الثلاثاء، يونيو ١٢، ٢٠٠٧

امي دي غريبة قوي


من يومين وانا نازل الشغل ملقيتش الحزام البني ودورت عليه ولم اجده كعادتي واثناء وانا بدور عليه امي قلقت من نومها ورفعت دماغها من علي مخدتها وسالتني انت بتدور علي ايه مجدي فجاوبتها باني بدور علي الحزام البني فلاقيتها بتقولي وهي بتقوم من نومها طيب استني هادورلك عليه

قلتلها يا امي لو سمحتي قولي ممكن الاقيه فين وانا هاتصرف الا انها كعادتها رفضت وقامت من نومها وقلقت راحتها علشان تدورلي علي الحزام البني وكعادتها لقيت الحزام في ثواني وانا اللي قعدت ادور عليه حوالي عشر دقايق وجت اديتهولي ورجعت تكمل نومها

امي دي غريبة قوي

من فترة رجعت البيت باليل وسالت عن البنطلون الجينز الكحلي فلقيت اختي بتقولي في الغسيل مش نضيف فاصابتني نوبة من نوبات الحمق الطفولي التي تصيب الرجال مهما كان سنهم او مقامهم او خبراتهم والتي ترجع بهم الي سنين عمرهم الاولي عندما كانوا يصرون علي شئ مش موجود ويبكون ويصرخون ملحين في الطلب علي هذا الشئ ومصرين في الحصول عليه حالا وقد كان الا انني لم اصرخ ولم ابكي ما فعلته انني عبس وجهي وغضبت وذهبي الي النوم بدون ان اتناول عشائي وعندما صحوت من نومي وجدت بنطالوني الجينز مغسول ومنشور وورقة صغيرة علي المرايا مكتوب عليها

"مجدي امك غسلت البنطلون وبتقولك لو منشيفش لما تيجي نازل ابقي صحيها علشان تنشفهولك بالمكواة "

امي دي غريبة قوي

ساعات ببقي قاعد قدام التليفزيون وكسلان جدا جدا وعطشان موت بس مش عاوز اقوم اشرب فاستني حد من اخواتي البنات قايم او بيتحرك فاقولوها ممكن تجيبلي اشرب فيكون ردها " لا اللي عايز حاجة يقوم يجيبها "ومتعديش ثواني الا لما الاقي امي جايبللي الميه علشان اشرب

امي دي غريبة قوي

لغاية قريب كنت لو اتصلت بيهم اسال علي هدوم معينة علشان محتاجها تاني يوم الاقيها ترد عليا انها مكوية وجاهزة واكتشف بعد كدة انها مكانتش مكوية وانها قالتلي كدة وقفلت معايا السكة وكوتها هي

امي دي غريبة قوي

لما كنت في السجن طلبت منها اكتر من مرة لو سمحتي متجيليش كل زيارة خليها زيارة وزيارة كانت تغضب وتزعل وممكن تعيط وتبكي وكانت ترفض طلب اخواتي بعدم الذهاب للزيارة لانها تعبانة ولازم ليها الراحة وكانت مصرة تلبيلي كل اللي انا بطلبه وتسعي ورا طلباتي وحاجتي وتوصلهالي للسجن او تيجي النيابة وتسيبها مع المحامي وتمشي وما تشفنيش

امي دي غريبة قوي

لما برجع من شغلي تعبان ومرهق ومش شايف قدامي وافتح الباب واقول سلامو عليكو الاقيها بتبصلي بنظرة شفقة وحنان غريبين وببقي حاسس انها ممكن تقوم تشيلني من علي الارض

امي دي غريبة قوي

كانت بتجيللي الزيارة وهي متماسكة وتقعد تكلمني عن فلان وفلان وفلانة اللي اتجوزت ومين اللي تعبان ومين اللي سافر وتخلص الزيارة وتمشي لكن بعدها كنت بعرف من اخواتي البنات انها كانت بتعيط في البيت بالساعات من غير سبب ولما يسألوها عن السبب كانت تقول السبب البهدلة اللي فيها مجدي

امي دي غريبة قوي

لما تيجي تطلب مني حاجة اجيبها من خارج البيت الاقيها بتطلب مني وكلها استحياء وكانها تطلب ما ليس من حقها وتكلمني بمنتهي الخجل وتقدم مبررات كتيرة لسبب طلبها مني هذا الطلب وكيف انها كانت ستاتي به لولا انها مشغولة في اعمال البيت ومش هاتقدر تنزل تجيبه

امي دي غريبة قوي

امي

بجد انت اتعبتي اي امراءة ستأتي بعدك

تعليق من عندي " متخفيش يا امي من الواضح ان مفيش حد جاي خالص"

ويللا مش مهم

هناك ٢٥ تعليقًا:

أحمد بن شلبي تكعيب يقول...

وانا .. برده ... امي ... غريبة ... اوي

لكن ... امي ... فين ؟؟؟؟

محمد رفعت يقول...

يا ابن الذين يا أحمد
سبقتني في التعليق بتاعي
كنت هقول نفس الكلمة

وانا كمان
أمي غريبة أوي أوي

محمود سعيد يقول...

والله فكرتنا يا أستاذ مجدى بطيبة أمهاتنا كلهن
فهذه المواقف لم تتفرد بها والدة حضرتك
فهو حال كل الأمهات
وأمى كمان :-)


بس ليه اليأس اللى فى آخر كلمتين دول :-)

شروق الشواف يقول...

ربنا يخلهالك ...

بس اخواتك البنات دوول جدعين جداا... لاني بصراحه بتغاظ لم أخويا يعمل فيا نفس الحركة دي ...وانا لم اطلب طبعا ميردش أصلا عليا ...

Bella يقول...

كل الامهات المصريات كده

ومن غير زعل ده مش صح

يعني امي كمان مربية اخويا عل كده واوقات بتكون مش قادرة تقف وبتعمل له مليون حاجة

وهو طبعا كالعادة مش بيحس بالجهد اللى بتبذله

ومن غير زعل كمان ده بيطلع رجل لايستطيع اذا وضع تحت اي ظرف ان يتصرف لوحده ويأكل نفسه لو الظروف اضطرته يتغرب مثلا

لايعرف ياكل ولا يلبس ولا يعمل اي حاجة

لو كل الابناء اتربوا على المساعدة الحمل ح يخف عن البنات وفي نفس الوقت الابن نفسه سيكون رحيم بزوجة المستقبل

ويستطيع التصرف اذا اضطرته الظروف

لكن نعمل ايه بقى

امهاتنا السبب في تدليلكم

عبدو بن خلدون يقول...



أولا
مساء
الفل
يا
معلم
وإبقى
رد
عليا
يا
نجم

رابعا
الفكرة
يا
حلوين
في
التوازن

بين
مشاعر
الرحمة
وحاجة
كده
بيسموها
"
حدب
"
الأم
علي
أبنائها

وبين
إنه
البني
آدم
سواء
ولد
أو
بنت
لازم
يطلع
معتمد
علي
نفسه
وعارف
الدنيا
ماشية
إزاي

المشكلة
بقى
في
العاطفية
الشديدة
التي
تزيد
أحيانا
عن
الحد

يعني
معلش
بس
إزاي
مس
عارف
تلاقي
الحزام

لا
مؤاخذة
يعني
بس
لو
كنت
دخلت
الكشافة
زمان
وكنت
شبل
كويس
وكشاف
ابن
حلال
كده
مؤدب
مخلص
نافع
ودود
رفيق
مطيع
باش
مقتصد
نظيف
شجاع
ومقدام
كنت
عرفت
إن
الله
حق
ولقيت
الحزام
وغسلت
البنطلون

علي
فكرة
يا
أونكل
مجدي
محدش
عارف
بكرة
فيه
إيه

بكرة
يجيلك
اللي
يتعب
منك
ومن
والدتك
ويتعبك
ويتعب
والدة
حضرتك
يا
زعيم

إخوانى مخربش يقول...

هو فين الغرابة فى كدة

ويلا مهم

ومضات .. أحمد الجعلى يقول...

يا نهااااااااار أبيض

حتى هذا الموضوع اللى بيتكلم عن الأم وحنانها ودورها ومجهودها، هنحوله لموضوع فلسفى ونخرج منه بقضية وآراء واختلافات ومناقشات واحتمالات وابحاث وحلول
(:

اكيد إنت فيك شيئ لله يا أستاذ مجدى، وفى فعلا مغناطيس بينك وبين القاء الحجارة فى المياه الراكدة، حتى لما جيت ترمى ورد فى الميه عمل طرطشة وزوابع
(:
ارجو ما حدش يزعل منى انا بس باهزر وسلمت امك يا أستاذ مجدى وكل امهاتنا وأعاننا الله على أن نكون بارين بهم ونستحق رضاهم ودعاهم

فوضى منظمة يقول...

أنا اما قريت الموضوع ..قلت لازم ابعت تعليق..بس انا مش عارف اكتب واوصف مشاعري

Alaa يقول...

هي غريبة فعلا
لأن الامهات اللي بالشكل ده بدأوا ينقرضوا
ربنا يحفظهالك و يخليهالك و يقدرك على ارضائها

مصري إخواني يقول...

بصراحة ياعم مجدى انت جعلت العيون تسكب الدمع، ربنا يحفظها لك ويحفظك لها
أمال ياعم مجدى الجنة تحت أقدمهم كيف...
وياصحبى ..أمك..أمك..أمك

الكواكبي يقول...

ما هي يا بني لازم تكفر عن خطيئة "زرعك" وسطينا . . هي اللي عملته ده شوية . .عموماً ربنا يسامحها ويخليها لك
بالمناسبة: بتدخل البيت ازاي تلاقيها؟ هي مامتك بتطبق شفتين ولا ايه . . انا متهيألي عمرك ما روحت قبل 3 بالليل

غير معرف يقول...

يجد انا بكيت
وانا لا املك الا ان اقول
اللهم جازي امهاتنا الجنة
ويارب ترزقني انا ومجدي حد
لالالالالا حدين
ويرزق جميع الاخوة اللي زي حالتنا بمن تراعيه وت......
مثل امه

غير معرف يقول...

حسبي الله وتعم الوكيل

عمر أفندى و أبووه يقول...

امى دى غريبة قوى

و مصر هية امى زى ما كلنا عارفين

يبقى مصر دى غريبة قوى

...............

لا الموضوع حلو فعلاً

غير معرف يقول...

موضوع جميل يا أ.مجدى

ذكرنى بامى الغالية

واللى غالبا فى اوقات الامتحانات

بكون مقصرة معاها جداا

وبوعدها فى الاجازة بانجازات ضخمة معاها
بس ربنا ييسر وتتعمل

كثير من الامهات كده

تبقى مشكلة عندنا لو حسينا وايه الغريب فى كده؟؟

لا..طبعا ده عطاء بلا حدود منهن بس مع الوقت وكثرة النماذج بنفتكر ان ده حق مكتسب

ونقول عادى يعنى مكل الامهات بتعمل كده..

غير معرف يقول...

امك الله يسامحه مدلعاك تنعامل انت بطريقه خاطئه وهي تسيسك وتعملك اللي عايزوه الله يكون في عون مراتك ويسامح امهاتكم اللي بيعودوكو علي الطريقة دي وتستخدموها بعد كده مع زوجاتكم ومن هنا تكون المشاكل تكون بتعاملك هي بالطيبه دي وانت بتستنزفها تغضب ووترفض العشا وتعسلك البنطلون تطلب المياه وانت قاعد وتجيبهالك ..........ز
صدقني لازم تغيير طبعتك دي لان كده مراتك هتتعب جدا

ومضات .. أحمد الجعلى يقول...

الصراحة يا أستاذ مجدى مش امك فقط هيا اللى غريبة اوى


إنما كمان فى معلقين غراب أوى
"ملحوظة غراب من غريب وليس من شيئ آخر"

غير معرف يقول...

أمك

...

الله حلو أوي الكلام في الموضوع ده
أول مره تتكلم عن أمك في المدونه

بس أمانه عليك تسلملنا عليها وتقولها إن كل زوار المدونه بيدعولها وخليها تدعيلنا كلنا زي مابتدعيلك


أمك
ثم أمك
ثم أمك

ثم أبوك

Strong80 يقول...

ly.dargalyانت عايز تجيب لامك الشتيمة ليه يا عم الفلحوص واحنا مالنا وال أمك يا عم مجدى شراب وبنطلون وحاجات غريبة تانية مخرمة ياعم ارحم امنا وامك لو سمحت

غير معرف يقول...

استاذ مجدى الموضوع جميل.وبصراحة عاطفة الامومة ليس لها حدود.ربنا يخليها لحضرتك.بس برضه التوازن مطلوب.

سلسبيل يقول...

ربنا يبارك لحضرتك فيها

بجد جميله مش غريبه

ربنا ميحرمكش من حنانها ابدا

Sally يقول...

امك دي مش غريبه اوي
امك دي جميله اوي
ربنا يخليهالك يارب

Unknown يقول...

اول مرة ادخل المدونة
قعدت اتصفح التدوينات بشكل سريع دون قرآة .. بس لما شوفت البوست ده مقدرتش مقراهوش

بجد بوست يجنن

ربنا يباركلك فيها وتكون ابن بار بيها وتفرح بيك قريبا

اللهم امين

شــــمـس الديـن يقول...

معلش مقدرتش امسك نفسي بس فعلا الرجالةالشرقيين اتربوا علي النانية و التنبلة و الكسل ابحت

حتي يا ربي كوباية المية مش عايز تقوم تجيبها لنفسك !!!!!

الله يكون في عونها بجد

انما تجني مثل هذه الام علي امراة اخري

معلش متزعلش مني وز اعتذر عما قولت بس فعلا كلمتين كانوا محشورين في زوري