السبت، أبريل ٢١، ٢٠٠٧

مش عارف.....



مش عارف ادون
مش عارف اكتب عن ايه
مش عارف اجمع نفسي
بجد مش عارف
بقالي يومين عاوز ادون وكل ما افتح المدونة اتراجع
فقلت اخد رايكم
اكيد هايخرجني من حالة الشلل التدويني اللي انا فيه
انا كنت مجهز اربع او خمس تدوينات تحت عنوان
"استعنا علي الشقا بالله "
وكانوا كلهم بيحووا مجموعة من مواضيع ورسائل النقد الذاتي سواء علي مستوي سلوكيات افراد الاخوان او حركة الجماعة وارائها تجاه القضايا الساخنة وكنت كل ما اجي ابتدي ارفعهم الاقي ضربة امنية او خبطة حياتية تحصل فاتراجع لعدم ملائمة المناخ لهذا الطرح بس لغاية امتي هانفضل كجماعة وكافراد كدة
وانا مقتنع تمام الاقتناع ان سبب مهم من اسباب مشاكل جماعة الاخوان عدم اتاحة المساحة المناسبة لاجراء فضيلة النقد الذاتي وتفعيل الية لاجراء حوارات تستهدف مراجعة الرؤي الحالية وقياس مدي ملائمتها للواقع الذي نعيشه او المستقبل القريب الذي نستشرفه وذلك لتعرضها الدائم للضربات الامنية الموجعة والغبية تجعلنا ننكفأ علي ذواتنا وكذلك المناخ لا يسمح بطرح قضايا مثيرة للجدل والنقاش والاختلاف مراعاة للظروف التي نمر بها
طيب هل ده الصح ولا لازم نعود نفسنا ونتكيف مع الوضع ده ونمارس حياتنا بشكل سوي ونطرح جميع القضايا ونقاط الاختلاف او النقد ونطور ونعدل ومنخليش النظام ينجح في شل حركتنا وقدرتنا ويحبسنا دايما جوة قمقم المطاردات والمواجهات وخاصة ان احنا في فترة حرجة ومفصلية مرشحين فيها بقوة للصعود السياسي والاجتماعي في السنوات القليلة القادمة وهناك مجموعة من النقاط الساخنة والاليات المستخدمة والعناصر التي ظهرت في البيئة الداخلية والخارجية التي نحتاج الي دراستها وايجاد اشكال جديدة من التعامل معها وعلشان كدة فكرت اني ارفع محموعة التدوينات اللي اتكلمت عنها بس خايف من ان طرحها هايخلي فيه اتفاق واعتراض وجدال وتذمر احيانا وضيق احينان اخري وتربص من متربصي الخارج وصيادي المياه العكرة وما اكثرهم حاليا
ولا اكمل في التدوين عن احاسيسي الشخصية ومشاعري تجاه احداث الحياة المختلفة وده من مميزاته انه بيجمع ما بيفرقش وانه جانب انساني لا يختلف عليه اثنين بس المدونة من اهدافها فضيلة النقد الذاتي ومحاولة ايجاد صيغة توافقية بين الانتماء والحب والخوف للاخوان وكذلك النقد البناء وتقويم الذات وايضا لاحظت ان المدونة في الفترة الاخيرة غرقت في الشأن الشخصي واتلونت بمجموعة من الاحزان والهموم
انا بجد محتار ومش عارف اخد قرار ومتاكد من انكم تقدروا تساعدوني في اتخاذ القرار
مستني تعليقاتكم ومقترحاتكم


ويللا مش مهم

هناك ٢٦ تعليقًا:

None يقول...

انا ممكن اقول
احنا مفروض نمشى بمنطق
ضربوا الاعور على عينه قال مهيا خربانه خربانه


يعنى كده كده فى ضربات امنيه
وفى اعتقالات وتضييق
وهنقعد كده علطول لحد ميجى فرج ربنا
فنقول اللى احنا عايزينه ونتكلم عنم جوه وننقد علشان نبقى اقوى ضد الضربات دى وانا عارف قصدك
ان مكن ناس تستغل الكلام د ه وتزود الدنيا وتشعللها
بس انا من راى الكلام ده يتقال احسن من انه ميتقلش
ولازم نتعود ونعيش حياتنا على كده
وقول على بركه الله

وسلاااااااااام

غير معرف يقول...

أكتب في كل الاتجاهات يا أخ مجدي ولا تحزن فالذئاب تعوي والقافلة تسير وستصل باذن الله عما قريب . أحمد عبد العاطي

محمد يقول...

السلام عليكم

الضرب لا يحتاج لمقالة أو غيره .. الضرب موجود .. حتى لو الإخوان إعتكفوا في منازلهم

خطط ضرب الإخوان موجودة ومجهزة .. وستنفذ .. سواء عارضوا أم لم يعارضوا تكلموا أو سكتوا

أكتب على بركة الله

غير معرف يقول...

أكتب يا أستاذ مجدى

ليه؟؟؟

أولا: لأن زى التعليقات اللى قل كده مذكرت الضربات الأمنية متلاحقة ومستمرة باستمرار حركتنا و انتشارنا..اذا انتظارنا لفترات هدوء نسبى ما هو الا انتظار شكلى لان الهدوء ده غير مستمر وفى اى لحظة يتغير

ثانيا: النقد الذاتى ليس مجرد تعبير داخلى أو توفير جو حر من رأى وراى أخر داخل الجماعة ولكنه وسيلة للتقوى امام تلك الضربات ووسيلة لتعميق الثقة بداخلنا اكثر وأكثر ..والوصول لمواطن القصور

ثالثا:دوما الأسهل هو عدم الاحتكاك ..وأحيانا يكون الأسهل الهجوم القوى..أما الأصعب فهو التوازن بين ان نحتك بمشاكلنا و أن نربت على بعضنا وعلى جماعتنا وقت المحن

اخلص النوايا واكتب وربنا يعين حضرتك ويرزقك الصواب
وأسفة على الاطالة

عبدالرحمن رشوان يقول...

أكيد إنت عارف رأيى كويس يا شيخ مجدى
مستنى حد يتكلم فى القصة دى
ولو انت اتكلمت فيها
أولى وأفضل
وعايز أعرف رأيك فى موضوع د سيد المليجى
عبدالرحمن

محمد رفعت يقول...

يا نهار أبيض ]ا ا/مجحدي بن سعد

والله أنا كنت امبارح لسة بكلم كام أخ كدة فى الحوار ده

وقلتلهم إنى احنا للأسف أقل الناس ننقد نفسنا ونراجع ما نفعل

وقلتلهم انا نفسي أخصص المدونة بتاعتي للموضوع ده بالذات

أنا عارف غنك متعرفنيش أصلا

بس انا عارفك كويس طحن

وعالعموم انا لسة جديد فى عالم التدوين...وهبقى منشكح لو حضرتك شرفتنى فى مدونتى الجديدة

http://matabbat.blogspot.com/

محمود سعيد يقول...

والله يا أستاذ مجدى البوستات العاطفية اللى عند حضرتك فعلاً بتجمع وبتدى فكرة وهى مهمة

بس برضه البوستات اللى حضرتك عاوز تنزلها ديه مهمة جداً برضه

أنا شايف إن اللى يخليك متخافش هو طريقة الطرح أو أسلوب الكلام

يعنى مثلاً الوثيقة اللى عبد الرحمن بيسأل عنها ديه

تدوينة بس طلعت للناس وبينشروها لكن أنا شايف أنها فى حد ذاتها نقد بناء يستحق الدراسة
زى اللى حضرتك هاتكتبه

فلذلك أنا نفسى يطلع كام وثيقة كده ويتنشروا لأنهم فى صالحنا مش ضدنا
أنا حتى مثلاً مش فاهم ليه إخوان أون لاين بيتجاهل الموضوع ده

وتدويناتك يعنى تقدر تقول محدودة فى الوسط التدوينى
مش هتنزل فى الجرايد :-)

غير معرف يقول...

أنا رأيي ببساطه

ياريت لو تدوينه مشاعر وأحاشيش

وبعدها وحده نقد ذاتي

وبينهم تعليق على الضربات الأمنية


بس الله يخليك يكون فتله وسكر بره
ويا سلام لو بعدها نص ضربه كبييير مع شوية سوداني أسواني
يااااه...كده ظبتت

غير معرف يقول...

السلام عليكم ورحمه الله
علي العموم مهما كانت الاحوال إحنا لازم نقف ضد دوك هو ومش مهم نزعل دوك هو مننا ولازم يبعد عن دوك هم اللي بيعارضوا دوك هم ونظام الدوك هو اللي عايز يولي بعديه دوك هواللي ابن دوك هو...لان دوك هم هم اللي رافضين إن دوك هو ياخد مكان دوك هو........ولا إيـــــــــــــة

غير معرف يقول...

اكتب يا باشا عن فضيلة النقد الذاتى الغائبةعن تفكير الإخوان
على فكرة أنا كنت باكتب بحث عن هكذا شئ واسميت البحث " الإخوان المسلمون ... محاولة لنقد الذات والتطوير الداخلى " حاجه كده على قد ما عاشرت وتدرجت فى صفوف الإخوان وما قرأته أيضا لمفكرين إسلاميين كبار
طلبت من الإخوة عندنا إرسال البحث لمكتب الإرشاد بعد الإنتهاء منه

أحد الإخوة أخذ منى جزء من البحث وقرأه وكالعادة المشكلة طلعت فيا أنا مش فى القيادات

" إخواننا اللى فوق عارفين " هكذا يقال لنا وكأن ما فى رأسنا ليس عقلا يفكر ويخطط

اكتب هدانا الله وإياهم
إخواننا اللى فوق عارفين

ASW يقول...

يعمنا اتكلم واقول اللي انت عايزه في الاخر انت بتعبر عن وجهة نظر فرد مش كل الجماعة ..........فاكيد اللي انت هتقوله في ناس حاسة بيه وناس تانيه هترد عليه توضحه ........وفي الاخر كل هيستفيد باذن الله ....ومن الاخر المدونة دي بتاعتك يعني اكتب فيها اللي يريحك واحن بنحب كل اللي بتكتبه......بقولك ايه ماتيجي تحلم معايا

تاسو بيحلم يارجالة
http://e7lmma3aia.blogspot.com/

موسى موسى يقول...

انا رأيى ياأستاذ مجدى ان شىء جميل جدا انك تكتب الانتقادات اللي انت شايفها بشرط انك متكتبش اى انتقادات سياسيه علشان فى غيرك كتير عاملين الواجب وزياده ومحسسنى ان الاخوان سياسه بس.. ولو فى انتقادات اداريه..مفيش مشكله بس قللها شوية .غير كده هتبقى حاجه مفيده جدا ان شاء الله

غير معرف يقول...

mafesh 7aga betestkhaba ,ekteb we mateklaksh ely hayz3al kan hayz3al keda keda wely hayefdal haykon a3kal we akmal we kaman yemken enta nafsak tetghayar ao tet3alem men el rodod
talking and disccusion is all good as long as you want to learn or teach not just prove you know

AbdElRaHmaN Ayyash يقول...

وقع بيان المدونين للتضامن مع عبدالمنعم محمود
شارك بتوقيعك
أنشر البيان في كل مدونة تعرفها
ساهم في حرية المدونين .. وحرية منعم
http://free4monem.blogspot.com/
----------
بص يا سيدي

بالنسبة للنقد الذاتي
أنا فعلا حسيت الموضوع ده
وبدأت عندي في المدونة بحاجات بسيطة
بس طبعا مش هكون زيك يا استاذ مجدي
أنتظر التدوينات
أما بالنسبة لانك مش عارف تجمع نفسك
ف..
استعن على الشقا بالله
سلام يا كبير

إبراهيم الهضيبي يقول...

أخويا وحبيبي مجدي
أعتقد الإجابة واضحة من كل الزوار والمعلقين
أكتب
ولكن أتمنى...فقط أتمنى
أن يحافظ الناس على سعة صدرهم تلك بعد أن يقرأوا التدوينات، فلعل إحدى مشكلاتنا -كما يقول الدكتور عمر عبيد حسنة- هي أننا ندعي تقبلنا للنقد ونقول رحم الله امرء أهدى إلي عيوبي، ثم ما أن نسمع النقد حتى نغضب ونتهم الناقد بالسعي للهدم، بل ونتهمه في أخلاقه وفي نيته
دوس يا عم مجدي، وربنا معاك
النقد الذاتي دا واجب لابد منه

مصري إخواني يقول...

مش عارف ليه ياعم مجدى لحد أمتى
عبده دسوقى
http://abdodsoky1975.maktoobblog.com/

Aml Ghonaim يقول...

جرى اتفاق على أن تكتب ؛؛
ربما الضربات الأمنية ؛ أو اصطياد الآخرين ماتكتبه ليس هو المانع ؛
لكن؛ ربما لانتقبل أن ينقدنا أحد ؛ فما بالك اذا كان هذا النقد من داخلنا ؟!
ولكن ؛ ان انتظرت ؛ ربما سيكتب غير الاخوان؛وهم يملكون الكتابة فى هذا الأمر ؛ وأحيانا تسمع كلماتهم أكثر ؛ وربما ما يكتبونه لن يكون بوضوح رؤيتك ؛
أو شموليتها ؛ أو حتى بسلامة نيتك
لذلك ؛ اخلص النية فى هذا العمل ؛ ولا تخشى الا الله فيه ؛؛؛
وثق فى عون الله لك ....

غير معرف يقول...

متكتبش يا عم مجدى الناس اليبيعلقوا بيرموك من فوق المقطم ومحدش حتى هيمشى فى جنازتك نصيحه مخلصه

غير معرف يقول...

write and give an example to people how within el IKwan their are people who think ,analyze and can help them selves and their organization to develop

talk and be heard ,its needed

السكندرى يقول...

سير على بركة الله يابن سعد
بس فى نصيحة
حاول دايما يبقى فى توازن بين النقد الذاتى وذكر المميزات

حتى لا تعطى الفرصة للمهللاتية
والجماعة اللى بيحبوا اللطم اللى ما بيصدقوا يلاقوا جنازة ويشبعوا فيها هوايتهم
ويبقى كدة بنثير جدل حول الجماعة
وإعطاء المبرر للأخرين لإثارة الشبهات حولنا أكتر ماهم بيعملوا ويقولك بص شوف دا الإخوان بنفسهم هما اللى بيقولوا كده

وساعتها مش حنعرف نرد عليهم

غير معرف يقول...

بسم الله الرحمن الرحيم
لازم نكتب بدل ما غيرنا هو اللى يكتب بس

ياريت يبقى فيه شوية نظام يعني تخلص نقطة تتفتح نقطة وهكذا

حتى لو عملت مدونة جديدة لنقد الذات اى حاجه بس بلاش الميه الراكدة ديه

ربنا يسترها عليك

حلم

None يقول...

الحركة الشبابيه لمناهضه الإعتقال – مش هنتاخد


ادخل عندى ضرورى جدا
وسلاااااام

اسماء العريــان يقول...

اظن ان كل الناس قالت الى نفسى اقوله

منتظرين البوست القادم وفيه

استعنا على الشقا بالله

غير معرف يقول...

بيني و بينك يا اخ مجدي انت بتعمل حاجة جديدة اصلا مالهاش سابقة عشان تقدر تحكم او تاخد مشورة
الاوهي نقد الذات على الملأ
سواء كان النقد ده شخصي كأخ من الإخوان
أو نقد لإحداث تتعلق بالإخوان من الداخل
يعني اعتقد اننا اول مرة نقرأ موضوع مثلا زي موضوع نقدك لأحداث الأزهر من الداخل
و اول مرة برضو نقرأ على الملأ كده احاسيس فرد من الإخوان تجاه اسرته الإخوانية او مسئوله او حاجة كده
اللهم بعض التجارب العشوائية في منتديات اخوانية مثل الملتقى
فصعب تاخد مشورة حد في الموضوع ده
لذالك أعتقد ان حضرتك دلوقتي بتجرب لسه و ان شاء الله لما تجربتك تتم على خير ونعرف عواقبها و مكاسبها .. ساعتها مدون ناشئ زي حالاتي ممكن يسأل السؤال بتاع حضرتك ده ويقول يا ناس اكتب ولا ايه .. افيدوني
الشاهد من الموضوع انه معتقدش انه ينفع حد يقولك اكتب بنفس مفتوحة مفيش
مشاكل .. لأننا مانعرفش ..
وفي نفس الوقت حضرتك لو مكتبتش يبقى
تخليت عن التجربة في عزها
لذالك اقول لك اكتب و احتسب
و دع الجيل القادم يتعلم -للأسف او لحسن الحظ - فيك

مشروع انسان يقول...

تعرف خلتنى اخد بالى من حاجة مهمة بجد النقد فعلا لازم يكون ليه وقته ويكون نقد بناء ومع النقد يكون فيه اقتراح لحل مش مجرد نقد وبس لان رضى الناس غاية لا تدرك وعمرك ما هترضى على كل الافعال وغيرك برضه كده بس برضه النقد مهم لانه بيوضح الامور ويطور الاداء بس يا ريت يكون مع النقد اقتراحات للتغيير ولا ايه صحيح
(البروفايل بتاعى فتحته للى يبغى يزورنى ويشرفنى)

الكواكبي يقول...

لولا ان المدونة ملايانة اخوات فضليات وان طنط ام احمد غالية عليا كنت سمعتك ما تكره
ايه يا عم الكآبة دي . . هي ناقصاك وناقصة الغم اللي انت باديء بيه ده؟
وبعدين على رأي عم المجهول اللي قال لك النا سدي بترميك من فوق المقطم من غير Air Bag يا صاحبي . . هما مش هاينقلبوا عليك؛ بس الناس دي قاعدة - لا مؤاخذة - جماهيرية زيهم زيك زيي زينا كلنا, بس ابقى لاقي اللي جاي في وشك من تحليلات وتقييمات
وبعدين عايز تعمل نقد ذاتي ولا تحليل ذاتي؟ لو تحليل ذاتي يتناول السيء والجيد يبقى اتكل على الله
لو نقد يناقش المساويء فأنا باكفيك العناء واحيلك لموقع اخوان اوف لاين العقيم وخصوصاً كتابات الكائن الحي المسمى أنور حامد؛ أو لأحد التصريحات السياسية "العميكة" لأ يدكتور من الدكاترة المتصدرين للعمل السياسي
بص يا عم انت بلاش وجع دماغ
حبة جد شوية
رايي يا مجدي وده نصيحة لله بجد ان في وقت المحنة والاضطهاد التي قد تواجهها اية جماعة بشرية مستضعفة بغض النظر عن مكانها وزمانها ومرجعيتها .. اية مراجعات او نقد علني قد يفسر انه نوع من انواع الخيانة للقضية وطعنة في الظهر
جهز نقدك وظبطه وقدمه للإخوانك وهما هايتصرفوا فيه واكيد ان شاء الله هايحطوه في المكان اللائق بيه جنب باقي الدراسات لحد ما ييجي الوقت المناسب للنظر فيها والعمل على حل ما جاء بها وتقريباً ده هايكون بعد الغزو الفضائي لكوكب الأرض بإذن الله تعالى لأن دي المحنة الوحيدة اللي لسه الإخوان ما جربوهاش وأكيد أكيد ساعتها ممكن يفكروا في موضوع النقد الذاتي ده