الخميس، فبراير ٢٢، ٢٠٠٧

نفسي


نفسي.........
احاسيس ومشاعر لو تركتها مكبوتة هايحصل لي حاجة من الحاجات دية
اما ان اتحول الي كائن "نوراني "
واما ستحولني الي كائن "شراني "
او انها ستحولني الي كائن "لا اخلاقي "
ففضلت أن أبوح بجزء منها علها تهدأ وتتركني أعيش ككائن "أخواني"

نفسي.. ببساطة ووضوح وشفافية وبدون خجل"نفسي ارتبط ببنت "ايوة اللي انت قريته او قريتيه صح " نفسي ارتبط ببنت "

نفسي
..نفسي أكون مركز اهتمامها زي ما هي هتكون مركز اهتمامي "يعني وانا في مشاغل حياتي اليومية وحرب الحياة الضروس اللي بنخوضها كل يوم وكل ساعة وكل لحظة ابقي متاكد من ان حد مهتم بيا . بيدعيلي . بيفكر فيا "

نفسي
..نفسي أشوف هروب عنيها حياءا من جرأة نظراتي واسمع تلعثم كلماتها من مفاجأة تعبيراتي ومسحة الخجل علي وشها من تلميحاتي


نفسي
..نفسي اسمع رنة المحمول اللي بتأكدلي انها فاكراني مش نسياني "ربنا يخليكي لينا يا موبينيل " خطي 012


نفسي
..نفسي في دعاها ليا في كل سجدة في صلاتها او رفعة ايديها للسما "اظن دعاها هايكون مختلف لانه خارج فعلا من القلب"


نفسي
..نفسي يكون عندي يوم في الاسبوع بانتظره بفارغ الصبر لاني طبعا هاشوفها فيه "طبعا هايكون عندهم في اليبت وطبعا ده غير يوم اسرتي الاخوانية اللي بنتظرها بفارغ الصبرعلشان النقيب ما يزعلش"


نفسي
..نفسي في نظرة الوداع اللي بتبقي من ورا شيش الشباك المتوارب والنور مطفي وانا ماشي وباوعدها اني مش هابص ورايا للشباك المتوارب


نفسي
..نفسي في مشاعر اللهفة اللي بتبقي في يوم زيارتي ليها واللي بتستبدلها بمشاعرالتعزز واللامبالاة اول ما تدخل الصالون وتشوفني "بس انا بحذرها اني عارف حقيقة مشاعرها واني ما بتخدعش من الوش الشمع ده "


نفسي
..نفسي اشوف نظرة الضيق علي وش امي وهي شايفة اهتمامي بغريمتها والنظرة دية هاتبقي رسالة ليا اني لازم اهتم بيها شويتين علشان اعوض احساسها بفقدي وانها ربت وتعبت علشان تيجي واحدة تاخدني علي الجاهز


نفسي
..نفسي في حد غير جعلي وابراهيم وعبد الرحمن وعمرو وحسين وبهاء وعبده ومحمد وانس اقابله ويكون اسمه مؤنث "مش معقولة كدة بقالي اتناشر سنة شغلتي احتوي واستوعب الشباب عاوز اغير بقي "


نفسي
..متتخيلنيش فارس احلام جي علي فرس ابيض علشان انقذها من الاعداء وده لأسباب كتير

اولها .ان انا مش ملاك يعني انا انسان عادي ليا مميزاتي وعيوبي وان هي هيكون ليها دور في انقاذي من عيوبي زي ما انا هاكون ليا دور معاها وانها هاتتعامل مع انسان مش ملاك فتكون مستعدة وجاهزة لسقطات واخطاء هذا الانسان
ثانيها .ان النظام في مصر مش هايسيب اي حد ينقذ اي حد وان هدفه الرئيسي ان البلد تغرق باللي فيها وان اذا امن النظام اكتشف حلمها مش بعيد يقبض عليا ويحولني لمحاكمة عسكرية وان الحصان يكون وجبة الغداء لأسود حديقة الحيوان

نفسي
..امسك ايديها ايوة امسك ايديها ومن حقي اني امسك ايديها ..... طبعا علشان اعديها الشارع "وطبعا ده بعد العقد اي كتب الكتاب علشان الشرع قال كدة وعلشان الاخوان ما يزعلوش "


نفسي
..كفاية كدة لان الاحداث اللي بتحصل في البلد والاحداث اللي بتحصل علي مستواي الشخصي بصراحة

سدة نفسي
ويللا مش مهم

هناك ١٨ تعليقًا:

واحد من الإخوان يقول...
أزال المؤلف هذا التعليق.
واحد من الإخوان يقول...

بصراحة

وأنا كمان نفسي

ربنا يسهلهالك ويسهلهالي

ويكفينا شر سدة النفس

بس هو في عندي طلب

ياريت لما تيجي تعديها الشارع وانت ماسك إيدها
تراعي شعور اللي زي حالاتي ونفسه هو كمان يعدي حد الشارع

على كل حال هانت
ربنا يفرحنا بخطوبتك وفرحك
ونشوفك كده وانت بتحقق كل اللي في نفسك

محمد حمزة

غير معرف يقول...

من الواضح إنك تعباااااااااااااان أوي وجايب جاز

بس ده مش كويس
حاول تشغل نفسك في أي حاجه وتنسى الموضوع ده
وصدقني هوه هاييجي لوحده

أصل الحاجات دي بتاعة ربنا

بس فعلا الموضوع ده عليه تعليقات كتييييره بس بلاش أقولها

ويللا ربنا يسهلك

عندي سؤال سخيف
هوه أول تعليق إنت مسحته ليه
هوه قال حاجه عيب

بن توفيق يقول...

كنت بضحك جامد جدا وانا بقرأ الموضوع الجديد نفسى .. وربنا يا رب يا استاذنا ينولك اللى فى نفسك قريب
والظاهر ان موضوع محمد وابراهيم ودعوات الناس ليك بدأت تأثر وتجيب نتيجة .. لان الموضوع بدأ يبقى فيه تحرك .. وخصوصا ان اخوك غزلان عملها او راح يعملها

رؤبنا ييسرلك الحال يا استاذنا ويزرقك اللى فى نفسك .. اللهم آمين

واحد من الإخوان يقول...

أول تعليق انا اللي مسحته مش ا/ مجدي

لأني اضفت تعليق بتاع مدونة تانية على المدونة دي عن طريق الخطأ

حصلت لخبطة يعني
محمد حمزة

غير معرف يقول...

المشاعر الانسانيه الصادقه بتصل الى القلوب بسرعه مقدرش غير ادعيلك ان ربنا يحققلك اللى فى نفسك عثمان

غير معرف يقول...

يعنى أول مرة تحن عليا وتكتب اسمى فى مدونتكم الكريمة يكون علشان تقول لى بعدا بعدا سحقا سحقا -على رأى واحد طموح صاحبنا-

جميل أن خلق الله الإنسان ووهبه هذا الشيئ الرائع الذى يميزه عن الجماد والآلات وهى المشاعر، والتى مهما حاولنا أن نتغافل عنها أو نصم آذاننا فى بعض الأحيان عن صوتها إلا انها اخيرا تصرخ معلنة وجودها. وجميل أيضا أن يمنح الله البعض هذه القدرة على صياغة تلك المشاعر فى سطور وكلمات انسيابية وكانها ترسم بالريشة صورة للمشاعر والعواطف.

ربنا يكرمك يا أستاذ مجدى وييسر لك الأمور ونراك قريبا مش مع الجعلى ولا زيد ولا عبيد وانما زوجتك وساعتها هاكتب لك المدونة اللى اتفقنا عليها اللى كلها عبارة عن كلمتين بس.

عمرو طموح يقول...

بص يا عمنا...

بداية كده، ربنا يرزقك زوجة صالحة إذا نظرت إليها سرتك... الخ

و بعدين ايييييييييييييه؟؟؟ ايه يا عمو، انت ناوي تبيع أول ما تلاقيها وللا ايه؟ يعني و انت كده و بنشوفك كل قد ايه... أمال ساعتها... هتطلب حذف اسمك من ذاكرتنا يعني؟ عموما ده مش هيحصل... و هبقي وراك وراك، و مش بعيد... تيجي تمسك ايدها عشان تعدوا الشارع، تلاقي نفسك ماسك ايدي وللا ايد الجعلي وللا بهاء وللا معرفش مين من اللي بتحتويهم، و تفاجأ إنك كنت بتحلم و إنها لسه مش موجودة... بس ساعتها... يا ريت متمسكش إيدي:)

عموما... رسالة لها... انت هتسعدي بواحد من أعظم الناس في التاريخ، نفسي أقولك ابقي سيبيهولنا شوية، بس عارف إنه مش من حقي، و إنه بعد كل ده من حقه يبقي ليه حياة يفرح فيها شوية بإنسانة متميزة زيه... هتتعلمي منه كتير ، ده أكيد، و يا ريت لما يقولك إنه في واحد اسمه عمرو عاوز يقابله، تسمحيله عن نفس راضية إنه يسيبك شوية و يقابلني.

غير معرف يقول...

نفسك..نفسك
متروح يا عم مجدي اتجوز

AbdElRaHmaN Ayyash يقول...

والله تدوينة جميلة جدا عم مجدي
أقدر أقول اني انا نفسي برضه في حاجات كتير
لكن ليس كل ما يتمناه المرء يدركه
حدد اللي انت تقدر عليه
واعمله
وبعدها هيفضل للأحلام مكان في المدونة هنا
سلام
عبدالرحمن عياش

غير معرف يقول...

بص يا أبو الامجاد

في عروسة لقطة..ومش هلاقي أعز من مجدي حبيبي أجوزهاله

وعلى فكرة ..التلاتة إلي اتجوزوها قبل كده "الله يرحمهم" شكروا فيها قوي.

ومعاها أربع عيال أكبرهم في أولى ثانوي والصغيرة بنت في رابعة ابتدائي !!

يعني جاهزة من مجاميعو ومش هتتعبك في حاجة "جاية بعيالها"..تمام يا عم !!

لو تحب أكلمهالك دلوقت..إيه رأيك ؟!!!

اتوكل على الله ..دي فرصة متتعوضش !!!

Strong80 يقول...

نفسك
هو حد كان ماسك نفسك
متجرب وتقرب
جمد ايدك وصل
نشن
ماللى نفسه فى جاجة ميعملها
انا مش عارف الناس دى ايه :
تلج
برادة حديد
إخوان
اتحك يا بعيد دور ونقى وفاصل وحمل بضاعتك
مستنى ايه يلا هه يلا هه محتاج زقه
كلنا هنساعد, معاك بس قول
دحنا اخوانك
ومساعدتك تهمنا اوى اوى اوى
احنا فلخدمة يا اجنس .

غير معرف يقول...

التعليق اللى فات انا شامم ريحه ابو صلاح فيه خد بالك ياعم مجدى

بنت من الاخوان يقول...

ربنا يحقق أمنياتك يا أستاذ مجدي
وياريت لو تعتمد على أخت حضرتك شويه في الموضوع ده
على فكره هي تعرف ناس كويسه كتيييييييييير
وان شاء الله عن قريب نفتح المدونه نلاقي الفرقه شغاله
وبيغنولك أحمد ربك بوس الايد حلم حياتك أصبح عيد000000000الخ
المهم ساعتها تعزمنا وما تتنكرش لينا ولاخوانك

غير معرف يقول...

يا عم مجدى اللى عاوز يتجوز ما يقعدش يقول نفسى ومش عارف ايه ،اللى اعرفه ان الجدع هو اللى يغمض عنيه ويروح متجوز واللى يحصل يحصل ،هيحصل ايه يعنى ؟ظعلقة كل يومين ؟وايه يعنى ؟يا ما كلت علق ولسه هتاكل ...
واحدة تنكد عليك عيشتك ؟طيب ايه الجديد ما فى ناس كتير ربنا مسخرهم للعكننة على ام البلد كلها مش انت بس .
ايه تانى يا عم ؟فلوسك تخلص اول باول ؟طيب ما هو اى مشروع ممكن تدخله تخسر فيه اللى قدامك واللى وراك .
قصدى يعنى ان مفيش مشاكل جديدة هتحصل لك ،وبعدين تعالى اسال واحد مجرب زيى ،مش مجرب الحاجات اللى فوق دى ،لا والله بالعكس ،بس مش هقولك علشان تفضل مفلفل كده وتقول نفسى نفسى ،لا بجد الحق نفسك قبل الجواز ما يلغوه ،انت فكرك انه هيفضل متاح على طول كده ؟لا يا حلو دول هيعملوا له بعد كده قواعد وشروط مش هتخلى حد يفكر فى الجواز ،ممكن مثلا يشترطوا ان العريس والعروسة لا يقل سنهما معا عن 92 سنة ،اشمعنى الرقم ده بالذات معرفش الصراحة .بس المهم انه هيبقى الموضوع صعب ..انت حر انا قلتلك علشان متقولش محدش نصحنى .الحقلك عروسة كمان قبل ما يغلوا او يروحوا فى الوبا.

غير معرف يقول...

محمد سيد
صراحة الكلام اللى انت كتبته أثر فى جامد حقيقى
انا حسيت انك بتكتبه بقلبك
انا متيقن ان شاء الله انك خلال هذا العام هتكون فى بيت الزوجية
حقيقى انت قدرتك على الوصف فاقت تخيلى
و لو تقدر توصل بهذه المشاعر لزوجتك هتكون زوج عظيم جداانا هدعيلك ان ربنا يرزقك بزوجة تبادلك نفس المشاعر مجدى انت جامد جدا

غير معرف يقول...

حبيبي انا عمرو
انا عاوز اقولك يامجدي ان الكلام ده من اكثر الكلامات لمسة مشاعري من مدة طويلة وانا عمري ما كنت اتخيل انك رقيق قوي كده بس انا عندي حاجة حاسس بيها الان عاوز اقولها اننا محتاجين نعبر عن مشاعرنا ونقول كل الي نحس بيه مش لازم نحس ان ده مشكلة وان ده عيب وخيبة وان لازم تكون المشاعر مترجمة لجواز انا عارف ان الكلام ده رخم حبتين
بس بجد ليه لازم الواحد لما يحس بحاجة يكون تفكيره نحيه الجواز فقط ولا غير وان لما الواحد هيتجوز كل مشاكله هتتحل ومشاعره هتملأ وهتبقى الحياة بمبمي بمبي بمبي انا راي ان المشاعر مش مرتبطة بالجوازالمهم خير انا مش عاوز اطول اكتر من كده بس بجد يامجدي كلمة جميلة

غير معرف يقول...

ادعو الله لك من كل قلبى ان يوفقك الله بالزوجة الصالحة التى تكون لك عونا وسندا وحبيبة وقريبة وجنتك على الارض فقد اثرت فى المدونه بشكل كبير ولمست قلبى كثيرا واحس بك وبما بدور فى قلبك لا نه ما يدور فى قلوب امثالنا ممن لم يرزقهم الله بمثل هذه الامنيات الرقيقة