السبت، يوليو ٢١، ٢٠٠٧

تدوينة x x x


xxx

من المتعارف عليه استخدام حرف الاكس للاشارة الي احتواء مادة الموقع او الاسطوانة المدمجة او شريط الفيديو علي مادة اباحية او غير اخلاقية وكلما زاد عدد الاحرف كلما كان هذا دلالة علي زيادة جرعة الاباحية واالاخلاقية في المادة واقصي عدد من الاحرف يكون ثلاثة احرف اي xxx

هذه معلومة عامة لكم اما لماذا اخترت هذه الاشارة كعنوان للتدوينة لاني تعرضت واتعرض لمواقف او احداث تقع تحت قائمة الاكس ومصادفة كان عدد تلك المواقف ثلاثة ولذا فهناك الاكس الاولي والاكس الثانية و الاكس الثالثة

الاكس الاولي " المنظور من البنات بالضرورة " متتخضش واقرا اللي تحت

بالطبع ستتسائلون عن مغزي العنوان وما هذا الشئ المنظور اليه من البنات بالضرورة ساجيبكم بانه ظهر البنت المصرية للاسف

فبعد ظهور ما يسمي بالبودي الستوميك الذي يظهر بطن البنت انتشر في طبقة محددة وفي مناطق بعينها ولكن حتي يصل الي الطبقة المتوسطة وعموم المستهلكين تم اطالته بعض الشئ مراعاة لاعراف وثقافة المجتمع المصري ولكن تلك الاطالة لم تضمن ستر البطن والظهر بشكل دائم فمع اي حركة من البنت ينحسر هذا البودي ليهتك سترها ويكشفها امام الاخرين وبالتاكيد تعرضتم كما تعرضت انا للكثير من تلك المواقف

في الشارع

اذا كنت شاب غير متزوج وتاخر سن زواجك وتقيم في مصر وتريد ان تحيا محافظا علي فطرتك النظيفة ومحافظا علي التكريم الذي نلته من رب العالمين كبني ادم ومراعيا لتعاليم دينك فعليك ان تاخذ عدة احتياطيات لتتجنب الدخول في معركة بين مبادئك واخلاقك وفطرتك وبين رغبتك وبشريتك وضعفك والتي مؤكد انك ستخسرها احيانا وينجم عن تلك الخسارة الم وضيق وفقدان الاحترام للنفس وتلك الاحتياطيات هي

- تجنب التمشية وارتياد مناطق وشوارع بعينها كالهرم وشارع جامعة الدول ووسط البلد وعباس العقاد واذا كان لزاما عليك نزولها فاحرص علي عدم تطبيق الالية القديمة لغض البصر وهي النظر للارض لانك ستجد جينز استرتش يعلوه جزء من الظهر هتك ستره وتعري وانصحك بالنظر الي اعلي لان صاحبة هذا الجينز الاسترتش وهذه المساحة المكشوفة من الظهر ترتدي طرحة او ايشارب علي راسها وتحرص كل الحرص علي عدم تكشف اي خصلة من شعرها حتي انني تشككت في احدي المرات ايهم اكثر فتنة واثارة حتي يتم ستره

في المواصلات

اذا كنت من معتادي استخدام " الميكروباص " كوسيلة اتنقل لك فاحرص علي عدم الجلوس في المقاعد الخلفية واختر دائما المقعد الذي خلف السائق وذلك حتي تتجنب الدخول في معركة داخلية عندما تهم احداهن بالنزول من السيارة لانها يجب ان تنحني وطبقا لمساحات وابعاد البودي فان الوضع سيكون كارثي لكل الاطراف والاغلب ستكون انت الخاسر الاكبر في تلك المعركة لانك ستعاني اشد المعاناة في اشاحة بصرك عن هذه الكارثة واشغال نفسك بالنظر خارج السيارة او اسفل مقعدك وترديد ذكر الاستغفار او غيره لعدم الانجرار لمعركة خاسرة

ملحوظة " من اكثر ما يثير دهشتك هو المعركة التي تخوضها البنت وهي تنزل من السيارة حيث تسعي وبكل قوة لعدم تكشف جسمها فتلف ذراعها خلف ظهرها وتلتقط طرف ما ترتديه باطراف اصابعها وتجذبه لاسفل وتحافظ علي هذه الوضعية حتي تنزل تماما من السيارة مع انها اذا ارادت لنفسها عدم التكشف وهتك حرمة جسدها كان من الاولي ان تختار من الملابس ما لا يعرضها لهذا الموقف


الاكس التانية " منتهي الشفافية " متتخدعش في العنوان وبص تحت



في اسفل البناية التي يقع بها مقر عملي يوجد محل غير مستاجر وله واجهة عريضة من الزجاج كنت كل صباح وانا صاعد الي عملي انظر فيها لاري مدي انتظام ملابسي ومدي هندمتي حتي صباح هذا اليوم الذي وجدت فيه الكثير من العمال ومعهم ادواتهم يقومون بتجهيز المحل لمزاولة نشاط تجاري لا اعلم عنه شئ ومر اسبوع بالكامل وانا ما زلت محافظ علي عادتي الاثيرة بالنظر الي صورتي في واجهة المحل وجاء يوم الجمعة وغبت عن مقر عملي وعندما عدت يوم السبت قمت بمزاولة عادتي بالنظر الي واجهة المحل ويا ليتني لم افعل لاني وجدت واجهة المحل مليئة بمانيكانات تعرض لانجيري

يا ليلة سودا هي نقصاكم مش كفاية اللي انا فيه

كانت تلك الجملة رد فعلي المبدئي لانه بهذه الواجهة تمت محاصرتي ففي الشارع البودي والجينز الاسترتش وتحت مقر الشركة اللانجيري وعلي صفحة الياهو عندما افتح الميل الخاص بي اعلان عن جزر الكاريبي وما ادراك ما هي جزر الكاريبي فاين المفر

واصبح همي الاكبر هو كسر عادتي اليومية بعدم النظر الي واجهة المحل وفي حالات اخفاقي كنت ما اراه يثير داخلي عقلية التاجر " ركز معايا وماتسرحش " فكيف لمواد قليلة جدا بهذا الحجم الذي يكاد لا يذكر ان تباع بهذا السعر اذا فمن يتاجر في تلك الاشياء يكسب الكثير وخاصة علي ما اعلمه انها مطلوبة بشكل دائم

وايضا كانت تثير داخلي الاشمئزاز من طريقة العرض والتصميمات الفاضحة التي يتم اختيارها للعرض بالواجهة وكنت اتسائل من هي المراءة التي ستقبل بالوقوف امام واجهة كتلك في الشارع وتمنيت في ساعتها لو يتم اصدار قرار يلزم من يبيع تلك الاشياء بوضع لوجو او شعار موحد يتم تنفيذه وتوزيعه من قبل المجالس المحلية ليوضع في الواجهات بدلا من المعروضات الفاضحة الموجودة حاليا ومن تريد او يريد الشراء فعليه بالدخول الي قلب المحل حفاظا علي الاداب العامة

ولكنني بعد تعرضي الدائم لتلك الواجهة التي تتغير المعروضات بها علي ما اظن اسبوعيا وجدت ان هناك ايجابية وهي ان البودي ارحم من اللانجيري وتخيلت للحظات ان النظام المصري لو كان يتمتع بمستوي الشفافية التي تتمتع بها المعروضات التي بالواجهة كانت مصر تخلصت من الفساد الضارب في كل شبر فيها

ملحوظة - المحل لايعرض سوي منتجين الاول اللانجيري والثاني الايشاربات

الاكس الثالثة - " بس انت اعجبها وهي هاتقوم بكل المصاريف " متفهمنيش غلط اقرا اللي تحت

تحتم علي طبيعة عملي ان تاتي الي الكثير من المطبوعات الاعلانية شبيه بالوسيط ولكنها ليست كالوسيط ولذا فستجد الاعلانات التي تعلن بها لشركات او مؤسسات صغيرة او محدودة او غبر معروفة بالمرة وفي احدي المرات كنت اتصفح احدي تلك النشرات فوجدت بها عدة اعلانات عن مكاتب للزواج وكانت صياغة الاعلان مثيرة للدهشة بشكل كبير فهي كانت كالاتي


هل تريدون تضييع العمر والسنين منكم " فلن يفيدكم الندم " بالطبع لا


مهما تكن الظروف الشخصية فلدينا جميع المستويات والطبقات والاعمار جميل جدا


ولتحقيق الاحلام لدينا الفرصة الاتية


عروسة بشقة وعفش لغير القادرين علي الزواج يا فرج الله


ازواج يريدون تامين العروسة بمهر وشقة تمليك ميضرش


سيدات اعمال لمشاركتهم اعمالهم حلو قوي كدة اتعشت


جنسيات مختلفة للسفر معهم والعمل هناك - اعمال مختلفة جميل خالص مصر برضه بقت خنقة


بعد ما قرات الاعلان اخذتني نوبة من الضحك علي المكتوب به ولم اصدق ان من الممكن ان يوجد من يعتقد في هذا الكلام واندهشت من كيف تحول الزواج " اقوي رابطة تربط بين مخلوقين وهو الباب الوحيد لاقامة الاسرة التي هي حجر الزاوية في اقامة اي مجتمع ويالتالي عمارة الارض وتحقيق هدف الاستخلاف " كيف تحول الي عرض تجاري ساذج وتافه كما يوجد بالاعلان ثم تركت الجريدة وعدت الي مشغولياتي


وفي فترة الراحة تذكرت الاعلان وحدثتني نفسي بعمل مغامرة والاتصال بهؤلاء المخابيل اصحاب الاعلان والتعرف علي ما يفعلونه وبالفعل اتصلت وكان الحوار كالاتي


انا - السلام عليكم


هي - وعليكم السلام


انا - حضرتك انا بتصل بخصوص الاعلان اللي في جريدة الشروق


هي - ايوة حضرتك تحت امرك


ملحوظة " اذا اردنا ان نجسد مصطلح الخضوع بالقول في صوت انسانة فسيكون هذا الصوت الذي كنت احادثه "ربنا يهديها


انا - كنت بسال عن المطلوب علشان الاعلان


هي - حضرتك تشرفني بالزيارة وهانعرض عليك الالبوم بتاع الصور واللي تعجبك نحددلك ميعاد علشان تشوفوا بعض


انا - طيب ماشي سؤال تاني بالنسبة لعروسة الاحلام اللي في الاعلان اللي هي عندها شقة وعفش ومش عاوزة اي حاجة خالص هاتبيقي موجودة في الالبوم


هي - لا دي بقي لازم تشتري الاستمارة وتملاها وبعدين نحددلك ميعاد لانهم قليلين جدا والطلب عليهم كبير خالص


انا - طيب ممكن العنوان بتاع حضراتكم


هي - اكتب عندك " والقت علي العنوان " ثم اكملت هو حضرتك هاتيجي امتي


انا - مش عارف بالظبط بس ممكن بكرة باليل


هي - تشرف في اي وقت بس ممكن قبل ما تيجي تتصل عليا علشان اكون موجودة


انا - خلاص هاتصل علي تليفون المكتب


هي - لا خد الحمول بتاعي واتصل عليه


انا - خلاص هاتيه


هي - خلاص هاستني منك اتصال علي بكرة ماشي


انا - ماشي بس سؤال


هي - اتفضل


انا - هو الاستمارة دي مجانا


هي - لا دي بميت جنيه بس


انا - بميت جنيه


هي - انت مستكترهم دا احنا هانجيبلك واحدة خالصة مخلصة مش هاتدفع فيها مليم


انا - والله عندك حق ايه ميت جنيه قدام فرصة زي دي


هي - المهم بس لما نحددلك ميعاد تعجبها وتملي عينها وهي هاتقوم بكل حاجة


انا - خلاص اتفقنا سلام بقي وهاتصل بيكي بكرة


وهكذا انتهت المكالمة واخذت افكر هل اكمل المغامرة ام يكفي هذا القدر وعندما تذكرت المائة جنيه حسمت امري بلا


وهذه كانت الاكس الثالثة والاخيرة


وسكت مجدي عن الكلام المباح


ويللا مش مهم


هناك ٦٧ تعليقًا:

مصري إخواني يقول...

والله انا لا أجد فى وضعنا الذى نعيشه غير هذا الكلام قال الإمام الشهيد حسن البنا: "إذا لامست معرفة الله قلب الإنسان تحول من حال إلى حال، وإذا تحول القلب تحول الفرد، وإذا تحول الفرد تحولت الأسرة، وإذا تحولت الأسرة تحولت الأمة، وما الأمة إلا مجموعة من أسر وأفراد".

" قل مسافر في طريق ما لابد من التزود بكل ما يحتاجه على طريقه بما يهىء له أسباب السير وتحقيق الغاية، وطريق الدعوة- وهو كل شىء فى حياة الداعي إلى الله- أولى الطرق بالإهتمام بما يلزم من زاد" كما قال الأستاذ مصطفى مشهور.

فلقد جمع الإسلام بين جنباته أفضل الوسائل لتهذيب النفس، وتجديد الروح، وتزكية الأخلاق، وعلى المسلم العمل على إحياء قلبه قبل توقفه للأبد، والتزود ببعض معينات الطريق التى تساعد على اجتياز عقبة الدنيا.
اللهم اهدى قومى إلى كل خير وإلى ما تحبه وترضى

غير معرف يقول...

السلام عليكم انا عارف ان حضؤتك مهدت للتدوينه وان المدونه بتاعتك وان اللي مش عاجبه يشرب من الترعه بس قيه معايير منها اننا ضيوفك وبنتابع كلامك فلازم تراعي مشاعرنا والامر الاخر انك دخلت نفسك في مخالفات شرعيه من الاولي اننا نتجنبها وهي اتصالك بالمكتب اياه وارجو منك ان تراعي ان الله تعالي يقول لا يحب الله الجهر بالسوء من القول الا من ظلم

مش هنسى يقول...

ايه مجدى عارف لو كملت المشوار كنت هذكر بال100 جنيه بس ما شاء الله عليك والله ربنا ينجينا ويخرجنا من دنيانا على خير

محمد عباس يقول...

استاذ مجدي استاذي الفاضل

كلام حضرتك كلنا بنشوفه وبنتاذى منه في شوارع القاهرة والاسكندرية

الاول بدعي ربنا انه يثبتنا على طريقه ويحفظلنا غض بصرنا ولا يضعفنا

ثانيا كلام حضرتك موجود ولو تحدثنا في الموضوع بصفة عامة استياءا ولكن تجدنا لا ندخل انفسنا حماية لانفسنا

ثالثا نقطة حضرتك من العلامات البارزة والقيادات الشابة التي ينظر اليهاانها احد شباب الاخوان المنفتحين على الآخر فهذه النظرة وهذه الحقيقة بتحتم او دعنا نقول انها تفرض على حضرتك بعض الاطر التي يجب ان تراعى من نظر هؤلاء

عصفور المدينة يقول...

اقدر أقولك إن مدونتك كدة حتطلع في البحث للراغبين في البحث عن
xxx
ولانجيري وكدة يعني يلا مش مهم
أذكرك بحديث رواه مسلم عن أهل الموقف حين يتجلى لكل قوم ما كانو يعبدون فيتبعمن كان يعبد الجن الجن ويصور لكل قوم ما كانوا يعبدون فيتبعونهم إلى النار
ويظل المؤمنون ومعهم المنافقون فيتجلى لهم ربهم عزوجل فيقال لهم ماذا تنتظرون يقولون

يا ربنا فارقنا الناس في الدنيا أفقر ما كنا إليهم ، ولم نصاحبهم

الخ الحديث
أعانك الله وإيانا وثبتنا وإياك وزوجك وجميع الشباب

Saad El-Shater يقول...

هو موضوع مهم بس مش في المدونات

ودي فعلا مدونتك بس للناس عليك حق

وللقراء عليك حق

اعننا واعنكم الله اخ مجدي

غير معرف يقول...

الأستاذ الفاضل ...مجدي سعد سعدت جداً بالتجول في مدونتك الراقيه ...تحياتي ...

غير معرف يقول...

انا من رأيى يا أخ مجدى تكمل المشوار وربنا يعوض عليك فى ال100 جنيه وابقى قسمهم على زوار المدونة وأكيد هتستفيد حاجة واهى تبقى مغامرة صحفية

محمد عـنـانـى يقول...

ههههههههههههه
كنت اعلم من الاول انك هتعملها كدا كان عندى احساس
كنت عايز اعلق على البوست الى فات قبل ما تكتب ده
بس الحمد الله
بس بجد انت رائع
ربنا يعزك يا استاذ مجدى
وبا النسبه للبوادى انا اتعرضت للموقف بتاع الميكرو باص
وبعدين كان فى بنت وامها قاعدين وراء البنت الى ظهرها بان ومسكوها ظبطوها انا واثق ان البنت بطلت تلبس الكلام الفاضى ده
ربنا يبارك فى الاخوات الى حملين هم الدعوه على كتفهم

belal يقول...

الصراحة يعني .. فيه تفاصيل ماليها لزمة ...بس عل العموم مدونتك وانت حر فيها
...

غير معرف يقول...

الحمد لله انك سكت لكنني احب ان اذكرك يا اخي حبا لك ان هذا الكلام ليس من الكلام المباح ولكنه مكرووووه يا اخي اذكرك بانه ليس كل ما يعرف يقال وان اردت ان تذكر فهناك من الطرق الكثير افضل من هذه الطريقة التي تخدش الحياء

يلا مش مهم يقول...

السلام عليكم
عودة الي التعليق
اولا
انا اسف جدا لكل من تأذي من اسلوب عرضي او مفرداتي التي استخدمتها
ولكنني حذرت من قبل لاني اعرف ما سادونه واعلم تمام العلم عدم توافقه مع البعض ولكن كما سبق ان قلت ان المدونة ملك للمدون والفيصل بيني وبين اي حد هو الخط الاحمر الذي لا استطيع ان اتعداه وهو
الحلال والحرام
فاذا لم اتعدي هذا الخط فما زلت داخل الاطار المقبول
وما دون ذلك فهو راجع للفروق الشخصية التي بين الافراد وثقافة واتجاهات وخلفيات كل فرد وهذا لا ارفضه تماما ولكنني اراعيه في بعض الاحيان واكون علي طبيعتي احيانا اخري
ثانيا
من الممكن ان يكون اسلوبي ومفرداتي قاسية بعش الشئ او منفلتة اذا شئت ان تقول ولكن حجم المعاناة التي يعانيها الشباب في مصر نتيجة لماكينة الاثارة الدائرة ليل نهار من كليبات وملابس وجرائد صفراء دفعتني الي استخدام وسرد تفاصيل كان من الممكن ان اتفادها كما قال احد المعلقين الكرام ولكنني سردتها لتبيين حجم المعاناة التي يمر بها كل شاب مصري تلك المعاناة التي انتقلت الي تفاصيل حياته فمن الممكن ان تنصحني الا اشاهد المحطة الفلانية او ان اشتري الجريدة العلانية ولكنني لا استطيع ان امتنع عن الذهاب الي العمل لان محل اللانجيري تحت مقر العمل ولا تستطيع ان تنصحني بعدم المشي في شوارع مصر ولا ان استقل المواصلات العامة
ثالثا
عناك اساليب عدة في الكتابة منها الجاد ومنها الساخر وانا اخترت في هذه التدوينة الاسلوب الساخر
واخيرا
انا حذرت من قبل وانذرت
ومع ذلك
اسف
لمن خدش حيائهم
وممكن نقول ان في اكس جديدة اضيفت لعالمكم وهي الاكس الرابعة وتسمي
بمدونة
يللا مش مهم
ويللا مش مهم

bahry يقول...

ههههههههههههههه

يا راااجل؟؟؟

والله الاخوان دول عثل عثل يعني

والتعليقات برضه عثل

دا أنا افتكرت الموضوع جامد وأكس بجد وحتفتح عالرابع

انفتاح إيه بس اللي انتوا بتتكلموا عنه ولما الراجل يكتب بوست أنا واحد من الناس ممكن أديله
PG
ودا أخره
يعني ينصح بإرشاد عائلي
تقوموا مسمعينه كلام عجيب
وجهر بالسوء
والضوابط
والحدود الحمراء
والخطوط الزرقة
واللي مقدرش يكمل البوست
واللي اغمي عليه

رغم ان البوست عادي جدا وممكن الاشبال يقروه بإرشاد عائلي

هما مش برضه لسه أسمهم أشبال؟؟

سؤال بايخ شوية لإخونا

هو أنتوا مش من هنا برضه؟؟
يعني من مصر؟؟

بولاق والسبتيه وشبرا

والعصافرة وسيدي بشر والحجاري والكرنتينة؟؟

ولا انتوا من حتت تانية؟؟

ملحوضة هامة يا مجدي

أنت قلت في النص كده كلام خطيييير عن الحجاب

يستحق الاهتمام والدراسة ويمكن تغيير الاستراتجيات بتاعة الاخوان في الموضوع دا

هل الصح التركيز علي الحشمة في دعوة المجتمع؟؟

ولا الحجاب طريقك للجنة؟؟

مش الافضل التركيز علي الجوهر في المرحلة القادمة والالتزام الاخلاقي ودا طبعا مش بديل عن المظهر بس أولي في التركيز

وعموما البوست جامد وبيقول كلام يحتاج لتفكير كتيير

وتحياتي يا مجدي سسبنس

غير معرف يقول...

why do not you just learn to live with your desire and sexual urges!!! Get used to the fact that you have built-in software and hardware that will always make females delicious in your eyes. enjoy the beauty if you happen to see it.

غير معرف يقول...

يا إكساتك يا أبو الامجاد....

بس أنا توقعت إن الموضوع يكون....ولا بلاش !!

ومعلش يا مجدي ...
البلاستيك ساح ..وغرق الدنيا !!!

دعواتك علشان بجهز لسفر تركيا ..وبعدها ماليزيا ..
نشوف العالم دي عملت إيه علشان تبقى كده ..

يمكن ربنا ينفخ في صورتنا ويزيح الصدا إلي على دماغتنا !!

مصطفي النجار يقول...

الاخ العزيز / مجدي
من حقك بالطبع أن تكتب ما تريد في مدونتك ، ولكن عليك أن تسأل نفسك من الجمهور الذي تخاطبه وما الرسالة التي تود توصيلها اليه ، وما هي مخاطر أو تداعيات ذلك ، لقد منحك الله بفضله مكانة متميزة بين شباب المدونين اخوة واخوات وصرت لهم رمزا وعلامة علي الطريق ، وصاروا ينتظرون ما تكتب
فبالله عليك فقط أخبرني من الجمهور الذي تخاطبه هنا في هذه التدوينة وما الرسالة التي تود توصيلها وهل هي فضفضة شاب تعبان زي أغلب شباب مصر وخلاص ولا في في حاجة تانية احنا مش واخدين بالنا منها ومحتاجين سيادتك تفهمها لنا ، ما شعور أي أخت تربت علي الحياء والعفة وهي تقرأ هذه العقد الجنسية التي أفضت في ذكرها بلا أي مبرر سوي أن تخبرنا انك تعبان أوي ، تري هل ستكون نظرتها اليك مثل نظرتها اليك قبل ذلك ، نعم هي مشاعر طبيعية وفطرية تلك التي تشعر بها ولكن لا يصح أن تذكرها في هذا المقام ، ممكن تقولها وانت قاعد مع حبايبك علي قهوة او في تمشية او حتي في اسرتك اللي كلها رجالة بس في مقام كهذا فقد أسأت الاختيار ، وان كان هذا من باب رمي الاحجار واثارة الدهشة فقد أخطأت الهدف والوسيلة ، عزيزي مجدي مع حبي وتقديري لقلمك الذي أعتز به أقول لك توقف وكفي وأذكرك بقول الشاعر
يموت المرء ويفني كل شيء
ولكن يبقي ما كتبت يداه
فلا تكتبن الا ما يسرك يوم القيامة أن تراه
اخي مجدي : يا حادي الطريق جرت

غير معرف يقول...

الاستاذ / مجدي
لم أكن أمتلك الجرأة أو البجاحة حتي أدخل وأعلق علي هذه التدوينة البشعة بوصفي فتاة
مسلمة وتنتمي للتيار الاسلامي
حتي وجدت أخر تعليق وفيه تساءل صاحبه عن احساس أي أخت تحترمك وهي تقرأ هذا الكلام
وأجيبك أنا بأنك خدشت حيائنا جميعا
ولسنا متزمتات او متشددات ولكننا مثل اختك ان كان لك اخت والتي
ستخجل مما كتبت ووصفك البشع ودليلك البديع في اثارة الغريزة ووصف مواطن الابتذال بكل تفاصيلها
بلا أي هدف نراك قصدته سوي الاثارة
ومحاولة جذب الاعلام والتيارات الاخري الي ما تكتب
بجرأة اشتهرت بها بين الاخوان
كما جاء في كلام المصري اليوم السابق
الاستاذ مجدي :
اف لمن يخلطون الغث والسمين
اف لمن لمن سيحملون اوزارهم واوزار من يضلونهم
يا قدوة وضعناها أمام أعيننا كثيرا
وحاولنا أن نتعلم منها
وداعا لتقدير كان لك في قلبي
وداعا لاعزاز كنت أحمله لك
من اليوم أنت ونفسك وهواك والله أعلم بنواياك واللهم احمي دعوتنا
واهدي من شرد عن الطريق
بنت من الاخوان

محمود قطب يقول...

بصراحة ياجماعة ومع أحترامي الشديد لجميع المعلقين
إلا إني شايف إن الإكسات لازم تتحط على التعليقات مش على المدونة ومش تلت إكسات قول خمسين ستين إكس

بعد أذن أستاذ مجدي أنا هعلق من وجهة نظري على بعض التعليقات في ثلاث نقاط

أولا:مع أحترامي الشديد لأستاذي أستاذ مجدي اللي أنا أعتز إني أتعلمت منه حاجات كتيير
الناس اللي عمالة تقول لأستاذ مجدي أنت رمز وقدوة للشباب ولازم تخلي بالك من كلامك
ياجماعة أنتوا نسيتوا إن أحنا مش بنقدس حد وإن مفيش أي حد مهما كان يمتلك الصواب المطلق
وبعدين شباب ايه اللي بتتأثر بالكلام
طب تعليقلت مين ديه اللي بتعبر عن رأي مخالف اللي ملية المدونة

ياجماعة دي مدونة أستاذ مجدي
(الشخصية)
يعني بتعبر عن ثقافته وفكره وأسلوبه وحياته وده الهدف الأساسي من التدوين

أذن مينفعش نطلب من أستاذ مجدي يغير أسلوبه علشان الزوار
ولكن منكن الزائر اللي مش عجبه الأسلوب ميدخلش

ثانيا:ياجماعة الكلام اللي أتقال في المدونة واللي خدش حياء الناس وخلاهم ينهاروا
مش هو ده اللي أحنا بنشوفوه ليل ونهار في الشوارع
مش دي مشكلة بتواجه كل شاب في مصر

نواجه المشكلة ونتكلم عنها ونحاول نشوفلها حل ولا نسكت ونقول عيب نتكلم

وبعدين ديه مظاهر منتشرة جدا
ده في ناس عيشين معانا في بلدنا بس في كوكب تاني شواذ ومخدرات وغيره وغيره
لازم كمان نتكلم عن الحاجات ديه ونفكر أزاي نغيرها
ياجماعة مش أحنا هدفنا أصلاح المجتمع
وهي ديه مشاكل الشباب والمجتمع الي أحنا عايشين فيه
ياجماعة لازم ننزل من البرج اللي أحنا قاعدين وننزل نحس بمشاكل الناس ونشيل همومهم

ثالثا وأخيرا:أنا عايز أفهم ياجماعة يعني أيه مساحة أختلاف بينا وبين بعض

إذا كان كل واحد مختلف معانا في فكرة أو أسلوب في الكلام أوفي أي حاجة
بنعترض عليه ولازم نخليه يقتنع بفكرنا

ولو رفض الأقتناع يبقى هو خطأ وحجتنا نقول على كل صغيرة وكبيرة أصل دي مش مساحة الأختلاف

ياجماعة الأصل إن أحنا أشخاص مختلفين وربنا خلقنا مش زي بعض
لأن الخلاف في جو من الحب وقبول الأخر هيخلينا نعمر الأرض

أنا مثلا مقدرش أكتب الكلام اللي أستاذ مجدي كتبه لأن شخصيتى كده ربنا خلقني كده
ولكني كمان مش زعلان من كلام أستاذ مجدي على العكس أنا سعيد بطرحه للموضوع ده لأن دي طبيعة شخصيته ربنا خلقه كده

وهي دي مساحة الأختلاف اللي ربنا جعلها
علشان كلنا كبشر بالحب والحوار نقدر نعمر الأرض

حزاكم الله خيرا وأسف لأني طولت

محمود قطب يقول...

أستاذ مجدي أنا أسف لأني بعلق تليق تاني

بس التعليق الأول كان على بعض التعليقات ولكن العليق التاني على التدوينة

أنا متفق مع حضرتك تماما في مضمون التدوينة وفعلا لازم يكون عندا الجرأة لمناقشة المشاكل دي وخصوصا إنها أصبحت واقع كلنا نعيش فيه

ولكن ياأستاذي مع العلم أنها مدونتك وتعبر عنك
ما المانع في أن تعرض الفكرة بأسلوب أخر
علشان تحاول توجد مساحات مشتركة مع معظم الناس

يعني فكرة الموضوع ده فوق الممتازة لكن طريق العرض فاقعة شوية

وأخيرا حضرتك وحشني جدا نفسي أشوفك وأقعد معاك

غير معرف يقول...

ياواطي
:D :D :D
ايه الكلام الجامد اخيرا حسيت ان انا مش لوحدي وفي ناس بتحس باللي انا حسوا موقف الميكروباص دا بسم الله ماشاء الله في كل مكان
ومحلات الانجيري والله اول مرة اعرف الكلمة دي معناها ايه بس موضوع التليفون دا موضوع بصراخة شخصي انا متعرضش ليه خلاص
يارب جوزنا يارب
يارب نتجوز كلنا بسرعة يارب
قولوا امين
اخر حاجة الكلام اظن عادي المشكلة مشكلة ثقاة واحد صاحبي خاف يقرا الموضوع عشان العنوان بس ناس كتير عادي ماهوا دا اللي بشفوا وبنسمعه وبنقرا فلما نجي نطرح المشكلة نكسف نقولها ايه الخجل اللي احنا فيه دا

وائل_صح ولا غلط_ يقول...

اولا عاوزين نخلي بالنا ان في ناس بتتدخل تعلق في الزحمه عشان يوقعوا بينا ويخلونا نكتب عن بعض باسلوب مش كويس فأي حد بيعلق ومش عنده مدونه اتمني الا ننساق وراء مايقول ونأخذ النقد البناء فقط من كلامه لانه ببساطه ممكن اي حد يدخل ويشتم ويجرح في شخص المدون ويكتب عند اسم صاحب التعليق انه مثلا واحد من الاخوان وهنا هتقوم الدنيا وتقعد ويتقال ان الاخوان بيخبطوا في بعض فلو كان اسم صاحب التعليق مش معروف لازم ناخد بالنا كويس منه

بالنسبه للتدوينه فانا شايف ان الجو مكهرب الوقتي والتعليقات بدأت حدتها تزيد (ربنا يكون في عونك يا استاذ مجدي)وانا بصراحه هخش اسلك الخناقه بس في الاخر لاني عاوز اتفرج شويه اصل انا بحب اتفرج علي الخناقات موووووووت ههههههههههههه

عبدالله يقول...

اعتقد انه قد جانبك الصواب في عرض ما تريد هناك الكثير ما يتم عرضه بصفه شخصيه و اخر يعرف كمشاكل مجتمع يمكنك الحديث عن ما اردت ذكره بدون الخوض في تعبك مما تتراه
يعني لو حكيت موقف التلفون عادي هيبقي مغامره مسخره
لو احتجيت علي موقف الميكروباص يبقي تمام بتوجه رساله
ادام توري الناس انت تعبان قد ايه ده ممكن تقوله في قعده في سهره في لقاء مفيهوش بنات الي هما مفروض عليك مش تخدش حياءهم بكلمات مالهاش لازمه يعني دلوقتي لما اي اخت تشوفك في اي مكان هتبصلك ازاي وهتفكر انك بتفكر في اي بنت ازاي
البنات الي كانوا بيدخلوا يكتبوا هنا برضه هيبصولوك ازاي مجرد شاب تعبان مفيش محرك في دماغه غير الجنس وبيشوف كل بنت من المنظور ده
في النهايه مدونتك و انت حر فيها ولنا حريه الاعتراض وفي النهايه لا يصح الا الصحيح
حل نهائي تعال نشوفلك شغل في السعوديه
:)
هنا اخر مره شوفت فيها شكل واحده كان من يجي بتاع سنه نسيت الصنف ده خلاص
:)

تحياتي

غير معرف يقول...

انا بنت وملتزمة ومن بنات التيار الاسلامى
هذا تعريف مشابه للى كتبته المعلقة منى
ولكن المحتوى قد يختلف
لانى اختلف معكى منى ... فهذه مدونته الشخصية وللاسف الناس بتفتكر المدونات دى مواقع عامة او منتديات لازم تراعى ضوابط معينة
فى الاخر دى بتعبر عن فكر صاحبها وهو حر فى افكاره
وبعدين ليه التهويل ...
انا بنت وقرأت المقالة ومش فيها كلمة تخدش الحياء كما قلتى ...كل الموضوع انه كتبها بالمصطحات العادية التى نستخدمها واحنا بنتكلم مع اهلنا واصحابنا ..مش المصطلحات اللى بنستخدمها واحنا بنتكلم على المواقع او فى الاماكن العامة كالعمل وما شابه
لا ارى انى بجحة عشان كتبت الكلام ده
ولكنى بكل صدق بكره الازدواجية التى يعانى منها الكثير من الملتزمين

عمر أفندى و أبووه يقول...

مجدى

هذه اسوأ ما قرأت لك حتى الان و ان كنت تعلم و متأكد انى لست من الواقفين ضدك على طول الخط لكنى اقف الان ضدك تماما و ضد هذه التدوينة و ما تحمله من سلبيات تفوق بكثير ما ستجلبه لك من اشباع شخصى.

باسم من السودان

غير معرف يقول...

أستاذ مجدى
قبل ان اكتب تعليقى قرات التودينة اكثر من مرة حتى اجد كلمة واحدة خدشت حيائى فلم اجد مع العلم انى فتاة من الاخوان: وارجو من بعض المعلقين ان يقراوا المدونة السابقة معلش بقي .. مدونتي
كنت اتمنى ان يتم التعبير عن الراى بطريقة اكثر رقيا
الموضوع الذى طرحه استاذ مجدى خصوصا اكس 1واكس2 اصبحوا منتشرين جداا وهذا هو الواقع الذى نحياه للاسف
كان نفسى التدوينة دى كانت تبقى مدونة بنت هى اللى كاتبها علشان نقدر نشارك براحتنامن الجوانب الاخرى للموضوع

Dr cool بادّن في مالطا يقول...

أنا برضه قرأت التدوينة و مش شايف إيه اللي يخدش الحياء فيها بصراحة و لو كان الكلام اللي اتكتب ده بيخدش الحياء يبقى الواقع الحقيقي اسمه إيه

الأخت منى اللي قالت على نفسها إنها واحدة من الإخوان و إن الكلام خدش حيائها ، أعتقد إن حضرتك كنتي ممكن تحافظي على حيائك بإنك ماتقرأيش التدوينة أصلاً مش تقرأيها و بعد كده تقولي خدشت حيائي ، بلاش تستخفي بعقولنا لو سمحتي و بدل ما حضرتك تقرأي تدوينة تخدش حيائك ، اتفضلي روحي موتي نفسك في العمل الدعوي و احرصي على هداية المتبرجات حتى لا يكتب أحد مثل هذه الكلمات التي تخدش حيائك بدلاً من أن تؤذينا بكلماتك الجارحة أنت و من هم / هن مثلك
و لو أنك تقرأين في كتب الحديث لعرفتي أن رسول الله صلى الله عليه و سلم قال من الأحاديث ما يتعرض لأكثر الأمور خصوصية و قال فيها من صريح الكلمات ، اذهبي و لومي رسول الله و قولي له ما يجب أن تقول ما قلت لأنك رسول الله و الجميع سوف يتخذ منك قدوة و الجميع سوف يقرأ كلامك و أنك سوف تخدش حيائنا

التدوينة مميزة ، و تحكي واقع يعيشه الشباب الملتزم و الذي يظن الكثيرين أنهم بالتزامهم لا يتأثرون بشيء و ليسوا بشراً كبقية الناس و يتعاملون مع الشباب الملتزم على أنهم ملائكة و هذا غير صحيح

التدوينة لمست واقع مؤسف لأمة منهارة

التدوينة ألقت باللوم على مجتمع لا يقدر ما يمر به الشباب من محدودية فرص العمل و الأجور المنخفضة ، مجتمع لا يرحم في طلباته التي يطلبها من أي شاب يفكر مجرد تفكير في أن يعف نفسه و يحفظها

التدوينة مواجهة للواقع و ليس هروباً منه و حرجاً من ملامحه

التدوينة رائعة أستاذنا الفاضل مجدي سعد

غير معرف يقول...

اولا لست بعبد المجيد ولا عبد الفضيل
ثانيا التدوينة لا شخصت داء ولا حددت دواء
ثالثا من الواضح ان معظم المعلقين من المترددين علي المدونة ومن باب دي مدونتي وانا حر فيهاكل واحد حر في تعليقه ويمكن يكون البعض عنده احساس انك بتعاني من شيء ما من خلال مدوناتك السابقة ومعانتك في البحث عن بنت الحلال وبالتالي وضعوك في خانة الكبت والحرمان والذي منه
رابعا لما انا كنت في الجامعةمن كام سنه كنت تلاقي كام بنت لبسين لبس ضيق وكده وكنا نقول واو دي البنت دي غنية
سيبك وبعدين مع النمو الاقتصادي وانتعاش الاسواق وارتفاع الدخل ورفاهية الشعب اصبح من الصعب للبنت الحصول علي بلوزة بكم وزاراير 20 جينه وتلبس فيها طول السنة لما يجليها جرب ولكن من السهل والمتاح والذي يرضي جميع الاذواق انك ب 5 جينه تجيب 5 بادي من علي الرصيف من اي مكان اشي احمر واشي اصفر واشي واشي

ويلا بقي مهم

واحـــد مـــــن الـنـــاس يقول...

ايه الكلام الفاجر الداعر العاهر الفاسق المارق اللي انتا كاتبه ده يا استاذ مجدي
يا للهول
يا للفضيحة
ياللمصيبة
ازاي تتجرا وتتكلم وتنتقد وتناقش اللي بنشوفه يوميا في حياتنا !!
ااااااااااااااه
انا اغمى عليا
لقد خَدش حيائي يا رجال

مش عارف ازاي تجرات وعملت كده
لحد دلوقتي
وصلتني الاخبار بوفاة 6 واصابة 23 قارئ للمدونة بهبوط في الدورة الدموية وانسداد في الشرايين الغضروفية . من جراء كتاباتك المارقة ذات الطابع الالحادي التي تهدف الى نشر الفسق والفجور بين ابناء امتنا الطاهرة النقية التقية الورعة العفيفة

لقد شلت يداي وشاب شعر رجلي من جراء قراءة هذا الكلام الفظيييييع الشنيييييييع المريييييييييع


انا اؤيد كلام اخوتنا الكرام في وجوب محاكمتك على كلامك هذا .. واقرار اقصى عقوبة عليك لكي نجعلك عبرة لمن لا يعتبر

ويا حبذا لو اعدمناك وعلقنا راسك
على باب زويلة .. او باب اللوق
................
................
في الاخر بس
بكرر كلام واحد من الاخوة المعلقين

:
انتو مش عايشين معانا في مصر
ولا عايشين فين ؟؟

غير معرف يقول...

عندما يفضفض الانسان فمن الممكن أن تكون فضفته مع أصحابه ومع شلته وفي نطاق ضيق
وشئنا أم أبينا فالمدونات صارت جزءا من واقعنا الاعلامي واليومي العام وليس الخاص ولذلك علي المرء أن يراعي الضوابط العامة قبل أن يختار ما يكتب
خاصة ان كان مجدي سعد وما صار يمثله لشباب المدونين
أما أغنية الحرية والتعبير بلا حدود ولا ضوابط عن داخل النفس وكوامنها
فهي أغنية مملة وسخيفة صارت نكتة بذيئة يرددها كل محب للشهرة بدعوي الحرية
وما كريم عامر ببعيد
ايها المدونون العظماء اتقوا الله
قل هل ننبئكم بلأخسرين أعمالا الذين
ضل سعيهم في الحياة الدنيا
وهم يحسبون أنهم يحسنون صنعا

AbdElRaHmaN Ayyash يقول...

أخ مجدي
بغض النظر عن المدونة شخصية أو غير شخصية
أنا أدعوك انك تحذف التعليقات اللي بتشتم او فيها تعبيرات وحشه .. لأن ده حقنا عليك .. اننا منشوفش حاجات زي دي عندك
------
الموضوع رائع
واقعي
ليس شخصيا مطلقا
يعبر عن تفكير شريحة غير عادية من الشعب المصري
و أستغرب .. هو مفيش اخت مدونة بتعلق ليه ؟؟؟
ربنا يوفقك يا عمو
دعواتك
وسلام

غير معرف يقول...

لا بقي يا أستاذ مجدي دي مش مدونتك وحدك ، دي مدونتنا كلنا
وانت اللي خليتنا نشاركك فيها
ليه دلوقتي عايزنا نمشي وتعمل لنا اقصاء اجباري ، عشان تكتب كلام لا استطيع أن أفهم الأن ماذا كتبته وما هدفك من نشره علي المدونة
الشباب في مصر بيعانونا من الكبت بس مش
ماشيين في الشارع يهتفوا بكدا
ولو حتي عملوا كدا ماينفعش احنا الدعاة الي الله
نعمل كدا ، أين عفة يوسف؟؟
أين حياء رسول الله الذي كان أشد حياءا من العذراء في خدرها
أستاذ مجدي مع احترامي لكل من علقوا وجاملوك ، اسأل نفسك لماذا ؟
اسأل نفسك لمن ؟
اسأل نفسك الي أين ؟؟

واحـــد مـــــن الـنـــاس يقول...

فين الشتايم دي يا عبدو
كله قال رايه بكل حرية وديموقراطية
واحنا كما تعلم بنعيش في ازهى عصور الديموقراطية

واحـــد مـــــن الـنـــاس يقول...

يا اخت ايات

هوا اللي موافق مع كلام الاستاذ مجدي بقا بيجاملو ...واللي مختلف معاه بقا هوا الصح ؟؟؟؟؟

بنت من الاخوان يقول...

الصراحه التدوينه دي جات في وقتها
والظاهرة البشعة دي هي السبب لقيام حملة "يابنات محمد "
وبقالي فتره ناويه اكتب عن الموضوع
وشكله هافتحه عندي لكن باسلوبي
المهم عايزين نفكرفي حل للظاهره دي
حلول فرديه وحلول جماعيه
وانا كفتاه اشرف بالانتماء للتيار الاسلامي وان ازعجتني بعض الكلمات فهي لم تزعجني بعشر القدر الذي تزعجني به الاباحيه المعلنه واللاحياء وغيره
وصراحه طرح مثل هذه الموضوعات يحتاج لجراه "بس يعني حبذا لو........."اكيد حضرتك عرفت الباقي
وموضوع التليفون ده بلاش منه تاني أكرمك الله لحسن الشيطان شاطر
وصراحة اعانكم الله
ملحوظه:
انا ما خدش حيائي حقا هو بعض التعليقات
هدانا الله للصواب

غير معرف يقول...

ألا يوجد ما يخدش الحياء عندكم سوى الاكسات فقط ، ألا يخدش حياءكم عولمة متوحشة تسري في العروق رغم اللحى و الاسدالات ، ألا يخدش حياءكم القبح الحضاري و التراجع الثقافي و الابتزاز العاطفي يا اخت منى ، ألا يخدش حياءكم ذكورة مجتمع نفاقي يحتقر المرأة و ينظر لها فقط كجسد متشيئ ، مابين المساحيق و الماسكرا و بين فقه الحيض و النفاس و رضاعة الكبير ، ألا يخدش حياءكم الاخفاقات و الهزيمة الحضارية و النزعة الاستهلاكية و القيم البطريركية و متوالية الاستبداد و القمع النازل ..ايه الحكاية ...ياناس حرام و الله

المونديال يقول...

موضوع جميل بس انتى غمقتيها قوى

غير معرف يقول...

قد نغضب أحيانا ونقول : فلان أخطأ في التصرف ولكن ألم نفكرمرةأنه
قد يكون تصرف صحيح ولكن بأسلوب خاطئ؟

غير معرف يقول...

أنا متفق مع الأخ عبدالله أن حلك أنك تجي عندنا في السعودية وتسيبك من الهم ده هو صحيح في فساد ولكن مش معلن
فحلك يابني هنا في السعودية ولى مش عاجبه يشرب من الكباية

على فكرة مدونة تمام تمام

مصري إخواني يعيش في السعودية

جمعاوى يقول...

الأخ
( خدبالك من كلمة أخ دى

لابوست ده بصراحة نقطة سودا فى مودنتك

و بغض النظر إنها شخصية أى المدونة

فليس كل ما يعرف يقال
و ليس كل ما يقال جاء وقته

يا اخ مجدى

و بعدين لو إنت متبهدل أوى كده

و عندك 30 سنة و لسه ماتجوزتش

طيب ما أحسن تتجوز

بس بالله عليك ما تتحججش بالظروف و الكلام البايخ ده


و بعدين فى سيرة النبى (ص)

حاجات كتيير تخلى نفسيتك تستريح


يا أخ مجدى

ممكن سؤال لو سمحت

لو لك أخت ممكن تخليها تقعد تقرأ البوست ده معاك ؟

منتظر الإجابة

غير معرف يقول...

السلام عليكم ورحمة وبركاته
وبعد
اخي الفاضل ان ما تكتبه لايعبر الا عن كبت هو بدخلك فلا خجل فانت تقوم بكل هذه الحلات بالفعل انت طالق لبصرك انت تتعمد النظر ولذلك تريد ان تخرج كل ما بداخلك في صورة لوحة قد تكون جميلة المنظر ولكنها وللاسف لاتعبر الا عن نقص ما في شخصيتك وهل من الممكن ان يتطلع البنات على هذا الموضوع(ياشيخ اتلهي ) وبعدين ايه الالفاظ اللي انت كاتبها دي والله العظيم انا مكسوفلاك
ان الاعمي ليس اعمى البصر ولكن الاعمى اعمى القلب

إيمــــان ســعد يقول...

ممممممممم

رأيي انك تتعلم تعمل تشتيت للادراك يا مجدي

خليك واقعي و لا البنات ح تلبس كلها حشمة ولا انت ح تتجوز بين يوم و ليلة

طبعا عليك بالدعاء برضه
*****

أما عن محتوى التدوينة

عادي جدا

:)

استغربت لما لاقيت الناس بتقول ازاى تقول كده و خصوصا البنات يعني

هو الرد المناسب الوحيد

ان من حقك ان تمارس ضعفك البشري
رغم عن ارادتك احيانا

حكاية بقه اننا مفترض نبقى منزهين عن الاخطاء لانكم من المفترض ممثلى التيار الاسلامي

:)

ده كلام غير واقعي بالمرة

لاننا جميعا بشر و لسنا ملائكة

تعرف يا مجدي

من ذاق عرف

الناس اللى بتتكلم ده و خصوصا البنات عشان اتفقعت بصراحة ينطبق عليهم اللى ايده فى الميه... نظام الواحد بيتكلم من خلف جدار سميك يرى العالم كما يريد ان يراه و ليس كما هو موجود فعلا.. بيكون صعب اوى انك تقنعه ان فيه راى اخر مخالف لرأيه

***

حاجة تانية

هو ليه الناس بتحب الازدواج في الشخصية
ليه لما الواحد بيكون صريح

تلاقي الناس اتخضت

كل منا يحب ان يكون دكتور جيكل لكن هذا لا يمنع وجود مستر هايد في جانب من شخصيته

***

معلش باكتب كتير لانى اتخنقت من الناس اللى مش بتحب تشوف غير اللى عايزه تشوفه... تعظيم الذات بعيدا عن نقدها هو ما يحبون ان يمارسونه

***

رأيي

خليك نفسك

تحياتي

غير معرف يقول...

السلام عليكم
أستاذ مجدي انا رأي من رأي محمود قطب و الكلام لكل من يقرأ أو يعلق ما تكلمت َ فيه هو واقع علينا حله و ليس من الخطأ ان تبوح بخواطر تجول ذهنك فأكتب ما شئت مالم تتعدي شريعة الرحمن.

غير معرف يقول...

كن أنت وعبر عن نفسك وحريتك لا حدود ولا قيود تقيدها ويلا نحطر الحنطور ونفيش الهوامش ونعمل أحلي دماغ ما هي بقيت هيصة ، وهبلة ومسكوها طبلة ، وعلي كل حال انتم كلكم عالم مكبوتين بسبب تربيتكم المغلقة
وفكروتني بعادل امام وهو بيبص علي الست
من ورا الشباك
في فيلم الارهابي
بجد لم تختلفوا عنه كثيرا
طيب ما بلاش العقد دي وسيبوا فيلم التدين
دا وخليكوا طبيعين
الحياة حلوة علي الطبيعة
احنا اتعلمنا كدا واحنا صغيرين
مش زي عندكم في الاخوان بتبصبصوا لبعض
وعاملين فيها علينا ورعين
هذه التدوينة تكشف فعلا معدنكم
وتجعلنا نعرف ما بداخلكم
ايها الاخوان المكبوتين جنسيا وفكريا

غير معرف يقول...

أظن ان ناس كتييييير من الملتزميين واقعييين في أكتر من كده وانا واحد منهم و ساعات بفكر في حاجات مش حلوة بس برجع و ادعي ربنا انه يهدينى و يثبتنى و ده نتيجة للبيئة اللي احنا عايشين فيها و لضعفي و عدم ......... ولكن أهنئك علي شجعتك في انك تفتح الباب ده و أظن ان نيتك خير و لازم لازم لازم نتقبل بعض و نعين بعض علي رضا ربنا . بجد جزاكم الله خيرا وهى مدونتك اكتب فيها اللي انت عاوزه .

غير معرف يقول...

الي يسار الي الابد
هل انت أتعلمت ان من ادب الخلاف استفزاز من امامك
هل تسمع عن ادب الخلاف و الأختلاف

و هو معني ان الإنسان بيتكلم في شئ فطري و أفكار بتيجي لاي حد عايش في مثل المجتمع الحالي انه مكبوت وهو انه الإنسان عشان يبقي متفتح معناه انه ميكنش متدين هو المتدين ده مش بشر يعني له شهوات و لكن بيوجها كما أراد الله واللا ال مفروض انه يكون عديم الشهوة عشان يبقي متدين .
لا يا أخي فهذا ليس فيلم التدين و لكن هذا هو التأرجح بين الجسد المخلوق من الطين والروح التي هى من أمر ربي

محمد عـنـانـى يقول...

استاذ مجدى
انافاخور بك
ولكن للاسف اجد الناس ومن يطلقون على انفسهم الاسلامين او تنتمى لتيار الاسلامى لا يعجبون بما فى مجتمعهم
ولا يعقلون ان ما كتبتهو هو طريق من طرق الاصلاح
المواجه والتصالح من النفس اقوى وافضل طرق الاصلاح يا اخونا
ما كتابتهو انا سعيد جدا بقرائته
وارى كل هذه العيوب بل والاسواء منها
ورغم كل هذا نخشا ونخاف من ماذا
الا ننادى با الاصلاح
اليس معرفه المشكله وحلها من الاصلاح
اتقذف الناس بدون حق
لا والله فانت لم تخرج قط
وربنا يعينك ويثبتك وينصر دعوتنا
تحياتى

محمود قطب يقول...

ياأستاذ مجدي نتمنى عليك حذف التعليقات التي تحتوي على كلام خارج

محمد عـنـانـى يقول...

بعد التحيه
اعجبت برد الاستاذ يسارى الاى الابد
وليس لى الحق يا استاذ مجدى ان ارد عليه ولكن ما يجب ان يعلمه هو عن من يتحدث
اتستطيع يا استاذ يسارى ان تصف لنا حياه مواطن امريكا بدون ان تعيش فى امريكا
الم تسمع عن السعار الجنسى
الم تشاهد ماذا يجرى فى شوارع القاهر
وعندما نتحدث نحن قاده الاصلاح
وتختلف الاراء
فنكون مخطائين
غالبا انت لا تعرف ماهى اليساريه
ومن هم الاخوان
غالبا انت ليس مصر او تتحدث عن ابنا مصر
ام كل هذا نتيجه كبت الاخوان
فهناك من يتهم الاخوان با ان النمله ضربت الفار
ممكن
اسف يا استاذا مجدى فكان من الاولا الا ارد عليه ولكن لم استطع

غير معرف يقول...

عادي انكم تتجمعوا علي الهجوم علي شخصي لأنني انتقدت كبتكم وعقدكم الجنسية لكن ليس من المقبول أبدا أن تقولوا نحن أصحاب الأيدي المتوضئة وتقولون هذا الكلام الذي يدل علي عدم غض البصر الذي تتشدقون به
وتأمروننا به كل وقت
انت عارفين فيلم لي لي
ولا ما حدش فيكم شافه؟؟
خليكم فاكرين مشهد عادل امام وهو بيبص علي الست
من ورا الشباك في فيلم الارهابي
عشان دا فعلا وصف واقعي لما أنتم فيه من كبت بسبب تشددكم وتعنتكم
الذي لا يأمربه الدين
فكوها شوية علي نفسكم
عشان ما نلاقيش حد تاني منكم
بيكتب كلام زي دا
ويخلي شكلكم وحش
ياأصحاب الأيدي المتوضئة
وابقوا احذفوا تعليقي

غير معرف يقول...

معلش نسيت أرد علي العلامة محمد عناني
اللي بيقول احنا قادة الاصلاح
اصلاح مين وانتم تعبانين من مانيكات قمصان النوم
وماشيين تبصبصوا لخلق الله
يا عم صلحوا نفسكم الأول وربنا يهدي الجميع

جمعاوى يقول...

الأخ الى الياس داما

غيب أى إنك تحكم على كل الإسلاميين .

بكلام شاب احد بس

ه ده كلام

mahmoud salah يقول...

بص يا معلم اكساوى انت وقعتلى بقه ولا حدش سما عليك
بقه ده اسمه كلام يعنى ربنا سترك وانت عمال بص وبحلقة فى محلات الناس المحترمة على المانيكات وخلافة يا راجل عيب على علاخمة الصلاة اللى تعبت لما علمت فى قورتك
بادى وضهر وبطن ,ووووووو طب هو ايه اللى ناقص يا اكساوى
طب ما دمت متأزم اوى كده يا اكساوى متنوى تعيشها صح وسيبك من الانجيرى لانه بصراحة ما بينفعش يا اكساوى وبعدين كده فطرتك النقية -ده زى ما انت ما بتقول يعنى-ممكن تتلغبط او تتعكر او تتزروت او تتاكسس وتكون هى التانية اكساوية
وبعدين انت عايز تحرم كل الناس من الاماكن اللى انت بتروحها ليه يا اكساوى ؟؟؟؟؟ اه منك ..طبعا مش عايزنا نشوفك هناك بتاكسس فى جامعة الدول والهرم .... بس عايز اقولك اننا وراك مراقبينك يا اكساوى سا نار وحيوية
ثم ليه ما تكونش بتغزى العين عنك ولا انت حاسس بمشكلة ولا حاجة يعنى عادى يعنى لا لانجيرى ولا يحزنون بيهزوا شعرة تحت جفنك يا اكساوى اقولك كفاية بقه يا اكساوى كده اول رد بس عشان انا فعلا مش فاضى الان ويلا مش اكس.

غير معرف يقول...

الى الاستاذ يسار الى الابد
انت كتبت الجملة دى بالنص:
اصلاح مين وانتم تعبانين من مانيكات قمصان النوم
وماشيين تبصبصوا لخلق الله

تعليقى عليها :
طبعا حضرتك بتقول الكلمة دى على الاسلاميين على اساس ان اليساريين امثال حضرتك لما بشوفوا قمصان النوم دى مابتتهزلوش شعرة ولما بيشوف البنا اللى بديهات مابينة بطنها بيبقى ولا كانه شاف حاجة واسما الله عليهم عنيهم فى الارض مابتفارقهاش
طب لو انتوا كدة احب انصحك نصيحة اخوية
روح اتعالج
والنبى صلى الله عليه وسلم لما قال للصاحابى اللى شاف بنت وبصلها قاله اصرف بصرك
ماقالوش ان مكبوت ومعقد لان دى الفطرة والطبيعة اللى ربنا خلق الناس عليها والاسلام ظبطها بان الشاب لما يشوف الحجات دى ويتأثر بيها (وده الطبيعى) يصرف بصره
وابقى طلع الكلاكيع اللى جواك من ناحية الاسلاميين اللى اتعلمتوها من افلام عادل امام
بجد ونعم التربية

غير معرف يقول...

السلامو عليكم:
بصراحه انا اصلا مكنتش اعرف ايه معنى الاكسات ودخلت على المدونه من باب انى بحترم استاذ مجدى جدا وبحب اطلع على مدوناته وان كنت لا احب التعليق بس لما قرات التعليقات اضيقت جدا وقرارت ارد مش علشان ادافع عن حد ولا علشان ادين حد لانى مقتنعه تماما بالحريه الشخصية واعلم ان استاذ مجدى يحترم هذا تمامابس انا هقول احساسى بالموضوع
مش عارفه انا حاسة ان هو الانسان مش كل حاجه بيحس بيها لازم يقولها ومش اصدى حاجه على التدوينه لانها معبرة عن واقع
واخيرا انا عايزه اقول لحضرتك بجد حضرتك غريب اوى ومش اصدى حاجه برده علشان محدش يفهمنى صح اصدى غلط
وبجد استمر لانك عندك فكر جزاكم الله خيرا
مسلمة من الاخوان

ahmed abo eldahab يقول...

الى الاستاذ خالف تعرف من يوم ما سمعت عنك وقابلتك في الجامعه وانا نفسي اقولك الكلام ده انت متعرفنيش صحيح بس انا اعرفك كويس جدااا من ايام حملة (يلا نحب على جنب) و (محمدز داي ) وغيره من الحاجات اللي انت كنت بتقول عليها امر طبيعي وتفتح وتقول علينا متخلفين فيها فده أمر طبيعي اننا نلاقي الكلام ده من حضرتك وتلاميذك قايمين بالواجب اللي شربو كل ده منك برضه وباين في دفاعهم عنك هنا وفي الجامعه كمان دفاع غير مبرر يا استاذ يا ابو فكر ويا ابو طريقه جديده اي فكر واي طريقه ملهاش اساس عندنا يبقى اكيد باطل بيتقال عنك قيادي اخوان مش عارف قيادي للاخوان في ايه (الالفاظ ولا التعبيرات ولا التدوينات ولا الحملات........) احيي كل من انتقدك بشده لانه انسان مسلم قبل ما يكون اخوان وده الرد الطبيعي اما اللي بيجاملوك من اللي اسماؤهم معروفه فالله اعلم بيهم ونوياهم واخيييييييييرااااا
(إذا رأيت
شحا مطاعا

وهوى متبعا

ودنيا مؤثرة

و إعجاب كل ذي رأي برأيه

فعليك بخاصة نفسك ودع عنك العوام)


اللهم اني ابرأ اليك من حولي وقوتي الى حولك وقوتك اللهم اعوذ بك من اعجابي بنفسي ورأيي فأنت أعلم من تكون نفسي ومصائبها

ahmed abo eldahab يقول...

نسيت اقولك انا مين
اناواحد من الاخوان المسلمين رجعي متخلف متشدد متفحم متحجر
زي ما بتقول يعني

وبيتقال لاننا بندور في الاساس بتاعنا اللي هو الاسلام قبل ما بنعمل اي حاجه

وياريت تفكر انك إخواااااااااان
مسلمين
مش اخوان بس

ويلا 1000000000000000 مش مهم

واحـــد مـــــن الـنـــاس يقول...

ahmed abo eldahab

كلمة صغيرة للاخ ده

يعني برضه مصرين ان الناس المخالفة لرأيكم بتجامل الاستاذ مجدي
اللي انا عمري ما كلمته ولا شفته ولا اعرفه اساسا الا من خلال مدونته

ايه القرف ده !!!!!!!!!!!!!

يقين النصر يقول...

ولا يهمك يا أستاذ مجدى..
لا يضرك التعليقات الغريبه ..
بصراحه من حقك أن تتكلم فى هذا الأمر الذى فشا فى كل مكان..
تذكرت أننى عندما أخرج الى الشارع أحاول أن أحفظ لك ولكل اخوتى فى الشارع كرامتهم الانسانيه ..وحقهم فى العيش بشرف فى مجتمع أصبحت فيه العفه بعيدة المنال ..
تذكرت أن المقصد من الحجاب هو العفه والصيانه ليس للمرأة فقط بل للرجل أيضا..
وتبقى رمزا للشباب الملتزم فى كل مكان ..
تنازعه رغبات البشر لكنه يبقى متساميا عن النزول الى الحضيض..
أيدك الله

ahmed abo eldahab يقول...

اولا لاستاذي اللي كتب عن القرف ومش القرف ربنا يكرمك وانت نبهتني لحاجه مهمه بكلامك ده جزاكم الله خيرااااااااا


والمموضوع التاني موضوع نشر الموضوع المنتشر طالما الكلام خرج من عند اخونا مجدي خلاص وفتحه ليه منلمش الموضوع بخطوات عمليه زي ما عمل الناس في موقع حماسنا بدل ما نقعد زي عواجيز الفرح
وكل يوم واحد مننا يشوف واحده لابسه من غير هدوم يفتح مدونه ويحكي عنها
لانه مضافش جديد
وكل الكلام اللي قاله عرفينه المهم ايه الحل

ويارب يكون رغم كل الاختلافات في الاراء اننا منتعطلش عن هدفنا ونخلق اهداف جانبيه ملهاش لازمه وتعطلنا

وكله يشتغل بفكره ودماغه طالما الطريق نهايته واحده

وننصح بعض

ونعذر بعض


واسف لو كان اسلوبي في الردود اللي فاتت كا ن كده بس يمكن لان الواحد مفكرش قبل كا يكب وايده كتبت لوحدهاااااا

اللهم إنك تعلم أن هذه القلوب قد إجتمعت علي محبتك
و التقت علي طاعتك وتوحدت علي
دعوتك . فوثق اللهم رابطتها و أدم ودها
و أهدها سبلها و أشرح صدورها بفيض الإيمان بك و بجميل التوكل عليك وأحيها اللهم بمعرفتك وأمتها على الشهادة في سبيلك إنك نعم المولى ونعم النصير

جميل التوكل عليك

شروق الشواف يقول...

انا مشس هعلق ... لان تعليقي هيجي ان شاء الله في تدوينه منفصله ...لان عندي كلااااااااااام كثييير


بصفه عامه

وبغض النظر عن اتفاقي او اختلافي مع المكتوب واسلوب التدوينه

الجميع بلا استثناء ...ترك المشكلة وتحدث عن اسلوب العرض

غير معرف يقول...

السلام عليكم :اولا اسفه لمشركتى مرة تانى بس انا حبيت اعلق على كلام استاذ احمد ابوالدهب اللى واضح ان هو مختلف تماما مع استاذ مجدى وان كنت لا ادافع عن احد ضد احد لانى ارى ان الجماعه محتاجكوا انتوا الاتنين مع بعض(واقصد بذلك الفكر) يعنى محتاجه فكر محافظ علشان يحتفظ باصلاتها وكذلك فكرمجدد علشان يجدد دمها مع عدم الافراط فى اى من الاتجاهين ولا ده ولا ده وارجوا من استاذ مجدى عند التعليق عدم الهجوم على احد وجزاكم الله خيرا
والسلامو عليكم

عبدو بن خلدون يقول...

بص هنا يا كابتشن

http://nojoomol7era.blogspot.com/2007/08/sxys.html

غير معرف يقول...

بصرف النظر عن اتفاقى على وجود المشكلة واختلافى مع استاذ مجدى فى طريقة عرضها ,انا مندهشة جدا من التعليقات وخاصة من الاخوة والاخوات لأ يا جماعة ما توصلش للتجريح والاهانة.والاختلاف فى الرأى المفروض لا يفسد للود قضية .اما بالنسبة ليسار الى الأبدفأقول لك الحياه حلوة على الاسلام احنا الاخوان اتعلمناها كده

غير معرف يقول...

أنا هموت من الضحك!!!!!!

أين خدش الحياء أو الإساءة إلى الاحترام في كلام لا يدعو سوى إلى المزيد من الكبت والتقنع والتحجب وتخبئة النساء وثيابهن وكل ما يتعلق بهم خلف حجب سميكة كي لا تخدش "رغبة" الرجل؟؟

ما خدش حيائي وأثار حفيظتي في الواقع هو مضمون الدعوى وليس شكلها!!

عيب يا جماعة! عيب يا اخوان!
راجعوا أحاديث الرسول، عن الختانين وتذوق العسيلة وآداب الوقاع والنكاح
راجعوا كتب الفقه والزواج
وكتب السيوطي
وغيره!!

ثم اتعظوا!!

قال ايه اصلاح وأخلاق!

المدونة تدعو إلىالكبت، والجماعة منزعجون لأنها "فاضحة"!!!
إلام تدعون إذاً؟
إلى المزيد من الكبت، حتى على الصعيد اللغوي؟

هل تعرفون معنى الحياء؟
:)

محمود الدوح يقول...

ياه
اكساتك كترت جامد
بس الصراحة
كلام فى الجون

انا كنت عايز اقتبس من التدوينة دى شوية حاجات

غير معرف يقول...

بصراحة انا ماكنتش اعرف موضوع الإكسات التي تسمى بها المواد الإباحية... واعتقد ان علمك بهذه المعلومة دليل ربما على ارتيادك لأماكن مشبوهة، او على مصادقتك لمشبوهين.. يعني دليل على صياعتك
اما وصفك الدقيق لكيفية تعرى جسد الفتاه وكيف تلف يدها لتستر نفسها، كل هذا دليل على انك لا تحاول غض بصرك، ممكن ببساطة انك تنظر في أي كتاب أو من النافذه أو في المصحف، يعني مشض لازم تتابع البنت وهي بتنزل من السيارة.
والأهم بقى إن النبي عليه الصلاة والسلام قال "إذا بُليتم فاستتروا".. يعني انت معرفتش تجاهد نفسك وتصرف نظرك، خلاص استغر ربنا وش لازم تفضح نفسك

انا قرأت الكثير من تدويناتك.. ومعجبة جدا بنقدك لتصرفات بعض المسؤولين في الإخوان، واستخدامهم بعض المصطلحات مثل "الطاعة" وغيرها لترهيب الصف.. لكن لاحظت بذاءة غير معتادة في طريقة وصفك وحديثك عن النساء ..
الأشياء التي تذكرها انت، لم أكن اعلمها قبل ان اتزوج!!! واضح ان نظرك متفتح زيادة عن اللزوم، وإن قراءاتك لا يخلو منها الكتب والقصص الإباحية، وربما الأفلام التي تشاهدها أيضا.... استغفر الله ، واستر نفسك

Hana Kareem يقول...

السلام عليكم، أنا سعيد جدًا الآن لأنني حصلت على قرضي من هذه الشركة الجيدة بعد أن جربت عدة شركات أخرى ولكن دون جدوى هنا رأيت إعلانات هذه الشركة وقررت تجربتها واتبعت جميع التعليمات. وأنا هنا سعيد، يمكنك أيضًا الاتصال بهم إذا كنت بحاجة إلى قرض سريع، تواصل معهم الآن عبر هذا البريد الإلكتروني: (contact@sunshinefinser.com) أو WhatsApp: +919233561861

شكرًا