الخميس، نوفمبر ٢٩، ٢٠٠٧

استعنا علي الشقا بالله 4


عودة مرة اخري الي ممارسة فضيلة النقد الذاتي وهذه المرة ستكون عن

المرأة

ويلا مش مهم

الاثنين، نوفمبر ١٩، ٢٠٠٧

كوباية نسكافيه


الله يرحمك يا دكتور حسن

تمر هذه الايام ذكري وفاة الدكتور حسن الحيوان وقد سبقني ورثاه الاخ الفاضل الدكتور-احمد عبد العاطي وصديقي - عبد المنعم محمود وكنت قد كتبت هذه التدوينة من فترة قليلة وعزمت ان انشرها في ذكراه الاولي الا ان مشغوليات العمل منعتني من نشرها في توقيتها المناسب وها انا الان انشرها وارسل اعتذاري الي صديقي (حسن الحيوان ) عن تقصيري تجاهه واسال الله العظيم ان يتقبل حسن الحيوان في الصالحين والا يحرمنا رؤياه في الاخرة وان يبارك فيعمله لدينه ولدعوته في الدنيا وان ينصر ويحفظ دعوتنا التي ما بخل الراحل عن تقديم كل غالي ونفيس لها وكنت قد كتبت اليه بعد وفاته مباشرة رسالة بعنوان "عاش صديقي حسن" والان اكتب اليه " كوباية نسكافيه " ورحم الله الدكتور حسن

كوباية نسكافيه- من دفتر رسائل مجدي الي صديقه حسن الحيوان

صوت الكتور حسن - فين كوباية النسكافيه يا غالي

مجدي - من عيني يا دكتور انت تامر ثواني واكون عندك بس خد معاك الكرسيين ماشي

" الحوار السابق كان يدور بشكل يومي بيني وبين الدكتور حسن الحيوان رحمه الله ونحن في هعنبر ثلاثة بسجن طرة وعن طريق " كوباية النسكافيه امتدت بيننا الحوارات والنقاشات الطوال في شتي مناحي الحياة ونهلت منه ومن اراءه وخبراته ورؤاه الكثير والكثير

والرسالة الاتية هي حوار تخيلته ولكنه حوار من طرف واحد مني لصديقي حسن الحيوان


ياه يا دكتور سنة مشفتكش ولا سمعت صوتك بجد واحشني كتير وواحشني قفشاتك واراءك وواحشاني القعدة معاك , بص بقي انا هاقوم اعملك كوباية النسكافيه الجامدة "فاكرها" وهاحطلك حبيتين سكر دايت من العلبة اللي علي نمرتك وهاعمل لنفسي كوباية الشاي ام نعناع وهاجيلك علي اول العنبر نقعد ندردش مع بعض واحكيلك عن اللي حصل السنة اللي فاتت ماشي يا غالي ثواني وهاجيلك

( دكتور حسن بابتسامته الهادية اللي مش بتفارق وشه ابدا وهدومه البسيطة المهندمة وطريقة جلسته المميزة وفي يده كوباية النسكافيه ) وانا اجلس بجانبه وفي يدي كوباية الشاي ابو نعناع

تحب ابدأ بايه يا دكتور باحوالي الشخصية ولا الحالة العامة للبلد ولا حال الاخوان في مصر ولا هزيمة الاهلي الاخيرة ولا خطوبتي والشعور اللي متملكني بعدها


بص يا دكتور انا هابدالك باخبار البلد

فاكر يا دكتور لما في مرة قلتلي يا مجدي النظام اللي بيحكمنا لا توجد لديه ادني ارادة للتغيير او مشاركة الاخرين له السلطة وان النظام الحالي وممارسته هي ممارسات وافعال من يدافع عن رقبته علشان هما بلغوا من الفساد ووالتجاوز ما يجعلهم معرضين للمحاكمة والعقوبة في حال خروجهم من السلطة

ده فعلا اللي حاصل يا دكتور النظام قدم كل ما تملكه مصر من ثروات وقدرات وتاثير خارجي لامريكا حتي يحافظ علي مكانه وبالفعل هو يدافع عن رقبته لا كراسيه

وفاكر لما قلتلي ان المواجهة قادمة قادمة بين النظام والاخوان لان النظام لن يستطيع ان يحتوي الاخوان كما احتوي بعض الفصائل السياسية الاخري وان الاخوان يملكوا مشروع ورؤية تهدد اصحاب المصالح في المنطقة وان المسرح يجهز للمواجهة

صدقت يا دكتور فعلا المواجهة بدات بتحويل قيادتنا للمحاكمات العسكرية وتفجير الوضع في غزة والضفة وفي الاردن واليمن وبالفعل كانت رؤياك صائبة


احكيلك عن الاخوان

سيبني افكرك بحاجة انت قلتهالي " يا مجدي الجماعة بتاعتنا عاملة زي جهاز الكمبيوتر جزء منها هارد وير وجزء سوفت وير وان النظام بيواجهنا بشكلين ضربات امنية مؤلمة في الجزء الهارد وير زي الاعتقالات والمحاكمات والتضييقات الاخري وفيروسات فكرية لضرب السوفت وير وضربتلي ساعتها المثل بحكاية فك التنظيم لانه هو اللي بيتسبب في قلق الانظمة من الاخوان وان هناك بعض الافكار التي تخرج ولا يوجد هدف من ورائها سوي السوفت وير الخاص بنا " وفاكر ساعتها اني اتفقت معاك في الكا ده بس برضه اتفقنا ان ده مش معناه اننا نقفل ابوابنا او نوافذنا امام الافكار والرؤي الخارجية بل ناخذها ونتدارسها ونستفيد منها قدر الامكان ونرد السئ او الغير مناسب منها " افتكرتك يا دكتور مع الحراك اللي بيحصل اليومين دول بجد يا دكتور حوالينا ناس بتنصحنا لوجه الله وناس تانية عاملة زي الفيروسات المهلكة بس اللي مضايقني جدا هو ان بعضنا بيخلط الصالح بالطالح وبيقفل ابوابه تجاه الجميع وبيامر الاخرين من حوله بنفس الشئ ودي مصيبة لو استمرت وربنا يستر

افكرك بحاجة تانية " فاكر لما قلتلي ان احنا عندنا مشكلة لازم نعالجها وهي ان احنا فعلا بنمتلك تنظيم حديدي المسام اتي تخلله ضيقة جدا جدا وان احنا محتاجين نخلخل المسام دي علشان الناس تتحرك بفردية اكبر ويبقي عندها القدرة علي المبادرة بشكل اكبر بس لازم واحنا بنوسع المسام دي نحذر من الهزات العنيفة والتغييرات المفاجأة اللي ممكن تجيب نتائج عكسية" افتكرت كلامك ده بعدما حدث في امر التدوين فعلا يا دكتور التدوين اداني الفرصة لاطلاق الحلول والاراء الفردية وادانا الفرصة ان الاراء تنتقل بسهولة ويسر بين افراد قواعد الاخوان بس التجربة كان ليها سلبياتها وبعض حركات وردود الافعال العنيفة من المدوينين اللي كانت هاتجيب نتائج عكسية بس عامة يا دكتور التجربة ما زالت في مجملها جيدة جدا لكنها محتاجة قيادات واعية ومرنة علشان تستوعب افرادها وتستفيد من حركتهم في تطوير افراد الجماعة

افكرك بحاجة تالتة " فاكر لما قلتلي ان حلمك الكبير ان الوعي السياسي ينتشر بين قواعد الاخوان في القري والنجوع والمدن وان حلمك للقسم السياسي انه ينتشر جهده واداه الي القواعد لان اهتمام افراد القسم حاليا بالنخب والمثقفين فقط وتقديم الرؤي الي متخذي القرار في الجماعة " عارف يا دكتور افتكرت كلمك ده بالحرف لما ظهر برنامج الحزب بتاعنا ولاقيت ان جماعتنا اهتمت جدا بارسال البرنامج الي الغير واغفلت قواعدها عارف يا دكتور كان نفسي البرنامج ده ينزل لكل الاخوان ويتناقشوا فيه شهر او اتنين او تلاتة في كل اسرة وكل لقاء وكل تجمع وان النقط اللي فيها اكتر من راي تطرح علي الناس كلها وكل راي ياخد حقه من وقت العرض وان الناس تتناقش وتتفق وتختلف وبعدها تطلع براي عارف يا دكتور كنا هانستفيد جدا جدا من الوضع ده لكن عارف اكتر حاجة ضايقتني ايه ان قواعدنا لم تري البرنامج وان قواعدنا فضلت مستنية راي القيادة في نقاط الاختلاف ولم تكلف نفسها مشقة النقاش والتباحث الا من رحم ربي من النابهين من قيادتنا الوسيطة


اكلمك بقي عن احوالي الشخصية

في الاول لازم اقولك علي حاجة اني كنت بستغرب جدا من قدرتك الغريبة علي الاهتمام بلناس والسؤال عنهم وعن احوالهم وصبرك الغريب علي سماجة البعض وتحمل شخصياتهم الرذلة وكل ما افتكر الشاويشية والظباط وهما ملتفين حواليك لطلب حاجة او طلب استشارة او اي امر اخر حتي المساجين الجنائيين كانوا بيجولك ويطلبوك وكانك اب ليهم بجد انت غريب يا دكتور غريب لان مفيش حد بيعملكدة دلوقتي بس علي العموم خير

ارجع بقي للموضوع الاساسي احوالي الشخصية اولا انا مطحون ف الشغل لانك طبعا عارف بعد الحبسة كنت عامل ازاي وكان لازم احرق نفسي في الشغل علشان اعوض ما فاتني عارف انك هاتحذرني من اني انجرف في دوامة الشغل وانسي واجباتي الاخري ومش هاكدب عليك واقولك لا انا بالفعل حاسس اني اتحولت لالة وبحاول ارجع تاني اظبط الامور وكل حاجة تاخد حجمها وادعيلي كتير يا دكتور علشان فعلا عاوز دعاك

هاقولك علي مفاجاة انا خطبت والله بجد خطبت طبعا عارف ان السعادة هاتغمرك وانك ممكن تقوم من مكانك وتحضني وكلمات المباركة والتهنئة مش هاتنقطع من علي لسانك وبفكرك بوعدك ليا ولانس واحنا في السجن انك هاترقص في فرحنا بالعصا ولما انس قالك قول حاجة يا دكتو ينفع تتعمل اقسمت بالله انك هاترقص في فرحي وفرح انس بالعصا والله يا دكتور كان نفسي جدا انك تكون جنبي وانا بخطب ومكنتش هاتقل عليك واقولك تعال الشبكة بس علي الاقل كنت هاتتصل بيا وقتها وهاتباركلي وكنت هاديك "هي" متستغربش لان ده اسمها تبارك ليها برضه لكن اقدار الله وحكمته وحرموني من ده لكن ان شاء الله ربنا يجمعنا علي خير في الاخرة واسمع التهنئة منك هناك اخر حاجة عاوز اقولها لحضرتك في موضوع الخطوبة ده ايه هو الاحساس اللي جاللي بعد ما خطبت وعارف انك هاتستغرب منه بس بجد ده احساس حقيقي انا يا دكتور حاسس اني بقيت اب اه بجد حاسس اني بقيت اب ومش هافسر تاني افهمها انت بقي

صح كنت هانسي انا عملت مدونة وحواري معاك دلوقتي هانشره عليها وجابتللي وجع الدماغ لان بكتب عليها الكلام اللي كنت بقولهوه وانا معاك وعلي فكرة كان تاني تدوينة عندي هي عنك لاني عملت المدونة قبل وفاتك بيومين تلاتة

اخر حاجة كنت هاطلبها منك انك تسامحني شايف نظرة دهشة في عنيك بس بجد سامحني لاني من ساعة وفاتك لم اتصل بزوجتك لتعزيتها في الاول كنت مش عارف لو اتصلت اقولها ايه لاني عارف مدي ارتباطكم ببعض ومدي حبك ليها وحبها ليك وبجد كنت مرتبك ومش لاقي اي كلام ينفع يكون عزاء ليها فيك وعلشان كدة متصلتش وبعدها قلت اتصل بس اتكسفت جدا هاتقول ايه لو سمعت صوتي بعد مرور الفترة دي فمرديتش اتصل فمعلش اعذرني اني ما اتصلتش واطلب منها انها تسامحني

كنت عاوز اقولك علي ايه تاني في حاجات كتير قوي يا دكتور نفسي اقولهالك ومشاكل عاوز رايك فيها بس مش هاينفع علي المدونة لازم اقابلك واقعد معاك واحكيلك

عارف انه مش هاينفع في الدنيا وعلشان كدة بدعي ربي انه يجمعني بيك في الاخرة علشان احكيلك عن كل حاجة حصلت وساعتها انا متاكد ان اللي هايجمعنا

كوباية نسكافيه

وبدعيلك من كل قلبي بالرحمة والمغفرة

الثلاثاء، نوفمبر ١٣، ٢٠٠٧

"هي"



"هي"

هي .. ملكة متوجة تنازلت عن عرشها لترتبط باحد العوام

هي .. نجمة متلالئة تركت سماءها وارتضت ان تنزل الي ارض الهوام

هي .. فراشة رقيقة لم تكترث لتحذيرات القريبين وسعت بجناحيها نحو النيران

هي .. صفحة بيضاء شاهقة البياض سمحت ليد طفل ان تعبث عليها بالالوان

هي .. ريح عاطر مر بصحرائي ينشر فيها بعض الجمال

هي .. يد ام حانية احتضنت طفل مشاغب سليط اللسان

هي .. قطرة ندي استقرت علي جلمود صخر قاسي يفتقد الحنان

هي .. شعاع شمس ضحي بنفسه وولج الي ارضي المظلمة ليبدد فيها حجب لظلام

هي .. يد فلاح ماهرة جاءت لارضي المجدبة تنشر فيها بذور الحياة

هي .. صباح جميل مشرق انار ليلي حالك السواد

هي .. اميرة نبيلة مدت يدها لانسان جسده مثخن بالجراح ونفسه مليئة بالندبات

هي .. ورقة شجر خضراء تحمل سر الحياة ابت الا تتركني كفرع جاف وافقت علي الاقتران

هي .. تغار الشمس من جمالها وينزوي القمر من حسنها ويصبح الفراش بجانبها وحش كاسر من رقتها

هي .. بحثوا عن كلمات لوصفها فلم يجدوا فاكملوا بحثهم فلم يجدوا فاصروا في بحثهم فلم يجدوا فلم اعياهم البحث و ضاقت بهم السبل قالوا نكتفي
ب
"هي"

الأحد، نوفمبر ١١، ٢٠٠٧

بجد انتوا عالم محترمة


تحية واجبة الي كل زوار المدونة الكرام الذين افاضوا علينا بكرمهم ونبل اخلاقهم وشاركونا لحظات سعادتنا والتي تتضاعفت بهذا الكم الهائل من التهاني والدعوات ومرة اخري لكم مني ومن " هي " الف تحية وكل الدعوات الصادقة لكم بالتوفيق والنجاح والسعادة الدائمة بالدنيا والاخرة وانا علي يقين انني مهما كتبت ودونت لن اوفيكم حقكم ولذا فلن اقول لكم الا

جزاكم الله خيرا

والحمدالله كان اليوم لذيذ جدا وجميل جدا وسعيد جدا

لولا بعض الدسائس والمؤمرات التي تمت بمعرفة كاترين زيتا جونز وانجلينا جولي كان اليوم سيكون من الايام المشهودة في تاريخ الانسانية وكانت


اول تلك الدسائس كالاتي

محمد - مجدي العربية هاتفصل بنزين ادعي ان ربك يستر لغاية لما نوصل لاي بنزينة

مجدي - دوس بس انت وربك هاييسر

محمد - العربية فصلت استني بقي هنا اروح اجيب بنزين وارجعلك

مجدي - " ميت علي نفسي من الضحك " ماشي يا حمادة خد تاكسي بقي بس بسرعة

بعد ربع ساعة رجع محمد وفي ايده جركن بنزين

محمد - مجدي تعالي معايا علشان ندلق البنزين ده في التانك

مجدي - ماشي بس بقولك ايه حاسب لاحسن البدلة تتبهدل بنزين

محمد - ماشي

النتيجة

مجدي ومحمد غرقو بنزين وميتين علي نفسهم من الضحك في الشارع جنب العربية

طبعا بدون اي حسابات او تعقيدات اكيد العملة دي من تدبير انجلينا جولي ريحتها كانت مختلطة بالبنزين بس علي مين عدت علي خير ومحدش خد باله من البنزين اللي مغرق ايدي واجزاء من هدومي


المؤامرة التانية

اميييييييييييييييييييييييييييين

" الفاتحة تم قرائتها من الحضور "

احدهم - يالا يا جماعة علشان عروستنا وعريسنا يلبسوا الدبل

انا - امي هاتي الدبلة علشان هانلبس الدبل دلوقتي

امي - الدبيلة مع اختك يا مجدي

انا - اختي هاتي الدبلة علشان هانلبس الدبل

اختي - الدبلة مع امك يا مجدي

انا - امي اختي بتقول ان الدبلة معاكي

امي - لا يا ابني دا انا سبتها لاختك علشان تجيبها

انا - اختي امي سابتلك الدبلة علشان تجبيها

اختي - لا يا مجدي دا انا فاكرة ان امك هاتجبها

امي واختي في صوت واحد - مجدي احنا نسينا الدبلة

" وفي لحظات كانت اختي تتسلل بين الحضور لتذهب الي اخي الاكبر وتنتزع من اصبعه دبلته وتاتي بها الي لالبسها ولا من شاف ولا من دري ولبستها واتصورت ومحدش خد باله وطبعا كلنا حاسين بالمؤامرة وشامين ريحة كاترين زيتا جونز ورا الملعوب ده بس علي مين طبعا عرفنا نخلع منها وتمت الخطوبة علي خير "

ما زلت عند وعدي بان احدثكم عن " هي " وستكون التدوينة القادمة ان شاء الله

وجزاكم الله خيرا

ويلا الف مبروك

الأربعاء، نوفمبر ٠٧، ٢٠٠٧

والله حصل




فاكرين لما كتبت




وقبلها كنت كتبت




اهو اللي في نفسي اتحقق


اه والله اتحقق


طب تلاتة بالله العظيم اتحقق


في ناس مندهشة وناس فرحانة وناس مستغربة وناس مش عارفة هو في ايه اللي حصل


اللي حصل يا شباب ان انا


خطبت


والله خطبت


وبكرة الخميس 8/11 قراءة الفاتحة والشبكة


وعقبال كل الشباب والبنات

بصوا بقي بعيدا عن احاديث التمرد والموالسة والاتفاق والاختلاف

انا اتحدث عن امر لا يختلف عليه اثنين

فلذا فانا و"هي" نستحق التهنئة سواء ممن اتفق معي او اختلف

ولذا فارجوا من كل الزوار كتابة تهنئة لنا نحن الاثنين
طلب
لو سمحتم يا جماعة اللي يعرف نمرة كاترين زيتا جونز وانجلينا جولي يتصل بيهم ويطيب خاطرهم بكلمتين ويقولهم ان الجواز قسمة ونصيب وربنا بكرة يرزقكم باحسن من مجدي لاحسن سمعت ان حالتهم صعبة قوي من ساعة ما سمعوا الخبر
ملحوظة

اري البعض يتسال عن من " هي " البعض ليهنئها والبعض ليحذرها والبعض ليشبع فضوله ولذا اعدكم ان التدوينة القادمة ستحدثكم عن من

" هي "

ويلا الف مبروك

الأحد، نوفمبر ٠٤، ٢٠٠٧

شكرا فضيلة المرشد - شكرا دكتور مرسي


كما قلنا من قبل ان طائرالتطوروالنصح والتقويم لابد له من جناحين الاول منهما " التمرد والدهشة ورمي الاحجار " والثاني هو " الانصاف والاستيعاب وعدم جلد الذات " ولاننا قوما عمليون فسنجد انه بفضل الله يتم تطبيق ما نقول في ارض الواقع ولنا مثالين يؤكدوا هذا الكلام

فضيلة المرشد - شكرا
منذ ايام قلائل كتب المهندس علي عبد الفتاح مقال علي موقع الجماعة الرسمي ينتقد فيه اداء وتصريحات بعض افراد الاخوان من منطلق غيرته وحرصه علي المصلحة العامة لجماعة الاخوان وله جزيل الشكر علي ما كتب وان كان البعض قد اساءه غيرة وحماسة المهندس علي ولذا فقد قام الاخ الفاضل ابراهيم الهضيبي بكتابة مقال غاية في الادب والمنطقية للرد عليه وارسله الي لياخذ رائي وقد اثنيت عليه في منطقيته وهدؤه وادبه ووقال لي انه قد ارسل المقال ال الدكتور حبيب وفضيلة الاستاذ عاكف لياخذ رايهما " الدكتور حبيب النائب الاول للاستاذ المرشد والاستاذ عاكف هو مرشد جماعة الاخوان والاثنين لا يجدا اي غضاضة في التواصل مع شاب عمره اثنين وعشرون عام " وقد رحبا باسلوب ابراهيم المنطقي المهذب وطلب اباهيم من فضيلة المرشد ان يتم نشر المقال في موقع الجماعة الرسمي وبالفعل اوصي فضيلته بان يتم النشر ونشر بالفعل

فشكرا للدكتور حبيب وشكرا لفضيلة المرشد علي استعابهم لطاقات وقدرات شباب الجماعة وشكرا لهما علي هذا السلوك الذي يعطي الجميع درس في حرية الراي وتداول المعلومات والاراء داخل جماعتنا الحبيبة وهذا الامرمن باب الانصاف فكما نشير الي الخطأ فيجب ان نشيد بالصحيح

الدكتور مرسي - شكرا
منذ ايام عدة وتحديدا يوم السبت قبل الفائت تقابل الدكتور مرسي مع مجموعة من مدوني الاخوان وكنت اتوق ان اكون معهم ولكنني لم اعلم بهذا الموعد الا يوم السبت ظهرا عندما تفحصت الميل الخاص بي ووجدت دعوة كريمة لحضور اللقاء ولكن موعد الانتهاء من دوامي هو السادسة ومكان عملي يقع في الجهة الاخري بالقاهرة من مكان عقد اللقاء ومن المستحيل ان انتهي من عملي واتوجه الي مكان عقد اللقاء واصل اليه قبل التاسعة مساءا ولذا فلم استطع ان البي الدعوة الكريمة التي وجهت الي
وقد قراءت عن فحوي ما تم باللقاء في بعض مدونات من حضر والكل اجمع علي جدوي اللقاء وجو الحرية والتفاعل الذي تم خلاله
ومن باب الانصاف ايضا وجب علينا ان نشيد بمن رتب لهذا اللقاء ومن حضره وهنا يضرب الدكتور مرسي درس في كيفية التواصل بين القيادة والقاعدة وتقدير الراي حتي ولو صدر من شباب حديثي السن والخبرة مني ومن اقراني
فشكرا للدكتور مرسي
ويلا مش مهم