

ولا من آثار البيتزا والكفته

عموما
احنا في الانتظار

وائل_صح ولا غلط_ يقول...

استغفر الله العظيم

لازم نقري كتير يا جماعه عن غض البصر

استعدادا للتدوينه الجايه

غير معرف يقول...

قول إلي في نفسك يا زميلي !!!
والي خايف يروح...

وبالنسبة لإخوانا فِله المعلقين...باقول إن مش كل الاخوان اتربوا في "غرف إنعاش "..يعني مش كلهم زي بعضيهم...
فترحمونا من أم التعليقات "البلاستيك" بتاعة كل تدونة قريبة من الناس !!

في ناس اتربت في مناطق ليها مفرداتها إلي مهما حاولت مش هتقدر تغيرها..مناطق هاي لايف يعني ..زي الحنفى وقواوير والناصريه و قلعه الكبش ...وطبعاً شارع عشرة بصفتي أحد أبناء هذه المنطقة العظيمة في "جنوب الجيزة" !!

يا راجل ده الواحد من كتر "الأكسدة" إلي عايش فيها وسط الاخوان ..بقى مش عارف آخر المستجدات في دنيا الناس...يعني مغيب عن مشاكل الناس وأحلامها
!!
ألا قولي يا مجدي ..هي باكتة البانجو بكام دلوقت ؟!!

إيمــــان ســعد يقول...

:)

اشك انه فى الاخر يطلع فيلم رعب

عموما برضه التشويق ده فن من فنون
marketing

:)

تحياتي

غير معرف يقول...

يا دين النبي!
هات ياعم!..وقوع البلا ولا انتظاره!

belal يقول...

لو شايف إن ممكن حد يستفيد من اللي انتا هاتكتبه...أو هيريحك انتا

..
يبقى اكتب
...
وانا هاغمض عينيا من دلوقتي

عشان مش هاضم الموضوع بطاطان البطة

غير معرف يقول...

المهم تستحضر النية .. وتبقى تقولنا نية ايه

bahry يقول...

الاخ العزيز مجدي سسبنس

تحياتي

احب اعرفك في الاول اني مش أخوان مسلمين ولا حاجة
بس يمكن أعرف ناس منهم أكتر منك
وان كنت اخواني سابق
وبحب وبحترم الاخوان كتيار وكفكر ومختلف
معاه كتنظيم خنقه شويه

المهم

بص يا عم
انا مع ان المدونة معمولة اصلا للبوح والتعبير عن المشاعر الشخصية والمذكرات الخاصة واراء الافراد وليس كما يفهمها كثير من الشباب ومنهم شباب الاخوان منابر للخطابة والتأثير الجماهيري والاستقطاب الحزبي والحركي

ماشي كده؟

بس في حاجة مهمة جدا جدا جدا

لازم نتناقش فيها

رغم ظني بأنك متقصدش الكلام ده

وهي

طالما حضرتك فتحت المدونة للناس وسمحت لهم بالتعليق يبقي يا حلو انت وقعت في الخية ومبقتش المدونة ملاكي وحاجة خاصة 100%
وأصبح للقراء بعض الحقوق عليك وعلي المدونة وإلا من حقك تقصرها علي نفسك بس وتدون زي ما انت عايز وتكتب اللي انت عايزه وان شالله تقلبها عبط انت حر

ولازم تفهم ان الاطار ده انت المتحكم فيه اه بس انت مش كل حاجة في ناس تانية معاك بس الكنترول معاك انت

انا بقول ده ليه؟؟

لأني ملاحظ من فترة أنها بقت فرة في المدونين

كل ما حد ينتقد مدون بشدة أو يختلف معاه يقوم رافع هذا الشعار في وجهه

دي المدونة بتاعتي وبابا هو اللي جيبهالي روح العب بكرتك قصدي مدونتك بعيد عني يا كخة

للمرة الثانية
انا أظن انك لا تقصد ذلك
ولكن جت فيك انت بقا

وعموما

نزل ام دا بوست
ومتخنقناش

بحري من اسكندرية

غير معرف يقول...

انته نجحت بامتياز يااستاذ مجدى فى التشويق وتحفيز الناس لقراءة التدوينة مبروووووووووووووك

إخوانية مصرية يقول...

صراحة قرات اول سطرين تحت اول اكس
وقلت باس خلاص
كفاية لحد هنا اما اشوف الموضوع الي تحت احسن

وعلي راي ايمان
الفيلم طلع رعب فعلا

وربنا يرزقك الزوجة الصالحة
ان شاء الله عن قريب