السلام عليكم

حاجات مختلفة فكرت فيها اليومين اللي فاتوا فقلت ادونها

هو ليه كدة

لما نزلت المصري اليوم كنت انا في العريش بعمل مهمة في شغلي وبعدين لاقيت التليفونات نازلة عليا زي المطرة

ايه اللي مكتوب ده ومش قلنا من الاول ان الناس دية مش هاتسيبنا في حالنا" "

"يا مجدي انت هاتعمل ايه "

" لازم يكون في رد سريع علي اللي اتكتب ده "

" انا خايف جدا علي التجربة من انها تفشل "

" الاستاذ مجدي ممكن نعرف اسم الحركة الانشقاقية اللي حضرتك عملتها واسمها ايه ومين معاك

دي كانت عينة من المكالمات اللي جاتللي واخر مكالمة كان سؤال من صحفية مش فاكر عنها اي حاجة

المهم

اني وانا راجع في الطريق سرحت بنظري وبصيت علي الرمال اللي ملهاش اخر علي جنب الطريق وقلت في نفسي يااااااااااه

قد ايه الاعلام ده مهم في لحظة مئات الالوف اتجهوا ناحية ظاهرة ما او موضوع معين

واتخيلت لو كان التحقيق اللي تم كان بيرصد الظاهرة بشكلها السليم من غير تهويل او تأويل او تفسير

من غير ما يغير في الكلام او يوجهه

من غير ما يسعي ورا الاثارة فقط

عارفين لو حصل كدة كانت النتيجة هتكون ايه

كانت الناس دخلت المدونة بقلب صافي وذهن متفتح وكانت قريت التدوينات بعين الاستفادة او الستزادة مش بعين النقد والتحفز

كانت شجعت الاخوان علي التعاطي مع النقد الذاتي العلني من غير خوف او تشنج

كانت رسخت قيمة كبيرة في المجتمع وهي الشفافية

كانت اثبتت لكل المصريين ان الاعلام مازال بخير ويؤدي رسالته بشكل صحيح

كانت وفرت جهد ووقت كبير تم بذله في الرد علي اللي اتكتب وهو حقيقي ولا متفبرك

كانت رحمتني من الظن السئ ناحيتي اللي انا عاذر اصحابه وعندهم حق فالمكتوب ليس بالهين

كانت هتساعد في نجاح التجربة وزيادة التفاعل حولها

كانت

وكانت

وكانت

بس لاقيت نفسي فقت علي نداء زميلي لي وهو بيطلب مني ربط الحزام لانني داخلين علي لجنة

حاجات افتكرتها

تابعت التعليقات اللي اتكتبت في اليومين الاخرنين وبرضه تابعت اللي اتكتب في بعض المدونات التانية لاقيت الحاجات اللي جاية

" واحد بيفسر اللي كتبته علي انه نوع من الانتقام والانتصار للذات نتيجة مواقف معينة حدثت لي داخل الجماعة "

"وواحد ساب الفكرة ولاقيته بيقول انه مش مستظرفني ولا مستظرف المدونة وان اسمها مش لايق لواحد في سني "

وواحد بيدعي انه ميكونش ثغر تؤتي منه الجماعة "

وحاجات كتير قريتها منها الايجابي وده كان الاغلب ومنها السلبي وربنا يسامح اللي اخطأ في حقي

حاجات سألت نفسي فيها

هو انا بدون ليه عن النقد الذاتي

عاوز شهرة

بتنتقم

فاضي

حمق

كل اللي فوق ده ممكن

بس ممكن حاجات تاني

صاحب فكرة

عاوز تخدم دعوتك من منظورك

ليك تجربة ومشاهادت كونت رؤيتك

اتعلمت حاجة عاوز الناس تستفيد منها

طيب تعالوا احكيلكم الحكاية وازاي بدأ فكرة التدوين عن الداخل الاخواني واللي جزء منه النقد الذاتي

البداية

من بداية ما عرفت الاخوان وانا حاسس ان الناس مش عارفانا يعني انا شايف مجتمع جميل جدا جوة وفيه بالطبع اخطاء لانهم بشر والناس برانا واخدة صورة مختلفة تماما عنا ودايما خايفين منا

وبعدين كنت كل لما اتعامل مع حد ويعرف بعد فترة اني من الاخوان كنت الاقيه يقولي تصدق انا مكنتش عارفكم ما انتوا كويسين اهوه امال الناس بتقول عنكم غير كدة ليه وبعدين كنت في مرة في اسرتي وبحكي موقف مماثل حصللي فلاقيت نقيب اسرتي وهو دكتور في جامعة القاهرة بيقولي تصدق انا برضه بتعامل اليومين دول مع اساتذة من اتجاهات اخري ومستقلين وبعدين بعد شهر من التعامل لاقيتهم بيقولولي نفس الكلمة

فحسيت ان الناس مش عارفانا بجد جزء كبير منه سببه التعتيم والتشويه الاعلامي وجزء احنا السبب فيه نتيجة عدم انفتاحنا وعدم اتصالنا الجيد بالناس " افتكر الحكاية دية وتعالي نروح لموقف تاني "

في اخر سنتين اشتغلت بشكل كبير في اعمال تنسيقية مع اتجاهات مختلفة سواء يسار او ليبراليين او علمانيين او مسيحيين او اسلاميين اخرين ولاقيت الناس وهي بتعاملنا خايفة مننا مش شايفانا جوة حاسين ان احنا كتلة مصمتة بتتحرك بالريموت مكنترول جيش مكون من روبوتات الية لغاية لما لاقيت واحد بيقولي انت عارف الناس لو شافتكم صح هاتحترمكم جدا وهاتبددوا مخاوف كتير عندهم وهتكسبوا تأيدهم ومناصرتهم " افتكر الحكاية دية وتعالي نروح لموقف تالت "

في اخر سنتين برضه حصل تغيير كبير في مناخ الحرية في مصر وجماعتنا خدت قرار باظهار هوية افرادها وبدأنا نشتغل في الجامعات باسم طلاب الاخوان المسلمين ولاقينا شباب الاخوان جايين بيقولولنا ان في شباب وبنات عاوزين ينضموا لطلاب الاخوان المسلمين فتعمل ايه وطبعا كانت بتيجي اسئلة طبيعية من الشباب والبنات اللي عاوزين ينضموا او يشاركوا في اعمال طلاب الاخوان والاسئلة دية كان منها هو انتوا جوة بتاخدوا قرارتكم ازاي - هو انتوا شكلكم ايه من جوة - هوة انا لو اشتغلت معاكم شوية وحبيت اسيبكم اعمل ايه او انتوا هاتعملوا معايا ايه واسئلة كتير علي نفس الشاكلة " افتكر الحكاية دية وتعالي نروح نشوف الموقف الرابع "

في اخر سنتين برضه بدانا مشروع لنتمية الوعي السياسي والاجتماعي عند طلاب وطالبات الاخوان المسلمين في جامعة القاهرة وكنت احد المسؤلين عن هذا البرنامج وعندما بدانا البرنامج لمسنا فجوة ليست بالقليلة بين وعي وادراك واولويات شبابنا واحتياجات المجتمع الخارجي واهداف جماعتنا وفي اخر البرنامج لا استطيع ان اصف لكم حجم التطور الذي حدث لدي شبابنا وبناتنا علي كل المستويات والذي اذكره جيدا ان الوسيلة الفعالة التي كان لها دور كبير في تطوير هؤلاء الشباب هي تعليمهم كيف يفكروا بادمغة الاخرين وكيف يضعوا انفسهم مكان الطرف الاخر عند اتخاذ القرار وكيف يقرؤا الواقع بعيون الاخرين وكيف يفرقوا بين ما هو ثابت كالعقيدة وبين ما هو متغير وقابل للنقاش والمسائلة " دي كانت اخر حكاية عندي " وتعالوا دلوقتي ندردش شوية

بعد الي انا حكيته ده اتبنت عندي فكرة ليه منعرفش الناس اللي برانا احنا مين وبنفكر ازاي وطموحاتنا ايه وبناخد قرارنا ازاي ويعني ايه اسرة اخوانية ويعني ايه نقيب اسرة وازاي بنتجوز وازاي بنحب وازاي بنختلف وازاي بنمارس بشريتنا وانسانيتنا وازاي بنزعل من بعض وازا بنتصالح وازاي بننهرس في اعمالنا زينا زي اي مصري وازي بنتقدم للجواز ونترفض وازاي وازاي وازاي

وبعدها لاقيت الناس بتتكلم عن التدوين والمدونات وجاتللي الفكرة ليه ما اعملش مدونة اعرض فيها كل ده بس يبقي بصورة انسانية في شكل حكايات حقيقية او مواضيع شخصيو او حوارات تفاعلية حية بين الناس وبعضها وعلشان كدة

دونت عن انس صاحبي وجوازه

ودونت عن حاجتي للجواز وموضوع رفضي

ودونت عن اسرتي الاخوانية وبنعمل فيها ايه

ودونت عن اعتراضي علي حادثة الازهر

ودونت عن شغلي وغرقي فيه

ودونت عن محنة جماعتي والظلم اللي واقع عليها

ودونت عن القبض علي وجابر والسجن والنيابة

ودونت عن ملاحظاتي علي اداء اخواني في جماعتي الحبيبة

ودونت عن اعتراضي علي العمل بشعار الاسلام هو الحل

ودونت

ودونت

ودونت

عن كل شئ عاوز الناس تعرفه عننا وعن حياتنا وعن جماعتنا علشان نبدد كل المخاوف ونننور الطريق قدامهم ونعرفهم ان احنا مجتمع بشري بيسعي للصلاح والتطور دائما

هو ده اللي دفعني للتدوين وهو ده اللي دونت عنه وهي دي اهدافي وهي دي رؤيتي وهي دي فكرتي

وكتبت اول ما كتبت احذر من اللي ممكن يحصل من المتربصين والمتسلقين واصحاب الرؤي الشخصية المحدودة اللي هاينتهزوا الفرصة وهايصطادوا في المية العكرة وهايحاولوا يستغلوا مساحة البوح الشخصي والجماعي باسلوب غير سوي

وكنت بظن ان احنا تفهمنا الامر لغاية لما حصل اللي حصل لاقيت ان الامر مش سهل وان الكتابة عنه شئ ومعاناته شئ اخر ووقعت في حيرة اكمل ولا لا اقف ولا لا الاخوان هايتفهموا فكرتي ولا لا والاعلام هايرصد بشكل ايجابي او محايد ولا لا

فعلا عانيت ولسة بعاني وعارف ان في ناس بدات تخاف مني اوتخاف عليا وان في ناس بدات تحذر من هذا الشخص وكتاباته وان في ناس اخدت موقف سلبي

بس مع كل ده انا ما زلت مؤمن باللي انا بعمله

يا اخوان الناس عاوزة تشوفوكم

يا اخوان الناس عاوزة تعرف اللي جوة عندنا

يا اخوان انا لما رحت اتقدم للجواز اهل البنت طلبوا مني احكي عن كل حاجة في حياتي ان حقهم ما بالكم واحنا بنطلب ايد البلد مش لازم نعرف اهلهل احنا مين وجوانا ايه

يا اخوان احنا معندناش حاجة نخجل منها علشان نداريها وتدوينة علموا انفسكم هي رسالة موجهة لا مجتمع بشري سواء اخوان او غيره لان السلبيات اللي رصدتها التدوينة موجودة في اي مجتمع

يا اخوان فكرة التدوينة دية جاتللي وانا في السجن في احداث القضاة لما اتقبض علي اكتر من خمسمية من الاخوان وجم علي سجن طرة وعيشنا شهرين كاملين مع بعض وشفت فيهم اخوان من كل حارة وزقاق وقرية فيكي يا مصر ورصدت سلوكيات حاسسيتني بالخوف علي قدرة الجماعة علي التطور والنمو

يا اخوان فكرة تدوينة مصر لكل المصريين كنت اقصد منها ان احنا نفكر برة الصندوق ونحط نفسنا مكان الاخر ونشوف احتياجه ايه وان احنا نناقش ونتسائل حوالين جدوي الشعار ونوصل في الاخر لصيغة توافقية

يا اخوان انا كنت عاوز الناس اللي برانا تشوف ان احنا عندنا تنوع وان احنا بنختلف وان احنا مش مستنسخين من بعض

يا اخوان انا اخوان وهافضل اخوان وهاعيش اخوان وهاموت اخوان

يا اخوان انا واقف ور ا قيادتي وواثق فيها ومش شاكك فيها ولا بتمرد عليها ولوايح مؤسستي بحترمها

يا اخوان احنا مهما اختلفت في الاخر هالتزم براي الاغلبية وهاحترم قرار الشوري وهانفذ واجباتي كما طلبت مني

يا اخوان احسنوا الظن باخوكم وتفهموا موقفه وفكرته

يا اعلام نرجوكم سيبونا نعيش حياتنا بشكل طبيعي بلاش حالة التربص الغريبة اللي بتحصل ناحيتنا

يا اعلام الاخوان جزء من الشعب المصري ليه حق عليكم وابسط الحقوق دية انكم تعاملوه بحيادية وبدون تربص

يا اهل مصر احنا بتمد ايدينا ليكم تعالوا شوفوا الاخوان اللي اجهزة الاعلام الحكومية حرماكم من التعرف عليهم تعالوا شوفوا حياتهم وسلوكياتهم واختلافاتهم علي مدوناتهم

يا نخب احنا بنمد ايدينا وبنفتح صدرنا وعقولنا ليكم فمتتخالوش عننا وتعالوا ادرسوا المدونات وشوفوا جزء من الاخوان مكنتوش قادرين تعرفوه

واخيرا

يا رب وصل رسالتنا وطمن قيادتنا واجعلنا عند حسن ظن اخوانا وافتح بيننا وبين قومنا بالحق وانت خير الفاتحين

ويللا مش مهم