الخميس، أغسطس ٠٢، ٢٠٠٧

انا عاوز تاج


هاحكيلكم حكاية مضحكة جدا وهي حكايتي مع التاج

انا بطبيعتي بصمجي تكنولوجيا يعني من الاخر لازم حد ييجي يعمل الحاجة قدامي مرة ومرتين علشان انقشها منه واعملها لوحدي بعد كدة ويشهد علي الكلام ده الجعلي وحافظ لدرجة اني كنت في بعض الاحيان اديهم الباسوورد واليوسرنيم بتاعي علشان يخشوا يعدلوا او يضيفوا او يحذفوا حاجات في المدونة وعلشان كدة هتلاقوا ان دايما التجديد عندي في التدوينات اللي في النص اما جانب المدونة فبخاف اجي عنده تماما علشان مبوظش الدنيا واخربها زي ما عملت قبل كدة وده بينطبق برضه علي الجهاز نفسه يعني لو الجهاز عاوز يتفرمت يبقي لازم اجيب حد يفرمته او يعرفه " بتشديد الراء " وهكذا دائما وابدا طب ده ما له بعنوان التدوينة اني عاوز تاج هاقولكم حالا


جهل بعيد عنكم

في الاول كنت الاقي في التعليقات حد كاتبلي العبارة الشهيرة ليك عندي تاج وخاصة الراجل ده محمد العناني وانا مش فاهم اولا يعني ايه تاج ولما فهمت " خش علي التدوينة دي من عند نجوم الحيرة وهاتعرف اصل كلمة تاج وازاي اتحورت عندنا " كانت المشكلة اني اعرف مكانه فين والراجل بعتهولي علي ايه يمكن يا مجدي علي الميل واروح ادور واقلب الميل ملاقيش حاجة واقول في عقل بالي " ايه العالم المتخلفة دي تقول بعتنا وهما مش عارفين اصلا يستخدموا الميل ولا الانترنت " لغاية لما اكتشف ان العالم مش هي المتخلفة وحفظا لماء وجهي هانتفق ما بينا وبين بعض ان المتخلف هو الميل ماشي يا رجالة وطبعا نتيجة تخلف الميل واخدين بالكم " انا مرديتش علي اي تاج كان بييجيلي والناس اخدت انطباع اني بطنش مش عارفين اني ضحية لتخلف الميل " اتفقنا قبل كدة ان الميل هو المتخلف اعزكم الله " وبناء علي الانطباع ده الزوار الكرام ما بقوش يعرضوا علي فكرة التاج دية خالص لغاية لما كنت باخد لفة تدوينية من يومين ولاقيت كذا مدونة عليهم ردود علي تاجات مختلفة فلاقيت ان الموضوع كويس وشغال وبيعمل حالة من الحوار بتبدا من عند القارئ او الزائر او المدون الصديق علي عكس التدوينة لانها بتنشئ حالة حوار يبدا من عند المدون صاحب المدونة فقلت ياه لو ييجيلي تاج بس علي مين ما خلاص القراء الكرام حرموا وده طبعا زي ما احنا متفقين نتيجة طبيعية جدا " لتخلف الميل اعزكم الله " وبعدين قلت طيب ما اكتب بوست اطلب فيه تاج بس بصراحة خفت واسباب خوفي هي

- استمرار حالة التخلف عند الميل " اعزكم الله "

- او ان في الاخر يتبعت تاج مش جامد يشفي غليلي ويكون اضافة بجد حقيقية

فعلشان كدة انا ليا طلب وهو

فعلا اللي متفاعل معايا يقعد يظبطلي تاج علي حق من االلي اتكتب في تذكرة داوود ويكتب فيه كل الاسئلة اللي تكشف المدون او تفرد لمساحات مش بييجي عندها مثلا

وان شاء الله هارد علي 3 تاجات بس رجاء يكونوا فعلا جامدين ومتنوعين

فكري علي انساني علي ترفيهي علي هرتلة وطلب تاني من حضراتكم

ممكن تبعتولي التاجات دية علي الميل بتاعي


واحب ابشركم بان حالة التخلف اللي كانت عند الميل اتحلت ماشي يا رجالة

مستني تاجاتكم وربنا يقدرني علي اجابتها كلها

ومحدش يكسف وهو بيكتب اسئلة التاج لاني ان شاء الله هارد عليها كلها

وطلب تاني ممكن من السادة المحترمين الكرماء الاتي اسمائهم اتحافي بتاج وذلك لاننا طرفي نقيض واعتقد ان التاج من الممكن ان يكون بداية لحوار مثمر وجاد


واخيرا

يللا مش مهم

هناك ١٢ تعليقًا:

عصفور المدينة يقول...

قبل ما اكمل قراية روح عندي فيه تصنيف اسمه تاجات
حتلاقي تلاتة فيه واحد منهم دبل هدية لك

وبعدين يا راجل انت مين قال ان احنا طرفي نقيض انت ليه مصمم تتخانق معايا
أنا زعلي وحش وإرهابي
:)
تحياتي لك وارجع اقرا من الأول بقة

عصفور المدينة يقول...

آه انت عايزه جاهز أسئلة بس حاضر عينيا حاجهزهم لك كلهم وانا من هنا باحجز المهمة لنفسي
بس احب أقولك إن الأسئلة مهما كانت عادية وتافهة ممكن تبين شخصيتك وتجاوب عليه الإجابات التي تحولها إلى شيء قيم ومفيد
حابدأ حالا في تجهيزهم

عصفور المدينة يقول...

أحب شخص لقلبك في الدنيا؟
انسان مستعد تضحي بحياتك – ركز فى كلمة حياتك – عشانه؟
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
ما هو اسم اجمل كتاب كتبه بشر قراته ومحتفظ به حتي الان؟
اسم كتاب كتبه بشر برضة- انت متعلق بيه وبتقرأه كل فترة؟
اهم جهاز منزلى انت متعلق بيه او بتستخدمه كتير؟
مكان تحس بالراحة عندما تدخله؟
شىء تحس بالراحة النفسية عندما تنظر اليه؟
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
اجمل مدينة زرتها داخل مصر ؟
أجمل مكان طبيعي رأيته داخل مصر ؟
شخصية كارتونية بتحبها
نوع هاتفك المحمول؟
سرعة بروسيسور جهازك؟
حجم ذاكرة –هارد- جهازك؟
المساحة التى تشغلها المواد الاسلامية على جهازك؟
أهم هدف انت واضعه لحياتك الآن؟
مواصفات فتاة الأحلام بالنسبة لك؟
شعورك لما بتسمع كلمة مصر ؟
شعورك لما بتسمع كلام عن اليهود؟
شعورك لما بتشوف ظابط شرطة؟
شعورك لما بتشوف الكناس العجوز فى الطريق؟
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
احساس يراودك فى اشارة مرور مغلقة بسبب مسئول كبير؟

انت مين
مين أكتر ست أشخاص بتحبهم
انت سعيد؟
لو اجتمعت أنا وحسني مبارك في غرفة واحدة
لو معاك مليون و نص جنيه تعمل بيهم ايه
بتحب مصر؟
بتحب البنات؟
انت مسلم؟
ليه؟
تاج 2
مين أكتر شخصية متقدرش تستغنى عنها في حياتك

و ليه؟
ايه أكتر موقف محرج تعرضت ليه
و اتصرفت ازاى
ايه الأمنية اللى بتدعى دايما ربنا انه يحققها ليك
و اتحققت ولا لسة
===========================================================
اسم مدونتك؟

لماذا اخترته ..وماهي نيتك من وراء اختياره؟
هل فكرت في إغلاق مدونتك؟ والسبب؟
صورتك في المدونة ورمزيتها ؟؟

لماذا دخلت عالم التدوين من الاساس؟
جمله قيلت لك فى وصف مدونتك؟
التعليقات بالنسبه لك ,اهميتها؟
احلى بوست كتبته ...ضع اللينك , ثم اذكر لماذا؟
أفضل بوست قرأته؟ وضع لينكه؟
أفضل مدونة قرأتها؟
حد قل أدبه فى التعليق إيه رد فعلك؟
أسوأ مدونة؟
أسوأ بوست أسوأ مدون...............

هيحصل ايه لإيميلك لما تموت ؟؟

اديت الباسوورد لحد قبل كده؟
كانت إيه طبيعة علاقتك بيه؟
اسمك؟
المشهور بيه وسط اصحابك؟

شخصيتك نوعها إيه؟
السفر بالنسبة لك؟
وقت فراغك بتعمل فيه إيه؟
المود بتاعك؟
الاكلة المفضلة؟
الصفات اللي أخدتها من بابا؟
الصفات التي أخدتها من ماما ؟
اكتر ست حاجات بكرهها؟
اكتر ست حاجات بحبها؟
الشغل بالنسبة لك؟
الانترنت بالنسبه لك؟
امرره لمين ؟ وحان وقت التدبيس

belal يقول...

الحمد لله..الواحد لقى مدون زيه ..مالوش في الكمبيوتر
..

إخوانية مصرية يقول...

هههههههه
بضحك ليه اصل حضرتك فكرتني بوحدة اعرفها كويس جدااا
يلا هنقول ايه
العلم نور بردوا
بس الحمد لله الواحد عرف التاج بيكون فين
وربنا يخليلي اخويا الصغير هوة الي بيشرحلك وانا بغش منه علي طول ههههه

غير معرف يقول...

حبيبى مجدى الحقيقه احنى راسى احتراما لهذا الاعتراف واقدر اقولك ان كل الجيل الى دلوقت فى اواخر العشرينات زيك كده ده طبعا ان ماكنش متخصص يعنى لواتكلمنا صراحه احنا اتعرفنا على الكمبيوتر كجهاز فى اواخر التسعينات يعنى زينا زى الجيل اللى هوه 17 او 18 سنه دلوقتى انا بعدى فى الشارع اللى م15سنه كنت بلعب فيه كوره الاقى مافيش مافيش حد فيه وكل العيال من تلات سنين لغاية15 او16 سنه قاعدين على قهاوى النت بصراحه اقدر اقولك كلنا ذلك الرجل حاتم ثابت

ومضات .. أحمد الجعلى يقول...

هوا ايه حكايات التاجات اليومين دول؟!!

ربنا معاك يا استاذ مجدى، كفاية عليك التحفة اللى اكرمك بيها عصفور المدينة، اظن هتقعد تجاوب فيها شهر مثلا وبعدها على طول هتنزل تدوينة بتقول فيها أرجوكم مش عايز تاجات تانى
(:

عمر أفندى و أبووه يقول...

انتا يا بنى ايه اللى خلاك غرزت الغرزة دى مع العالم دى...اهو الراجل رزعك تاجات اللى لسه موش عارفها لحد دلوقتى ...الراجل اللى اسمه عصفور الجنة ده ولا المدينة ...انا اصلا مجاليش طأطااان اقرا الاسئلة ..انتا هتجاوبها امتى و ازاى بقى...على العموم بالتوفيق و اشوفك لاحقا

عصفور المدينة يقول...

:)
والله دي التاجات اللي وصلتني وانا جاوبت عليها والخلق كلها جاوبتها عايزين نشوف شخصية أستاذ مجدي وممكن هو يجزأهم فعلا أحسن كدة افترا برضه

تصدق يا أستاذ عمر أ مدي صعب عليا

مصري إخواني يقول...

ياعم مجدى مش عارف التاج فضحتنا وسط المدونين يادى الكسوف اودى وشى فين طيب لما انت مش عارف التاج لازم تفضح نفسك وتفضحنا ياللا ماهى الفاس وقعت فى الراس
باقول لك اتعلم التاج بسرعة ياخوى وتعالى علمه لى علشان الفضيحة اصلى لا اعرف ما هو التاج........اوك

الوردة الزرقاء يقول...

بسم الله ما شاء علي التعليقات و التاجات ربنا يعينك علي الرد عليها و بعدين حضرتك ما بتزرش المدونة ليه و لا مشغول في الرد علي التاج المهم انا بردوا جايلي تاج و لسه ما جاوبتش عليه

Unknown يقول...

كلام رائع

يا ريت تزور مدونتي و تديني رأيك
عنوانها http://www.umdeema.com

ام ديما