الجمعة، مايو ١١، ٢٠٠٧

خيرت .. أرجل منك




بعد خمس افراجات من المحكمة وحكم بعدم احقيتك بتحويل المواطنين للعسكر الا انك مصر علي عدم الافراج عنهم وقاعد تلعب الاعيب قذرة للحيلولة دون خروجهم وبتعند وبتلعب بكل مؤسسات الدولة وبتهدر احكام القضاء علشان رغبة شخصية في الانتقام وانا بقيت متاكد من انك علي استعداد تبيع البلد باللي فيها علشان رغباتك الجنونية بس كل ده مش هايغير من الحقيقة شئ
ان
خيرت ارجل منك
ايوة ارجل منك وعارف ليه
لان خيرت صاحب فكرة وبيضحي ليها اما انت فصاحب مصلحة وبتضحي باللي حاوليك علشان تحصل عليها


.. فخيرت ارجل منك
ولان خيرت اتحبس قبل كدة مرتين واتقفلت شركاته واتصادرت امواله ولسة ثابت علي فكرته ومبدأه اما انت فكل ساعة بحال علي حسب مزاج السيد الامريكي ..


فخيرت ارجل منك
ولان خيرت وجماعته واجهوك بشرف في الانتخابات اللي فاتت والناس اخترتهم واختارت مشروعهم اما انت وحزبك فلولا اموالكم وقمعكم كنتم بقيتم في مزبلة التاريخ ..


فخيرت ارجل منك
ولان خيرت بيحترم القضاء المصري وبيعلم اللي حواليه احترام احكامه اما انت فالقضاء وكل مؤسسات الدولة اصبحت لعبة في ايدك بتشبع بيها رغباتك الجنونية ..


فخيرت ارجل منك
ولان خيرت بيته واهله مؤمنين بقضيته وفكرته وواقفين وراه وبكل قوة اما انت فبيتك واهلك عايزين يورثوا البلد ويحولوها لتكية غصب عن اهلها ..


فخيرت ارجل منك
ولان خيرت بيحط راسه علي مخدته وبينام وهو مستريح البال لانه مظلمش حد ولا قمع حد ولا سرق حد اما انت فكفاية عليك دعوات ملايين المصريين المظلومين ...


فخيرت ارجل منك
ولان خيرت بيدافع عنه حتي المخالفين ليه في فكره وكسب احترامهم اما انت فبيدافع عنك شوية افاقين ومأجورين حولوهم نظامك لاغوات واقفين علي بابك لحين الانتهاء من اغتصابك للبلد ...


فخيرت ارجل منك
ولان خيرت صوته من دماغه وقراره من ارادته الشخصية اما انت فصوتك وارادتك رهن لحضور الست كوندليزا وقبلها الست اولبرايت علشان نسمع صوتك او نشوف قراراتك


فخيرت ارجل منك
ولان خيرت موجود في مكانه بارادة قواعد الاخوان ومنتخب منهم اما انت فوجودك مرهون بقدرتك علي اداء فقرة الاستربتيز السياسي الذي اصبحت تجيده تلك الايام باحتراف فكل ما تحب تقعد او تورث لابنك فتقلع البلد هيبتها ومكانتها حتي اصبحت مصر شرطي اسرائيل في المنطقة وتابع السعودية المطيع ...


فخيرت ارجل منك
ولان خيرت مش بيداري ويطرمخ علي الفاسدين والنهابين وبيهربهم للخارج اما انت فصاحب العبارة ولصوص البنوك ومحتكر الحديد ومورد اكياس الدم يشهدوا علي ان ...


خيرت ارجل منك
ولان خيرت وجماعته حاولوا يجمعوا المعارضة ويلعبوا السياسة بنضافة ويحيوا الحياة السياسية تاني اما انت فلعبتك هي افساد الاخرين لضمان بقائك واقامة احزاب كرتونية ورشوتك لبعض رؤساء الاحزاب تشهد علي ان ... خيرت ارجل منك
ولان خيرت احترم منافسيه في الانتخابات وترك هو وجماعته دوائر للرموز الوطنية اما انت وحزبك فمسحته التنافس السياسي باستيكة القمع والرشاوي السياسية ...


فخيرت ارجل منك
ولان خيرت في سجنه واغلاله اقوي منك ومن نظامك البوليسي القمعي ومبعاش ولا بطل ولا سافر ولا ساب ..


فخيرت ارجل منك
ومن الاخر حبسته او سيبته عارضت او استشكلت اعتقلت او عذبت سجنت او موت برضه
خيرت ارجل منك
ويللا مش مهم

هناك ٢٣ تعليقًا:

jowayreya يقول...

salamu 3alaykom,
this is life,
people love ALLAH and work 4 him, and people just living blindly for themselves working for themselves:S:S:S
what r u wainting from some one just before dying just thinking of his damn son is gonna govern or not, not thinking at all what he gonna tell GOD about what he did to us,
someone wasted the country for 25 years, and wanna complete his damn stratigy after he dies :S:S
may ALLAH give us patience and faith and energy to work
salam

أبو نضال يقول...

صدقت فى كل كلمة انت قلتها يا أستاذ مجدى


بس ربنا يستر عليك

:)

حارة سد يقول...

كلامك صح يا استاذ مجدي
جزاكم الله خيرا

غير معرف يقول...

مش بقولك يا عم مجدي صوابعك أقوى وأحسن ... بلاش مش مشهم
يا باشا هو وكل اللي حواليه في مزبلة التاريخ من زمان
وبعدين عاوز أقول حاجة هو لو راجل بصحيح ينزل الشارع وسط الغلابة بلاش الغلابة اللي ملوا البلد ينزل في أي حي وسط الناس

عمرو طموح يقول...

لا يا أستاذي...

مينفعش تقول خيرت أرجل منه...

لأنك كده بتقول إنهم ينفع يتقارنوا...

أو إنه راجل... بس في اللي أرجل منه...

لا...

مفيش بينهم مقارنة...

ربنا لما استخدم كلمة (رجال)في القرآن كانت محسوبة... و ليها معاني و دلالات كبيرة قوي...

مقدرش أحطه أساسا علي معايير الرجولة لأنه ولا حاجة عليها، و لا حتي صفر، و لا حتي سالب.. هو متيحطش عليها...

خيرت راجل... صدق ما عاهد الله عليه... و خيرت راجل... لا تلهه تجارة و لا بيع عن ذكر الله... خيرت راجل...

بس هو...

شيء... شيء كالأنعام بل هو أضل...

اللهم عليك بمن ظلم و استبد
تبا لهم إلي يوم الدين

عبدو بن خلدون يقول...



مش
عشان
هو
صاحبي

بس
بجد
كلام
عمرو
صح

سيدي
عندما
قارنت
بين
عمو
خيرت
والتاني
ده

عملت
زي
اللي
قارن
النسر
بالفار

فشرف
الفأر
بذلك
شرفا
لا
يستحقه
ولا
يحلم
به

ومنطقيا
لا
تصح
هذه
المقارنة
أساسا

لإنك
لو هتقارن
لازم
يكون
فيه
معايير
وأسس
ومؤشرات
بس
بقى
البتاع
الضايع
ده
اسم
الله
عليه
جايب
صفر
في
كل
حاجة

غير معرف يقول...

داما متألق ...دائمً كريم ...دائماً مهذب
تعاملت مع هذا الشئ بكثير من الكرم
فوضعته مع لشـاطر
وقارنت بينهما
رغم مابين الخصمين من فارق وفروق


خللى بالك على نفسك ..علشان التدينه دى ناشفه ..وربنا يستر

غير معرف يقول...

http://lesa-3aish.blogspot.com/

مشروع انسان يقول...

من المؤمنين رجال صدقوا ما عاهدوا الله عليه فمنهم من قضى نحبه ومنهم من ينتظر وما بدلوا تبديلا

اروي الطويل يقول...

اممممم
لا تعليق
أروع من اني اعلق
حماكم الله
وده راجل لانه راجل بس كدا

خطــاب يقول...

رائع يا استاذ مجدى

الدنيا سجن المؤمن

مصري إخواني يقول...

بصراحة ياصاحبى بين لحظة وضحاها أتوقع أنك متكنش معايا، الكرف علىَُ ياعم مجدى انا معك ومؤيدك فى الدفاع عن إخواننا، ومعك اننا لا نستطيع أن نحبس آهاتك المكلومة من هذا النظام الفاسدومن حاكمة المتغطرس لكن ليس بهذا العلو.
ربنا يحفظك ياصاحبى الأيام القادمة سأظل واضع يدى على قلبى.
المهم إنك ترجعلنا بالسلامة.
صحبك عبده دسوقى

ومضات .. أحمد الجعلى يقول...

فعلا مش عارف أرد على هذا الموضوع بأى تعليق

هل على أن أطلب منك ان تهدئ من حدة الكلام رغم اقتناعنا جميعا به

ام هل علينا أن نؤيدك ونسرد ونضيف إلى ما ذكرته من مساوئ وعيوب

أم هل علينا أن نصفق للرجال الرجال ونحيى صمودهم ونسأل الله لهم فرجا قريبا واجرا مكتوبا.

حقا أصبحنا فى زمان يصبح الحليم فيه حيران

غير معرف يقول...

اتخنقت خلاص زهقت ملبيت واللي فيه
يا عم مجدي كما قلت لك انك صوت الشعب

كلامك في محله واحنا يا اخوان مش في حصة عربي علشان تقول ارجل ورجل
المهم اننا ان صاحب الرسالة افضل من صاحب المصلحة
ونفسي بلاش نفسي دي علشان مجدي
نخليها بدي نكثر من الدعاء لعل وعسى ويلا ربنا يبارك في فلمك

غير معرف يقول...

تسلم ياصديقى تدوينة موفقة وحلو أوى الخط بتاع عبد الحليم قنديل ده فى الكتابة بس خلى بالك من نفسك وأنت مروح باليل

غير معرف يقول...

صاحبي مجدي
كنت ناوي اعلق واتخانق معاك اعتراضاً على انك تقارن بين الكائن الحي اللي اسمه حسني وبين المهندس خيرت بس وجدت ان الرجالة عمرو وبن خلدون قالوا نفس الملحوظة بالظبط وده بيأكد نظرية ان اللي دون ما ماتش
وبالنسبة للمخلوق المسمى حسني فأنا باعتبره صنف تالت يعني لا هو بني آدم لن تصرفاته مش تصرفات بني آدمين ربنا حباهم بمخ للتفكير والأغلب انه قرر يستثمر في موضوع المخ ده وباعه لمستثمر اجنبي عمل بيه عربية مخ بانيه؛ وفي نفس الوقت هو مش حيوان لن الحيوانات والله أرق من كده وعندها قلب عن اللي ما يتسماش
وما نقدرش نقول انه جماد لأن الجماد ليه فايدة يعني الجزم ليها فايدة مثلاً بس حقيقي انا مش عارف لازمة سعادته ايه؟

غير معرف يقول...

لا طبعا حرام عليكم حسنى مش بالوحاشه ديه
هى حتى الوحاشه ديه افضل منه وبعدين هو ليه لازمه طبعا ياصاحبى
انه يقرفنا

غير معرف يقول...

تسلم ايدك يا صاحبي عبرت كثيرا عما بداخلنا ولا يستطيع الكثير منا التصريح به ، وان كنت زودتها شويه ربنا يستر عليك ويحفظك ويتقبل منك .
وربنا يفك اسرك يا بشمهندس انت واخوانك الاعزاء واخيرا اتفق مع عمرو ابن خلدون واسلام ،لا يستحق هذا هذا الشخص ان نضعه في محل مقارنة مع اي كائن ايا كان
والسلام ختام

غير معرف يقول...

حسنى مبارك طابور خامس مش صف تلات

غير معرف يقول...

قوم إذا صفعت النعال وجوههم
شكت النعال بأى ذنب تُصفع
مش متأكدة منوزن الشطر الأول اللى يعرف البيت ده يفكرنى بيه
***
وبالنسبة لتعليق ابن خلدون
لحظة يا استاذنا
مثالك عن مقارنة النسر بالفأر هو كمان غير دقيق
لأن النسر طائر يأكل الجيفة
فى حين الصقر أرقى من ده كثيرًا
عشان كده يقولوا صقر قريش وصقر العرب
مش نسر قريش
حصة العربى محتاجة تركيز يا أفندية عشان بتفرق والله العظيم
ربنا يستر على استاذنا
ودعواتكم

غير معرف يقول...

المدونة دي جميلة بس انت ناوي تروح تاني ولا ايه





هاجر محمد السعيد

غير معرف يقول...

ربنا عالظالم

بس انا تعليقي على استخدام مصطلح الرجوله

مصطلح صعب تلاقيه دلوقتي في أرض الواقع
وللأسف كل واحد بيفهم الرجوله بمزاجه

يعني
ياريت لو كل واحد يشوف هل هوه راجل بجد ولا؟
طبعا أقصد راجل زي خيرت
راجل في كل حاجه
راجل مع كل الناس

حلم الحرية يقول...

ارجل منه طبعا

دي حقيقة لا تقبل الجدل

وواقع لايقبل النقاش

وان كنت زي ما قالوا اللي قبلي شايفه انك ظلمت خيرت الشاطر بمثل هذه المقارنة

تحياتي لقلمك