الجمعة، أغسطس 10، 2007

عمر افندي وابوه " حالة تدوينية "


انا مؤمن ان التدوين نجح لسببين

البوح الشخصي او نقل الحالة الانسانية والبشرية الي شبكة الانترنت

الحرية وعدم وجود وسائل رقابية علي التدوين غير ضمير واخلاق وتصورات المدون

بالنسبة للنقطة الاولي فباسم " اه اسف نسيت اعرفكم اني بكتب عن باسم الشربيني وابنه عمر "عمل حاجة غريبة قوي يعني انت هتلاقي في مدونين عملوا مدونات علشان يعرضوا لنفسهم او مشاعرهم او افكارهم او علشان يدافعوا عن قضية او يناصروا مظلوم او حتي علشان يهيسوا او يقلوا ادبهم كل ده موجود ومتابعينه لكن باسم عمل حاجة غريبة قوي عمل مدونة لابنه ايوة مدونة لابنه

عمر افندي

ابنه اللي عنده سنة وميعرفش اي حاجة في الدنيا لما يكبر هيلاقي في مدونة من عمره ومتابعه نموه وحياته بشكل تفصيلي وهاييجي يوم ابوه يقولوه يا عمر يا ابني المدونة دي من عمرك يعني عندها عشرية سنة زي ما احيانا تلاقي اب بيقول لابنه يا حسين يا ابني الشجرة اللي قدام الباب دي من عمرك غرسناها في الارض يوم ما انت اتولدت ولكن بما اننا بقينا في عصر الديجيتال فخلاص بقت المدونة بديل للشجرة

وفي مشهد تاني هنلاقي باسم وهو علي فراش الموت بعد عمر طويل ان شاء رب العالمين "معلش يا باسم كلنا هانموت " هنلاقي باسم بيوصي ابنه عمر " يا عمر يا ابني المدونة دي سقيتها من دمي واعصابي وحافظت عليها طول الفترة اللي فاتت علشان توصلك بالشكل ده فوصيتي ليك لما اموت تشيلها في عنيك وخاصة يا ابني اني اتحديت عمك مجدي بتاع يللا مش مهم وقلتلوا ان المدونة دي هتبقي من اشهر مدونات العالم وانت عارف يا ابني ان عمك مجدي لسانه عامل زي الفرقلة واذا فشلنا مش هايسيبنا في حالنا وبصراحة انا مفقوع منه ونفسي احقق اللي قلتله عليه وخاصة انه اتريق عليا لما قلتله كدة فيا عمر المدونة المدونة واياك ان تكسل عن الببلشة والطرقعة والسلام ختام وبالمرة متنساش وانت مهتم بالمدونة تهتم بامك واخواتك ولكن اذا احسست لحظة انهم سيعطلوك عن المدونة فلهم رب كريم وانت للمدونة وسيبني بقي علشان تلحق ترفع التدوينة الجديدة "

يا جماعة اللي فات ده مش خيال دي ممكن تبقي فعلا حقيقة لان باسم حتي الان مصور ابنه خلال السنة الاولي من حياته حوالي 1200 صورة من اول ما كان عمر جنين وده عن طريق الاشعة التليفزيونة وبعدها وهو عمره يوم وبعدين وهو مش عارف عمره قد ايه وكمان عمر وهو بيحلق وعمر وهوفي العربية وعمر وهو بيشجع الاهلي وعمر وهو نازل علي القمر " واسعة دي شوية " بس مع باسم مستبعدهاش ابدا

وكمان باسم مصور عمر مش عارف حوالي 40 او 50 مقطع فيديو في كل انشطة حياته يعني من الاخر باسم حول عمر الي تدوينة حية وحول المدونة الي كائن بشري وعمل حاجة جديدة جدا
يا بختك يا عمر كل ده في السنة الاولي من عمرك وانا اللي عندي 30 سنة معنديش صورة ليا وانا صغير غير صورة وانا في الحضانة مع ابلة صفية الله يرحمها واحنا في جنينة الحيوانات وتخيل ان انا مش ظاهر فيها واللي ظاهر حتة من مريلة في جنب الصورة امي قالتلي ان دي مريلتك يا مجدي وانا طبعا مقدرتش اكدب امي وقلت فعلا دي مريلتي




طيب انا بكتب ليه عن باسم وابنه عمر لان عمر عيد ميلاده يوم 14 اغسطس يعني يوم الثلاثاء القادم وباسم طبعا عامل ليلة ولا الليلة الكبيرة عنده علي المدونة وسمعت ان اوبرا المذيعة الامريكية المشهورة هاتيجي وهاتبقي ليلة ولا الف ليلة والاستاذ باسم وابنه عمر ليهم حق علينا ان احنا نروح نشوف التجربة اللذيذة دي وكمان نهني باسم باشا وابنه عمر افندي
وفي نهاية التدوينة

كل سنة وانت طيب يا عمر



ويللا الف مبروك
وهابي بيرث تو يو
ويتربي في عزك يا بيسو
وربنا يباركلك وتخاويه يا ام عمر
وتلاتة بالله العظيم التدوين ده طلع كل الجنان اللي كان جوانا
ويللا مش مهم

هناك 9 تعليقات:

إيمــــان ســعد يقول...

:)

تمام جدا

ربنا يبارك له فيه

انا على كده لما نجيب القطة الشيرازي اللى اختى عايزاها ابقى اعمل لها مدونة

:)

تعرف انا بافكر اعمل مدونة عن اطفال الشوارع و حكايتهم و قصصهم بس معنديش المجهود البدني و لا العصبي و لا الوقت الكافي

بس بجد

فكرة حلوة ربنا يجعله فى ذريته الخير

تحياتي

عصفور المدينة يقول...

شكرا لك على الاهتمام بالتجربة وعرضها لنا وعلى فكرة أنا عامل مدونة لأبنائي بس سرية هم اللي بيكتبوا فيها قصدي بيشخبطوا فيها

عايزين نشوف صورة مريلتك وانت صغير
:)

meroo يقول...

كل سنه وانت طيب يا سى عمر افندى وعقبال 100سنه وعلى فكره المدونه دى بتاعت عمر افندى وابوه جامده جدا انصحكم تتابعوها

وقف لله تعالى يقول...

فكرة حلوة بجد :) ما شاء الله

أخت لي فكرت تعمل مدونة للزهرات من كل حي

قالت لي أقول لها عن زهرات بيعرفوا يتعاملوا مع النت و هي هتتصرف

:D

غير معرف يقول...

الف مبروك ياعم باسم وعقبال 1000 سنه خير وفى دعوه ربنا عطاء يا عمر افندى


انس القاضى

عبدو بن خلدون يقول...



قشطة عليك

عمر افندى و ابوه يقول...

صاحبى مجدى سعد...

شكرا ليك على مدونتك الجميلة و تتردلك فى الافراح بس انتا اتجوز و خلف و اعمل مدونة لابنك و انا اظبطك...

الاستاذة ايمان سعد...

هو عمر افندى موش قطة شيرازى ...ولا طفل شوارع بس على راى واحد صاحبى (يلا موش مهم)

الاستاذة ميرو...

شكرا جزيلا على مجاملتك اللطيفة دى


انس بيه القاضى

ازيك يا باشا وحشتنى تليفونى السودانى مع مجدى خده منه و تواصل معايا حتى بالرسائل


عبدون بن خلدون

قل عليك يا سيدى

و اخيرا..

اقرأ اخر رسالة لعمر افندى فى سلسلة احتفالاتنا بعيد ميلاده الاول و هى بعنوان

عمر افندى" ابنى الحبيب"

غير معرف يقول...

الاستاذ الفاضل مجدى اليس غريبا انك لم تدون حتى الان عن خروج القصاص حبيبك من المعتقل بفضل الله

يلا مش مهم يقول...

ايمان
بخاف لما بلاقي تعليقك
لاني عارفك مش اي حاجة ممكن تعلقي عليها فاما البوست بيبقي حلو جدا واما بيبقي وحش جدا

عصفور المدينة
ربنا يباركلك في عيالك واهلك كلهم
وبالنسبة للمريلة بتاعتي فان شاء الله هادور عليها قصدي علي الصورة وهاتحفك بيها

ميرو
حمدالله علي السلامة وشرفتي المدونة وفعلا عمر افندي مدونة انسانية جدا وجامدة جدا

وقف لله
اسمك جامد مووت
فاكرني باغنية محمد منير
قلبي مساكن شعبية
فواحد رد عليه وقال
انا قلبي وقف لله
المهم فكرة جبارة ان يتم عمل مدونة للزهرات

انس القاضي
بيعلق علي التدوينة يا سعدي يا هنايا لك الشرف يا باسم بتعليق اوسو اوسو وتهنئته لابنك
والتدوينة اللي جاية ليك يا اوسو اوسو

ابن خلدون
واحشني جدا وقشطة عليك

ابو عمر
براحتك يا غالي الليلة ليلتك

غير معرف
فعلا عندك حق بس للاسف انا كنت متفق مع باسم اني هادون واشارك معاه في الاحتفالية بتاعت عمر من حوالي اسبوعين
والقصاص خرج في نفس توقيت نشر هذه المدونة فالاعتذار موصول للقصاص وهاستمحه اني هادون عن مناسب عاجلة ونرجع ليه
وعلي العموم حمدالله علي السلامة يا قص
ولو بتشوفوه قولوه اني بتصل بيه كتير ومش عارف اوصله

ويللا مش مهم