نفسي

نفسي.........
احاسيس ومشاعر لو تركتها مكبوتة هايحصل لي حاجة من الحاجات دية
اما ان اتحول الي كائن "نوراني "
واما ستحولني الي كائن "شراني "
او انها ستحولني الي كائن "لا اخلاقي "
ففضلت أن أبوح بجزء منها علها تهدأ وتتركني أعيش ككائن "أخواني"

نفسي.. ببساطة ووضوح وشفافية وبدون خجل"نفسي ارتبط ببنت "ايوة اللي انت قريته او قريتيه صح " نفسي ارتبط ببنت "

نفسي..نفسي أكون مركز اهتمامها زي ما هي هتكون مركز اهتمامي "يعني وانا في مشاغل حياتي اليومية وحرب الحياة الضروس اللي بنخوضها كل يوم وكل ساعة وكل لحظة ابقي متاكد من ان حد مهتم بيا . بيدعيلي . بيفكر فيا "

نفسي..نفسي أشوف هروب عنيها حياءا من جرأة نظراتي واسمع تلعثم كلماتها من مفاجأة تعبيراتي ومسحة الخجل علي وشها من تلميحاتي

نفسي..نفسي اسمع رنة المحمول اللي بتأكدلي انها فاكراني مش نسياني "ربنا يخليكي لينا يا موبينيل " خطي 012

نفسي..نفسي في دعاها ليا في كل سجدة في صلاتها او رفعة ايديها للسما "اظن دعاها هايكون مختلف لانه خارج فعلا من القلب"

نفسي..نفسي يكون عندي يوم في الاسبوع بانتظره بفارغ الصبر لاني طبعا هاشوفها فيه "طبعا هايكون عندهم في اليبت وطبعا ده غير يوم اسرتي الاخوانية اللي بنتظرها بفارغ الصبرعلشان النقيب ما يزعلش"

نفسي..نفسي في نظرة الوداع اللي بتبقي من ورا شيش الشباك المتوارب والنور مطفي وانا ماشي وباوعدها اني مش هابص ورايا للشباك المتوارب

نفسي..نفسي في مشاعر اللهفة اللي بتبقي في يوم زيارتي ليها واللي بتستبدلها بمشاعرالتعزز واللامبالاة اول ما تدخل الصالون وتشوفني "بس انا بحذرها اني عارف حقيقة مشاعرها واني ما بتخدعش من الوش الشمع ده "

نفسي..نفسي اشوف نظرة الضيق علي وش امي وهي شايفة اهتمامي بغريمتها والنظرة دية هاتبقي رسالة ليا اني لازم اهتم بيها شويتين علشان اعوض احساسها بفقدي وانها ربت وتعبت علشان تيجي واحدة تاخدني علي الجاهز

نفسي..نفسي في حد غير جعلي وابراهيم وعبد الرحمن وعمرو وحسين وبهاء وعبده ومحمد وانس اقابله ويكون اسمه مؤنث "مش معقولة كدة بقالي اتناشر سنة شغلتي احتوي واستوعب الشباب عاوز اغير بقي "

نفسي..متتخيلنيش فارس احلام جي علي فرس ابيض علشان انقذها من الاعداء وده لأسباب كتير
اولها .ان انا مش ملاك يعني انا انسان عادي ليا مميزاتي وعيوبي وان هي هيكون ليها دور في انقاذي من عيوبي زي ما انا هاكون ليا دور معاها وانها هاتتعامل مع انسان مش ملاك فتكون مستعدة وجاهزة لسقطات واخطاء هذا الانسان
ثانيها .ان النظام في مصر مش هايسيب اي حد ينقذ اي حد وان هدفه الرئيسي ان البلد تغرق باللي فيها وان اذا امن النظام اكتشف حلمها مش بعيد يقبض عليا ويحولني لمحاكمة عسكرية وان الحصان يكون وجبة الغداء لأسود حديقة الحيوان

نفسي..امسك ايديها ايوة امسك ايديها ومن حقي اني امسك ايديها ..... طبعا علشان اعديها الشارع "وطبعا ده بعد العقد اي كتب الكتاب علشان الشرع قال كدة وعلشان الاخوان ما يزعلوش "

نفسي..كفاية كدة لان الاحداث اللي بتحصل في البلد والاحداث اللي بتحصل علي مستواي الشخصي بصراحة

سدة نفسي
ويللا مش مهم