السبت، سبتمبر 22، 2007

سلي صيامك


حاجات متنوعة كتبتها علشان تسلوا صيامكم وطبعا تسلية الصيام بتيجي بعد اداء الفرائض وقراءة الورد القراءني واذكار الصباح والمساء واداء صلاة القيام وورد الذكر اليومي وكل ما افترضه اي منا علي نفسه للاستفادة من رمضان للفوز بالرحمة والمغفرة وختامها العتق من النيران وربنا يتقبل منا ومنكم
ويا ريتك سنة يا رمضان



اول حاجة - عمتي بطنها بتوجعها قوي
كانت سنين عمري الاولي في بيت العائلة بالسيدة زينب وكان مكان نومي هو غرفة عمتي وكنت عندما اذهب لانام اجد عمتي وقد التفت بغطائها والقت جزء منه علي وجهها وينساب بجانبها صوت ام كلثوم يشدو باحدي روائعها التي كنت لا افهمها وكنت " بستغلسها جدا" في تلك الايام وفي هدؤ الليل وصوت ام كلثوم المنخفض اسمع نهنة بكاء صادرة من تحت الغطاء ومصدرها هو عمتي فانزل من سريري وامشي نحوها واسالها وقد غلبني القلق " ما لك يا عمتي " فكان ردها هو الصمت وعندما اكرر السؤال كانت ترفع الغطاء عن وجهها وتمسح دموعها بظهر يدها وتقول لي وهي تحاول ان تستعيد رباطة جاشها " مفيش يا حبيبي بطني بتوجعني شوية " وارد عليها بسذاجة وبراءة الاطفال " طب ما تروحي للدكتور " لترد مرة اخري " ماشي يا حبيبي بكرة ان شاء الله هاروح للدكتور بس روح نام انت دلوقتي " واذهب الي سريري واغرق في نومي

وفي اليوم التالي يتكرر نفس الموقف وتدور نفس الاحداث وينتهي الامر بذهابي الي سريري لاضع راسي علي الوسادة وافكر لماذا لا تذهب عمتي الي الدكتور " عشان معهاش فلوس " ولا بتخاف منه " عشان ممكن يديها حقنة " ويعييني التفكير والبحث فانام وصوت ام كلثوم يشدو قائلا " يا حياتي انا كلي حيرة ونار وغيرة من الشوق اليك - نفسي اهرب من عذابي نفسي ارتاح بين ايديك " وبجانب شدو ام كلثوم يرتفع صوت بكاء عمتي ثم انام

وبعد فترة ليست بالقليلة جاء الينا احدهم ويدعي مصطفي وكان كل ما اتي هذا الرجل كان البيت يعلن فيه حالة الطوارئ الشاملة فكل شئ يوضع في مكانه الصحيح ووالنظافة والنظام يكونون شعار الكل في هذا اليوم وبالطبع يتم اعداد مائدة عامرة من كل الاصناف وهذا ما كان يحببني في هذا الضيف الذي لا اعرف موقعه في العائلة وبالاضافة لكل هذه الاحداث حدث امر غريب جدا فمنذ جاء هذا الرجل وعمتي لم تعد بطنها " بتوجعها " واصبحت كل يوم قبل النوم تستمع الي ام كلثوم وتنظر الي السقف ولكنها لا تبكي بل تنظر الي الفراغ وترتسم علي شفتيها ابتسامة رقيقة من حين الي اخر مما كان يثير دهشتي ويدفعني الي سؤالها " هو انت بتضحكي ليه يا عمتي " ليكون جوابها هو " مفيش حاجة يا حبيبي نام انت بس " لاذهب الي سريري وانام

وبعدما تجاوزت سنين الطفولة وتعديت برائتها علمت ان عمتي تزوجت في سن متاخرة واصبحت اقول لهذا الزائر يا عمي مصطفي واصبح اولادهم هم ابناء عمتي
وفهمت وقتها لماذا كانت تبكي عمتي ولماذا كانت تنظر الي السقف ولماذا كانت تبتسم بدون داع
ملحوظة

عمتي - انا بطني بتوجعني قوي

ويلا مش مهم

هناك 18 تعليقًا:

alnagar يقول...

جميلة قوي يا عم مجدي الذكريات دي
بس يبدوا انك كنت مشاكس من صغرك
وقوي الملاحظة والحمد لله ان وجع بطن عمتك راح وبقت كويسة، عقبال وجع بطنك انت كمان يروح
وانصحك بنصيحة بوصفي طبيب
خلي رمضان دا ليك فيه دعوة مخصوصة
تدعوا بها في كل سجدة
وتلح علي الله بها
وهي اللهم زوجني زواجا عاجلا غير أجل
وارزقني بمن تقر بها عيني وتهنأ بها نفسي
وتأكد ان مش هييجي رمضان الجاي
الا وانت في قفص الزوجية وقد فقدت حريتك وربنا يوفقك ساعتها

محمد القط يقول...

جميل يا مجدي....
ربنا يخفف بطن كل البنات...والشباب كمان..

محمد العنانى يقول...

انا اسف جدا على الضروب الى حصل
بجد انت اول ما قفلت انا افتكرت
انا اسف
لو امكن ممكن تضيف اميلى
gahadelmasry@yahoo.com
تحياتى

إيمــــان ســعد يقول...

و هل ده ينفع نوصف له اقراص بسكوبان برضه ؟

:)

تحياتي

أبو الدوم يقول...

لو كان الامر كده فانا عندي عسر هضم و اسهال و امساك و ..............و حاسس ان بطني هتفرقع من كتر ما هية فاضية .
سلامتك يا قلـ..اقصد يا بطنى.
يا عمته الحقي بطنه أاا بطني أاا بطنه
بطنى ....ياااه الحقينا يا عمتى.

دكتور حر يقول...

ظريييييييييييييييييييييييييف

لكن عموما عقبالك من غير ما بطنك توجعك

وجميله حكايات الطفوله

كل سنه وانت طيب

bahry يقول...

جاج وجع في بطنك

ابن حـجـر الـعـسـقـلانـى يقول...

آآآآآآه يا بطنىىىىىىىىىىىىى

عمرو طموح يقول...

سلامة بطنونتك يا أساتيذو

خد أسبرين... بس من النوع العاطفي:)

غير معرف يقول...

حلوه اوى جميلة جدا جدا عسوله خالص بجد فظيعه بجد اتمنى لحضرتك ان بطنك متوجعكش خالص وتخف بسرعة قول امين
يلا بقى سلام

غير معرف يقول...

if you remmbered these old stories in Ramadan, and you have some stomach troubles----- this means you are extra-hamonic man, salam, Abdelfadil

غير معرف يقول...

الف سلامة عليك سا مجدى بيه انشالله اللى يكرهوك ...على فكرة انا بطنى بتوجعنى انا كمان
عمار المنصورة

MOSLIM يقول...

بالرغم انى كلامك وجاعلنا بطننا
بس هو افضل من مدونات ناس كتير بتوجعلنا دماغنا
بكلام مالوش لازمة
وكل سنة وانت طيب

KIMOOOZ يقول...

انت عايز تفهمنى ان الالولا الصغير اللى انت حاطط صورته ده هو انت و انت صغير

طيب

هحاول اصدق انه لما يكبر يبقى شبه الكائن الفضائى اللى انت حاطط صورته فى البروفايل بتاعك

شذى مولوتوف يقول...

ياه ايه ده
انا لو من عمتك وفى حد قرفنى كده
كنت استنيته اما ينام وخنقته

العيال الصغيرين دول سوووووووووس

بس فى الاخر
هادعى لحضرتك واقول شفاك الله وعافاك

حلم الحرية يقول...

ممممم

معرفش

ما اخدناش دوا وجع البطن ده في صيدلة

ـــــ
شفاك الله وعافاك
وشفا الله وعافى كل الشباب والبنات اللي بطنهم وجعاهم

انا مش بتفلسف علي فكرة يقول...

ههههههههههه
ايه يااستاذ مجدى فى ايه؟انت واخد عائلتك فحط وردم مرة العصافير بتاعت خالك ومرة عمتك ربنا يستروميكنش حد منهم ممكن يقرا الموضوع ده بس بجد والله ضحكت كتير

AbdElRaHmaN Ayyash يقول...

يااه
و الله و صبرت و نلت يا عمو مجدي
هاااانت يا باشا