الخميس، يونيو ١٤، ٢٠٠٧

هو الحجاب بينتشر ..ولا المفهوم بيتشوه


لا اعتقد ان هناك احد ينكر الطفرة التي حدثت في الاونة الاخيرة لعدد المرتديات" للحجاب" او "غطاء الراس " واعتقد ان المصطلح الاخير هو المناسب لوصف الحالة التي نحن بصددها
ولكن اعتقد كذلك ان هناك حالة من الغموض والسيولة تصاحب هذه الطفرة وذلك سوف نلاحظه في ما ترتديه بنات ونساء مصر حيث انك اذا كنت تتجول في شوارع مصر ونظرت باستقامة فستجد ان روؤس البنات يلفها ايشارب محكم الربط ولكن كلما نزلت بنظرك لاسفل فستفاجأ باشكال مختلفة من الازياء التي تتناقض تماما مع الايشارب المحكم الربط الموجود علي راس الفتاة وفي بعض الحالات ستصدم عندما تجد امامك فتاة ترتدي ايشارب محكم الربط وبودي عاري البطن او الظهر او جينز لا يعلم احد كيفية ارتدائه من ضيقه واشكال اخري متعددة من تجاوزات الملابس
السلوك
اصبح ايضا من المعتاد ان تجد سلوكيات غريبة جدا تصدر من مرتديات الايشارب فلا مانع من ضحكة عالية او نظرات غير بريئة او تلميحات غير سوية من البنات المرتديات للايشارب محكم الربط حتي بدا تتملكني قناعة باننا اذا تركنا تلك الظاهرة تنتشر بدون دراسة ومواجهة فسيتحول المجتمع المصري الي مجتمع شبيه بمجتمعات الخليج حيث تحول الحجاب الي عرف او تقليد متي حانت الفرصة للتملص منه او من واجباته تملصنا او تحوله لزي معتاد لا يرتبط باي محددات اخري
الشخصية
حكت لي اختي انها في احدي مرات تواجدها في مسجد المعهد التي تدرس به جلست بجوارها مجموعة من البنات المرتديات للسواد اي عبأة ونقاب واشياء اخري كثيرة الرابط بينها هو اللون الاسود وكان حديث تلك البنات هو حول ان احد المشايخ المشهورين يريد الزواج من الرابعة فردت اخري كيف فانه متزوج بالفعل من اربعة فاجابت الاولي بانه طلق الرابعة ويريد استبدالها باخري فردت ثالثة من الممكن ان اكون الرابعة للداعية فلان اما الرابعة لهذا الشيخ فلا
وكانت اختي تحكي لي وهي مصدومة فاحلام وطموحات البنات منفصلة تماما عن ما يجب ان يكونوا عليه
مناقشات
عندما تناقشت مع بعض اصدقائي من الاخوان حول ما يحدث انقسمت ارائنا الي قسمين
القسم الاول يري ان ما يحدث هو امر ايجابي حيث ان انتشار غطاء الراس هو خطوة وسوف يتبعها خطوات اخري تكمل النموذج ككل وتعالج الاخطاء الحالية
القسم لثاني يري ان ما يحدث هو امر في منتهي الخطورة حيث ان المجتمع كله يزحف وبقوة ناحية الالتزام الظاهري وان الحركة الاسلامية انتشت واعتبرت ان ما حققناه في الفترة الاخيرة من انجاوات علي الصعيد الاجتماعي والسياسي هو نهاية المطاف واننا ما زلنا مصرين علي نفس خطاب مرحلة التسعينات ولم نرصد ولم نواعي المتغيرات التي حدثت في الخمس سنوات الفائتة
رؤية
انا اعتقد ان نموذج البنت المسلمة يجب ان يكون متكامل الجوانب من عقل وسلوك ومظهر واعتقد ان في العقد الاخير اهتممنا جدا بمظهر الفتاة وكان خطابنا الدعوي كله موجه الي زي البنت وغطاء الراس وذلك كان امر طبيعي نتيجة للهجمة الشرسة التي قاداها البعض علي الحجاب وتبنتها بعض مؤسسات الدولة ولكن يجب علينا مع تغير المعطيات ان نغير الية العمل وكذلك مضمون الخطاب الموجه للنساء داخل المجتمع المصري
فيجب علينا الان ان نوازن بين الالتزام بالزي وتقويم السلوكيات وتطوير وتنمية شخصية البنت بحيث تكون عضو فعال في المجتمع لها مشروعها الشخصي وتمتلك القدرة والكفاءة اللازمة لاداء مهمتها الفطرية وهي الاعتناء بالاسرة التي هي نواة المجتمع كله
واعتقد اننا كحركة اسلامية يجب ان نقلص من مساحة خطابنا الموجه ناحية الالتزام بالزي لصالح المسارين االاخرين
واننا يجب ان نبدأ وبسرعة وكثافة نحو وضع تصور لمواجهة حالة الالتزام المظهري التي تسود المجتمع المصري الان
سؤال
ما رايكم انتم في مايحدث
هل هو انتشار ام تشويه
وما الحل
يللا مش مهم

هناك ٢٢ تعليقًا:

مصطفي النجار يقول...

الحجاب مش بس طرحة ، الحجاب سلوك وسمت ومجموعة من الأخلاق التي يجب أن تكون متلازمة ، الموضوع دا بجد خطير جدا ، ومضايقني من فترة طويلة ، وكان نفسي تقوم حملة تتكلم عن الموضوع دا وتصحح المفهوم الغلط الموجود عند كتير من البنات حول الحجاب المودرن الذي
تلبس معه ملابس متناقضة معه
تثير الغرائز وتشوه صورة الحجاب
البوي هيبقي يكاد يتقطع من شدة ضيقه وكذلك
البنطون الجينز أو الجيبة الضيقة
ومع كل دا تلاقيها لابسة طرحة
دا طبعا تهريج واستخفاف بالحجاب وقيمته
والأكثر فجاجة من ذلك هو السلوكيات التي تصدر من هؤلاء الفتيات
ممكن نتمشي علي النيل ونشوف المناظر
اللي تكسف وتخلي الغير محجبة تكره الحجاب
بل الأبشع من ذلك النقاب الموضة
نعم تراه في مدينة نصر ومصر الجديدة
نقاب اسود بس مودرن وتحته برده بنطلون ضيق وعيون بها ماكياج صارخ
ويصاحبه أفعال اشد سخافة من ضحك أو بحلقة في وجوه الرجال وليست مبالغة بل واقع
الموضوع يا جماعة كبير أوي وأنا أشارك الاستاذ مجدي قلقه من الذي نراه ويزداد كل يوم ، والغريب في ذلك أن هناك بعض الجهات التي تروج لهذا النوع من الحجاب بالتدريج
كما فعل شريف صبري في أغنية فيديو كليب من فترة
وكذلك أصبحنا نسمح عن المايوه الشرعي
الاسلامي ، طب ازاي مايوه واسلامي ؟ظ مش عارف !!
المهم جزا الله خيرا الأخ مجدي علي اثارته لهذا الموضوع
وادعوا جميع الاحباب اخوة واخوات
الي تبني حملة بعنوان
( الحجاب مش بس طرحة )
وننتظر مقترحات وأفكار لهذه الحملة
وبارك الله في الجميع

عبدالله الشيخ يقول...
أزال المؤلف هذا التعليق.
عبدالله الشيخ يقول...

السلام عليكم يا عمو مجدي ,واحشني كيف احوالك . ؟ اتمني تكون فلة .( مقدمة لازم اكتبها علشان بقالي كتير ماتصلتش بيك )

بالنسبة لموضوع الحجاب انا مش شايف ان القضية قضية مفهوم بقدر ما هي قضية سيكولوجية اخرى عند البنات فالحجاب ( عند بعضهم ) يمثل راحة من تعب العناية بالشعر يعني لسه هتقعد تسرح و تسشور قبل ما تنزل تلف ايشرب و تخلص , ممكن كمان لو شعرها وحش شوية تبقى بتخبيه و ممكن تلبسه علشان شكلها احسن بيه او علشان دلوقتي رجالة كتير اول حاجة بيدور عليها في العروسة انها محجبة ( على اساس انها كدة ذات الدين ) . ومفيش مانع انها تعدله في وسط الشارع يعني الموضوع مش فارق عندها قوي .و ضيف لكدة الكليبات اللي بتعمل فيها كل حاجة المحجبة زي اللي مش محجبة ايزي يعني .

ارجع لتناولنا لقضية الحجاب اعتقد ان احنا بنقع في غلطات كتير منها لما بنتعامل مع واحدة مش محجبة مثلا بتتعامل معاها زي ماتكون مش محترمة لمجرد انها مش مغطية راسها- انا ماانكرتش ان ده مهم - مجرد الضغط النفسي بيخليها تغطي راسها انما هي زي ما هي , ممكن انظر للموضوع من ناحيتين: الاولى ان دي خطوة وبعد كدة هتلتزم باداب الحجاب وساعتها لازم الخطوة دي تاخد حجمها بدون مبالغة .
الثانية : ان كده الترتيب غلط يعني كان لازم تقتنع وتلتزم قبل ما تلبس الحجاب .
فالموضوع بمنتهى البساطة ممكن التعامل معاه على ان الحجاب حاجة تانية اكبر من حتة القماشة اللي فوق الشعر يعني منديش لحتة القماش اكبر من حجمها و نهتم اكثر بالاداب و الالتزام الذي يصحب الحجاب يعني ميكونش خطابنا الدعوي موجه للبنات الكاشفين راسهم بس لأ لكله .

محمود سعيد يقول...

الحقيقة وأنا ممكن اعتبر كلامى اعتراف بأن

الخطاب الإسلامى بتاعنا بتاع التسعينات بتاع الحجاب كان خطاب مظهر

مع أنا من رأيى أن الأولى هو خطاب العقل اللى بيقودها للمظهر

يعنى خطاب الأخلاق اللى بيتبلور فى مظهر

خطاب الفكر اللى لما يتكون هيتحول لمظهر

لكن احنا اهتمينا بس بأن المظهر يتحق
وأهو تحقق



مش عارف الكلام مبدأيا كده مش كفاية
لكن ممكن ازود بعدين
ونحاول نشوف كيف نزل تشريع الحجاب وما الذى سبقه

وليه لما نزل تشريع الحجاب الصحابيات معملوش زى بنات اليومين دول


فيبقى لازم نعمله علشان نلغى الظاهرة بتاعة الايشارب الملفوف ده :-)

وطبعاً برضه الرأى الآخر بتاع أن ده شىء حلو
فهو شىء حلو فعلاً

من باب أنه أحسن الوحشين :-)

عمر عاشق القرآن يقول...

مش مهم ازاى ؟؟؟
لا مهم

انا بدأت ألاحظ ان المصريين بدأوا يهتموا بشكل الدين وان اشكال التدين انتشرت جدا لكن جوهر الدين بينتشر برضه بس ببطأ شديد

يعنى مش الحجاب وبس .. ممكن تلاقى بياع بيصلى الفرض بفرضه و بيقرا قران و زبيبة الصلاة و لوحة مكتوب عليها "هذا من فضل ربى " وتلاقى غش فى الميزان و سرقة و ....

سلوكيات الناس !!!

mesteka يقول...

فقط اودت اولا انا ابدي راي في نقطه معينه ثم رايي في الحجاب
شريحه كبيره من المحجبات بيقولو الجمله دي بنفسي الطريقه"" الم نفسي بقي واتحجب"" فهي شايفه ان الحجاب بعض الشئ كمظهر ديني فيه نوع من الاحترام
والبعض الاخر يري وكانها اصبحت قطعه من الملابس التي لا تستغني عنها لمجرد اللبس فقط
والبعض الاخر اجبرن علي ارتداء الحجاب
والبعض اثرت فيهن كلمات علماء وداعيه اسلاميين علي اهميه الحجاب وستر الجسم
ولكن يظل انعدام الثقافه الدينيه موجود وهذا هو مربط الفرس
فمثلا اذا كنت غير محجبه ونويت ان اتحجب وانا احب ديني الا سلامي واؤمن به حق الايمان واعلم ان كل ما يأمرنا ب انما هو منفعه لنا
ثم يتوجب عليك معرفه منافع الحجاب هذا في اعتقادي شئ ضروري حتي نتمسك ونحب حجابنا وندعو غيرنا به
وفي نهايه كلامي فانتشار الحجاب هذه الايام فيه بعض التشويه نظرا لانعدام ثقافه واعني كلمه ثقافه وليس تتدين
وهذا موضوع غايه في الاهميه لانه ينتج عنه سلسله طويله من الاشياء المتعلقه

عبدو بن خلدون يقول...



الموضوع
معقد
فعلا

خطأ
جوهري
وقع
فيه
الإسلاميون
عندما
ركزوا
علي
الخطاب
الظاهري
وفقط

وربما
يكون
لذلك
ما
يبرره
لكنه
لا
يشرعنه

دائما
كان
السعي
وراء
المظهر

ولا
داعي
للبحقث
عن
"
وصدقه
العمل
"

ناهيك
بلا
شك
عن
ما
وقر
في
القلب
!

نقطة
أخرى

المجتمع
المنافق
لنفسه

المجتمع
الذي
يقبل
أن
تكون
ثلاثة
أرباعه
محجبات
ولكن
نسب
الطلاق
والمشاكل
الزوجية
متصاعدة

فضلا
عن
عدم
الزواج

ولا
تتحدث
عن
الزواج
العرفي
أو
ما
وراءه

والله
في
مشكلة
صور
ذهنية
عند
البني
آدمين

ما
دامت
فلانة
محجبة
إذا
فهي
كذا
وكذا
وكذا

عن
نفسي

في
حياتي
القصيرة
جدا
قابلت
بنات
كتير

لكن
الحقيقة
نبة
الناشطين
المتحركين
ذوات
الوعي
والفهم
والعقل
بل
والدين
أيضا

هن
من
الفئة
غير
المحجبة
أكثر

مش
عارف
لغاية
النهاردة
ده
شيء
إيجابي
ولا
سلبي

موافق
جدا
علي
خطورة
هذا
الموقف
وإنه
مجرد
أحد
تجليات
الاتجاه
العام
والميل
نحو
التدين
الظاهري

أنا
عن
نفسي
أفضل
إني
أعيش
في
مجتمع
نسبة
الحجاب
فيه
5%
بس
هن
بيلبسوه
عن
اقتناع

وفي
قدر
كافِ
من
الاتساق
بين
سلوكياتهن
وبين
ما
يفترض
بهن

كلمة
أخيرة
انتشار
الحجاب
علي
هذه
الطريقة
وشعبيته
بهذا
الأسلوب
أظنه
من
باب
"
الغثاء
"

"
غثاء
السيل
"

غير معرف يقول...

يا جماعة ادخلوا بسرعة علي البوست دا وحاولوا تنشروه عشان الناس تعرف حقيقة اللي بيحصل في فلسطين
http://anam3ahom.blogspot.com/

غير معرف يقول...

فعلا موضوع الحجاب بقا زى اكتر ماهوه التزام...انا بالذات كان ليا تجربه فيه ولسه ربنا اكرمنى بارتدائه من عده اشهر فقط بالرغم من تخرجى من الجامعه منذ عده سنوات وكان سبب عدم ارتدائى ليه بالرغم من التزامى في الفروض الدينيه وهوه نظره المجتمع وكلام اللى حواليا باعتبار ان البنت الغير محجبه اسوء من محجبه وعلى الرغم من ان تقريبا كل اللى محيط بيا من محجبات تقريبا غير ملتزمات نهائى قولا او فعلا ده عمل عندى رد فعل معاند طيب قبل ما تصلحوا الغير محجبه اصلحوا المحجبه بدل ما هى لابسه عشان شعرها مش حلو ولا عشان اخوها ولا ابوها فرضوا عليها ....فرجاء من المحجبات انهم يكونوا مثال للالتزام والاحتشام لاى بنت غير محجبه حتى ممكن تبقا مثل او قدوة ان غير ها من غير محجبات يعجبوا بيها وتكون السبب في انهم يلتزمواوبرده(انك لاتهدى من احببت ولكن الله يهدى من يشاء)

غير معرف يقول...

هو كل حاجة لازم نعمل لها تنظير واختراعات وتحليلات لا تمت للموضوع بصلة وكمان نتهم نفسنا ان احنا كمان السبب عشان الخطاب بتاعنا مش عارفة ماكانش قد كدا.. بصراحة انا مختلفة مع ابن أخ ومع ابن خلدون ونفسي يبطلوا تنظير وتفقير أحسن مرارتي اتفقعت منهم..أي بنت بتلبس الحجاب بتبقي عارفة انها لازم تبقي قد الحجاب وحتي الممثلات لما بيسالهم حد .. امتي هتلبسوا الحجاب بيقولوا لما نبقي قد مسئوليته.. ما يجيش واحد بقي يتفلسف ويقول الخطاب والبوسطة والطوابع .. بجد حاجة تخنق .. انا نص زميلاتي لبسوا الحجاب عشان يتجوزوا وبيتفننوا ازاي يكون حجابهم ملفت ومثير عشان يشد الولاد ليهم ، صدقوني الموضوع كدا مش حاجة تانية ، وأنا رأيي ان اللي زي دول يقلعوا الحجاب أكتر ويريحونا من بلاويهم ويبطلوا يسيئوا الي الدين بأفعالهم وماحدش يقول دي فترة انتقالية ومش عارفة ايه
ويلا مش مهم

Sanaa basha يقول...

السلام عليكم
بما إنى الحمد لله خلصت ذمتى وامتحاناتى
فممكن أعلق على كام حاجة:
بس يا رب يفهمونى صح
:)
فكرة أن الحجاب السليم يأتى عن مدخل الترهيب والترغيب أنا الصراحة غير مقتنعة بجدواه أوى أو منفردًا على الأقل. لإن أى قرار مهم زى ده لو استند فى أخذه على عواطف أو مشاعر لحظية لن يصمد طويلا أمام تقلب النفس واشتداد الفتن على أى بنت فى هذا العالم .أنا تجربة الحجاب معايا لا تصلح مقياس لأحد لكن فى رأيى لو بنت عايزة تتحجب ، تحسبها مكاسب وخسائر ،ممكن بمساعدة الصحبة بتاعتها والى أن تقتنع به تماما ، فلا يجوز الضغط عليها أبدًا من عينة سبع شرايط على الحجاب وست سبع كتب عن زى المرأة واربع خمس تعليقات على هدومها وستين درس متوجه بالأساس لده.عاوزة أقول من الآخر ، اللى فات مهم لكن لو وصل الى حالة من العنف العاطفى واقتصر على الإسقاط النظرى للنصوص فلن يجدى كثيرًا،الموضوع ده أبعاده مش نصوص دينية بس ، بل مجتمعية وانسانية واقتصادية ونفسية ...الخ ، وليه مداخل متعددة ليست بالضرورة نصية.وبالتالى من السهل جدا البنت تتحجب عشان اتضغط عليها بالنص لكن ما لم يطور الخطاب نفسه لاستيعاب المعطيات اللى فى الواقع الآن أيًا كانت (اجتماعية، اقتصادية ،، نفسية ، انسانية ...)، فسترتد عنه مع أول موجه برود تنتابها إيمانيا.ومؤشرات هذا الارتداد من الأسباب اللى جعلت استاذ مجدى يكتب التدوينة دى

وبالنسبة لما علقت عليه (رفيدة) أرجوكى يا رفيدة لا تنتقصى من قدر التفكير التحليلى أو المراجعة للذات لإن التوقف للحظات ومراجعة الاتجاه خير من السير فيه وتجاهل ما يصدر عنه من نتائج .
، لسه امبارح كنت فى درس وكنا بيتكلم على فكرة"انت سكن لزوجك" وتفرع الحديث على دور المرأة فى الحفاظ على المجتمع ، لكن لاحظت أن كل الحوار موجه الى الزى وشروط الزى وحدود التعامل مع الرجال و...الخ ولم يتناول شيئًا عن دور المرأة فى المجتمع ده ورسالتها فيه وهل تقتصر عند حدود "البسطة" بتاعت البيت ولا ليه بعد أكبر سواء قليلا أو كثيرا . لم أستسغ مظهر تحديف الطوب على الكلام اللى اتقال لكن عموما أنا ألاحظ فعلا إن الخطاب الاسلامى يتناول المرأة على انها جسد تماما كما يتناولها الخطاب التحررى
وفى النهاية لما يتطلع لنا الحجاب المودرن ،نقول بلاش نقد وفزلكة
يللا مش مهم

محمد النجار يقول...

اولا جزاك الله خيرا يا أ/مجدى على هذا الموضوع المهم ففعلا الامر محير هل انتشار الحجاب بهذه الصورة ايجابيا ام لا
انا ارى انه غير ايجابى لانه ناتج عن قناعة عند معظم هؤلاء البنات
فمعظمهم لا يرى انهم على خطأ وعليهم تصحيحه ولو بعد حين ولكن للاسف انتشرت هذه الثقافة فى الاونة الاخيرة عن عمد وقصد ووجدت من ينشرها ويروج لها ممن يسمون بمشايخ الفضائيات فعندما ينحى فقهاء الامة امثال الدكتور يوسف القرضاوى ويستبدل بقادة مايسمى بالتيار الرمادى امثال الدكتورة سعاد صالح تكون هذه هى النتيجة ونحن نسمع مثل هذه الفتاوى على القنوات الفضائية التى تبيح للبنات ارتداء مثل هذه الملابس الضيقة ولامانع ايضا من نمص الحواجب ووضع المكياج
لذلك اعتقد ان الخطأ ليس عند هؤلاء الفتيات بدليل انهن لديهن النية الصادقة لارتداء الحجاب ولكن المشكلة فيمن ميعو الدين باسم التيسير على الناس واعتقد ان اهم دور لنا الان هو مواجهة هذا التيار بالحجة والدليل واقوال العلماء

soreal يقول...

I think sanaa pinpointed the most important thing about this whole issue when she said:

"
لكن عموما أنا ألاحظ فعلا إن الخطاب الاسلامى يتناول المرأة على انها جسد تماما كما يتناولها الخطاب التحررى

"

we need to move on from that view of the woman...
in our societies... appearance became every thing... hypocrisy in what we wear or what we do become the norm... and thats the biggest problems we face as an islamic nation..

remember that those women eventually will be responsible for the next generation ...

we dah howa elmohem...

غير معرف يقول...

استاذ مجدى .اولا انا سعيدة لانى اول مرة اعلق على موضوع هنا وان شاء الله متكونش اخر مرة. بالنسبة للحجاب فمع احترامى الشديد لكل الاراء انا شايفة ان معظم البنات اللى بيكون حجابهم مش متظبط بيكونوا حاسين ان فيهم حاجة غلط واذا وجدوا حواليهم اللى يساعدهم صح هيتغيروا .وبصراحة انا مش معا ان البنات اللى حجابها غلط بيسيئوا للحجاب لانى الحجاب اكبر من كده بكتير .وشايفة ان دى زى واحد بيعمل حاجات غلط وبيصلى نقوله مايصليش احسن ولا ناخد بايديه علشان يسيب الغلط.وانا متفقة مع اننا لازم نطور فى خطابنا الدعوى .وجزاكم الله خيرا.

أحمد بن شلبي تكعيب يقول...

ممكن مشاركتي تضيع وسط الجهابذة بس يللا مش مهم

............................

ظني ان هذه الظاهرة (اتجاه الحركة الاسلامية الى الاهتمام بالظاهر ) هو احد روافد ما يجب تصحيحه او بالادق اكماله في البناء ، وهو ان الحركة الاسلامية وتوجهاتها في الشارع والمجتمع لا يجب ان تظل اسيرة ما يسمى برد الفعل
.

يجب على الحركة الاسلامية بكل روافدها ان تأخذ بزمام المبادرة حتى لا تظل اسيرة ردود الفعل بالاضافة الى النتائج الغير مأمولة احيانا

وبس كده

غير معرف يقول...

ايه يا أخ مجدى
انت مش ناوى تتكلم عن اللى بيحصل
فى فلسطين و لا ايه؟
ده الواحد حاسس بإكتئاب
محتاجين حد يطمنا على اخواننا
هناك.
الدنيا كلها اتجمعت عليهم

أبو الفـــداء يقول...

أصلح الرجل شكل سيارته...
وووضع عليها ديكورات عديدة...
متوافقة مع الموضة...



بعد مدة عطلت السيارة...
فهو لم يهتم بإصلاح محركاتها...وأسلاكها الداخلية

مللت الصمت يقول...

انا اول ما قرأت الموضوع كان عندى كزا نقطه عايزه اتكلم فيهم....

بس بعد ما قرأت التعليقات كله دخل فى بعضه,فانا هكتب اللى فى زهنى دلوقتى......


كلنا معترفين ان الحجاب مش بس طرحه,بس مين بقى اللى يقنع البنات بكده؟؟؟


و اللى زاد و غطى على حكايه الاشارب الموضه طلعلنا كمان الاسدال الموضه و النقاب الموضه....


ما شاء الله نلاقى بنات لابسين اسدال اسود و نقاب اسود و كل هدومهم اسود فى اسود و نلاقيهم اللهم بارك مرحرحين قوى فى الشارع.....


الفكره نفسها هل الحجاب او ما يطلق عليه حجاب اللى منتشر فى الشارع دلوقتى ده فعلا حجاب بمفهومه الصحيح ولا مجرد موضه و هيجيلها يوم و تختفى؟؟؟


و احنا مش زى ما ام عمر بتقول...

احنا مش عايزين البنات يقلعوا الاشاربات لانها بتشوه للحجاب احنا عايزينهم يلبسوا الحجاب عدل....

طبعا خير وبركه و كتر الف خيرهم انهم لبسوا الحجاب من الاصل.....

بس نوجه جهودنا ان الناس تفهمه و تقتنع بيه من جوه زى ما اقتنعه بيه من بره..

إخوانى مخربش يقول...

ياسيدى الفضل ما الدين بالصوم والصلاة

انما الدين خذ فى خفة وهات


السبب فى هذه المشكلة هو المدى الوهابى الذى يركز على المظهر وليس الجوهر

وممكن حضرتك تسمى الناس دول محجبات دى لوكس

انا عامل بوست عن نقاب دى لوكس

هكون سعيد اوى لو عرفت تعليقك عليه

إخوانى مخربش يقول...

اه نسيت

لا حجاب بينتشر


ولا فى حتى مفهوم علشان يتشوه

عمر أفندى و أبووه يقول...

ايه يا عم مجدى الموضوع ده...انا حاسك كتبته فى حالة فراغ تدوينى...ما علينا لما نتقابل نبقى نتكلم

و عندك انتا مجموعة من الملتزمين بقراءة موضوعاتك و التعليق عليها فور نزولها زى ابن خلدون ده اللى موش فاهم ايه الفكرة فى انه بيكتب كلمة و يدوس انتر و هكذا هل من باب لفت النظر لتعليقه...اظن ان التعليق ممكن يلفت النظر بقوته و تحدثه فى صلب الفكرة و بموضوعية اكتر من انى اضغط انتر بعد كل كلمة...و كمان من الملتزمين و المعلقين اللى بعتبرهم زى فريق تعليق يلا موش مهم محمود سعيدد صاحب التعليق المسكلة الشهير فى مدونة رمى الاحجار...

انا موش عاجبنى الموضوع ولا توقيته و الراجل بتاع فلسطين ده عنده حق مية فى المية ...يلا بينا نتناقش و نشوف الدنيا عاملة ايه و الناس هناك عندهم حق ولا لا و نوضوح مع بعض الصورة لحد ما البرواز يبقى واضح و جلى لكل الناس موش الشعرة اللى باينة من تحت الايشارب و الضحكة العالية و البنطلون الضيق ....يا عم مجدى ...ولا بلاش

يلا موش مهم

بنت من الاخوان يقول...

استاذ مجدي الموضوع ده مهم جدا واحنا لازم نهتم بفلسطين والمعتقلين وكل ده لكن
ما ننساش مجتمعنا الي عمال بينزل مش عارفه بحد رايح لحد فين
يعني لي قريب علئد للتو ما لبنان بيقول الحمد لله احتا بناتنا لسه بخير
لكن لما كلامه ده رعبني لان بنسبه كبيره جدا نحن متحملون مسؤلية الخطاب الهادف مع الشباب
وفي نفس الوقت الجهود المبذوله
قليله
جدا
واحنا ما كناش كده من سنتين ولوما اتحركناش الوضع هيقضل من سيء لاسوا
وبالنسبه للحملات كان في حملة السته دي في جامعة القاهره لكن انا بعتبر الحمله بدايةلطريق والعلاج محناج صير
والموضوع ده محتاج نفكر كتير ونبدا نتحرك بجهودنا المتاحه