الثلاثاء، سبتمبر ١١، ٢٠٠٧

انقذوا العالقين في شوارع القاهرة



يا حكومات العالم
يا اصحاب الضمير الحي
يا اي انسان يؤمن بحق البشر في الوصول الي منازلهم حينما يريدون ذلك
يا اي انسان يؤمن بحق البشر في الذهاب الي اعمالهم في مواعيد العمل الرسمية
يا منظمات المجتمع المدني وهيئات الامم المتحدة

هذه استغاثة من مواطن مصري عالق بشوارع القاهرة منذ اكثر من اربعة ايام ولا يجد اي عون اومساعدة من حكومته المنتخبة من قبل رئيس الجمهورية فقط

ارجوكم تدخلوا ولوبالعسكروالجنود لانقاذنا واعادتنا الي منازلنا

ما سبق هو استغاثة كتبتها من اجل ارسالها الي كل من يستطيع ان يقدم العون لنا نحن الشعب المصري الذي يفتقد ادني درجات الاحترام من قبل حكومته والذي تحول اغلبه الي عالقين في شوارع القاهرة مع بدء الازمة المرورية التي تعصف بالبلاد منذ اربعةايام

البداية

منذ اربعة ايام فوجئت عند نزولي من مكتبي بشارع الهرم قد تحول الي جراج كبير تصطف فيه الاف السيارات ولا احد يعرف لماذا مما اضطرني الي الذهاب الي منزلي مشيا قاطعا حوالي 12 كيلومتر علي اقدامي

اليوم التالي علقت علي محور 26 يوليو حوالي ثلاث ساعات عند ذهابي الي نقابة الصحفيين لحضور ندوة عن حكم المرتد في الاسلام وعند وصولي كان متبقي حوالي عشردقائق وتنتهي الندوة وعلمت ان الدكتور سليم العوا لم يحضر لانه كان من العالقين في مدينة نصر وكدت اجزم ان من ارتد قد ارتد بسبب تعرضه لتجربة الاحتجاز في شوارع مصر نتيجة اختناق مروري وطلبت من احد المنظمين للندوة ان يطلب من السادة المحاضرين ان ينصرفوا لاننا عرفنا سبب ارتداد الناس عن دينهم

اليوم الثالث فوجئت باحد السائقين عندما طلبت منه الذهاب الي التحرير يرفض وينطلق هاربا وكان شياطين الجحيم تطارده واستسلمت للامرالوااقع واستخدمت ثلاث وسائل للنقل حتي اصل الي هدفي وكانت كالتالي تاكسي - مترو - قدمي وقد قطعت المسافة في خمسة اضعاف وقتها الطبيعي
حلول

عزيزي المواطن اذا كنت من مالكي السيارات فالافضل لك ان تترك سيارتك في مكانها ولا تقربها وتعتزلها تماما لانني احذرك من انك ستتمني ان " تولع السيارة باللي فيها " مما ستشاهده في شوارع القاهرة
عزيزي المواطن اذا كنت من اصدقاء سائقي الميكروباس فاياك ان تفكر في استخدام تلك الوسيلة لانك ستعلق مع العالقين ولكنك ستتميزعن الباقي بانك ستسمع مجموعة من الشتائم والسباب الصادرة من صديقك السائق الذي فقد قوت يومه لان سيارته وركابه اصبحوا من العالقين
عزيزي المواطن لن اكلمك عن وسيلة المواصلات التي انقرضت وهي ما يسمي بالاتوبيس او " الحافلة " واعتقد ان رواد المدونة قد بلغوا من النضج والاحساس بقيمتهم كبشر ما يمنعهم من استخدامتلك الوسيلةالغير ادمية بالمرة فضلا عن حالة الانسداد المروري الذي تعيشه القاهرة هذه الايام

عزيزي المواطن لن يتبقي لديك سوي المترو كوسيلة انتقال لك في القاهرة ولكن عليك ان اردت استخدام تلك الوسيلة ان تقدم بعض التنازلات والتضحيات وهي كالاتي

تحمل اللفحة الساخنة التي ستلفح وجهك عندما يقتح باب المترو والتي ستجعلك تعيد النظر الف مرة قبل القاء نفسك في هذا الاتون المستعر

تحمل رائحة العرق التي حولت عربة المتروالي كهف عطن الرائحة وكانك انتقلت الي" العصر الطيني العفني النتني" والذي قضي فيه علي الديناصورات تلك الكائنات التي كانت تحكم الارض وتحملت كل التغيرات البيئية ولكنها فنت عن بكرة ابيها عندما تعرضت الي لفحة واحدة من رائحة عربة مترو مصرية

تحمل اختلاط الانساب والجينات الذي سيحدث نتيجةاختلاط الاعراق " والاعراق هي جمع عرق وهوما يفرزه الجسم البشري عبر سطح الجلد " ويوجد دائما في الدائرة المبللة التي تقع اسقل ابط المصريين العالقين في المترو

تحمل الساعات الطوال من الوقوف اما شباك التذاكر للحصول علي تذكرة والتي من الممكن ان يتوقف قلبك من الفرحة عند حصولك عليها وتتحول تذكرة " التحرير- جيزة" الي " الدنيا - مقابر الامام "ولا تخف الوحدة فهناك الالاف الذين قطعوا معك نفس التذكرة

الله يخربيتكم يا بعدا
طبعا كل هذا هو مسؤلية كاملة للحكومة التي من اول مهامها ادارة الدولة بما يحقق للمواطن ابسط احتياجاته ولكن بما ان النظام يملك ولا يدير فسنجد ان كل افراد الاجهزة التنفيذية والامنية والتي نراها تتجمع في" فواني" جمع الفانية وهي التي اقل من "الثانية" عند حدوث اي تجمع سلمي يعترض علي الكوارث التي نعيشها الان ونجدهم يلقوا القبض علي المتظاهرين بزعم تعطيل الحركة المرورية ولكنهم امام ما يحدث من حالة العلق التي يعيشها المصريون الان عاجزين مختفين لا مبالين
الله يخربيتكم يا بعدا
تحذير

لا تفكروا في النزول الي شوارع القاهرة الا اذا كنتم تلفظوا انفاسكم الاخيرة وبدلا من الفاظها في البيوت فالفظوها في شوارع القاهرة مع العالقين من اهلها فمن الممكن ان تنالوا اجرالذين ماتواعالقين واعتقد ان اجرهم يفوق اجر الذين قضوا غرقا اوحرقا وذلك لان العالق سيكون قد مات"
مخنوق من اللي بيحصل ومحروق دم اللي جابوه من حالته" واخيرا
رمضان كريم
ويللا مش مهم

هناك ١٨ تعليقًا:

7amsawy يقول...

ياسلام عليك يا استاذ مجدى
والله ضحكتنى وخرجتنى من الهموم الى انا فيها
عندك حق والله يا استاذنا وكل الى بتقول عليه عن المرور فى رقبة الخائن الظالم الهاتك عرض الشعب القابع فى شرم ودابة الأرض تأكل منسأته حاليا
يلا سلام وعلى فكرة ده اول تعليق فى حياتى على تدوينة وانت رائع وهتلاقينى معاك على طوووووول
مع السلامة

إيمــــان ســعد يقول...

فيها ايه لو قضينها عجل

:))

عموما انا مستعدة اضحي و اتحمل اني اعلق فى شوارع مصر الحبيبة لو بعربية بي ام زرقاء

و ربنا يعيني وقتها بقه

:)

أندلس يقول...

ضحكتني وانا مكتئبة من نفس السبب دة
امبارح جنيت على حق نفسي ورحت من مدينة نصر للتحرير بالعربية ورجعت
كرهت نفسي وكرهت السواقة وكرهت كوبري أكتوبر اللي بحبه
وكنت بعيط وانا سايقة من وجع ركبي
دة غير كمية الدعاء اللي دعتها على الحكومة اللي خربت البلد
والناس ملهاش سيرة غير الزحمة اللي ملهاش حل دي
ودة لسة رمضان مبتداش
ربنا يعينا والله

GAMTIME يقول...

مين بس اللى ينقذ مين

دا اللى مش عالق فى المرور يابنى عالق فى المجارى

عالق على فلكة الحياة
يللا

من لم يمت بالعلقان فى الشوارع ... نات بغيرة

وولا يهمك

غير معرف يقول...

رمضان كريم

كل عام وأنتم بخير

غير معرف يقول...

والله يامجدى انا لسه عامل حادثه بالعربيه امبارح ولولا ستر ربنا كنت رحت فيها ف يعنى الحمد لله على الزحمه احيانا
حاتم ثابت

Moaaz Mady يقول...

طيب تقول ايه يا حلو للي راح من الصبح مشوار من مدينة 6 أكتوبر إلى مصر الجديدة
كان المفروض إني هأدي واجب زيارة مريض الصبح قبل ما أروح الشغل وبعدها أوصل اللي معايا لأقرب محطة مترو وبعدها أرجع الشغل

طبعا كل الأماكن المخنوقة لازما هتعدي عليها يا حلو
من الخنقة بتاعة المحور لميدان لبنان لكوبري 15 مايو لكوبري أكتوبر لشارع صلاح سالم لشوارع مصر الجديدة
كانت رحلة عسكرية من الطراز الأول

مجدي
انت عبرت عن اللي جوايا بامتياااااااز

روح ربنا يفكلك شارع الهرم وتلاقيه فاضي

آآه بالمناسبة اليوم ده لم أصل إلى الشغل أصلا
وعدت إلى البيت بعد منتصف الليل
حتى الآن لم أفهم كيف؟!!!
سلام يا جميل

شقاوة شعب يقول...

يا خبااار
وانا اللى طول عمرى نفسى اسكن فى القاهرة عشان مجالات الدراسة فيها احسن من اسكندرية ومجالات ممارسة دراستى فيها اكتر

يالا بقى خيرها فى غيرها
ندور على بلد تانية وامرنا لله

وكل سنة وحضرتك طيب بمناسبة شهر رمضان الكريم
اسال الله ان يبلغنا جميعا ليلة القدر
ويكتبنا من عتقائه من النار فيها
ويفك اسر اخواننا واساتذتنا وشعبنا وبلدنا

hend galal يقول...

عزيزي الاستاذ مجدي،
فاهمة انت بتكلم على ايه لأنني ساكنة في فيصل وشغلي في أخر المعادي ولظروف خاصة بضطر كل يوم اروح من المعادي للدقي وبعدين ارجع فيصل اخر اليوم يعني واخدة القاهرة كعب داير :)المواصلات بشعة وغير أدمية وكمان انت نسيت حاجة مهمة؛رائحة البنزين الجديدة اللي خانقة الشعب كله يعني خنقة فعلية ومعنوية.
بس مع احترامي لكل العالقين في قاهرة المعز احنا كمان علينا عامل، طريقة القيادة وعدم انتظام الناس في الصعود والنزول من أبواب المترة المخصصة لذلك وغيره كتير. كلنا ناقمين على الحكومة وده حقنا بس لازم كمان نقف شوية مع نفسنا. تفتكر ده مهم ولا برده ياله مش مهم؟؟
كل سنة وكل المدونين والقراء بخير وربنا يتقبل منا جميعاً

انا مش بتفلسف علي فكرة يقول...

السلام عليكم:
ايه ياجماعه؟
اغيب عند فتح مدونتك ياستاذ مجدى ياجى اربع خمس ست ايام اجى الالقى اكتئاب من التدوين علي تشجيع من الناس علي موصلات تعابة الناس كلها
المهم كل سنة وانتوا طيبين كلوكوا وان شاء الله يكون رمضان جميل عليكوا يارب السنة ديه قررت اقول كل سنة وانتوا طيبين اكتر من كل عام وانتوا الى الله اقرب
سسسسسسسسسسسسسسسسسسلام

miro يقول...

اسلوب حضرتك جامد جامد بجد وعلشان انا مش من القاهره ولما بنزل القاهره مبشوفش الكلام ده خالص فمش حسه بالمعاناه دى
كان فى مره واحده بس وقفنا فالدائرى يمكن عشر دقايق وكنت قاعده فالتكييف وكنت قرفانه بقه وزهقانه وهموت كمان فالله يكون فعونكم

شذى مولوتوف يقول...

الله ***** شارع الهرم
والله ****** شارع فيصل
وكمان مرة ****** شارع فيصل اللى ساكنة فيه وبدعى عليه هو وسواقين الميكروباصات اللى بيقفوا فى وسط الشوارع يركبوا ناس او ينزلوهم

والله زلين انفاسنا وانفاس اللى
ولا بلاش

من الجيزة
اللى بيخدوا فيصل على محطات
بس الحمد لله
ربنا بيحبنا وساكنا فى الطالبية
المحطة المعترف بيها


بجد بجد اسلوب رائع جدا
انا لسة بقول لبابا البلد دى خلاص ماينفعش يتقعد فيها


يلا كل سنة وانتوا طيبين
ربنا يجعلنى واياكم من عتقائه

غير معرف يقول...

الموضوع دا بيفرق أوي كمان للي عندهم نشاط أخواني بالليل ..

ربنا يكون في عونهم

عمر أفندى و أبووه يقول...







ركبنا العربية ...تذمرت تذمرا‘ شديدا و قولت لمراتى مليش دعوة انا عايز عادل مسلم

يا مشمش قلبى يا بلح حياتى يا كنافة عمرى كل رمضان و انتى قمر الدين بحبك و بموووووت فيكى"

عمر افندى فضل يحك الفانوس مطلعشى حاجة فا بدأ فى تفكيكه لقطع للبحث عن العفريت

حتى الهلس يا ناس موش موجود هنا

كل دا و غيره كتير فى مقال (
رمضان من السودان) على موقع عمر افندى اليوم

www.omarafandy.com


غير معرف يقول...

السلام عليكم

رمضان كريم جميعا

مش قادر اقولك ضحكت اد ايه لما قريت المدونة... لسبب تاني خالص وهو اني في السعودية هنا وكنت راكب مع مديري وهو سعودي وكان متضايق اوي من الزحمة... اللي هي ايه بقى اننا وقفنا في الإشارة 6 دقائق فقط...
ساعتها قلت له انت بس محتاج تنزل ميدان الجيزة.. ولا بلاش شارع عثمان محرم في الطالبية.. وابقى قابلني لو طلعت منه..
راح رد علي رد غريب بصراحة سكت وقلت اللهم اني صائم... بيقولي "لا مش في اشارات مرور والناس بتحترمها!!!"
ايه رأيك يا مجدي كنت ارد عليه اقوله ايه؟!
احمد سليم

bahry يقول...

العالقون في المحروسة

يا ناس

يا هووووو

حد ينجدنا

هنموت خلاص

الحقوووونا

Anas Emad يقول...

باين عليك كاتب التدوووينة ده

علي الــلاب توب و انت عالق في الزحمة

اصل التدوينة سخنة قوووي

وزحمة قوووي ..

ربنا معاك

أميرة محمد محمد محمد يقول...

ضحكتني والله يااخ مجدي بالفعل ما تقوله ماسه ومش في القاهره بس حتي في الاسكندريه طريق البحر اللي كان بيبقي اسرع طريق بقي ماحدش يعرف يمشي فيه وخاصة في وقت الظهر

ربنا يكرمك ويوصلك بيتك بالسلامه انت وكل العالقين عند معابر ميدان التحرير وشارع الهرم