الاثنين، نوفمبر ١٩، ٢٠٠٧

كوباية نسكافيه


الله يرحمك يا دكتور حسن

تمر هذه الايام ذكري وفاة الدكتور حسن الحيوان وقد سبقني ورثاه الاخ الفاضل الدكتور-احمد عبد العاطي وصديقي - عبد المنعم محمود وكنت قد كتبت هذه التدوينة من فترة قليلة وعزمت ان انشرها في ذكراه الاولي الا ان مشغوليات العمل منعتني من نشرها في توقيتها المناسب وها انا الان انشرها وارسل اعتذاري الي صديقي (حسن الحيوان ) عن تقصيري تجاهه واسال الله العظيم ان يتقبل حسن الحيوان في الصالحين والا يحرمنا رؤياه في الاخرة وان يبارك فيعمله لدينه ولدعوته في الدنيا وان ينصر ويحفظ دعوتنا التي ما بخل الراحل عن تقديم كل غالي ونفيس لها وكنت قد كتبت اليه بعد وفاته مباشرة رسالة بعنوان "عاش صديقي حسن" والان اكتب اليه " كوباية نسكافيه " ورحم الله الدكتور حسن

كوباية نسكافيه- من دفتر رسائل مجدي الي صديقه حسن الحيوان

صوت الكتور حسن - فين كوباية النسكافيه يا غالي

مجدي - من عيني يا دكتور انت تامر ثواني واكون عندك بس خد معاك الكرسيين ماشي

" الحوار السابق كان يدور بشكل يومي بيني وبين الدكتور حسن الحيوان رحمه الله ونحن في هعنبر ثلاثة بسجن طرة وعن طريق " كوباية النسكافيه امتدت بيننا الحوارات والنقاشات الطوال في شتي مناحي الحياة ونهلت منه ومن اراءه وخبراته ورؤاه الكثير والكثير

والرسالة الاتية هي حوار تخيلته ولكنه حوار من طرف واحد مني لصديقي حسن الحيوان


ياه يا دكتور سنة مشفتكش ولا سمعت صوتك بجد واحشني كتير وواحشني قفشاتك واراءك وواحشاني القعدة معاك , بص بقي انا هاقوم اعملك كوباية النسكافيه الجامدة "فاكرها" وهاحطلك حبيتين سكر دايت من العلبة اللي علي نمرتك وهاعمل لنفسي كوباية الشاي ام نعناع وهاجيلك علي اول العنبر نقعد ندردش مع بعض واحكيلك عن اللي حصل السنة اللي فاتت ماشي يا غالي ثواني وهاجيلك

( دكتور حسن بابتسامته الهادية اللي مش بتفارق وشه ابدا وهدومه البسيطة المهندمة وطريقة جلسته المميزة وفي يده كوباية النسكافيه ) وانا اجلس بجانبه وفي يدي كوباية الشاي ابو نعناع

تحب ابدأ بايه يا دكتور باحوالي الشخصية ولا الحالة العامة للبلد ولا حال الاخوان في مصر ولا هزيمة الاهلي الاخيرة ولا خطوبتي والشعور اللي متملكني بعدها


بص يا دكتور انا هابدالك باخبار البلد

فاكر يا دكتور لما في مرة قلتلي يا مجدي النظام اللي بيحكمنا لا توجد لديه ادني ارادة للتغيير او مشاركة الاخرين له السلطة وان النظام الحالي وممارسته هي ممارسات وافعال من يدافع عن رقبته علشان هما بلغوا من الفساد ووالتجاوز ما يجعلهم معرضين للمحاكمة والعقوبة في حال خروجهم من السلطة

ده فعلا اللي حاصل يا دكتور النظام قدم كل ما تملكه مصر من ثروات وقدرات وتاثير خارجي لامريكا حتي يحافظ علي مكانه وبالفعل هو يدافع عن رقبته لا كراسيه

وفاكر لما قلتلي ان المواجهة قادمة قادمة بين النظام والاخوان لان النظام لن يستطيع ان يحتوي الاخوان كما احتوي بعض الفصائل السياسية الاخري وان الاخوان يملكوا مشروع ورؤية تهدد اصحاب المصالح في المنطقة وان المسرح يجهز للمواجهة

صدقت يا دكتور فعلا المواجهة بدات بتحويل قيادتنا للمحاكمات العسكرية وتفجير الوضع في غزة والضفة وفي الاردن واليمن وبالفعل كانت رؤياك صائبة


احكيلك عن الاخوان

سيبني افكرك بحاجة انت قلتهالي " يا مجدي الجماعة بتاعتنا عاملة زي جهاز الكمبيوتر جزء منها هارد وير وجزء سوفت وير وان النظام بيواجهنا بشكلين ضربات امنية مؤلمة في الجزء الهارد وير زي الاعتقالات والمحاكمات والتضييقات الاخري وفيروسات فكرية لضرب السوفت وير وضربتلي ساعتها المثل بحكاية فك التنظيم لانه هو اللي بيتسبب في قلق الانظمة من الاخوان وان هناك بعض الافكار التي تخرج ولا يوجد هدف من ورائها سوي السوفت وير الخاص بنا " وفاكر ساعتها اني اتفقت معاك في الكا ده بس برضه اتفقنا ان ده مش معناه اننا نقفل ابوابنا او نوافذنا امام الافكار والرؤي الخارجية بل ناخذها ونتدارسها ونستفيد منها قدر الامكان ونرد السئ او الغير مناسب منها " افتكرتك يا دكتور مع الحراك اللي بيحصل اليومين دول بجد يا دكتور حوالينا ناس بتنصحنا لوجه الله وناس تانية عاملة زي الفيروسات المهلكة بس اللي مضايقني جدا هو ان بعضنا بيخلط الصالح بالطالح وبيقفل ابوابه تجاه الجميع وبيامر الاخرين من حوله بنفس الشئ ودي مصيبة لو استمرت وربنا يستر

افكرك بحاجة تانية " فاكر لما قلتلي ان احنا عندنا مشكلة لازم نعالجها وهي ان احنا فعلا بنمتلك تنظيم حديدي المسام اتي تخلله ضيقة جدا جدا وان احنا محتاجين نخلخل المسام دي علشان الناس تتحرك بفردية اكبر ويبقي عندها القدرة علي المبادرة بشكل اكبر بس لازم واحنا بنوسع المسام دي نحذر من الهزات العنيفة والتغييرات المفاجأة اللي ممكن تجيب نتائج عكسية" افتكرت كلامك ده بعدما حدث في امر التدوين فعلا يا دكتور التدوين اداني الفرصة لاطلاق الحلول والاراء الفردية وادانا الفرصة ان الاراء تنتقل بسهولة ويسر بين افراد قواعد الاخوان بس التجربة كان ليها سلبياتها وبعض حركات وردود الافعال العنيفة من المدوينين اللي كانت هاتجيب نتائج عكسية بس عامة يا دكتور التجربة ما زالت في مجملها جيدة جدا لكنها محتاجة قيادات واعية ومرنة علشان تستوعب افرادها وتستفيد من حركتهم في تطوير افراد الجماعة

افكرك بحاجة تالتة " فاكر لما قلتلي ان حلمك الكبير ان الوعي السياسي ينتشر بين قواعد الاخوان في القري والنجوع والمدن وان حلمك للقسم السياسي انه ينتشر جهده واداه الي القواعد لان اهتمام افراد القسم حاليا بالنخب والمثقفين فقط وتقديم الرؤي الي متخذي القرار في الجماعة " عارف يا دكتور افتكرت كلمك ده بالحرف لما ظهر برنامج الحزب بتاعنا ولاقيت ان جماعتنا اهتمت جدا بارسال البرنامج الي الغير واغفلت قواعدها عارف يا دكتور كان نفسي البرنامج ده ينزل لكل الاخوان ويتناقشوا فيه شهر او اتنين او تلاتة في كل اسرة وكل لقاء وكل تجمع وان النقط اللي فيها اكتر من راي تطرح علي الناس كلها وكل راي ياخد حقه من وقت العرض وان الناس تتناقش وتتفق وتختلف وبعدها تطلع براي عارف يا دكتور كنا هانستفيد جدا جدا من الوضع ده لكن عارف اكتر حاجة ضايقتني ايه ان قواعدنا لم تري البرنامج وان قواعدنا فضلت مستنية راي القيادة في نقاط الاختلاف ولم تكلف نفسها مشقة النقاش والتباحث الا من رحم ربي من النابهين من قيادتنا الوسيطة


اكلمك بقي عن احوالي الشخصية

في الاول لازم اقولك علي حاجة اني كنت بستغرب جدا من قدرتك الغريبة علي الاهتمام بلناس والسؤال عنهم وعن احوالهم وصبرك الغريب علي سماجة البعض وتحمل شخصياتهم الرذلة وكل ما افتكر الشاويشية والظباط وهما ملتفين حواليك لطلب حاجة او طلب استشارة او اي امر اخر حتي المساجين الجنائيين كانوا بيجولك ويطلبوك وكانك اب ليهم بجد انت غريب يا دكتور غريب لان مفيش حد بيعملكدة دلوقتي بس علي العموم خير

ارجع بقي للموضوع الاساسي احوالي الشخصية اولا انا مطحون ف الشغل لانك طبعا عارف بعد الحبسة كنت عامل ازاي وكان لازم احرق نفسي في الشغل علشان اعوض ما فاتني عارف انك هاتحذرني من اني انجرف في دوامة الشغل وانسي واجباتي الاخري ومش هاكدب عليك واقولك لا انا بالفعل حاسس اني اتحولت لالة وبحاول ارجع تاني اظبط الامور وكل حاجة تاخد حجمها وادعيلي كتير يا دكتور علشان فعلا عاوز دعاك

هاقولك علي مفاجاة انا خطبت والله بجد خطبت طبعا عارف ان السعادة هاتغمرك وانك ممكن تقوم من مكانك وتحضني وكلمات المباركة والتهنئة مش هاتنقطع من علي لسانك وبفكرك بوعدك ليا ولانس واحنا في السجن انك هاترقص في فرحنا بالعصا ولما انس قالك قول حاجة يا دكتو ينفع تتعمل اقسمت بالله انك هاترقص في فرحي وفرح انس بالعصا والله يا دكتور كان نفسي جدا انك تكون جنبي وانا بخطب ومكنتش هاتقل عليك واقولك تعال الشبكة بس علي الاقل كنت هاتتصل بيا وقتها وهاتباركلي وكنت هاديك "هي" متستغربش لان ده اسمها تبارك ليها برضه لكن اقدار الله وحكمته وحرموني من ده لكن ان شاء الله ربنا يجمعنا علي خير في الاخرة واسمع التهنئة منك هناك اخر حاجة عاوز اقولها لحضرتك في موضوع الخطوبة ده ايه هو الاحساس اللي جاللي بعد ما خطبت وعارف انك هاتستغرب منه بس بجد ده احساس حقيقي انا يا دكتور حاسس اني بقيت اب اه بجد حاسس اني بقيت اب ومش هافسر تاني افهمها انت بقي

صح كنت هانسي انا عملت مدونة وحواري معاك دلوقتي هانشره عليها وجابتللي وجع الدماغ لان بكتب عليها الكلام اللي كنت بقولهوه وانا معاك وعلي فكرة كان تاني تدوينة عندي هي عنك لاني عملت المدونة قبل وفاتك بيومين تلاتة

اخر حاجة كنت هاطلبها منك انك تسامحني شايف نظرة دهشة في عنيك بس بجد سامحني لاني من ساعة وفاتك لم اتصل بزوجتك لتعزيتها في الاول كنت مش عارف لو اتصلت اقولها ايه لاني عارف مدي ارتباطكم ببعض ومدي حبك ليها وحبها ليك وبجد كنت مرتبك ومش لاقي اي كلام ينفع يكون عزاء ليها فيك وعلشان كدة متصلتش وبعدها قلت اتصل بس اتكسفت جدا هاتقول ايه لو سمعت صوتي بعد مرور الفترة دي فمرديتش اتصل فمعلش اعذرني اني ما اتصلتش واطلب منها انها تسامحني

كنت عاوز اقولك علي ايه تاني في حاجات كتير قوي يا دكتور نفسي اقولهالك ومشاكل عاوز رايك فيها بس مش هاينفع علي المدونة لازم اقابلك واقعد معاك واحكيلك

عارف انه مش هاينفع في الدنيا وعلشان كدة بدعي ربي انه يجمعني بيك في الاخرة علشان احكيلك عن كل حاجة حصلت وساعتها انا متاكد ان اللي هايجمعنا

كوباية نسكافيه

وبدعيلك من كل قلبي بالرحمة والمغفرة

هناك ٢٦ تعليقًا:

غير معرف يقول...

انا ما كنتش أعرف الدكتور بس عرفته من مدونة الدكتور أحمدعبدالعاطى و الاستاذ عبدالمنعم محمود و تدوينتك ده دلوقتي و بصراحة نفسي نفسي أشرب معاكم كوباية زنجبيل هناك برده.
ربنا يرحمه و يحسن خاتمتنا.
و ربنا يباركلك يا أستاذ مجدي .

غير معرف يقول...

للعلم انا عايز أشكرك لانك شاركتنا خبرة ودروس اتعلمتها من الدكتور و يا ريت متبخلش علينا بالباقي
و بكده اللي مشمفش الدكتور يشوفه و يجلس معاه ينهل منه و تكون انت السبب و أهو كله في ميزان حسناتك.
و الكلام مش عالدكتور بس ده علي كل من أثروا فيك ....فعسي كلمة تصنع رجلا
و عسي رجلا يعز أمّه" يتشديد الميم" و عسي أمه تمكن لدين الله .
وربنا يعزك يا أستاذنا

يقول أنى امرأة يقول...

اولا جزاك الله خيرا انك عيشتنا معاك الذكرى و اللحظات الجميلة دى
ثانيا رحم الله الدكتور حسن و جمعنا و اياة فى الفردوس ان شاء الله
ثالثا بقى اظن انة هيكون مبسوط اكتر لو اتصلت بزجتو حتى بعد المدة دى كلها
ممكن يكون صعب عليك بس هو الموضوع عامل زى صلة الرحم الواحد ممكن يعد سنين مش بيتصل بحد بس بيبقى لازم عشان ربنا و الجنة و هنا دول مش بس السبب لا دى الاخوة فى الله كمان
اتصل بزجتو و خلى ( هى ) تكلمها معاك و انا عارفة كويس اوى ان ( هى ) هتشجعك على دة

حلم الحرية يقول...

جعلتنا نعيش للحظات مع دكتور حسن الحيوان
ربما كانت لحظات قليلة لكنك نقلت لنا خلالها معاني كبيرة
جزاك الله عنا خير الجزاء

وجازاه عن كل ما قدم خلال حياته خير الجزاء

ربنا يرحمه ويغفرله ويجمعك بيه في جنات الفردوس اخوانا علي سرر متقابلين وتعزمه علي كوبايه النسكافيه في قصرك في الجنة ان شاء الله

ومضات .. أحمد الجعلى يقول...

ليه طريقتك دى بس يا أستاذ مجدى، قلوبنا وعيونا خلاص لم تعد تحتمل

الله يسامحك يا استاذ مجدى

الله يرحمك يا دكتور حسن

محمد يقول...

رحمه الله وسامحك

غير معرف يقول...

السلام عليكم ورحمة الله وبركاته ---
اخى العزيز الاستاذ مجدى ---من اخ لك يعلم ان اخوة فى الله مقدمة علىاخوة الارحام والانساب --من اخ لك يرسل لك لاول مرة فى مدونتك التى يقراها كمتابع ---- اخى العزيز سامحك الله فقلوبنا كما قال الاخ احود الجعلى لم تعد تحتمل --اهتاجت مشاعرى وذاكرتى على الاخ الراحل الكريم الذطنور حسن الحيوان الذى شرفت بلقائة فى اواسط التسعينات لقاء واحدا لا زلت اذكر تفاصيله ---نعم الاخ كان --نعم من ما اذا رايته الف والفت --نعم من صدق فيه قول شرعتا المحكم ان الارواح جنود مجندة --رحم الله اخانا وصبر كل محبية على فراقه --واجزل له فى الاخرة عطاء لمن لم بلف فى الدنيا ما يستحق الا بحب اخوانه ---تذكروا اخوانا لكم فارقوكم باجسادهم وارواحهم ترفرف حولكم تشتكى ظلم العباد لرب العباد------ رحمك الله اخى الدكتور حسن الحبوان ==رحمك الله اخى المهندس اكرم الزهيرى---بارك لله فيكم جميعا وسامح الله الاخ مجدى الذى ادمى قلبى وادمع عينى وانا قلبى بالاصل عليل

غير معرف يقول...

لالالالالالالالالالا كده صعب يا مجدي التدوينة دي بجد مأثرة جدا دي خلت دموعي غلبتني حرام عليك يا مجدي وربنا يارب يرحم الدكتور حسن ويرحم اموات المسلمين جميعا انا برضه مع الاخت الا بتقولك تسال علي زوجة الدكتور دة اقل واجب تعمله مع اسرته واتصل وما تترددش
ولاء

غير معرف يقول...

انا لله وانا اليه راجعون


رحمه الله واسكنه فسيح جناته

أحمد عبد العاطي يقول...

رحمك الله أخي حسن وأكثر من محبيك الذين يذكرونك بالخير والدعاء
ونصيحة لأخي مجدي علي نقل المشاعر الانسانية وتطعيمها بالأجواء السياسية
لأن جفاف السياسة وحدها جرفنا في آخر المضمار وجزي الله الجميع خيرا علي تفاعلهم

غير معرف يقول...

http://www.islamonline.net/servlet/Satellite?c=ArticleA_C&cid=1195032536684&pagename=Zone-Arabic-Daawa%2FDWALayout

غير معرف يقول...

http://www.islamonline.net/servlet/Satellite?c=ArticleA_C&cid=1195032536684&pagename=Zone-Arabic-Daawa%2FDWALayout

غير معرف يقول...

رحم الله أخونا الدكتور حسن

بس

النسكافية مقاطعة ؟

ا بـن عــمــر يقول...

جزاكم الله خيرا على البوست الجميل
ولك عندى تاج ياريت تستلمه

عمر أفندى و أبووه يقول...

مجدى اسلوبك بجد كان رائع و ابكانى ....ربنا يتقبله فى الصالحين و يكرمك على موهبتك فى السرد...

و انا مع يقول انى امرأة جدا فى انك تتصل بيها بزوجته الان...

جزاكم الله خيرا

أبو الفـــداء يقول...

اللهم ارحم د. حسن...وأدخله فسيح جناتك

شكرا على تلك الروح التي عشنا فيها خلال قراءة المدونة

محمود سعيد يقول...

رحمه الله ، وأنا باغبط بصراحة الدكتور حسن على ما رزقه الله فى الدنيا من حب الناس وربنا يرزقه فى الآخرة الفردوس إن شاء الله

وجزاك الله خير إنك شاركتنا بخبرتك معاه :-)

فنان من الأخوان يقول...

للمتحابين في جلال الله منابر من نور حول العرش يغبطهم عليها الانبياء و الشهداء و الصالحين
في الجنة أن شاء الله هتقعد معاه وتشربو نسكافيه علي شط نهر اللبن من غير عساكر و لا مساجين جنائين
و حسبنا الله ونعم الوكيل

غير معرف يقول...

رحم الله الدكتور الفاضل حسن الحيوان ورحم الله المهندس الشهيد أكرم زهيري ... وندعوا الله أن يشفي صدورنا ممن ظلموهم قريباً إن شاء الله ...

غير معرف يقول...

رحم الله الدكتور حسن وأدخله فسيح جناته وجمعنا جميها بنبيه المصطفى في الفردوس الأعلى
اللهم آمين

غير معرف يقول...

الله يسامحك يا مجدي
بس برده جزاك الله خيرا

والله الذي لا الاه الا هو بالفعل احنا افتقدنا هذا الرجل

بس الغريب يا مجدي اني كنت واخد فكرة عن الناس اللي ربنا ما رزقهمش باطفال انهم جافي المشاعر ، ولكننى لم ار شخصا حنونا بمقدار حنان هذا الرجل .
لم ار شخصا طويل البال وصبورا بمقدار صبر وطول بال هذا الرجل .
يالله والله زمان فين قعدة البونات يا صاحبي

رحمه الله رحمة واسعة واسكنه فسيح جناته
وجمعنا واياه في مستقر رحمته مع النبيين والصديقين والشهداء

غير معرف يقول...

انس القاضى...
منك لله يا مجدى....هو انا ناقص
اللهم بلغه سلاما مناالان...واسعدنا واسعده برضاك عنه وعنا يااكرم من اعطى

الكواكبي يقول...

رحم الله الدكتور حسن
وجمعك به في فردوسه الأعلى
اللهم آمين
الحقيقة الدنيا بقت ناشفة جداً والحكاية مسخت . . نفسي الاقي حد يرجعني زي زمان ويشرح لي السيرك اللي حوالي ده من غير ما يكون بيسحاول بس يحتويني . . نفسي الاقي ردود حقيقية مقنعة او اسمع شيء قطعي او الاقي حد عاقل افضفض معاه من غير ما يقيمني آخر القعدة
الله يرحمك يا دكتور حسن . . ويرحمنا معاك

KIMOOOZ يقول...

ايه يا عم
كل ديه كوبايه نسكافيه
ده لو جردل نسكافيه كان زمانك كتبت حاجه جديده
صديقك حسن النيه بتاع اسكندريه

غير معرف يقول...

لن انسى ماحييت موقف الدكتور حسن الحيوان رحمه الله ونحن خارجون من سجن مزرعة طرة ولم يتبق فى السجن سواه لن انسى ايمانه الوثيق وحبه العميق لن انسىاخر معانقه له واخر كلمات سمعتها منه كانت اخر كلماته ونحن خارجون من السجن انتم على الطريق رحمه الله رحمة واسعه وجعل عناءه فى الدنيا رحمة وسعة فى الاخره حاتمثابت

السرداب يقول...

شاهد صور حيوانات اجمل الخلفيات التي يمكن ان تراها.