ابو مراخير كبيرة

ابو مراخير كبيرة

كان ليا واحد صاحبي اتولد ومراخيره كبيرة

مش مهم مراخيره ادي ايه ..المهم انها كبيرة

وهو صغير كان زمايله بينادوله بابو مراخير كبيرة

كان ساعات بيتنرفز .. يغضب .. يتعارك معاهم بس وهو مروح بيته كان يفتكر كلامهم وسخريتهم وكل ما يفتكر كل ما يزيد غضبه وزعله من مراخيره الكبيرة

قبل ما ينام كل يوم يقعد يفكر في ليه هو اللي مراخيره كبيرة

واشمعني باقي الناس لا ولما يتعب من التفكير كان يحسس علي مراخيره بايده ويروح في النوم

كل ما يبص في المرايا علشان يغسل وشه كان يسيب كل حاجة في وشه ويبص علي مراخيره الكبيرة

في فصله كان لما يستجمع نفسه ويقوم يجاوب او يعرض رايه كان ما يشغلوش الناس رايها ايه في كلامه اد ما كان

يشغله رايهم في مراخيره الكبيرة

مع زمايله وهو في وسطهم كان كل اللي شاغله مراخيره الكبيرة وكل ما يبص حد من زمايله ناحيته ساعة ما ييجي يتكلم كان يفتكر انه بيبص علي مراخيره الكبيرة

لما اتخرج وراح يعمل مقابلة للتوظيف ساب كل شئ واصبح اهتمامه الوحيد هو الراجل اللي هايعمل معاه المقابلة هايقول ايه علي مراخيره الكبيرة

كل حاجة في حياته وكل موقف وكل راي كان بيتبني علي مراخيره الكبيرة

مع ان الراجل ده لو تعايش مع مراخيره وحاول يشوف ايه المفيد منها هايلاقي حاجات كتير

مثلا ممكن علشان كبيرة تساعده علي التنفس الجيد اكتر من الناس اللي مرخيرهم عادية

او انها هاتنفعه قوي لما ييجي يلبس نضارة علشان هاتشيلها في سهولة ويسر

وبعدين حتي لو اتفقنا انها مفيش منها فايدة ليه بيسيب الصورة كلها وينسي كل شئ جميل فيها ويمسك في العيب او ما يظنه انه عيب

اكيد الراجل ده عنده من المزايا الشكلية والنفسية الكتير قوي

بس هو بينسي كل ده وبيمسك في المشكلة او ما يظنه انه مشكلة

كلنا لينا مراخير كبيرة

علي فكرة كلنا عندنا مرخير كبيرة ( مستوي تعليمي اقل من الاقران - مستوي اجتماعي اقل من زملائنا - طول زائد - قصر اقل من المعتاد - لثغة في النطق - وزن زائد )

بنحاول نداريها

وبنفضل اسري ليها

ونسيبها تتحكم في رؤيتنا للحياة

ونسمحلها انها تقضي علي مميزاتنا وايجابياتنا

وانها تتسبب في احباطنا وتثبيطنا وانها تبقي حاجز كبير بينا وبين الاخرين

وتخلينا نتصور ان كل نظرة هي ليها وكل همسة هي عليها

مع ان المرخير الكبيرة دية احنا مش متحكمين فيها فليه نعمل في نفسنا كدة

وليه نقضي علي كل حاجة حلوة في حياتنا علشان امر زي ده

انا متاكد ان كلنا بنملك ايجابيات او مميزات وسلبيات او نقاط ضعف

فليه مناخدش بالنا من مميزاتنا ونقويها ونبرزها ونحاول نكتسب نقاط قوة ومميزات اخري

اما سلبياتنا او نقاط ضعفنا اللي احنا مش مسؤلين عنها ليه ما ننسهاش

او نتعامل معاها بحكمة ونحطها في مكانها الطبيعي

وماندهاش الفرصة انها توقف حياتنا اوة تفسد علينا عيشتنا

فعلا احنا محتاجين نتعايش مع نفسنا علشان نعرف نتعايش مع الناس

ويللا مش مهم