السبت، سبتمبر ٢٩، ٢٠٠٧

سلي صيامك 3


انا بحب درب الجماميز

عارف انك هاتبرق او هاتبرقي وممكن تعيدوا قراءة الجملة تاني واكيد بعدها هاتضحكوا وممكن حد ينادي اخوه او اخته ليريها عجيبة من عجائب الدنيا السبع واحتمال اللي هاييجي يتفرج علي تلك العجيبة ينطقها " درب الجواميس " او ضرب الجماميز " او اي حاجة تنفع تريقة علي الاسم

بس لازم تعرفوا ان درب الجماميز هو اسم الشارع اللي اتولدت فيه واتربيت فيه واذا كان ينفع شخصيتي تتحول لبازل كانت قطعي هاتتجمع من كل شبر فيه وان انا بحب الشارع ده جدا وفخور باسمه وبقولوه في كل مكان وفي اي حتة علي الرغم من كم الضحكات والتريقي اللي بسمعها يعني في مرة كانت بنت من خدمة العملا في فودافون بتتصل بيا علشان تاخد بيانات مني وتعرض عليا خدمات جديدة ولما سمعت اسم الشارع فطست علي نفسها من الضحك ومقدرتش تكمل المكالمة وقفلت السكة وفي مرة تانية كنت بخلص ورق رسمي والراجل بص في البطاقة ولاقيته بيبصلي نظرة كلها اندهاش وبيقولي اسمه ايه فسالته "هو مين " قالي " الشارع بتاعكم " قلتله درب الجماميز " قالي " بس ده حرام " قلتله " هو ايه " قالي الضرب في الجماميز حرام " ثم انفجر ضاحكا

وهكذا دائما ما اقابل تلك التعليقات كلما سمع احدهم باسم الشارع بس انا برضه فخور بيه وبدافع عنه وبحبه


انا بحب درب الجماميز

انتوا عارفين لو شفته الشارع ده علي حقيقته هاتحبوه جدا بجد ولو عرفتوا قد ايه هو ضارب بجذوره في تاري القاهرة القديمة هايتمني كل واحد فيكم انه يكون من شارع درب الجماميز


انا بحب درب الجماميز

من اقدم شوارع القاهرة عمره اكثر من 350 عام وكان موازي لشارع الخليج المصري اللي هو دلوقتي شارع بورسعيد وشارع الخليج المصري كان كورنيش القاهرة القديمة يعني شارع درب الجماميز كان علي نيل القاهرة مباشرة ولو اتمشيت في الشارع وخليت قهوة عيسوي علي يمينك هايبقي معاك خمس دقايقي وتوصل لميدان السيدة زينب ولو خليت عم يوسف النجار علي يمينك يعني كدة قهوة عيسوي علي شمالك واتمشيت هتلاقي بعد عشر دقايق ميدان باب الخلق وبعدها بعشر دقايق الحسين والازهر ولو خرجت من حارة جاد هتلاقي في وشك شارع مجلس الامة اللي اذا اتمشيت فيه هتلاقي ميدان التحرير علي بعد عشر دقايق ولو اديت ضهرك لدكانة عم عبده البقال ومشيت هتلاقي نفسك نزلت علي ميدان بركة الفيل " محدش يضحك " ومنها علي قلعة الكبش " اللي هايضحك هازعل منه " وخمس دقايق تبقي عند سبيل ام عباس وبعدها قلعة محمد علي


انا بحب درب الجماميز

كانت فيه مدرسة الفنون الجميلة اللي بقي بعدها كلية الفنون الجميلة وكانت فيه مدرسة الهندسة الملكية اللي بقت بعدها كلية الهندسة بجامعة القاهرة وفيه مدرسة بنبا قادن الثانوية اللي كانت مقر مدرسة الهندسة الملكية سابقا ومدرسة الخديوية الثانوية اقدم مدرسة بمصر اكثر من 160 عام منذ انشائها

خرج منه الشيخ محمد رفعت والمثال محمود مختار ولم تخلو اي رواية من روايات ثلاثية نجيب محفوظ من ذكر اسمه وكان مسرح للعديد من الاحداث في تلك الروايات وغيرها للعديد من الكتاب


انا بحب درب الجماميز

لو مشيت في الشارع وخليت قهوة عيسوي علي شمالك لغاية لما توصل تقاطع شارع سكة راتب مع الجماميز ودخلت يمين هتلاقي نفسك في الحلمية القديمة وهنا كان الاماما حسن البنا ساكن ولو كملت شوية صغيرين هتلاقي قسم الدرب الاحمر اللي كان المقر العام للاخوان زمان وكان درس الثلاثاء يلقي اسبوعيا في ميدان الحلمية

لو مشي في درب الجماميز وخلين قهوة عيسوي علي يمينك لغاية تقاطع الجماميز مع شارع قدري خش شمال في قدري وعد اربع عمارات علي شمالك هتلاقي عمارة صفرا العمارة دي استخبي فيها الطيار عبد المنعم عبد الرؤوف مسؤل الاخوان في الجيش المصري وقتها وكان مختبئ بعدما فشلت محاولة تهريب المناضل عزيز المصري بطائرته وسقوطها

لو كملت في شارع قدري هاتوصل للخضيري ومنه لسبيل ام عباس ولو بصيت علي شمالك هتلاقي حارة واخدة الناصية بتاعت السبيل الحارو دي خشها وعد حوالي سبع بيوت هتلاقي بيت قديم البيت ده اللي اقسم فيه عبد الناصر وخالد محي الدين والسادات علي الانضمام للتنظيم الخاص للاخوان

ولو كملت كمان شوية هتطلع قلعة الكبش اللي منها احمد عبد المجيد اللي قتل النقراشي باشا ومن ساعتها والاخوان يعيروا بهذه الحادثة

لو رجعت لدرب الجماميز مرة تانيه وخرجت من حارة جاد لشارع بورسعيد ومشيت لغاية شارع الجمهورية ومنه لقصر عابدين وهتلاقي هناك ميدان عابدين الشهير اللي وقف فيه عرابي واتباعه في وش الخديوي وكمان الاستاذ عبد القادر عودة والاخوان لما خرجوا يطالبوا برجوع الجيش لسكناته وتسليم السلطة للمدنيين


انا بحب درب الجماميز

بعد كل اللي قريتوه ده بالله عليكم محبتوش شارع درب الجماميز

وبالله عليكم من حقي اني افتخر بيه

ومن حقي اني لما اقول اسم الشارع محدش يضحك عليه او يتريق عليه

اذا اقتنعت بكلامي واقتنعت ان من حقي اذكر اسم الشارع بتاعي من غير ما حد يضحك او يتريق يبقي لازم تعلق وتكتب في تعليقك

انا بحب درب الجماميز

ويلا مش مهم

هناك ٢١ تعليقًا:

غير معرف يقول...

من حق كل واحد يحب المكان اللي وعاش واتربي فيه ومن حقه كمان انه يلاقي كل الاحترام والتقدير للمكان ده انت يا مجدي وصفت االشارع بطريقة جميلة موووووووووووت حسيت فيها اد ايه انت بتحب الشارع ده وكمان حسيت انه شارع مناضل وبطل ويستحق كل تقدير واحترام
انا كمان بحب ضرب الجماميز
ولاء

الـفجـريـــة يقول...

لا يا أ.مجدى
ده مش بس شارع كده
ده عالم كبير
تاريخ وجغرافياونضال سياسى يعنى
مع انى بروح باب الخلق كتييير والحسين والقلعة كتيير الا انى ممرتش عليه قبل كده

المرة الجاية أمر ان شاء الله
بس هكون عارفة عنه كتير من التدوينة
وممكن اسلم على عم يوسف النجار او عم عبده اللى هيكونوا مستغربين لان مفيش سابق معرفة
بس مش مشكلة
وأخيرا
انا بحب درب الجماميز

عصفور المدينة يقول...

عسل
:)

غير معرف يقول...

ILove darb elgamameeeez

يا دماغى يقول...

السيدة الحب الاول والاخير
ومن يعيش فيها لن ينساها

غير معرف يقول...

لا اكيد من غير ما اقتنع بدرب الجماميز لازم كل واحد من جواه يكون عنده انتماء للمكان اللي اتربي فيه حتي لو كان غير لائق اجتماعيا او شكليا وهو اكيد مش كل واحد مننا له ام اجمل امراءه بس اكيد بيحبها جدا والا هيكون عاق لوالديه وعلشان كده انته يا مجدي انسان بر بدرب الجماميز

ياسر أبوالعلا يقول...

لا بصراحة وصف حلو قوى يا مجدى بس اوعدك انى لو حاولت أوصل أى مكان من اللى انت قلت عليها دى هاتوه وهيبقى شكلى وحش قوى ، المهم الوصف جميل ، بس انت معرفتناش سبب تسميته بهذا الاسم ، وعاوز اسألك سؤال مهم يا مجدى ...هو فين بقى درب الجماميز ؟

belal يقول...

بصراحة يعني ومن غير تريقة
..
تخيل منظر واحد ..واقف كده وسط ناس كتير وهتف بصوت عالي ..أنا بحب ضرب الجماميز


اللهم لا شماته
..

يا دماغى يقول...

اسمها الحلمية الجديدة
مش الحلمية القديمة

GAMTIME يقول...

طيب كنت قول واشرح الشرح الوافى دة من زمان ....... برغم انى لست من القاهرة .. الا انى ساقتنى قدماى الى هذا الدرب .. واوهنا فية شر توهة .. وكل ما نسال حد يشرقنا ويغربنا لدرجة انى ......حبيييييييت درب الجماميز .. بجد حسيت فية برائحة عتيقة ممكن توصل للفاطميين مثلا وكانت فرصة اشوف مكان بالقدم والعراقة والاصالة دى

عمر أفندى و أبووه يقول...


حاولت مضحكشى بس مقدرتش
ههههههههههههههههههه

غير معرف يقول...

انا بحب درب الجماميز
والسيدة زينب
وبموووووووووووووت فى القاهرة كلها
مع انها زحمة بس بحبهابحب عراقتها وبحب امشى وسطها وابص واركز فى كل شبر فيها
بحبك يامصر

غير معرف يقول...

يمكن أنا الوحيد اللى نزلت دموعه لما قريت عن درب الجماميز
لأنى متغرب بره مصر من فتره و نفسى قوى قوى فى أى حاجه من ريحة مصر
نفسى أشرب شاى من قهوة عم عسوى
نفسى أقف على الكورنيش و أملا عينى من نيلها
نفسى أتكعبل فى مطبات شوارعها
نفسى بجد بجد أشم بس ريحة زرات ترابها

يا بختك يا مجدى بدرب الجماميز

شقاوة شعب يقول...

رغم انى من اسكندرية وبموت فى كل ذرة فيها وبعشق بحرها وهواها وناسها وشتاها ومطرها وصيفها واسواقها وكل حاجة فيها
الا ان دايما عندى شوق وفضول انى اتجول فى كل حتة فى القاهرة
نفسى ادخل شوارعها واتفرج على حواريها
نفسى اعرف ايه شكل شبرا
نفسى اطلع فوق المقطم واشوف القاهرة من فوقيه
نفسى اروح الحلمية واشوف "زهرة" و "على" هناك (اللى فى مسلسل ليالى الحلمية)
نفسى اشوف الناس اللى عايشة فى وسط القبور واللى بسمع عن انهم كتيييير قوى فى القاهرة

ورغم انى بعشق حاجة اسمها اسكندرية
الا انى برضه بحب القاهرة
وبحب درب الجماميز واتمنى انى ازوره بعد كل هذا الوصف الرائع له
وبالطبع اذا قدر لى هذه الزيارة فلن اترك اى وصفة جانبية له الا وسأسلكها لأتفقد كل هذه الاماكن اللى حضرتك شوقتنا لرؤياها

doctor mohamad يقول...

أنا....أحب......درب............ال.جما........ميز
.
.
.
.
سامحنى ياااااارب
لكن بجد الاسلوب سلس جدا يا أ مجدى
حببتنى بجد ف درب الجماميز
لدرجة انى حطيته ف خطة زياراتى بإذن الله

غير معرف يقول...

if one can love his house, street, country and nation by this style
if one can read what his eyes see
if one can discover the minor good seens and put it in front of him

then one have a feeling of flying and will fall in deep love towards his past, present and future------ you is in you---------write more to complete the puzzel of you

Abdelfadil

زمردة يقول...

السلام عليكم ورحمة الله وبركاته
لاني بحب كل ما هو اصيل
فانا حبيت درررررب الجماااااااااميز
قلتها بصوت عالي اهه
مع تحياتي

فنان من الأخوان يقول...

استاذ مجدي حضرتك نيسيت معلم مهم جدا وكبير جدا لما تكوم مستشفي الحوض الورصود علي شمالك و انت رايح علي الخضيري ادخل يمين 15 متر هتلاقي مسجد صرغتمش اللي كان الامام البنا بيصلي فيه وهو طالب في كلية دار العلوم و لما توصل سبيل ام عباس هتلاقيشارع السيوفية اللي كان فيه اول شعبة للاخوان المسلمين
نورت المنطقة و نورت الشعبة
وكمان مكتب اداري وسط كله و
ويلا ربنا يسترها

غير معرف يقول...

"انا بحب درب الجماميز

لو مشيت في الشارع وخليت قهوة عيسوي علي شمالك لغاية لما توصل تقاطع شارع سكة راتب مع الجماميز ودخلت يمين هتلاقي نفسك في الحلمية القديمة " الصحيح انها الحلمية الجديدة بتاعة ليالي الحلمية

doaa nile7 يقول...

شركة للقضاء علي الحشرات؟ ما هو الحل للقضاء بشكل كامل علي مختلف مشاكل الحشرات؟
افضل شركة مكافحة البق بالدمام
والإجابة علي هذه الأسئلة وما يلي كافة رغبات من يبغي شركة للقضاء علي الحشرات ورش المبيدات ووقف المعاناة من وجود الحشرات بالمنزل
ارقام شركة مكافحة حشرات بجدة
و التى قد تؤثر على أسرتك بالسلب وتسبب الاذى تتمثل في شركة بسمة الامجاد0554713207 التي تعتبر
تعتبر شركة بسمة الأمجاد من الشركات الرائدة في السعودية التي تعتمد علي أحدث الاساليب والطرق العلمية في تسليك المجاري ومكافحة الحشرات بشكل ناجح مقابل أسعار مناسبة لا مغالاة فيها افضل شركة مكافحة البق بالرياض
افضل شركة مكافحة النمل الابيض بالرياض
تتسم الشركة بأنها تمتل أحدث الألات والأدوات فضلا عن أن العاملين بها يتبعون أفضل الطرق لمساعدتك علي التخلص بشكل نهائي من أي حشرات أو قوارض افضل شركة مكافحة الصراصير بالرياض
اهم النصائح لتجنب الاصابة بحشرة البق

doaa nile7 يقول...


الاهتمام بتنظيف المنزل جيدا وبصور مستمرة مع اعداد جدول تنظيف
الحرص على القاء القمامة اول باول مع احكام وغلق صندوق القمامة جيدا افضل شركة رش مبيدات بالقصيم
فتح النوافذ والشبابيك لادخال اشعة الشمس التى تساعد على قتل الجراثيم والبكتريا والحشرات
غلق الثقوب والشقوق المحتمل تواجدها بالمنزل افضل شركة رش مبيدات بالدمام
الاهتمام بالنظافة وتطهير المنزل او المكان بمطهرات مثل الديتول والكلور
الحرص على وضع الزهور والنباتات التى تعطي رائحة نفاذة مثل النعناع والفل وزيت الكافور مكافحة الحشرات بالرياض
يمكنك ايضا استخدام العطور وايضا البخور لتجنب الاصابة بحشرة البق افضل شركة مكافحة حشرات بالدمام
احرص على غسل الملائات والمفروشات والاغطية بالماء الساخن للتعقيم وايضا البخار للقضاء على الجراثيم والتخلص من حشرة البق او بق الفراش مكافحة حشرات بالقصيم
يجب فحص قطع الاثاث والانتيكات من حين لاخر لان البق يفضل الاختباء بين الشقوق الصغيرة والثنايات
احرص جيدا على تنظيف المكان لان لايوجد حشرات بمكان نظيف
شركات رش مبيدات بالرياض

شركة بسمة الامجاد تعد اكفء شركة مكافحة حشرات بالدمام وتستخدم افضل المبيدات الحشرية المصاحبة للبيئة والامنة تماماً على صحتك وصحة اسرتك