الخميس، أبريل ١٢، ٢٠٠٧

دش سخن .. عشا سخن .. نوم عميق (اوهام شاب مصري)


يوم الثلاثاء مساءا توفيت الي رحمة الله زوجة عمي
وايضا يوم الثلاثاء لم اغادر مكتبي الا الساعة الحادية عشر مساءا لان عرض الشركة للحصول علي احد المشروعات كان لازم يخلص ويروح للجهة المالكة للمشروع قبل الساعة اتناشر ظهر الاربعاء وعلشان كدة اتصلت بابن عمي واستئذنته اني مش هاقدر اروح المستشفي واني معاه من صباح الاربعاء
وبالفعل يوم الاربعاء الصبح كنت في المستشفي وفضلت لغاية الساعة حداشر ومقدرتش اسافر احضر الدفن علشان كنت لازم اروح اقدم عرض الشركة وفعلا استئذنت من عمي ورحت الشركة
وبعدين علي الساعة سابعة مساءا تركت الشركة وروحت علشان احضر العزا وفضلت للساعة اتناشر بالليل لغاية ما المعزين مشيوا ونمت وكنت الصبح الساعة تسعة في مكتبي والساعة ستة مساءا نزلت علشان عندي مقابلة مع حد من العملا في مدينة نصر ورحتله وفضلت في المقابلة لغاية الساعة اتناشر مساءا
واثناء الست ساعات دول كنت بمني نفسي واصبرها اني اول ما هاخلص المقابلة
هاروح وهاخد دش سخن واتعشي عشا سخن وانام براحتي لان بكرة الجمعة
وبعدين خلصت المقابلة ونزلت وانا فرحان جدا اني هاروح ولاحظت حاجة مش جديدة ان كل الناس مروحة يعني كل الناس ماشية في اتجاه واحدوانا بالطبع كنت ماشي معاهم بس للاسف انا كنت غلطان لاني نسيت اني مش زيهم ايوة انا مصري ومولود علي الارض دية بس انا من الاخوان ومادام ان من الاخوان يبقي معناه اني مش هاعيش زي باقي الناس كل الناس من حقها تروح وتنام بعمق بعد ما تاكل عشا سخن واللي قبله هاتكون خدت دش سخن وكمان نسيت اني عايش في مصر المحبوسة ونسيت اني عايش في عهد المستبد مبارك ونسيت ان مصر بقت عزبة بتتورث ونسيت ان في عصابة من الخطافين والقتالين والمجرمين اسمهم جهاز امن الدولة ونسيت ونسيت ونسيت لغاية لما رن تليفوني وللاسف فكرني وكان مضمون المكالمة
مجدي ما تروحش لان الدكتور محمد عبد العال والدكتور سالم اتقبض عليهم وعبد المنعم مطارد
وتوالت بعدها التليفونات من محمد غزلان وبعدين اختي المتزوجة وبعدين اختي اللي مش متزوجة وبعدين اسلام لطفي وبعدين احمد وبعدين وبعدين .....الخ الخ الخ
وراح حلم الدش السخن والعشا السخن والنوم العميق
ودلوقتي برضه انا قاعد في حتة غير البيت لغاية لما نشوف اخرتها ايه
عارفين يا جماعة كام واحد فقد احساسه بالامان من الاخوان مع حالات الاختطاف اللي بيقوم بيها جهاز فزع الدولة مع الناشطين منا كتير بجد كتير
يعني دلوقتي هتلاقوا اسلام لطفي اكيد برة البيت وكذلك محمد غزلان ومصطفي واسلام واحمد وشباب كتير اصبحت المسألة معاهم مسألة وقت مش اكتر يعني كدة كدة هايتقبض علينا بس هي ادوار واوقات يعني القصاص الاول ومنعم دلوقتي وهكذا
انتوا عارفين يا جماعة اسر الناس دية خدت علي الموضوع ده يعني عندنا في البيت بقي طبيعي جدا اول ما يجيلهم التليفون يأكدوا علي تفتيش البيت واخلائه من اي ورق خاص بيا او اختي لانها من الاخوان برضه ويشيلوا اي دفتر لتسجيل نمر التليفونات ويلبسوا عباياتهم واشارباتهم ويقعدوا منتظرين فزع الدولة ييجي

ومثلا عند محمد غزلان نفس الامر وبجد ربنا يكون في عون امه يعني اخوها"المهندس خيرت الشاطر " وزوجها"الدكتور محمود غزلان " في السجن وابنها مطارد
مع السلامة يا منعم

بص يا منعم انا ممكن اختلف معاك وممكن ازعل معاك لكن معنديش اي مشكلة افديك بروحي من اي ظلم يقع عليك وخاصة اذا كان السبب هو دفاعك عن فكرتك وسعيك الدائم لنشرها
علي فكرة يا جماعة منعم لسة خارج من القضية اللي كنا فيها مع بعض من ست شهور وكنت لسة معاه قريب وكا بيحكيلي همه ورغبته في السفر وسعيه لتحقيق نفسه كصحفي
وعلي فكرة منعم ده عامل زي النحلة ولسة فاكر يوم ما كنا مع بعض في حديقة الازهر للمساعدة في تنفيذ اليوم الترفيهي لابناء المحالين للمحاكم العسكرية وكان هايتقبض عليه في اخر اليوم بس ربنا ستر
وعلي فكرة منعم في القضية اللي فاتت سلم نفسه بعد القاء القبض علي كل من في القضية ومن الواضح انه هايسلم نفسه برضه المرة دي كمان ربنا يكون في عونك يا منعم
يا جماعة بجد ادعوا لوالد منعم لانه في الحبسة اللي فاتت كان تعبان جدا واخ حاجة عرفتها ان حالته الصحية متدهورة جدا وربنا يعينه علي ما يلاقيه ابنه
منعم مش قادر اقولك غير ربنا يتقبل منك وابقي افتكر يا صاحبي عنوان مدونتي " يللا مش مهم" مهما حصل فمش مهم مهما اعتقلونا فمش مهم مهما قمعونا فمش مهم
المهم هو ان نفسيتنا تبقي عالية اعلي من اسوار سجونهم وان قلوبنا عزيمتنا تبقي صلبة اصلب من حديد قيودهم وان ايمانا يبقي راسخ ارسخ من حيطان زنازينهم صدقني هو ده المهم

بص يا صاحبي انا مش عاوز اهزر لان الموقف ميستحملش بس انا حاسس ان دعوتك برؤية حبيبك القصاص ربنا استجبهالك وهاتروحولوه وابقي سلملي عليه قوي واذا اسمي مجاش في المرة دي هاجي ازوركم الاسبوع الجاي ان شاء الله
وربنا يجعله في ميزان حسناتك

انا بجد ما كنتش عاوز ابات برة البيت لان خلاص ما بقيتش تفرق بس الحاجة الوحيدة اللي خلتني اخد القرار ده ان اللاب توب بتاع الشغل معايا ومش معقولة اروح بيه علشان ييجوا ياخدوه ويدخلوه في احراز القضية وما يرجعش تاني وكذلك لان معايا ورق مهم جدا يخص الشغل وبرضه لازم اسلمه لحد من الشركة وعليه فانا قلت ابات برة واسلم الحاجة دية لاصحابها واللي يحصل بعد كدة يحصل
وسلام بقي علشان ادورلي علي اي كرسي انام عليه
بس قبل ما اقوم ادور علي كرسي انام عليه في حاجتين لازم اعملهم
الاول سؤال هو يا تري هاييجي يوم نقدر نحقق حلم الدش السخن والعشا السخن والنوم العميق ونروح بيوتنا
والتاني تهنئة واجبة لازم اقدمها لجمال مبارك "الف مبروك يا جمال علي جوازك من خديجة وابقي افتكر لما تروح وتاخد دش سخن وتاكل عشا سخن وتنام نوم عميق ان في كتير مش قادرين يحققوا الحلم ده"

ويللا في داهية

هناك ٣٢ تعليقًا:

غير معرف يقول...

مجدي
سلامو عليكو
قد إيه إحنا بالفعل عايشين واقع مأساوي
أول ما وليد بلغني خبر الدكتور محمد عبد العال ونقلي توقعه إن الموضوع ممكن يكبر بالليل وبعدين إتصال الكواكبي بيا علشان يبلغني خبر مداهمة بيت منعم في إسكندرية وأنا حاسس بضيق نفسي مش قادر أوصفه ..
مراتي لقتني سهمت مرة واحدة قعدت ألف وأدور عليها علشان متوقعنيش من لساني وأقولها إنهم راحوا لمنعم فقلقها اللي لم يتوقف من أكثر من 4 شهور يزيد ..
عارف أكتر حاجة بكون حريص عليها لما بسمع بخبر اعتقال جديد
مش إني اخبي واخفي الورق واللاب توب والحاجات دي لا ..
أكتر حاجة إني أحاول أخلي مصطفي ينام ويدخل سريره قبل ماأمن الدولة يحضروا..
مصطفي بيسهر تقريباً لحد الفجر وده لأني مش بنام غير بعد الفجر .. ارتباطه بيا كبير ..
كل حلمي إني لما يتقبض عليا ميكونش مصطفي صاحي ..من بعد آخر مرة جولي فيها وهو مش بيستحمل صوت جرس الباب .. مجرد ضرب الجرس يجعله يجري من مكانه في إتجاهي أو في إتجاه أمه ويقعد يقول بصوت عالي مين يا ماما مين ؟ مين يابابا ؟
بحس والله بكل معني الخوف متجسد قدامي علي وشه بحس بمعني الفزع مرسوم علي ملامحه

وفعلاً كانت طريقة ضغطهم علي جرس باب الشقة بشكل متصل - وخصوصاً إن صوت الجرس كان عندي عالي جداً وحاد - صعبة ومفزعة وبعد ما كسروا باب الشقة كان الأمر أشد

أنا مصدقت إني غيرت صوت الجرس وغيرت الشقه كلها علشان الولد يهدي ويزول من عنده الموقف المؤلم ده

يارب لو اتمسكت يكون مصطفي نايم وميحسش
ياه قد إيه أحلامنا بقت غريبة
عيل نايم
ودش سخن
ونوم عميق
يااااااااااااه
اللهم اجعل ذلك كله في الميزان
أحمد

عبدالمنعم محمود يقول...

مجدي قد تكون مدونتك اخر ما اتعامل معه علي الانرنت
فنا لن استطيع ان يداهم بيت ابي هذا الكم الذي دخله لاعتقالي فوالدي الذي يعاني من مرض الموت حاليا وليس معه غير والدتي
اقتحمت عليم البيت كتيبة من القوات الخاصة لتعتقلني
وتعاملوا معاملة لا انسانية مع والدتي لاجبارها علي ان تعطيهم رقم جوالي او يعرفوا مكاني
اعتقد اني ساسلم نفسي مثل المرة السابقة يا صديقي
لكن هذا وصيتي انا السجين المنظر
ان تدعوا علي نظام مبارك الفاسد المستبد
واقسم عليكم بالله ان تدعوا لابي الذي قد لا استطيع أن اراه
حتي وقد لا استطيع ان اذهب لاسلم عليه فقط
ادعوا علي الظالمين المفسدين
الذين يغتالون هذا الوطن فينا

غير معرف يقول...

لا يا منعم لا تسلم نفسك
ليس من حقك
أمك وأبوك ينتقلوا من بيتهم
إلي جوارك بعيداً عن هؤلاء السفلة المجرمون
وجودك بالخارج سيكون شوكة في حلوقهم
دعها تؤلمهم
دعها تشعرهم بجرمهم
دعها تشعرهم بعجزهم
هم والله إلي زوال
إنهم فاسدون
فجره
إنهم لصوص
داعرون
ملعونون
إياك أن تسلم نفسك إليهم بهذه السهولة
إنت في غابة اللاقانون
فلا تذهب إلي سفلة نيابة أمن الدولة برجليك
لا تذهب إلي محمد الفيصل والغراب وسامح سيف وهاني حموده وعبد الخالق عابد ومحمد عادل و خالد الشلقامي
فكلهم نعال في أحذية كلاب لاظوغلي الجبناء

منعم .. إنما النصر صبر ساعة
فاصبر
والصبح رغم أنوف الكلاب قريب
أحمد

همسة قلم يقول...

حسبنا الله ونعم الوكيل
حسبنا الله ونعم الوكيل
حسبنا الله ونعم الوكيل

غير معرف يقول...

اللهم احفظ مجدي ومنعم واسلام وغزلان واخوانهم
اللهم ثبتهم واعنهم واحفظ وعافي اهلهم وثبتهم يارب يارب
يارب انصر بيهم الاسلام واعز بيهم المسلمين يارب تقبل دعائم واجعلهم مستجابي الدعوة يارب صبرهم يارب صبرهم (اللهم انت ربي لا اله الا انت عليك توكلت وانت رب العرش العظيم ماشاء الله كان وما لم يشأ لم يكن ولا حول ولا قوة الا بالله العلي العظيم اعلم ان الله على كل شيئ قدير وان الله قد احاط بكل شيئ علما اللهم اني اعوذ بك من شر نفسي ومن شر كل دابة انت اخذ بناصيتها ان ربي على صراط مستقيم)
يارب طمنا عليهم يارب

يلا مش مهم يقول...

منعم انا بحاول اتصل بيك بس تليفونك مقفول ممكن لو هاتسلم نفسك اشوفك قبلها في اي مكان حتي ولو قدام النيابة
مستني اتصالك وفرجه قريب

غير معرف يقول...

what I find really weird in this situation is that you(el gama3a) do nothing about it you keep just complaining about it without taking any kind of actin ...I mean we did not hear your voice in the last constitutional ammandements..

غير معرف يقول...

حسبنا الله ونعم الوكيل
الواحد مش عارف يقول إيه ولا عارف يوصف الإحساس اللي جواه
إحساس غريب

محدش عارف مين مننا حر ومين مسجون
ومحدش عارف بكره هايكون فين

هوه احنا مش مصريين
ولا احنا مش بنيآدميين أصلا

ولا إيه
حد يفهمني

غير معرف يقول...

سلامي ليك يا منعم
وربنا يوفقك لما فيه الخير

AbdElRaHmaN Ayyash يقول...

هتخرج يا عبد المنعم ان شاء الله
يا استاذ مجدي .. بلغ منعم منا السلام
قل له
كلنا اخوان

غير معرف يقول...

وفي القاهرة اعتقلت قوات أمن الدولة عبد المنعم محمود ـ المدير الإداري لمركز حوار ـ صباح اليوم الجمعة، حيث قامت قوات الأمن بمداهمة مسكنه بعد فجر اليوم ولم تجده وظلت في مطارته حتي ألقي القبض عليه.



على جانب آخر جدَّدت النيابة العسكرية أمس الخميس حبْس الدكتور محمد علي بشر، والدكتور خالد عودة، والدكتور عبد الرحمن سعودي، والمهندس مدحت حداد، والدكتور أسامة شربي 15 يومًا على ذمة التحقيقات.




http://www.ikhwanonline.org/Article.asp?ID=27642&LevelID=2&SectionID=0



حسبنا الله ونعم الوكيل ..........اللهم عليك بالظالمين

sharkawoo يقول...

قد لا يجد الإنسان شئء يعبر به عن تلك الغصاصة التي في قلبه نحو هؤلاء الظلمة ...


لك الله يا أستاذ عبدالمنعم ...

وأرجعلك لنا سالماً غانماً....

غير معرف يقول...
أزال المؤلف هذا التعليق.
الكواكبي يقول...

امبارح كنت انا ومنعم مجتمعين مع وفد منظمة العفو الدولية بنحاول نوصل لهم كم الضغط اللي احنا فيه
انا كنت باتكلم بلهجة قانونية جافة وباردة فهذه طبيعة القانون انه لا يعرف العاطفة ولكن على الجانب الاخر حاول منعم ان يوصل لهم معاناتنا الانسانية واشهد ان الكلمات لم تسعفه وان كلماته خرجت من حلقه بغصة ولكن وبياللسخرية بدأ وفد العفو الدولية ينتبه لخطورة ما يحاول عبدالمنعم ايصاله لهم عندما قال ان كل امله عندما يقبض على الاخوان ان يحاكموا امام محكمة امن الدولة
لقد سادت حالة من الوجوم على اعضاء الوفد . . الهذا الحد انحطت احلامنا!! الهذا الحد نجح الطاغية مبارك وكلابه في تقزيم آمالنا واحلامنا!
نعم تضائلت احلامنا في طفل نائم ومحكمة ظالمة ودش دافيء . . ولكنهم لن ينجحوا في ان ننسى حلمنا الكبير في ان نرفع هذا النظام القذر من فوق صدر مصر
والله لو ساومونا على ارواحنا على ان نهادنهم ونقرهم على ظلمهم لن نفعل
صبراً شباب وبنات ورجال ونساء الإخوان ان موعدنا مصر وبعدها فإن موعدنا الجنة بإذن الله
لن يسلم عبدالمنعم نفسه لجلاديه وان فكر في هذا يجب ان نمنعه
لن نقدم انفسنا لجلادينا قرابين على اطباق من ذهب

غير معرف يقول...

لم أصدق نفسى وأنا أقرأ الخبر فعبدالمنعم بعد هذا الظهور أصبح حلم كل من يريد لمصر الحريه
هو الصوت الإعلامى القوى ..والفكر الإبداعى الفاعل
فقد إستطاع أن يزرع فى ثقافه الإخوان ثقافه المواطن الصحفى
هو لم يضعها فى مناهجنا التربويه ولم يقيم لنا ورش العمل فى أسرنا الإخوانيه لكنه إستطاع أن يضرب مثالاً ناجحاً ..وأخاً مقتنعاً بما يفعل
فتأثره به الكثير ولعلنا جميعاً منهم

عبدالمنعم
سامحنى على أخر مكالمه
قد نكون إختلفنا فى الرأى ولكننا أبداً لم نختلف فى الحب والقلوب
نعم أنت أستاذى قبل كل شئ
عبدالمنعم ..سأفتقدك كثيراً طوال فتره الغياب وعسى أن تكون قصيره
عبدالمنعم سأزور والدك فور أن أنهى إمتحاناتى أخر الأسبوع ..أعدك بذلك
عبدالمنعم ..سأتى لزيارك وتلبيه دعوتك فور إنتهائى من مشروع التخرج لأقضى معك ومع العريان الساعات الطويله
علشان تنظف لى مخى من الصدى والزباله على رأيك
عبدالمنعم ...لا تحزن فوالدك معه الله ..هو الذى يساعده ويحميه ويدبر له ويشفيه إن شاء الله
عبدالمنعم ..أستمتع بقضاء هذه المرحله مع القصاص ..قوله إنى نفسى أقابله علشان أتعرف على هذا الصدر الكبير الذى وسع إخوان القاهره والجيزه وضواحيها
عبدالمنعم ...أنت روح تسري في جسد هذه الأمة....أنت القادم بقوة على طريق الدعوة.....أنت من يحمل على كتفه كفنا لدفن الظلم
عبدالمنعم ...أنت مصداق قول الله تعالى .."من المؤمنين رجال صدقوا ماعاهدوا الله عليه فمنهم من ينتظر ومابدلواتبديلاً"
أحسبك كذلك ..ودعائى لك أن يخفف الله عنك
ويثبتك ويؤيدك أنت وإخوانك
سلام يامنعم

غير معرف يقول...

عبدالمنعم حتى هذه اللحظه هارب من الظالم والجلاد ...لكن هل يستطيعون أن يمسكوه ..ان يسكتوه ...ان يمنعوه عن علاج والده المريض
أيها النظام الظالم ...لمره واحده ..كن إنسان


سؤال وحد يرد على هو حتى الأن لم يتم القبض عليه
صح ولا أنا غلطاااااااان؟؟؟!!!أفيدونـا

يلا مش مهم يقول...

عبدالمنعم مازال طليقا وحتي الان قراره عدم تسليم نفسه
ربنا يحفظه

About Me يقول...

دي بقت مافيا

غير معرف يقول...

السلام عليكم
استاذ مجدي ربنا يحفظك
انا عرفت خبر اعتقال عبد المنعم الساعة 5 يوم الجمعة اول ما عرفت خوفت جدا علي حضرتك و كلمت اخوك ابو ياسين اطمن منه عليك قالي تمام لسه بره فرحت انك لسه بره و ان بستطاعتك تاخد دش سخن بس ممكن ماتلحقش تتعشي عشا سخن
بس والله انا في حالة من القرف و زهق الله ينتقم منهم
وحسبنا الله ونعم الوكيل
واخرتها ايييييييييه
بجد الواحد فقد اي دافع للانتاج او الابداع في البلد دي حسبنل الله ونعم الوكيل
لك الله يامنعم
لك الله يا والد منعم
لك الله يامصر

مشروع انسان يقول...

فيه فيديو جديد لعبد المنعم بعد اقتحام منزله
منشور بمدونتى ومدونة عبد المنعم ومدونة انسى لو فيه جديد ابقوا قولولنا

أحمد سعيد بسيوني يقول...

بسم الله
الذين اذا اصابتهم مصيبة قالوا انا لله وانا اليه راجعون

حسبنا الله ونعم الوكيل

هكذا دائما يكون ثمن الحرية

يقول احدهم

من استغنى عن الحرية بالامن فقدهما معا

اللهم ارزقنا الحرية والامن

وافرج عن جميع الاحرار والشرفاء

ياااا رب

البحر
www.ana-elbahr.blogspot.com

غير معرف يقول...

السلام عليكم يا مجدى أنا اسلام أنا لسه جاى من عند أبو عبد المنعم على فكرة هو تعبان قوى ياريت ياجماعة تدعو له وربنا معاك ياعبد المنعم

غير معرف يقول...

السلام عليكم اخي مجدي ربنا يحفظكم كلكم من هؤلاء الفجرة ويحفظ كل شباب الاخوان ويصبر اهليهم ولي رجاء خلوا بالكم من نفسكملا يعني كلامي انكم ما تشتغلوش علشان انا عارفة لئن لجتمعت الانس والجن علي ان يضروك بشئ لم يضروك الا بشئ قد كتبه الله عليك رفعت الاقلام وجفت الصحف بس الرسول علمنا نرضه اننا ناخذ بالاسباب ولا تنسوا ان تججدوا النية وان يجعل الله هذا في ميزان حسناتكم وان الله لا يجمع لعبد امنين او خوفين من امن في النيا خوفه اله يوم القيامة ومن خاف في الدنيا امنه الله يوم القيامة فهذه بشارة الجنة ان شاء الله يجمعنا واياكم في الفردوس الاعلي ان شاء الله وادعو الله ان يزيح عنكم الهم قريبا ان شاء الله وتاخذ دش ساخن وتنام كويس يا استاذ مجدي واني اعتقد ان هذا الدش لا تستطيع ان تشعر بجماله الا في الجنة ان شاء الله

غير معرف يقول...

عبدالمنعم محمود يظهر على قناة الحوار ضمن برنامج ولمده خمسة دقائق تقريباً
يحكى فيه محنته ويتهم فيها النظام بالسعى لإرهابالجميع
وتهديد كلم يحاول إظهار حق المظلومين فىمصر سواء من يفضح التعذيب أو يفضح المحاكمات العسكريه
وقال: ...المواطن المصرى منتهك فى كل مكان بداية من حريته الشخصيه وحتى غرفه نومه
فى نهايه مكالمته أكد عبدالمنعم أنه لن يهرب وأنه يحترم القانون حتى لو سيقع عليه ظلم ولكنه سيسلم نفسه
وأكد على ووفه بجوار والده حتى اخر لحظه وأكد أخيراً على أنه بالإسكندريهتائهاً فى شوارعها يبحث عن مكان أمن من العسكر

غير معرف يقول...

أسف جداً ..خطأ غير مقصود
عبدالمنعم لم يظهر ولكنعبر الإتصال الهاتفى فقط

nayra esam يقول...

ربنا يصبركم على ما انت فيه من بلاء
فوالله ان العين تدمع والقلب يحزن على مافيه حال مصر اليوم
ولكننا موقنون و متأكدون من ان الله لن ينسانا
وان شاء الله ربنا يبارك لك فى عمر والديك وتراهما فى احسن حال وصحة ان شاء الله ويفرج كربتكم و يزيح همكم
وان شاء الله تعالى ترى والدك سعيد بك فى الدنيا وفى جنات النعيم

نيرة عصام عبد المحسن

m_elmenofy يقول...

انا لله و ان اليه راجعون
حفت الجنة بالمكاره اسأل الله لك و لنا و لجميع اخوة و المعتقلين الثبات

m_elmenofy يقول...

انا جاتلى فكرة ...ممكن او اكيد الاخوان بداو يتحركوا فيها
الفكرة هى "والد عبدالمنعم " الهو الحاج محمود
نقف جانبه و نشوف احتياجاته هو و والدة عبدالمنعم...اى احتياجات
نحسسه ان ابنهم مغلطش و راجل فى زمن عز فيه الرجال
الاخوان فى الاصل بيقفوا جنب اهالى المعتقلين...و ده وقت اننا نحاول نساعد عبدالمنعم فى اى حاجه
و الطريق الوحيد دلوقتى اننا نخدم والده العبدالمنعم قلقان عليه جدا جدا و والدته و نقف جنبهم
ياريت العنوان لو تعرفوا يا مجدى او اى حد يبعته على الايميل عندى و نحاول نعمل اى حاجه
باذن الله هيفرق مع عبدالمنعم و اهله جدا باذن الله تعالى
جزاكم الله خيرا

غير معرف يقول...

لا حولا ولا قوة الا بالله

بجد مش لقيه كلمات توصف اللى انا حاسه دلوقتى ربنا يوفقكم ويحفظكم من كل ظالم

اجابةعلى سؤال الاستاذ مجدى فى اخر البوست

حضرتك ممكن تلاقى دش سخن وعشا سخن ونوم عميق فى الدنيا بس الاحلى انك تلاقيه فى الحنة واحسن منه كمان

أنما هى دار الشقاء

عابرة

وليد يقول...

تدوينة حلوة يا مجدي بتكتبها بإحساسك
وليد السيد

غير معرف يقول...

مجدي يا صاحبي
مش عارف ليه هافه علي الاغنية بتاعتك او بتاعة السجن
هاتفرج هاتفرج باذن الاله
ونخرج وننعم بنور الحياة
يا قاعد لوحد وبوزك طويل
ما ترضى الاهك وعيش في رضاه
.....
المهم .... يلا مش مهم

غير معرف يقول...

مش غريبة دي مفيش ولا واحد من المعلقين الكرام قال ( رحم الله زوجة عمك ) دا إنتو ناس شديدي الغرابة يا بتوع الجماعات الإسلامية ؟!!!!!!!!!!!!!!!