الأحد، مارس ١٨، ٢٠٠٧

اللهم اني مستني التليفون


الهم اني مستني التليفون

مش عارف ايه حكاية التليفون معايا دايما مصير الامور المهمة في حياتي متعلق بيه المرة اللي فاتت ساعة القبض عليا والمرة دي متعلق بيه خبر خطوبتي او بقائي في قائمة العزاب والمهم مطولش عليكم واحكيلكم اللي حصل يوم التلات اللي فات

انا رحت يوم التلات اللي فات المشوار الموعود وتمت المقابلة زي ما بتيجي في الافلام بالظبط وفي اخرها قالولي ممكن ناخد فرصة للسؤال والاستشارة ونرد عليك في خلال اسبوع وطبعا وافقت لاني ما ليش اي حل تاني

ومن ساعتها وانا مستني التليفون الموعود واثناء انتظاري ليه قررت اني اتوب واعمل زي ما كنت بعمل في نهار رمضان علشان ربنا ييسرلي الامور فهتلاقوني كل ما اجي اعمل حاجة غلط أأقول "اللهم اني مستني التليفون " علي وزن " اللهم اني صائم " وكمان بطلت اعمل الحاجات اللي هاكتبها دلوقتي

بطلت اشتم اي حد مهما كان درجة غيظي منه
بطلت استخدم اي تعبير خارج في تهريجي وخاصة مع الاخوان الخارجين اصحابي
بطلت افكر في اي تخيلات دنيئة من بتاعت شباب الاخوان العزاب مثلا " اني ما سمعش كلام نقيب اسرتي " ما تخليش دماغك تروح لبعيد
بطلت اضيع الفجر وبطلت اضيع اذكار الصباح والمساء
بطلت اسرح بنظري وبقيت اغض بصري كويس جدا مفيش غير مرة واحدة امبارح وانا في سيتي ستارز وبجد كانت" حلوة قوي "اللحظة اللي استغفرت فيها ربي بعدها
بدعي في كل صلواتي وبناجي ربنا حتي برة الصلاة واطلب منه واشكيله همي واترجاه يحقق لي طلبي يعني انا عملت كل اللي حاجة
اقدر اعملها علشان ربنا يسهلي وييجي التليفون بالبشري ودعواتكم معايا
من يومين بدأ القلق والشك يتسرب لقلبي ونفسي من التفكير والانتظار ولكني قمت صليت بالليل ورميت حمولي كلها علي الله وقلت لربي في سجودي "يا رب انا فوضت الامر ليك تختارلي واذا اختيارك يا رب وافق هوايا هاكون اسعد انسان علي الارض في اللحظة اللي هاعرف فيها واذا اختيارك خالف هوايا هاكون بمشيئتك اكتر انسان راضي بقضائك ومسلم بيه وهايكون دعايا ساعتها ربنا يسعدها ويصبرني "
لما اعرف الرد ان شاء الله هاكتب تدوينة مكونة من عنوان بس فلو كان الرد ايجابي هايكون العنوان "يا رب انا سعيد بقضائك "
واذا كان الرد بشئ اخر هايكون العنوان "يا رب انا راضي بقضائك "
دعواتكم معانا ويللا مش ..... لا بجد الموضوع بقي مهم
ف يللا مهم جدا

هناك ١٦ تعليقًا:

بن توفيق يقول...

يااااااااه .. ده انا حاسس ان الاسبوع ده عدى على حضرتك كانه سنة

الانتظار صعب يا استاذنا .. وان شاء الله يكون الرد بالايجاب
وتكتب العنوان اللى جاااى انا سعيد بقضائك يا رب

ربنا ييسرلك الامور يا استاذنا .. بس جامده الحاجات اللى انت عملتها الاسبوع اللى فات دى

كويس عشان اعملها بعد عمر طويل ان شاء الله

غير معرف يقول...

enta gameil awy walahy



do you want her in specific or you just think she is right for you ?

so2al gheles moshkeda :)


inshAllh Kheir

غير معرف يقول...

يارب سعيد بقضائك

ان شاء الله تكون هذه الكلمة هى عنوان المدونة القادمة

ياااااااااااااااااااارب ان كان فى هذا الموضوع الخير

غير معرف يقول...

يارب هذا عبدك يرجى كرمك وجودك فلا تحرمه من نعمة السكينة مع من تعينة على صلاح دينه ودنياه وعجل له بالبشرى انك مالك كل شىء والمقدر له فاسعد فؤاده يالله
مبروكككككككككككككككك مقدم ياعم مجدى وماتقلش انا نقيت فيها
يسر الله حالك
اخوك عبده دسوقى

غير معرف يقول...

ان شاء الله سعيد بقضائك وربنا يكرمك وتجبي الرنتيسي لان يس ابن اخوك منتوا هتفتحوا فرع لحماس عندكو او حفص وميكونش فيه شرخ في الدهان

غير معرف يقول...

يارب يكتبلك الخير ويسعدك إن شاء الله ونفرح بيك قريبا

غير معرف يقول...

إيه يا أبو الامجاد..هي العروسة طحن للدرجة دي..
ولا انت واقع يا دبوور...

روح يا شيح ربنا ما يقطعلك حرارة تليفون ..قادر يا كريم

غير معرف يقول...

يارب يكرمك وييسر لك الخير حيث كان ويرضيك
على فكرة انا سعيد لاني كلمتك في (التليفون)
وقلت يارب الرقم اللي هتصل منه الاخ مجدي اكيد مش مسجله هيقول ايييه لكن ياللا مش مهم انا هاتصل واعرفه بنفسي
واتصلت واثنيت عليه وعلى التدوينة بتاعت القصاص فرج الله عنه وعن اخوانه ورد الله كيد الظالمين واني والله احبك في الله
اخوك رضا بركات معلم قرآن

غير معرف يقول...

يارب يكرمك وييسر لك الخير حيث كان ويرضيك
على فكرة انا سعيد لاني كلمتك في (التليفون)
وقلت يارب الرقم اللي هتصل منه الاخ مجدي اكيد مش مسجله هيقول ايييه لكن ياللا مش مهم انا هاتصل واعرفه بنفسي
واتصلت واثنيت عليه وعلى التدوينة بتاعت القصاص فرج الله عنه وعن اخوانه ورد الله كيد الظالمين واني والله احبك في الله
اخوك رضا بركات معلم قرآن

غير معرف يقول...

ان شاء الله سعيد بقضائك يا اخ مجدي
انا بس حبيت الفت نظرك ان المفروض انت اللي تتصل بيهم تسألهم عن رأيهم النهائي لاني ممظنش انهم هم اللي هيتصلو بيك اظن ميصحش
انا بقولك كلامي ده من وجهة نظري لان
ده اللي بيحصل معانا لما حد بيتقدملي ابويا بيرد عليه نفس الرد وبعدين اللي متقدم بيتصل تاني علشان مش معقول ان ابويا هوه اللي هيتكلم يقولو ايوه وافقنا يا ابني تعالي حمل
بمعني اخر ده العرف عندنا حاول تعرف همه طبيعتهم ايه لو كانو زي حالتي كده يبقي لازم تتصل بسرعة وبعدين علشان تريح دماغك من كتر التفكير وصدقني لو مفيش نصيب متزعلش لان اكيد الخيره فيما اختاره الله وبعدين استخير كتيير واكيد ربنا هيختار لك اللي فيه الخير ليك وليها وربنا يارب يسعدك ويرزق جميع شباب المسلمين بالازواج والزوجات الصالحين

الكواكبي يقول...

ايه التناكة دي يا عم انت
انت لسه ما اتصلتش من ساعتها؟ قوم شد تليفون لعمك الحاج واعتذر له بأي حاجة . . الجاموسة بتولد؛ طلبوك في الجهادية . . اي فيلم هندي يبرر تقاعسك
المفروض انك تتقمص دور الفارس اللي هايروح يخطف الأخت على موتسيكل جاوا من اللي استخدموه في اغتيال رفعت المحجوب
روح اتصل وتعالى بسرعة

وليد يقول...

السلام عليكم ورحمة الله وبركاته
قبل التعليق أحب أهنأك على مدونتك الجميلة يا مجدي والي أنا بحس معاها غني قاعد معاك فعلا أنت تكتب كما تتكلم ولمن لا يعرف مجدي في الكلام فهو مزود بكل خواص المحادثة والحوار والتهريج بارك الله فيك
أما بالنسبة اللهم إني مستني التليفون فأسأل الله أن تعيد سريعا ويسعد الله قلبك بالعيد أو بمدفع اففطار أو بالحسنيين يعني يتصلوا ويرحبوا بيك بعلا لبنتهم .. وفقق الله ويسر لك أمورك وكتب لك الخير فالله لا يقدر إلا الخير
أخوك وليد السيد

غير معرف يقول...

ايييييه ... دنيا
لطالما كان هذا حال المغاوير في كل زمان
اما الى جوار ربهم
او الى جوار زوجاتهم
ثبتك الله يا اخ و نجاك
اهم حاجة تكون ثبت عند السؤال
حاكم الأخ بيفضل نجم طول عمره
الى ان يقف هذا الموقف امام اهل عروسته
وهنا اما يلبخ على غرار " انتو لازم تعرفووا كل حاجة...انا بعرق كتير " ء
او ربنا بيربط على لسانه و يعرض بضاعته الحسنه اولا
لكن طالما ثبت عند السؤال ... ثق في حسن المآل
ان شاء الله
سؤال بريء اخير
هي أخت ؟؟

محمود محمد حسن يقول...

ربنا يسعدك يا اخي ويكتب لك الخير ولو الموضوع خير يقربك منه ولو شر يبعدك عنه .

بره الموضوع يا اخ مجدي ، لما الواحد بتوصل بيه الخنقة من الأخوان مداها ، وانت عارف طبعا إن الخنقة من الإخوان ممكن يبقى شكلها إيه ، بيبص قدامه يتلمس ناس متفتحة زيك ، علشان دول اللي بيخلوه يكمل المسير .

تحياتي

أبو نضال يقول...

ربنا يقدملك اللى فيه الخير ليك فى الدنيا و الآخرة إن شاء الله
:)

عمر عاشق القرآن يقول...

ربنا يستر

وعقبالى يارب لما استنى التليفون زيك كده
بس التليفون ده مش التليفون بتاع المدونة القديمة